طفلي لا يأكل الخضروات و الفواكة

[مشمشة قطر]

السلام عليكم

خواتي لدي طفل عمره 10 شهور و مع الاسف تعود ان ياكل السريلاك و ما ياكل الخضر و الفاكهة و اللحوم . بشكل يومي اطبخ له الاكل البيتي لكنه مع الاسف يسكر فمه و يصد و ما ياكل. و المشكلة الأسوا ان السيريلاك سبب له امساك حاد مع خروج دم في بعض الأحيان مع الخروج. و الدكتور وصف له تحاميل بشكل مستمر و انا الصراحة مابغي ولدي يتعود على التحاميل في هالسن.

ياليت يا خواتي تفيدوني في نوعية الأكل اللي ممكن انه يحبه.

 

[سعوديه راقيه]

ليه ما تعملين له زي التعديل بالاكل يعني تخلين شكل الاكل مختلفه بالتقديم زي الساندويش له يمكن يحب كذا

 

[مشمشة قطر]

مشكورة اختي بس هو عمره 10 شهور يعني لسه ما يامل اشكال بالساندويش

 

[وبشر الصابريـن]

اختي تعرفين الفواكه المهروسه الي تنباع بالجمعيات اخذي منها واكله لولدج

وشوي شوي بيحب الفواكه

اما الخضار اهرسي له بطاطس وشويه جزر واكليه

ابدي بشي قليل وعقب زيدي

وممكن تجبين زبادي وتخلطين معاه نوع من الفواكه واكليه


ولدج صغير لاحقي عليه لايصير فيه عاده ماياكل

 

[مشمشة قطر]

مشكورة اختي بس مع الاسف احاول معاه بشكل يومي ياكل الخضر و الفاكهه لكنه ما يبقي و المهروس ما سشده يرجعه على طول و في نفس الوقت

 

[ريــم الدلوعة]

خذي 3 تمرات وهرسيها مع مويه دافيه وصفيه له
بالمشخال صغير برضعاته وشربيه ايه ومعاليه الاالعافيهـ ..

 

[آحآسيس]

ايوا التمر يفتح الشهيه

بعدين جوعيييه لا تعطيه سيرلاك اول مايصحى اعطيه جزر وكوسه تلين البطن ان شاء الله ياكله

اتوقع الغلط منك الله يسعدك كان من عمره خمسه شهور تاكليه خضار وفواكه

اما الفواكه حكايتها سهله جربي تهرسي الموز او التفاح وتخلطيه بشويه سريلاك اتوقع حيتقبله

جربي وردي علينا

الله يعينك

 

[مشمشة قطر]

مشكورين خواتي على النصايح راح ابتدي فيها خلاص

اختي انا مشكلتي اني موظفة و ولدي في هالفترة تعتني فيه وحده قريبة لنا و مع الاسف هي عودته على السريلاك. و كذا مرة اعمل الخضار و اوديه لها الصباح مع ولدي عشان تعطيه منه. لككن للاسف ما تعطيه مادري هي السالفة عناد او لا ليما تعود على السريلاك و انا لما اخذه منها بعد الدوام ما يرضى ياكل اي خضار مني

 

[وبشر الصابريـن]

اختي قطعي عنه السيرلايك انا ولد اخت ريلي جذيه الحين عمره سنتين ومايااكل الا شي بسيط

ولازم مهروووس

نصيحتي راجعي عند دطتور احسن لج دام ولدج توه صغير

وانصحج بمهند وايد شاطر وفااهم

لاتسكتين عن ولدج

 

[ام=فروسي]

رد خااااص وسريع انا مجربتها بولدي

السلام عليكم ورحمه الله وبركاته اختي انا انصحج توقفين عنه السريلاك وشوفي التمره اللينه حيل ومعروفه فوايد التمر من ايام الرسول حاولي تعطينه بيدج قطع تمره الاخلاص او اي تمره بس تكون لينه جدا عشان يقدر يهضمها الولد ونصيحه ترا الحلبه جدا مفيده حيل انا مجربتها بنفسي جربتها لمن اسوي ماي حق اولدي وين تحطين الماي الحار؟؟ احنا نسميها مطاره او حافظه ماي البيبي حطي مع الماي الحار بعد ماتغلينه بيدك رشه حلبه غير مطحونه وسكري الغطاء المطاره او الحافظه واذا جيتي بترضعين البيبي بتشوفين ماي صار شوي اصفر هذا مفعول الحلبه ولدج راح يصير بصحه جدا طيبه ويفيد جسمه بعد ويفتح عنده الشهيه يقعد ياكل لاتنسين البسكويت حق الاطفال اللين بالسوبرماركت تحصلينه مكتوب عليه السن وسلامت عمرج يا اختي

 

[عابرة في الحياة]

حتى انا ما اكل الخضار والفواكه

ممكن لانوو صغير


اذا كبر واستمر حاله وديه لطبيب تغذيه .. ودي*

 

[باووونتي]

والله انا بنتي كذا بس عمرها 6شهور
مرتين كلت سيريلاك ومن بعدها ترفضه حتى لو خلطته مع الحليب ماتبيه
وحتى الخضار ماتبيها بس تتفله
وهالحين مليييت وماصرت اسوي لها شئ بس عالحليب ...