فزعتكم يا بنات الكويت

[دندنه]

السلام عليكم
من العنوان واضح المطلوب
الصراحه ودي ازور الكويت وهذي اول مره
ولا اعرف فيها شي
وابيكم تساعدوني وتعطوني فكره عن كل شي مثل:
وين اسكن و وين اروح واتمشى واحلا المطاعم والاسواق المميزه
والقهاوي الراقيه والغريبه يعني الي ما عندنا بالرياض زيها
وانا ودي اروح بعد اسبوعين واجلس 4 ايام
ولا تنسون تعطوني فكره عن الجو وايش اللبس ثقيل والا خفيف؟
والف شكر لكم

 

[سهرانه]

اهلين​

انا من السعوديه ورحت الكويت العام الماضي بصراااحه توسع الصدر​

بقولك عن المطاعم اللى عجبتني عندهم .. ميس الغانم مقابل الابراج اكلهم وجلساتهم تهبل​

ومطعم فريج صويلح شعبي بس اكلهم لذيذ وجنا خصوصا المرقوق وكبسة السمك​

تحصلينه في شارع المطاعم .. بالنسبه للاسواق اعجبني مارينا مول محلاته حلوووه و عندهم​

جلسات المطاعم والمقاهي اللي فيه على الكورنيش توسع الصدر روحي كريسبي كريم عندهم دونات رووعه
.
وفيه سوق شرق برضو حلوو .. واذا تبين فساتين سهره عندك سوق ليلى قاليري​

هذي الاشياء اللي اكثر شي عجبتني ..فيه سوق الصالحيه طبعا كله ماركات كبيره من شنط وغيره يعني كثري​

فلوسك اذا رحتي له بس بصراحه كئيب مافيه متسوقين كثير ..مدحو لي سوق الفنار بس مالحقت اروح له​

واكيد الاخوات الكويتيات بفيدونك اكثر
...​

 

[مستكة]

حياج الله بديرتج الثانيه الكويت,,,,أنا أختج من الكويت ترى أحنا حاضرين ونحطج بعيونا,,,وأنشاء الله نخدمج,,,بس راسليني متى وصولج,,,,

 

[طيري الأخضر]

دندنة حبيبتي ،،، بالضبط مثل ما قالت الأخت ميس الغانم وايد ممتاز أكله وقعدته تطل على الشارع
وجزء على البحر ،،، وهالأيام الجو بالنهار دافئ وبليل تقريباً 22 درجة الحرارة يعني بريد تحتاجين بودي
ثقيل تلبسين ولبسج العادي فوقه

عندنا مجمع جديد فاتح حالياً إسمه الأفينيوز على الدائري الخامس ياريت تمرينه راح تستانسين فيه وايد
فيه مطاعم كثيرة فيه وصالات سينما جديدة ومتطورة جداً خاصة صالة رقم 4 الكراسي اللي فيها متحركة وجلد مثل كراسي الطيارة على الدرجة الأولى تنرفع من تحت رجلج والمسند يتحرك من ورا ظهرج ،،،،، لزوم الراحة وأنتي تطالعين الفيلم قمة في الرفاهية هذه الصالة أنصح تحجزين فيها

ومري الفنار وايد حلو فيه قهاوي ومحلات حلوة ،،، وبالنسبة للسكن أنا أنصحج تسكنين في فندق المريديان اللي على البحر روعة المنظر بالنهار تشوفين الكويت من فوق والبحر يهبل وغرفته الكبيرة شرحة وواسعة
وحمامها وانتي بكرامة كبير وراهي ،،،

الجو وايد حلو هالأيام ،،، حياج الله يالغالية في ديرتج الثانية الكويت

 

[A7LA GALA]

انصحج بزيارة الكويت الان لان الجو روعة لاهو حر ولاهو برد
بالنسبة للسكن ماعندي فكرة

* احرصي على انج تروحين مجمع الافنيوز اهو توه يديد بس روعه راح يغنيج عن اي مكان ثاني وروحيله من الصبح اذا ماني غلطانه اهو يفتح الساعة 10 الصبح تناولي فطورك هناك فيه وايد كافيهات حلوة وبعدين اعملي شوبينغ كل المحلات اللي تلقيها متوزعة في المجمعات الاخرى تلقيها فيه واذا جيه وقت الغدا وانت لسه ما خلصت الشوبينغ فلا تقلقي بس حاتحتاري بين المطعم الايراني اللبناني الامريكي الياباني الصيني ....وبعد ما تخلصي الغدا تقدري تكملي التسوق لغاية الساعة 11 او ال 12 مساء خليه الافنيوز رقم واحد في قائمة الاماكن اللي تزوريه بالكويت وعندك بعد مجمع المارينا وهو يتكون من 4 اجزاء جزء فيه المحلات التجارية والجزء الثاني يطل عالبحر واسمه مارينا كريسنت كله مطاعم وكافيهات والقعدت تكون داخل المطعو او برا والجو يشرح القلب والجزء الثالث هو فندق المارينا ممكن تسكني فيه اذا حابه بس ما عندي عنه فكرة والجزء الرابع مارينا ويفز فيه كافيه يطل عالبحر وفيه مطعم ياباني اسمه ماكي وانت بالطريق للمارينا ويفز حاتشوفي البحر وحدايق وسيعه نظيفة ومرتبة

في مجمعات اخرى وكمان حلوة مثل ( سوق شرق ، الفنار،البستان،مجمع مريم، دانه سنتر، المهلب،الكوت،كويت ماجيك،زهرة،مجمع الصالحيه،سوق المباركيه(يشبه سوق مرشد اللي بدبي)) والكثييييييييييييييير من الاسواق بس اذا تبيين رايي روحي اول شي الافنيوز والمارينا مول لان بس عندك 4 ايام

* اذا تحبي الدراريع الكويتيه عندك مجمع الاوقاف ومجمع الحمراء مول (الحمرا مول بالفروانيه واسعاره افضل) مجمع العربيد كله دراريع بس تفصال مافي جاهز والهام الفضاله عندها محل هناك اسمه محل الهام الفضاله

*اذا نفسك بالرهش الكويت والدرابيل وشعر البنات وغيره من الحلويات الكويتيه القديمه روحي سوق الخضره اللي داخل سوق المباركيه راح تلقي داخله مكتوب سوق الحلوى فيه محل الشمال وبوفتين و...غيره من المحلات واسعارها مناسبة لان وايد خليجيين يشترون هالشغلات من محلات اخرة غاليه وماتسوى

المرا الجايه اكلمك عن المطاعم واذا عندك اي استفسار انا حاضرة ومن عيوني

 

[بسبوسه]

هلا فيج اختي الدندونة

الخوات ما قصرو كفوا ووفوا بس أضيف

أماكن لليهال اذا معاج احد منهم

عندك حديقة الشعب والمدينة الترفيهية وصالة التزلج

وداخل الافنيوز في محل كبير جديد للأطفال اسمه برووي

سألي عنه


هذا اللي يحضرني الحين


وحياج الله يالغالية​

 

[دندنه]

الف الف شكر لكم يا خواتي جميعا الصراحه ما قصرتو وفيتو وكفيتو :c017:
وانا الصراحه برد عليكم كل وحده لحال :shiny:
اخت سهرانه الف شكر لك حبيبتي بس حبيت اسالك بالنسبه لسوق ليلى قاليري حق السهرات
عندهم اشياء حلوه وراقيه والا كلها مشكشكه ومتكلفه؟ يعني حلو؟ وكيف اسعارهم؟

اخت مستكه الله يحييك اختي وتسلم الديره واهلها وانا زيارتي اذا الله سهلها راح تكون بعد اسبوعين

اخت طيرنا الاخضر مشكوره حبيبتي على المعلومات المهمه الي زودتيني فيها وياليت لو تعطيني فكره عن الافلام الي نازله عندكم جديد العربي والاجنبي اذا كنت تعرفين انتي او اي وحده من البنات الموجودين، تعرفين احنا بالسعوديه ما عندنا سينما علشان كذا اذا سافرنا نروح لها كثير والله يوفقك ويحييك ياعزتي

الاخت A7la Gala يعطيك العافيه الصراحه ما قصرتي بس ابي اسالك من كل هالمجمعات الي سردتيهم وش احلى شي بعد الافنيوز ومارينا ؟عطيني 3 اسماء معليش بزعجك شوي
وبالنسبه للجلابيات وش احلى سوق اروح له علشان اشتري منه هدايا؟ بالنسه للشكل والاسعار......
ولا تنسين تعطينا فكره عن احلى المطاعم والقهاوي الحلوه الي اشوفها بمسلسلاتكم والف شكر

اخت بسبوسه مشكوره حبيبتي ما قصرتي بالنسبه للاطفال عندي بنت عمرها 5 سنوات و ولد عمره سنتين
بس مو اكيد اخذ الولد معاي والمعلومات الي قدمتيها لي تنفعني جدا وبحاجتها شاكره لك مرورك وردك
واذا تعرفين اماكن اخرى تنفع للاطفال اكون لك شاكره

ويعطيكم الف عافيه جميعا وصدق انا عاجزه عن الشكر :clap:

 

[A7LA GALA]

[:c017:الاخت A7la Gala يعطيك العافيه الصراحه ما قصرتي بس ابي اسالك من كل هالمجمعات الي سردتيهم وش احلى شي بعد الافنيوز ومارينا ؟عطيني 3 اسماء معليش بزعجك شوي

هلا دندنة المجمع الثالث اللي تروحيله هو الفنار لان فيه سينما وكم مطعم ..واذ رحتي صوب واجهة المجمع الخارجية اللي تطل على مركز سلطان(سوبر ماركت كبير) حاتشوفي 3 كافيهات تقريبا وفيهم قعدات بالهواء الطلق كما ان المنطقة اللي فيها الفنار فيها اغلب المجمعات اللي ذكرتهم لك سابقا مثل البستان،مجمع مريم،مجمع زهرة،الوطنية،الثريا،دانة سنتر، سنتر بوينت،واذا مشيتي شوي بالسيارة بحيث تخلي الفنار على يسارج راح يكون على يمينك مطعم فريج صويلح يقدم اكلات كويتيه لذيذة جدا واسعاره مناسبة وفيه كابينات كل كبينه هي بيت كويتي قديم كما يمكنك مشاهدة طريقة صنع الحلوى المسقطيه وتذوقها وهي حارة مجانا وشراءها اذا رغبتي..وبعد المطعم بشوي هناك محل كبير لمارك سبنسر وبعده مجمع المارينا مول الجزء الاول اللي قلتلك انه فيه محلات تجاريه بالاضفة الى كم مطعم في الدور الارضي وفي الدور الاول هناك مطاعم وسينما..وفي الجهة المقابلة للمارينا هناك سوق السالمية القديم واذا كملت سيدة في نفس اتجاه الشارع اللي فيه المارينا بعد الاشارة الضوئية كملي سيدا راح تكوني في سوق السالمية الجديد كم ان محل سناء موجود قريب من هالسوق بس لازم ترحيله بالسيارة


اعذريني ألحين لاني مشغوله جدا بس لي عودة باذن الله راح اكلمك عن الخيار الرابع من المجمعات اللي ممكن تروحيلها بالكويت


وبالنسبه للجلابيات وش احلى سوق اروح له علشان اشتري منه هدايا؟ بالنسه للشكل والاسعار......
ولا تنسين تعطينا فكره عن احلى المطاعم والقهاوي الحلوه الي اشوفها بمسلسلاتكم والف شكر

 

[همسة حب 2]

اختي الحبيبه الكويت بتنور أنشالله .. دام بنتك الصغيره معاك روحي فندق المارينا لانه لاصق فيه مجمع المارينا لانه داخله في مركز ألعاب وايد حلو وفيه سينما بعد.... والفندق بعد حلو .... الفندق هذا بشارع الخليج ... هذا الشارع وايد حلو وفيه وايد فنادق ومنتجعات ... ( بعد دوار البدع ).
مجمع ليلى جاليري فيه بدلات سهره جدا راقيه ....
وعنك مجمع المهلب أيضا فيه سينما و مكان صغير لالعاب الاطفال .
خلي طلعاتك صبح وعصر وراح أحاول أعملك مثل جدول اذا تحبين طبعا وعندي الويب بيج لأغلب الفنادق وأسعارها أذا تحبين .
الشارع الي فيه ليلى جاليري فيه أكثر من5 مجمعات يم بعض وكلهم قراب من المارينا ( زهره بدلاته غاليه شوي + الفنار مناسب والباقي أيضا مناسبين )
في مجمع راقي أسمه الرايه فيه كافيهات ومطاعم لكنه بمنطقة شرق تقدرين تشوفينه بطلعة وحده مع مجمع الصالحيه وسوق شرق )

 

[دندنه]

احلا غلا
همسة حب
ما قصرتو ياحبيباتي الصراحه اني عاجزه عن الشكر
ومن كلامكم حمستوني مره على الجيه
بس احس ان اربع ايام قليله مرره على لف الاماكن الحلوه هذي كلها
جزاكم الله الف خير

 

[&دره&]

الفنادق وايد وعلى حسب المكان اللي تبينه يكون عادي ولا فيو عالبحر

مثلا فيه فندق الشيراتون وفور بوينت وكراون بلازا وكورت يارد هوليدي ان والمريديان والمرينا و ماريوت وموفنبيك..وساس وريجنسي وغيرها من الفنادق وفيه شقق فندقيه وفيه شقق مفروشه:msn-wink:

بقولج مجمعات رخيصه وغاليه وانتي اختاري:sly:

فيه فندق موفنبيك محلات واايد منها حلويات ومطاعم ووو

شوفي في مجمع النقره الشمالي والجنوبي

فيهم بدل سهرات حلوه واسعارها معقوله من 40 دينار وانتي طالعه تحصلين بال150 وفوق ببوتيك الاميره
بس الاغلب مديلات حلوه واسعار معقوله خصوصا اذا كان عندج مناسبات ورى بعض والميزانيه ما تسمح لبدل بال250 وطالع... وحتى فيهم دراريع وعبي وشيلات :clap:

فيه بعد بالمهلب محلات حفلات وين بعد ياربي ..اممم اي في مجمع البستان جم بوتيك رااقين وحلوين :cupidarrow:وفيه محلات وايد للبس الاطفال مثل جاكادي واوش كوش وفيه محل الالعاب فانتسي وورد:icon30:

وللعيال الله يخليهم فيه بسوق السالميه الجديد يسمونه ستي سنتر او المعلم فيه قسم طفل المستقبل كبيير والعابه حلوه وتونس وفيه بعد يمه المطاعم المعتاده برقر كنج وماكدونالد والارنب الجائع وفيه القسم اللي قباله مطاعم غير فيها عيووش وسلطات ومشاوي وغيرها وعندج مجمع المثنى بعد هم فيه طفل المستقبل ومحلات وجم كافيه:smoke1:

واذا بتشترين العاب للعيال عندج العاب شرق بشارع بن الوليد محلات على مد البصر من الالعاب باربيات ونطاطيات وقواري ((بايسكل)) وغيرها وغيرها :in_love: راح ايننونج على ما يختارون لعبه :shiny:

بعد ياربي وين وين وين ؟؟

اي في حولي مجمع بلازا فيه كافيهات ومحلات وغيرها

وفيه مجمع الايوب فيه سوالف حلوه للمتزوجات :cupidarrow:من قمصان نوم :icon26:ولانجري اشياء واااااااو:in_love: وهم فيه عبي وملافع و فيه محل اسمه استر بالدور الاول عبيه رااقيه وحلوه :icon30:

وفيه قبالهم مجمع السندس فيه محل شارمل بالدور الاول يبيع ميك اب وغيرها..

فيه مجمع الرايه محلاته كلها راقيه وماركات :cupidarrow: احب فيه محل اوكايدي للعيال :cupidarrow:

واذا زوجج يحب الماركات عندج مجمع دار العوضي بروحج تتسوقين هنااك ههههههههه فاضي لانه غالي:nosweat:

فيه مجمع المنشر ما ادري وين يمكن بفحيحيل :1eye:ومجمع الكوت يونس جنه متاهات:sly:

واذا تحبون وناستكم تكون ثقافه فيه المركز العلمي بشارع الخليج فيه السينما ثلاثية الابعاد والاكواريوم و قسم الابحاث حلو لكم وللعيال:showoff:

واذا تحبون شيشه:smoke1: ونسكافيه بالحليب وسحلب وزهورات وغيرها عندج مقهى ليالي الحلميه وفيه يم سوق شرق قهوة الشميمري تكون عالبحر حلوه وعلى امتداد سوق شرق فيه كافيهات وقهوه وشيشه ومطاعم مثل فرش مانقو وفيه قسم بسوق شرق الباركنج يكون عاليمين فيه كافيه حلوه وعندهم بعد شيشه:icon30:وفي بعد بسوق الكويت يم سوق الخضره وسوق السمج مجموعه مقاهي ومطاعم :essen:فيها عيش وكباب وكشري ومشاوي وغيرها وغيرها:msn-wink:

ولو تقعدون اكثر بالكويت تقدرون تروحون بعباره لي فيلكا من عند راس السالمه تطلع 1ونص وترجع 6 ونص تكون رحله سياحيه وتذكرة العبار2ونص وفيه عبارة ام الخير بمرسى المارينا تاخذج لي هناك مع وجبة بوفيه 18 دينار النفر:nosweat:

فيه مطعم :essen:اسمه الوطيه اسمع فيه وما ادري وينه :bleh: بس يقولون عجيب وحلو في برنامج الرجل:santa_1:

لا تنسين ذكرتلج محلات عاديه ورخيصه بعد واماكن غاليه وراقيه :surrender:

بس والله كلها لها رونقها وحلاوتها:icon26:

انا اقول طولي المده ما يمديج تروحين كل هالاماكن لانه انا كويتيه ما تصدقين لا رحت المركز العلمي ولا مجمع المنشر ولا مطاعم واايد بعد والله:nosweat:

حياج الله وان شاء الله تستانسين بالكويت

والبنات هم ذكرو لج اماكن وما قصروا:icon31:

 

[A7LA GALA]

دندنة حبيبتي تعبك راحة والمهم عندي انك تنورين الكويت بزيارتج لها وتنبسطين وترجعي لديرتك وانت حاملة معك أجمل الذكريات من بلدك الثاني الكويت

نجي ألحين للخيار الرابع بالنسبة للمجمعات انا بقولك وانت قرري
ممكن تروحين لمجمع الكوت هو بعيد شوي عن العاصمة بس فيه سينما ومحلات تجارية والور الاول فيه مطاعم بس اذا رحتيله وانت بالدور الارضي راح تشوفي كافيهات منتشرة على طول النافورة الموجودة في المجمع من الخارج والقعدة فيها تشرح الصدر خصوصا لما تبدي النافورة تتحرك وتصعد وتنزل على انغام الموسيقى..
اذا زرتي مجمع الكوت ممكن تزوري معه مجمع المنشر وممكن بعد تروحي لمجمع كويت ماجيك بس في حالة الاخير لازم تمشي شوي بالسيارة كما ممكن انك تزوري منتجع الهيلتون فيه شاليهات ومطاعم وكافيهات ممكن تروحيله زيارة لاي مطعم من مطاعمه ..هذي الاماكن اللي ممكن تروحيها في حالة اختيارك لمجمع الكوت لانها كله في نفس المنطقة والمكان..

اذا كنت تبين ماركات مثل فيندي ولويس فيتون وشانيل ...الخ عندك مجمع الصالحيه كله ماركات بس كئيب شوي احس مافيه روح
او ممكن تروحي لمجمع الراية فيه ماركات ومطاعم حلوة فيه فوق مطعم للبرغر اعتقد اسمه برغر بوتيك بس على مستوى يعني البرغر اللي عنده متكشخ مو مثل مطاعم الوجبات السريعة
او ممكن تروحي لمجمع فيلا مودا هم كله ماركات وموجود في المنطقة الحرة الكويتية ويم المجمع فيه فندق موفمبيك المنطقه هذي هاديه ومافيها ناس وايد

هذا بالنسبة اذا كنت تبين الماركات تحصلينها في هالمجمعات

ولي عودة باذن الله

الاماكن بالكويت ماشاء الله لاقوة الا بالله كثيرة ومثل ما ذكروا البنات في ردودهم ان وايد اماكن احنا اهل الديرة مازرناها او زرناها مرة او مرتين من زمان و4 ايام ماتكفي بس مو مشكله اذا نظمتي افكارك وعرفت انت شنو تبين وشلي حابه تزوريه وتشوفيه راح تستغلي المده هذي كويس وتنبسطي ان شا الله

 

[emtithal]

أحلى وقت لزياره الكويت هالوقت ....راسلينى على الخاص واللى تبينه حاضره .....مطاعم اماكن ترفيه للأطفال للكبار .....مستعده وحاضره ....ثانكيوووو

 

[عطر الخزامى]

مجمعات مطاعم اسواق كويتية
فنادق
تفضلي حياك
اضغطي هنا:questionmark:
المرشد السياحي للكويت ​

 

[سهرانه]

ليلى قاليري اغلب محلاتهم لبسهم راقي وسمبل واسعار المحلات تختلف من محل لمحل وبالنسبه للاسعار اخذت فستان راقي ونعووم مره بعد التخفيض بتسعمية ريال ..

بس اغلب الاسعار من الف ريال وطالع خصوصا الماركات الكبيره الاوربيه .. واحلى مافيه اللي بالمحل يساعدونك كثير على الاختيار اذا احترتى بس لاتستعجلين تشترين شي لين تلفين كل السوق لانه مو كبير ماياخذ معك وقت ..​

 

[دندنه]

الصراحه انا عاجزه عن الشكر
ما قصرتو يا بنات وفيتو وكفيتو
عطيتوني الي ابي وزياده
الله يوفقكم ويجزاكم عني كل خير

 

[A7LA GALA]

دندنة اشصار عليج حبيبتي يتي الكويت ولا ليلحين

 

[دندنه]

هلا فيك حبيبتي احلى غلا معليش ترا توني اشوف سؤالك
ايه والله يا حبيتي جيت الكويت وانبسطت فيها مررررره
وعجبتني مره والجو كان رائع واتمنى ازورها مره ثانيه لكن
للاسف زوجي ما عجبته وما ارتاح فيها يقول ما ينرجع لها
مررره ثانيه وانا مره ضاق صدري لاني مرره انبسطت
وشكرا لك حبيتي على سؤالك واهتمامك

 

[A7LA GALA]

الحمدلله انج استانستي وعجبتج الكويت

وبالنسبة لريلج شكلج فلستي الريال علشان جذي مايبي يرد لها عالعموم ترى الرياييل كلهم جذي اهم شي انج قضيتي اجازة سعيده وان شاء الله تردين لها مرة ثانية وثالثة ورابعة ...

 

[دندنه]

انشاء الله
الله يسمع منك ومشكوره حبيبتي