عن اسم الله العزيز

[راجيه الرضا]

مرة كنت بقرأ في تفسير إسم الله "العزيز" .. لقيت كلام كتير في منتهى الجمال والروعة، لكن فيه معنى واحد استوقفني جدا، قالوا : العزيز هو الذي لا مِثل له ولا نظير! يعني اللي مفيش حد في الدنيا زيه ولا أحسن منه !! .. أهو الموضوع ده أنا بحسه جدا جدا في أعمال الخير !! أحيانا أسمع إن فيه حد عنده مشكلة معقدة جدا ! فأتحمس إني أساعده، وأفضل أقول في نفسي: هحاول أعمل مع الراجل ده اللي عمره ما كان يتخيله !! هابهِرُه !! هخليه يفضل يحمد ربنا طول عمره !! .. وأفضل أتخيل كدة إن ربنا فرحان بيا وإني عملت حاجة جامدة أوي وثوابها عظيم !! .. وتمر الأيام والشهور وأحيانا السنين، وأقع أنا في مشكلة، يقوم ربنا باعتلي واحد يعمل معايا موقف أشد ميت مرة من اللي أنا عملته مع الراجل الأولاني !! ويساعدني ويخرجني من مشكلة ملهاش حل ! أو يقدملي خدمة عمري ماكنت أتخيلها ولا أحلم بيها !! .. ساعتها بنبهر !! بنبهر بأفعال ربنا سبحانه وتعالى إللي دايما لازم تكون الأجمل والأعظم والأكرم !! وبفتكر دايما حديث التاجر اللي كان بيتجاوز عن المُعسرين، فلما لقي الله تعالى قال : نَحْنُ أحقُّ بِذَلكَ مِنْهُ، تَجاوَزُوا عَنْهُ !! وكإنه بيقول : أنا العزيز، ما ينفعش حد يبقى أكرم ولا أعظم مني !! سبحانه وتعالى !
أنا من فترة كدة كان لي صديق بيمر بظرف شديد جدا وكان محتاج مبلغ كبير عشان يخرج من الأزمة دي ! فقلتله إن شاء الله أحاول أدبرلك المبلغ ! واتصلت بصديق تاني تاجر محترم ومقتدر مادياً ، قلتله انا اسف جدا بس في صديق ظروفه كذا وكذا ومحتاج المبلغ ده في أسرع وقت !! ساعتها بعتلي رسالة صوتية على الوتس اب ، قال لي : بص يا عماد أنا بمر بظروف صعبة أوي دلوقتي وكنت شايل قرشين على جمب عشان الظروف دي ! أنا المحل بتاعي (في منطقة راقية جدا) كنت شاريه من سنين طويلة من راجل محترم كبير في السن، وكان فيه بيننا عشم ومودة فا مكنتش مهتم أوي بتوثيق عقد المحل ! للأسف الراجل توفي وأولاده طمعوا في المحل بتاعي وطعنوا في صحة العقد ورافعين عليا قضية طرد من المحل !! فأنا شايل قرشين عشان لو لا قدر الله سيبت المحل أعرف أجيب محل تاني وأنقل !! والمشكلة التانية إن فيه شكوى كيدية ضدي في الضرايب جم قدروا عليا ضرايب بـ2.5 مليون جنيه !! .. المهم أنا قاعد بسمع صوته في الرسالة وهو متأثر جدا، وخلاص اعتبرت إن ده اعتذار عن القرض !! لقيته في آخر الرسالة بيقول: إن شاء الله هبعتلك السواق دلوقتي ب75% من المبلغ ! وأرجوك تسامحني مش هعرف أدبرلك المبلغ كله، وربنا إن شاء الله يفرجها علينا وعلى صاحبك !! .. تخيلوا ؟!!
المهم .. تمر الأيام ، وأغيب أنا الفترة اللي غيبتها دي كلها، وأبعتله جواب من جوة بقول له سامحني أنا مش عارف أوصل لحد والراجل غالبا لسة متعثر، فبعتلي رسالة خليتني أعيط أقسم بالله !! قال لي ولا تشيل هم ولا تفكر في الفلوس خالص خالص، ولو كنت سالف لحد تاني فلوس من أي حد قل لي وأنا أسدها لحد ما ربنا يفرجها عليك وعليهم !!!
سبحان الله .. خرجت وكلمته على طول، قلتله أنا تواصلت مع الراجل ولسة الظروف متعثرة معاه، فقال لي : ولا تشيل هم ، انا هستناه لحد ما ربنا يأذن، أنا أصلا معتبر الفلوس دي رجعتلي خلاص !! قلتله : رجعتلك ازاي ؟
قال: بعد ما بعتلك المبلغ ده بفترة اكتشفت "بالصدفة" إن أنا كسبت قضية الطرد دي من 2018 وأنا مش عارف ? والحمد لله هفضل في المحل بتاعي!! والمشكلة التانية بتاعت الضرايب ربنا حلها من عنده والمبلغ نزل من 2.5 مليون لـ 250 ألف فقط ? !! فأنا قلت دي بركة مساعدة الراجل ده، واعتبرت الفلوس رجعت ?
سبحان الله العظيم !!
والله ياخواننا اتأثرت واستبشرت جدا بكرم ربنا سبحانه وتعالى !! ماينفعش أبدا يبقى حد أكرم ولا أعظم منه !! مفيش حد يعمل حاجة لله غير لما يردهاله أضعاف أضعاف !!
صدق ربي: هل جزاء الإحسان إلا الإحسان !! الإحسان الأولى منك انت وعلى قد حجمك انت !! والإحسان التانية منه هو وعلى قدر عظمته هو سبحانه وتعالى !!
فعلا والله "عزيز" لا مثيل له ولا نظير .. سبحانه وتعالى