شو اختار ولدي أم وظيفتي ؟؟!!

[$$ أم سعود $$]

السلام عليكم ورحمة الله وبركاته
بنات عندي مشكلة وأبي استشركم وياريت تعطوني ارأئكم فيها
انا موظفة ولله الحمد راتبي جيد بس أفكر أستقيل لانه عندي طفل صغير عمره شهرين واخليه مع الخدامة لانه انا وريلي نداوم ومحد من اهلي واهله يسكنوا قريب منا فنضطر نخليه مع الخدامة بس والله اتحسر وابكي كل يوم وانا رايحة الدوام ووبالدوام لما احس بلالام شديدة بصدري ابكي لاني اتخيل ولدي محتاج حليبي ومحروم منه وياخذ حليب صناعي
فكرت اني اترك العمل وايلس مع ولدي اربيه واهتم فيه بس مترددة ؟؟!!
خايفة اترك وظيفتي واندم بعدين لانه صعب احصل وظيفة بعدين ولانه مثل ما تعرفون الحياة المادية صعبة واحنا انا وريلي تونا ىبأول الطريق حتى بيت ما سوينا وراتبه بروحه ما يكفينا حتى لين نصف الشهر والحياة الحين تتطلب مساعدة من الطريفين
بس بنفس الوقت ماهاين علي ولدي ارميه مع الشغالة من الصبح للظهر وارد الظهر هلكانه ارقد يعني اكثر من نصف اليوم انا بعيدة عنه والله اني احس بالذنب وابكي
استشرت اهلي كل حد عطاني رأي امي تقول اهم شي ولدج واختي تقول حرام تتركي الوظيفة, الناس ما لاقيه وظايف والحياه صعبة !!
واستشرت ريلي قال كيفج ما عندي مانع بس تحملي الضغط المادي وعودي عمرج انه نعيش ع راتب واحد بس انا خايفة اني ما تأقلم !!

أبي اشوف ردودكم يا بنات قبل ما اتخذ اي قرار ؟؟!!!!!!!!!!!!!
​

 

[سكر نباته]

الله يعينك نفس المشكله الحين انا ابي اتوظف لكن ماادري وين احط ولدي وولدي عمره سنه يعني حتى حضانه ماينفع لكن انصحك انك لا تتركي الوظيفه ولكن حطي كمرات مراقبه في بيتك عشان تتطمني ان الشغاله ماتسوي في ولدك شي وهذا اهم شي وتوكلي على الله ... والله يوفقك

 

[$$ أم سعود $$]

شكرا حببتي ع الرد

 

[لجيّن]

حبيبتى اشعر بمعاناتك :sadwalk:

الوظيفة مهمة لك ولتحقيق ذاتك ... كما ان المقابل المادى ايضا مهم :icon30:

الموضوع محتاج تنظيم لوقتك وارادة منك فقط :msn-wink:

اذا كان طفلك رضيع وعمره صغير ويحتاج لعناية ...

- خذى اجازة مؤقته واهتمى بيه للفطام لكن لا تستقيلى

- اذا امكن اتركيه عند والدتك او احد من اقربائك تاتمنيه عليه

- استغلى كل لحظة فى وجودك فى المنزل لترعيه وتهتمى بيه

- نظمى يومك ووقتك بكفاءة لتحققى اقصى افادة لكى ولعائلتك

ربنا يوفقك لما يحب ويرضى حبيبتى :icon26:

طمنينا عليكى عزيزتى

 

[دوا الجروح]

انا مريت نفس ظروفك
كنت احط في البدايه اعيالي عند ام زوجي بحكم ان امي ابعيده صارت مشاكل تمت اتقولي اطلعي من الشغل وقعدي عند اعيالج تدرين ايش سويت شفت حضانه وحطيت اعيالي بس صدقيني تميت اطب عليهم فجاءه شفت بلاوي اليهال الصغار الي يصيح الي يحبي لين الحمام وحده قاعده لليهال امخلصه ثانوي اعليميه امسويه اكل للاطفال مله عيش حاطه اليهال وقاعده اطعمهم المهم لامكان صحي ولاناس يتامنون شفت حضانه ثانيه الحمد لله الله وفقني معاهم تمو اعيالي من عمر اربع شهور الى سن المدرسه الحمد لله فرق فرق من نظافه ونظام ومسؤوليه انتي عليج اول شي تبحثيين عن المكان المناسب ويا كثر هاالايام من الحضانات الممتازه ياخذون الاطفال من عمر شهريين ولا ويعلمونه وعمره ست اشهوور لما اتشوفيين المكان الي انتي تترتاحين له اخذي كل اغراض طفلك معاك المفرش والغيار والاكل ولاتنسسسسسي لاتنسسسسسسسسسسسي الوظيفه مهمه اتصدقين كلام ناعمه في قصتها مع ام بسمه يوم حثتها على العمل العمل لحد الان يتراوى جدامي الله يوفقك

 

[جبن سايل]

اختي العزيزه لا ولا ولا تفرطين في الوظيفه مهما كان راتبها قليل او كثير ترى فيه ناس كثيرين يتمنون الوظيفه ولا حصلوها مهما كان تتساعدين انتي ورجلك وتعزين نفسك وعيالك
اما ولدك فدوري لك حضانه لها سمعه ممتازه وحطيه فيها مع شغالتك اذا تبين عشان تنتبه له اكثر واحرصي على تحصين ولدك بالاذكار ودايما قولي استودعتك الله اللذي لاتظيع ودائعه 3مرات عشان ترتاحين وتتطمنين عليه
واسال الله العلي العظيم ان يوفقك وجميع المسلمين والمسلمات

 

[لمسة حنية]

شوفي حبيبتي اللي ايدة في الماي مو مثل اللي يدة بالنار بس انا باقولك حاجة واتمنى تفكرين فيها زيييين الحياة الان اصعب من قبل يعني انتي عندك وظيفة وغيرك محتاجها وراح تروح عليك وبعدين ماراح ترجعين لانة الشغلة مو لعب تتركين بعدين ترجعين بس فكري انتي لو تركتي الوظيفة من فين بدبرون عمركم وسط غلا الاسعار ولسى في طلوع اللة يستر وانتي اصلا ليش تشتغلين مو عشان ولدك اللة يخلية لك توفرون لة كل اللي يبية وعشان تساعدين زوجك انا اخواتي جالسات بالبيت لاهيات باولادهم ويتمنون لو يشتغلون يحرمون انفسهم عشان اولادهم الحياة صعبة واللة يستر من اللي جاييييييييي تقبلي مروررري حبيبتي

 

[الكمال لله]

اختي احتفظي بالوظيفه وخذي اجازه لحين ابنك تقدرين تضعيه في حضانه والله يعينك الحياة مررررررة صعبه

 

[$$ أم سعود $$]

اشكركم اخواتي ع الردود بس سبحان الله انا اميل اكثر للاستقالة ؟؟ّّ؟؟!!

 

[لجيّن]

اشكركم اخواتي ع الردود بس سبحان الله انا اميل اكثر للاستقالة ؟؟ّّ؟؟!!

عزيزتى ام سعود

واضح ان الحلول المتاحة مش مناسبة ظروفك ...

بس انا شفت لك موضوع انك ناوية تعملى مشروع صغير ... ودى ايضا فكرة جيدة جدا مناسبة لظروفك وميولك

بالتوفيق حبيبتى :icon30:

 

[حبي وسام]

الله يكون في عونك وييسر امرك

 

[$$ أم سعود $$]

الله يكون في عونك وييسر امرك

شكرا حبي عالرد

 

[3afraa_33]

عاملي خادمتك زين وضعي كاميرا مراقبة وعلميها كيف تعتني بالولد وكيف تاكلة ..واذا رجعتي لك باقي اليوم .. واذا تركتي الوظيفة ماهو حل لانك في يوم من اليام بتضطرين تتركين عيالك عندها ونفس الشي .. المهم المعاملة الجيدة..واذا تسمح لك مديرتك خذي الخامة بالطفل يوميا في غرفة العاملة.. واشرحي لها ظروفك ..اعرف مديرة مدرسة تاخذ خادمتها مع اطفالا لمدة 14 سنة .. ومبسوطة. وتخليها تساعدها بشغل المكتب والكل متفهم وضعها .. بل ان احدى المعلمات تحضر رضيعها بمقابل مادي للخادمة!!

 

[الـــــورد]

السلام عليكم ورحمة الله وبركاته ...

ربي ايعينج عزيزتي والله ايفرج عليج ان شاء الله من رائي انج تتركين الوظيفة وتتوكلين على الله واتجابلين ولدج لين يكبر شوى وربج الرزاق يمكن اتحصلين عقب وظيفة ولج من الله اجر تربية ولدج يا حليله طفل بو شهرين وعند الخدامه ومحد من اهلج عندج عزيزتي ما تضمنين الخدامه حتى لو عاملتيها زين بس رعاية وحنان الام غير والله ان شاء الله بيعوضج خير يوم بتختارين ولدج على الدوام والراتب حتى لو كانت ظروفج صعبة عليج بالاستغفار من كلام ربي جلا في علاه (( فقلت استغفروا ربكم انه كان غفارا يرسل السماء عليكم مدرار ويمددكم بأموال وبنين ويجعل لكم جنات ويجعل لكم انهارا )) صدق الله العظيم
عزيزتي عن تجربتي الشخصية كنت مثل حالج بس والله اني ما حسيت بالنقص من تركت وظيفتي وجابلت بنتي اتوكلي على الله وجابلي ولدج والله يرزقج من حيث تحتسبين ومن حيث لا تحتسبين وعليج بملازمه الاستغفار .

والله اييسر امورج ان شاء الله
(( استغفر الله الذي لا إله إلا الله هو الحي القيوم واتوب إليه )) فوالله فيها الخير الذي لا يخطر على بالج :icon26:

 

[ميمي 24]

ياأختي ام سعود
اقترح عليك أنك الان تاخذين إجازة من غير راتب لمدة سنة
بعد السنة صلي إستخارة وفكري وقارني بين حياتك بالوظيفة وحياتك من دون وظيفة وقرري على اساسها ايش الي يريحك انت وبس
ولاتقولين لزوجك او إهلك انك ماخذة إجازة علشان تشوفين الوضع وخاصةً زوجك , قولي العمل إصرو اني أخذ إجازة لمدة سنة علشان يمكن أغير قرري بالاستقالة , بس انا خلاص أخذت قرري وما راح اترجع

 

[أنيقة]

أقترح أن تأخذينه معك إلى أقرب حضانه لعملك.. وهناك الكثير من الحضانات تستقبل الخادمة والطفل معاً..
إسألي وستجدين بإذن الله..

وفقك الله..​

 

[امل الحياة]

طبعا ولدج اهم من الوظيفة في ظل هالظروف...هو محتاجج ومحتاج عنايتج واهتمامج وحنانج ...وحتى لوعاملتي الخدامة زين ماتامنينها ابدا على طفل صغير ومافي حد في المنزل ....انصحج تقابلين ولدج عزيزتي ..والله راح يعوضج خير ان شاء الله ....وبالتوفيق غاليتي...

 

[فتون الشرق]

نصيحتي لك اختي إذا كان معاش زوجك يكفيكم الافضل تكونين ويا طفلك لانه احوج لك خاصة في هذا السن أو انج اتحطينه في حضانة معروفه بالعناية بالأطفال والاهتمام بهم والله الموفق