السلام عليكم ورحمة الله وبركاته
قريت أغلب مواضيع الشمالي الشرقي من أول صفحة إلى آخر صفحة واللي أحياناً تتعدى الخمسين .. قريتها حرف حرف وطبقتها بكل عزيمة وإصرار والأهم : اقتنااااااع تاااام
حياتي تغيرت كثير وزوجي قالي إني متغيرة وإني رجعت بشاير القديمة العروس اللي تزوجها بدلعها ودلالها وهدوءها .. صار يدللني ويراضيني ويساعدني
استمرينا شهر بأحسن حال كنت كثير فرحانه ومستانسه وزوجي أسعد وأسعد
وبعدين أشوف نفسي تغيرت .. صح
صرت أفكر مليون مرة قبل لا أتكلم .. صح
صرت أفكر بزوجي وردة فعله إذا أقدمت على أي تصرف .. صح
لكن هو ؟؟؟؟ ما زال متى ما حب يطول لسانه طوله .. متى ما حب يصرخ صرخ .. متى ما حب يمسح بكرامتي الأرض مافي مانع وصار يتمادى أكثر وأكثر .. وطبعاً يتحكم بكل شي كأني قطعة أثاث بالبيت
مسحت هالشهر كلـــــــــه بلحظه غضب وحده :
صرخت بكل قوتي .. طلع مني صوت عمري ما سمعته أنا شخصياً !!!!!!!!!!
حسيت بلعومي تشقق
قلتله كلام وايد بما معناه : إنت ما تهمني رضيت ولا ما رضيت زعلت ولا ما زعلت إنت ما تستاهل أصلا إني أحترمك والشرهه مو عليك علي إنا اللي ساكته عليك وعلى أسلوبك معاي .... وكلام كثييييييييييير
بالأخير تركتله البيت وطلعت .. ولا فوق هذا سيارتي ما كانت عند الباب ! كانت على بعد شارعين ! قالي ما تطلعين .. قلتله مو بكيفك أنا طالعه وما همني تسمحلي أو لأ .. أنا كيــــفي أسوي اللي يعجبني
تخيلوا طلعت بالشارع أمشي على ريولي وأنا حامل بالسابع !! بتقولون مينونه أدري بس والله طلعت عن طوري حسيت ودي أختفي من الدنيا .. كرهته من كل قلبي ولو إني مو طالعه جان ذبحته بيدي ..
فجأة لقيته وراي شايل بنتي الصغيرة ولحقني بسيارته أخذني من الشارع عن الفضايح
أنا تعبت
كافي تعب الحمل .. كافي تعب الياهل اللي عندي .. وايي زوجي يعصب ويصرخ وينتقد ويهين على مزاجه وفوق هذا أنا الغلطانة وما أفهم شي ولا أعرف شي وإني بدونه أضيع !! حسافة على تعبي معاه والمنتديات اللي أدخلها عشان أحسن حياتنا وهو ولا هامه يبيني عبده عنده
صارلي فوق الأسبوع ما أكلمه إلا بالضروريات .. قلتله مابي منك شي فكني حتى صوتك مابي أسمعه .. وإذا كلمني ما أرد عليه .. وإذا سوالي شي ما أشكره لأني شكرته وااايد وكان يقولي إنتي ما يبين بعينج !! خل يعرف معنى ما يبين بعيني صح ..
صار يخاف مني يدري إني مينونه وممكن أطلع من البيت مرة ثانية أو أسوي شي ثاني الله يعلم شنو
حبيت أفضفض بس
مادري إذا أبي حلول أو لأ !!
لحد الحين أحس إني ضايعه ودي أتركه بس عارفة إني أجذب على نفسي .. أحبه لكن أكرهه
أبيه يكون موجود على طول لكن مابي أسمع صوته .. أبيه يراضيني بس مو مستعده أرضى لأن قلبي مليان ناحيته
