فيه غصة .. وافكر في الطلاق ليل نهار ؟؟

[امراة محطمة]

السلام عليكم ورحمة الله وبركانه ..

انا متابعة جيدة حق ها القسم ,, وما تمنيت في يوم من الايام اكتب هني .. بس بقوللكم سالفتي وانتوا انصحوني شو اسوي..

انا صار لي متزوجة من 10 سنين وعندي 4 اطفال .. تزوجت زواج تقليدي وحياتي كانت مستقرة .. صح تصير مشاكل بس تنتهي على خير ..

زوجي عصبي وايد .. وعنيد .. والي في راسه يسويه .. وكم مرة جكيته يكلم بنات .. المهم .. المشكله الي صايرة الحينه .. انه ..

ينام في غرفة وانا في غرفة .. وها الموضوع صار له سنه تقريبا .. في البيت القديم كان جي .. بس على الاقل كان دور واحد .. والغرف مقابله بعض ..

بس في البيت اليديد .. ينام تحت في غرفة المكتب وعلى الكنب .. تصدقون عاد ..

والله ساعات تمر عليه ليالي ابغي احضن حد .. اسولف مع حد .. حد يسمعني .. احس بوحدة شديدة .. واحساس غريب ..

طبعا ما تركت الموضوع .. كلمته بهدوء وقلت له ها يعتبر هجر في الفراش والله ما يقبل بها الفعل .. رد عليه انه اليهال لما ينشون الليل يصيحون ويرقدون على السرير ويزعجوني وانا عندي دوام وانش من وقت ..

قلت له انزين وفي الاجازات ما في دوام ليش ما تنام في الغرفة ,, يرد عليه بنفس الرد .. على فكرة في غرفة ثانية ما فرشها لين الحينه .. وغرف اليهال مفروشه وينامون فيها بس نص الليل ينشون ويبون ينامون معايه .. مع العلم انش وارقدهم في غرفهم .. بس هو ما يبي ازعاج ..

الحينه طالع لي بسالفة يديدة .. يبات في الدوام لانهم يعطونهم سكن .. وها السنين كلها ما كان يبات هناك .. ولما سالته قال لي ترا حر وايد ودربي طويل وابات في الدوام ابرك لي ..

افكر وايد انفصل عنه .. صرنا كل في واد .. انا مع اليهال وهو مع نفسه .. وطبعا شكيت انه ماخذ عليه حرمه ثانية .. وقالي هيه ماخذ عليج حرمة .. وبعدين قالي لا امزح معاج ويلس يتطنز عليه واتصل في امي وقاللها خبري بنتج تطلع ها الاوهام من مخها ..

يا جماعة الخير احس اني منفصله عنه بس مب بشكل رسمي .. شو اسوي ؟؟ شوروا علي؟؟؟ ترا نصايحكم راح تهمني ..​

 

[-:مسك:-]

انا اقول شيلي فكرة الطلاق من راسك..مافي شي مستاهل تحملي عالاقل عشان اطفالك اللي مالهم ذنب ..

لاتستسهلون بالطلاق يا جماعة الخير.. تراه ابغض الحلال عند الله .. وبعدين فيه حديث بما معناه ان الحرمه اللي تطلب الطلاق من زوجها من دون سبب قوي ما تشم ريحة الجنه .. اعوذ بالله

ويا حبيبتي صدقيني مرده بيرجع لك .. بس يمكن ضغوطات الحياة والعمل متعبته

ادعي له .. وربي ما يخيب رجاك ..

الله يسخره لك ويرده لك ردا جميلا ويقر عيونك باللي تتمنينه

 

[امراة محطمة]

تسلمين اختي مسك .. على النصيحة .. والله انا ما ودي ,..

بس طال الانتظار .. والله ساعات الشيطان يوسوس .. وانا عندي احاسيس .. لما يباني ايي الغرفة .. والله احس بالاهانه .. يعني انا موجودة عند الطلب بس .. وانا لما ابي حقي الشرعي شو يعني اتريا لما هو يتكرم وايي .. الله ما يرضى بها الافعال .. والله استحي اقول حق حد .. وهو لا حياة لمن تنادي ..​

 

[عيون المي]

يعني زوجك ميعطيك حقك الشرعي خلال هالمده يمكن معه ضعف او انتي تغيرتي عليه بعد الولاده او يمكن محسودين او يكون مدمن العاده السريه لاسمح الله

 

[جروحي بصمت]

الله يعينك ويفرج كربتك

 

[امراة محطمة]

اختي عيون المي .. بالنسبة للحق الشرعي لما يبي يطلع الغرفة يمكن مرة بالشهر .. بالنسبة للحسد ما ادري والله .. حتى العادة السرية ما ادري .. لانه الكمبيوتر في غرفة المكتب .. ولما ينام يقفل الباب بالمفتاح .. بس احسه يجوف الكمبيوتر ,,

اختي جروحي بصمت .. امين يا رب .. والله ادعي ليل نهار .. والله يتقبل ..​

 

[ّصراحتي راحتيّّ]

الله يكتبلك اللي فيه الخير​

 

[امراة محطمة]

صراحتي راحتي .. تسلمين اختي .. والله انا في هم لا يعلمه الا الله .. يمكن الكلام ما يشرح الي يدور في صدري .. بس الله المستعان ..​

 

[قطـــــريه]

اختي المعروف ان الزوج لمن يطلع من غرفته وينام بغرفه ثانية معناته ابحثي عن مرأة أخرى بحياته .. بس انتي غلطتي علمتي عيالج يقومون ويجون الغرفة وانتوا نايمين ! مايصير اختي وماينلام صراحة .. المفروض الباب يتسكر عليكم ومحد يدخل وانتوا بالحجرة .. انا من رايي تحلين موضوع عيالج اول .. وبعدين تحاولين تجذبينه للغرفة مره ثانية ..

 

[flash]

اختي ..ليش ما ترتبين امورك وامور عيالك اولا اذا جوك عيالك بالليل رجعيهم لفرشهم بنفس الوقت ولا تعطينهم وجه .. وازعلي على اللي يجيك بالليل وامدحي اللي مايجيك بالليل لا تتهاونين في هالشيء ..

ثم بعد هالخطوه اذهبي للغرفه اللي هو فيها ونامي معه اذا قال اذهبي لفراشك ارفضي وقولي اخاف تجيني وحشه ..

لا تتركينه الا اذا جاء معك في غرفتك وبالنسبه للعيال اذا جو بالليل قولي له مافيها شيء هذولا عيالنا ..وانشاء الله يكبرون ويفهمون ..لازم تضحي

وبعدين شغلة انه ينام عند تلفزيون او كمبيوتر ما تريح !!!

انتبهي لزوجك وحافظي عليه

 

[امراة محطمة]

قطرية .. اعرف معاج حق .. بس عيالي عودتهم يرقدون في غرفهم .. بس نص الليل ينشون وييون ينامون عندي وانا على طول انش واخذهم لغرفهم .. شو اسوي وبعد عندي طفل رضيع ..

لازم يقدر هو بعد .. وانا اشك عنده وحده ثانية .. بس هو من النوع الكتوم والغامض جدا .. ومستحيل يعترف ..​

 

[امراة محطمة]

flash .. والله شو اقولج .. الغرفة الي يرقد فيها .. فيها كرسي واحد الي يرقد عليه .. وساعات لما اجوف الكمبيوتر .. اكتشف يجوف في يوتيوب عن دلع البنات .. وسوالف بنات ..

ترا زوجي عمره 40 سنه ومب صغير ..​

 

[امراة محطمة]

والله يا جماعة الخير .. انا ما ناقصني شي .. على قدر من الجمال .. والاخلاق والحمد لله محبوبه من الجميع ..

بس دايما هو ينتقدني .. والله احس فيه صيحة .. ليش .. التعذيب .. فيه صيحه .. وانا من النوع الصبور ..
بس لين متى؟؟؟​

 

[جرح الشوق]

انا اتوقع ان فيه وحده ثانيه بحياته حاولي ترتبي امور عيالك واهتمي ف نفسك اكثر اتزيني واتكشخي حاولي تكسبي زوجك وترجعيه للغرفه الزوجيه ولحقي ع طيرك قبل لا يلفي ع غيرك ترا هفه عمر 40 صعبه
والله يهديه ويصلح باله

 

[امراة محطمة]

جرح الشوق .. والله معاج حق .. بس كيف ارجعه غرفة النوم؟

حتى اختي مرة قالتلي ترا في سن 40 الرياييل يردون مراهقين ؟؟؟؟؟​

 

[بلسم الشافي]

حبيبتي ---------------

أعذريني عزيزيتي -----بس بأرد ع الخاص -----ممكن لأني نفس حالتك ----بأختلاف
أن هجر زوجي لي ----وهو معي في غرفة ---نومي؟؟فمن تجربتي ----ممكن تستفيدي؟؟؟
والله يسخره لك ---ويسعدكم

 

[Gizlan]

عزيزتي
هذا ريلج وابو عيالج .. لا تتنازلين عنه مهما صار...
حبيبتي ..انتي لازم تعتبرين هالمشكلة معركتج وتنتصرين وتيببينه صوبج لج ولأولادج..حلالكم ولكم وبس..
وترا هو صدج اذا تعود الريّال ّعلى مرأة صعب يعيش بدونها.. لكن الحين لازم تخلين بالج طوييييييل وصدرج وسييييييع عشان نحل هالمشكلة .. الطلاق انهزام .. لا تفكرين فيه ابد ..
هالمنتدى وايد ينفعج .. انا وايد ساعدني .. فحاولي تستفيدين منه ع قد ما تقدرين..
اول شي لازم تحددين وتعرفين شخصية ريلج وتفهمينها عشان تسويين الأشياء الصح معاه ..شوفي بوصلة الشخصية يمكن هو من النوع اللي يفيد معاه مثلا الأغراء من بعيد لبعيد .... الخ.. المهم حددي الشخصية عشان تعرفين تزهبين الخطة الصح..
ثانيا لازم تكونيين ملكة جمال في بيتج .. حتى لما يشوفج ما يصدق انج نفس الأنسانة اللي ودرها في غرفة بروحها .. حبي نفسج موت .. عشان تشعين ثقة .. ولا تزعلين وتكتئبيين عشان هجره ترا ببين عليج .. صبري ان الله مع الصابرين .. والله ان النعم اللي عندنا من الله لو نعدها ما نحصيها .. في ناس ما يرومون ينامون من الألم .. في المستشفيات .. صدقيني نعم الله علينا من .. صحة .. وعيال .. وخير وووو وايد ..وايد ولازم نفرح بها في كل ثانية .. والمؤمن مبتلى يا عزيزيتي .. فثقي بالله يكن معج باذنه ارحم الراحمين..
ثالثا اعيدي ترتيب بيتج واولادج .. حلو انه قالج ان جية الأولاد بالليل مضايقته .. هذا الموضوع من الأولويات تصلحينه .. ما ريد اقولج شلون .. هذا بيتج وهم اولادج وانت ادرى باحسن طريقة .. وتقدرين انشالله .. اهم شي انج تسوينه بسرعة ..خلي بيتج مملكتج .. ورتبيه .. والأشياء اللي ما يحبها تخلصي منها .. حسسيسه ان ملك .. وهذي مملكته .. عشان يحب برجع لها ..
حبيبتي امر الله بالهون .. تسلحي بالصبر .. والايمان .. ولا تياسين من ربج ابد.. والطلاق انسيه
واهم شي والخطوة قبل الأولى عليج بالدعاء الصادق .. عليج بالقرب من الله .. ومن يتق الله فهو حسبه ..اقراي موضوع "مستغربة" في المنتدى .. فيه ادعية عجيبة انا وايد فادتني .. جزاها الله واصحاب هالمنتدى الف خير ..
عزيزتي .. من اليوم انت امرأة جديدة .. وانشالله امورج كلها بتتحسن..
جربي وانشالله تكون السعادة بين ايديج قريب ..

دعاء له مفعول جميل : ادعي في السجود وفي كل حين والأفضل # مرات كل مرة "يا حي ياقيوم يارحمن ياودد انزل محبتي في قلبه"
وعليج بسورة المزمل 3 مرات .. اما البقرة فسورة عجيبة انا شخصيا الله من علي برحمته وبها ووايد نفعتني ..
اختي مثل ما قلت .. كوني مع الله يكون معج .. ومن يتق الله يجعل له مخرجا .. ولا تنسيني بالدعاء ..
طمنينا عليج اول باول .. ودمتي بحفظ الله

 

[امراة محطمة]

بلسم الشافي .. راح اكون في انتظارج ..

Gizlan .. والله كلامج ما شاء الله رهيب .. والله دمعت عيني .. وان شاء الله اسوي الي تقولين عليه .. تعدلت حقه في البيت يقول منو قاص عليج .. لبست له كل شي .. يقول مب عايبني ويقول انتي ما تعرفين انا شو ابى ..

والله ثم والله .. ساعات يقول لي انتي ما اعرف كيف مستحمتلني .. حتى اخوانه قالولي نفس الكلام ..
بس شو اسوي هو ابو عيالي .. وراح اسوي بنصايحج .. مع اني مسوتنها من قبل ..​

 

[Gizlan]

انتقاد .. وغامض .. وكتوم .. يمكن ريلج شرقي اذن .. بس تاكدي احسن..

وترا رييالينا نفس المشكلة .. عدو الأربعين وبدا لعذاب والمشاكل .. لكن ماعليه .. صبري . .وانشالله فرج قريب .. والله المستعان ..
واحان فب هالمنتدى احلى شي ان كلنا نحاول نساعد بعض .. والأخوات من تجاربهم نتعلم وايد .. والله وياج

 

[Gizlan]

ما عليج من كلامه .. مثل هالنوع بس مخلي قشرة حواليه لأانه يكون وايد حساس ..
حللي شخصيته بسرعه .. عشان نبدا الخطو والشغل .. واذا شمالي ترا يحب المراة الصامتة .. فلا تكثرين الكلام .. احسن عشان يكون عندج وقت للشغل ..خهههههه