عطوني حل لمشكلة قريبتي مع المعرس الجديد

ا

ام الوجود

New member
إنضم
2007/07/19
المشاركات
71
مساكم الله بالخير ..

انا دايما ادخل هالقسم واشوف مشاكل الحريم وكيف ماشالله عليكم تحاولون تعطون الحلول الزينه ... قلت خلني اكتب مشكلة قريبتي طبعا بعد ما خبرتها اني بكتب مشكلتها بهالقسم ....

ماشالله قريبتي كثير جوها خطاب خصوصا ماشالله هالسنه فوق السبع معاريس .. بس سبحان الله ما يصير نصيب وكانت تستخير وما تكون مرتاحه ابد ...

المهم هالاسبوع خطبها واحد من مدينه غير مدينتها وجو شافوها وهي من شافت الريال:39: ارتاحت نفسيا وصلت الاستخاره وبعد مرتاحه ..بتقولون وين المشكله ..؟؟؟
المشكله يا طويلات العمر ان الريال عنده اعاقه بسيطه فرجله وبعد في يده ما يقدر يحركها كثير ..بس يقدر يسوق وقايم بأموره بنفسه الحمدالله ...وهالشي اللي فيه لما كان صغير اتعور وصارت له الاعاقه .. هو عمره 30 سنه وهي 29 سنه ..والصراحه من ناحية البنت ماتشوفها مشكله كبيره ومبدئيا موافقه عالريال ..بس المشكله امها .!! رافضه الموضوع بتاتا واتقول ليش ازوج بنتي لواحد معاق وحتى لو اتزوجته قالت ماراح اتسوي لها حفله وعرس ولا غيره وهم طبعا يحاولون يقنعونها بس ماشي فايده..
كيف تقدر تقنع امها ؟؟ مع ان ابوها واخوانها موافقين عالريال لان ماشالله بغض النظر عن اعاقته هو ريال ملتزم وما يطوف صلاته وموظف ومعتمد على نفسه ..
شو رايكم حريم ...كيف تقنع امها بموضوع الزواج هذا ؟؟
وشو رايكم بالموضوع بشكل عام ..
 
ماأشوف فيه اي مشكله يكفي انه ملتزم ومحافظ ع صلاته واللي فيه تعتبر اعاقه بسيطه جداااا ماينرفض عشانها هدا رأيي بشكل عام اما امها الله يهديها تخلي احد من الأهل تعرف ان له كلمه عليها يعني يقدر يقنعها وان شاء الله توافق

الله يوفقها ياااااارب
 
اسأل الله التوفيييق لها وتيسيير امورها

عليها بالاستغفار والدعاااء وتحري اوقات الإستجابة

الامر الآخر المشكلة تكمن في معارضة امها تحاول تقنعها وتبين لها الامور وانها مرتاحة له وابوها يحاول يقنع امها لابد تقنع من الجميع
الام نظرتها قاصرة للأمور ولازم الأب يوضح لها لان عمر البنت 29 يعني تقدم بها السن ع اعتااب الثلاثين فلو رفضتم هذا قد لا تجدون من هو افضل منه من ناحية المميزات
وهو ليس معاق ما دام انه قاادر على مسئوليااته

وبالتوفيق..............
 
والله بصرااااحه لازم تخلي احد يقنع امها ولا هي برضووو تقنع امها وماأنصحها تتزوجه وأمها مو راضيه ولله تتعب بعدين أشين شي لما تتزوجين انسان امك او ابوووك ماتقبلوه صعبه
وبعدين انتي قلتي انها استخااارت ومو شرط انها ارتاحت خلاص يصير هذي الخيره لا احيانا من صلات الاستخاره ترتاحين بس يطلع لك امر يعسر الزواج مثل الحين ام صاحبتك
فقولي لصاحبتك اذا كتب ربي تاخذينه فبيتيسر الأمر واذا لا يتعسر الأمر ومالك عن كتبة ربي
وعسى ان تكرهو شي وهو خير لكم وعسى ان تحبو شي وهو شر لكم (الله يكتب لها الخيره
 
ممكن وحده عاقلة تكلم الام وتخوفها
تقولها مايجوز لك ترفضينه وهو بهاالمواصفات وبنتك مواقفه عليه ومافيه شي مخجل ومعيب
وقايم بنفسه
لو رفضتيه ترى يمكن تصير حوبة هالرجل في بنتك وتتعذب مع واحد مو كقو عشان رديتو اللي دينه وخلقه
زين لجل اعاقه بسيطه من الله ماله فيها حول ولاقوه
بإختصار تدخل من باب التخويف على بنتها من المستقبل لو رفضت هالشخص
وتذكرها بالله ومايجوز لها هالشي ومن هالكلام
وكثرة الكلام غصب بيلين راس الام وحتى لو هددت الحين بعدين بترضخ للامر الواقع وغصب بتفرح لبنتها
واضح ان الام تسوي كذا من خوفها على بنتها وحبها لها
فاادخلو لها من هالباب..
والله يكتب لها اللي فيه خير..
 
الله يوفقها وييسر امرها تجي لامها باللين وتخلي ابوها يكلمها لعلها تقتنع.........
 
الاعاقه موعيييب ياما نااس كانو صااحين بس سلووكهم وخلقهم موكويس ,,
الكلام فالموضوع بيقنع الام ,,
 
السلام عليكم

مافيه أي مشكله
ما أدري الأمهات ليش يعقدون المواضيع
مدام قائم بأشغاله وأمور حياته بنفسه الحمدلله
وبعدين أهم شي البنت تستخير وربي يقدملها الخيره
 
بقولك شي غاليتي قوليلها تستخير اولا ثانيا لا تحط الاعاقه عذر
بقولك وحده من قريباتي تزوجت واحد ماينقصه شي جسم وشكل بس الاخلاق والمعامله زفت
زين
ضلت معه 10 سنوات مابين ضرب واهانه مع انها ماشاء الله متعلمه وطباخه واتكيت وجميله وجسمها يعني ماناقصها شي حياتها جحيم معه اخر شي تطلقت ورمى عيالها عليها زين
وخطبها واحد معاق مايمشي زين يعرج وبشكل واضح وشكله مو حلو يعني مو مقبول مره واستخارت
وارتاحت تزوجته والحين ماشاء الله معيشها بنعيم هي وعيالها ومدلعها اللي بفيدك فيه ان الاعاقه مو سبب لرفض الرجال الطيب تسال عن اخلاقه ودينه وربي يكتب لها الخير​
 
صدقتي اختي ونا بعد اشوف الاعاقه اعاقة القلب ..شو الفايده لو الريال كامل بكل شي بس قلبه مريض بالشك والحقد..
 
تقول لامها لو كانت بنتها هي اللي فيها الاعاقة .....اش كانت بتسوي ....يارب يسخر لها امها
 
والله يا اختي .. انا خوي مسوي حادتث من عشر سنوات وكل ما شفنا بنيه ساعات تكون راضيه بس الاهل يدخلون ويخلونها تغير رايها ..
حبيبتي .. طاعة الام واجبه .. بس البنت مب صغيره .. يعني اتصلي استخاره قبل لا تروح تكلم امها .. وتقعد مع امها وتتكلم معاها بهدوء وتقول لها انا بسوي اللي يرضيج بس اسمعيني ..وتكلم امها وتقول لها انها له اذا خير لها صدقيني الله بيلين قلب امها وبتوافق ان شاء الله .. اهم شي باعتقادي تستخير قبل لا تكلم امها . هذا والله اعلم واجل
 
اختي الغاليه ام قريبتك لزم احد يفهمها ان الاعاقه اعاقة العقل ...فكم رجل سليم الاعضاء ولكنه يعيش زوجته بهم وغم وشتم وضرب ...وكل انواع الاجرام وقبل كل شي لايهتم بصلاه .وبعض الاصحاء يعتمد على زوجته بالمصروف .لانه عاطل عن العمل لكن مادام موظف فهو رجل يعتمد عليه ..فهني ان لقريبتك بهذا الزوج ان كان من نصيبها.
 
فديت عطري قال:
ماأشوف فيه اي مشكله يكفي انه ملتزم ومحافظ ع صلاته واللي فيه تعتبر اعاقه بسيطه جداااا ماينرفض عشانها هدا رأيي بشكل عام اما امها الله يهديها تخلي احد من الأهل تعرف ان له كلمه عليها يعني يقدر يقنعها وان شاء الله توافق

الله يوفقها ياااااارب
أنقر للتوسيع...
صح الاب اكيد له على زوجته كلمه خليه يقنعها واللهه يكتب لها مافيه خير وصالح
 
الزم تقنع امه
وتقول عن ايجابيت الرجال قبل سلبياته ويكفي انه معتمد على نفسه
وعمره البنت مهب صفيره
والرجال مهب عيب العاقه
الله يوفقه
 
خليها تقول لامها الرسول عليه الصلاة والسلام قال من اتاكم من ترضون دينه وخلقه فزوجوه...وخليها بعد تخلي امها تستخير سبحان الله يمكن ترتاح وتوافق على طول والله يقدم لها الخير
 
مجرد اقناع للام باسلوب وادله علميه وقصص

ويكفي تعطونها مثاااااااااال قولولها لو ولدها المعاق كانت بترضى ان حد يرفضه لسبب اعاقه بسيطه ؟؟؟؟؟

وقولولها لو بنتج تزوجت ولا سمح الله صارلها شي ترضين ان زوجها يخليها

الاعاقه اعاقة العقل والفكر مب الجسد ويكفي انه فيه صفات دينيه حلوه

 
خلي الكلام يصير كلام رجال يعني ابوها يقنع امها ومدام هذي صفات المعرس برايي ماينعاب وتبغي الصراحه البنت عمرها29 يعني موصغيره خليها تستخير وتتوكل على الله وتحاول اقناع امها بشتى الطرق مهما كان هذي امها الله يرزقها الي فيه الخيررررررررر
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل