شوفوا موقفي واحكموا؟؟؟؟

[امل2]

السلام عليكم
أاهلين باخواتي البلقيسيات والله اني اذا تضايقت من هالشمالي الشرقي جيت دايركت على هالمنتدى ادور له حل واحيانا اشوف اشد من مصيبتي وتهون علي مصيبتي !!!!!!!!

أقولكم قصتي معه انا لي اسبوع متزاعلين وجالسة عند اهلي ورجعت لبيتي وبرضوا تميت اسبوع راجعة لبيتي ؟!!

وكنا طالعين للسوق وطلبت منه نوع من الخضار مشتهيته يجيبه لي ورفض طلبي للعلم ان هذا النوع مايوجد الا في مزرعة قريبة من السوق .... حاولت فيه بكل الطرق لدرجة اني عطيته فلوسه عشان يجيبه ورفض مايبي يروح للمزرعة يقول ان لقيناه عند البقالات ولا ماله لازم؟!! وعمال المزرعة على الشارع يبيعون يعني يضرب لهم بوري ويطلعون له وقلت هالشي وهم رفض؟؟؟؟

بعد يومين طلبت أمه يوديها السوق ووداها وطلبت منه نفس نوع الخضار اللي انا طلبته منه يجيبه ؟؟؟!!!

لكن جاب لها كرتون !!! يوم جاء البيت قعد يصوت لي بأعلى صوت !!! استغربت وش عنده جايب لي هدية ؟؟؟؟؟

ورحت عنده واتاريه معه شوية خضرة من اللي قلت له ... وسألته وش هذا؟ ومنين ؟ وقالي اني رحت بامي السوق وطلبت اشتري لها هالخضرة وجبت لها !!!! وقلت لامي تعطين شوي لك!!

أنا حز بخاطررري مرة مرة مرة لدرجة اني اللحين أكتب ودموعي على خدي ....!!!

وقلت له : امك تجيب له ماشاء الله على طول ؟! وانا ترفض تجيب لي؟؟! مع اني ماقلت للك تجيبه الا يوم اشتهيته؟؟

قال أمي غير وانتي غير ؟؟

والله بط كبدي زيادة....... مثل ما امك تبغاه انا بعد ابغاه!!
مع انه ماكانت تبغاه لبيته بتروح تسير على ناس وتاخذه معاها !!!

قال ياوويللك ماتاكلينه ؟؟؟

قلت اولا انا مااخذ صدقة من الناس اولا ...ثانيا : طابت نفسي ماابغى منك شي خلاص ؟؟

انا زعلت صراحة لاني احس انه جرحني مرة مرة مرة وحز بخاطري تصرفه ..

خلاص عاد قام يبربر عاد هو لانه يخاف ازعل لان زعلي شين !!! ويهاوش ويقول انتي تحبين النكد وتدورين على المشاكل وانتي مريضة وحياتك توقفينه عشان موضوع تافه مايستاهل اي نعم امي غير ك ؟؟؟ امي ابجيب له وانتي بعدين مو لازم اول ماتقولين لي اجيب الشي .....(على العلم ان المزرعة جنب السوق على طول يوم نروح السوق) ؟

وانا بصراحة ابي رايكم بالموضوع ؟؟؟ وكيف اتعامل معه في مثل المواقف هذي ؟؟؟؟

والله اني ماودي اني زعلت بس جدا جدا حز بخاطري وغصب عني ...خاصة اني توي جاية من فترة زعل !!! لكن ماقدرت اخبي اللي بخاطري؟؟؟؟

وهل انا على حق او غلطانه؟؟؟

وهذا الموضوع صاير اليوم المغرب ؟؟؟



ردوا علي يازوجات الشماليين الشرقيين المعقدين التعبيين؟؟؟؟؟؟؟؟؟؟؟؟؟؟؟


جزاكن الله خير الجزاء!!!!!!!!!1

 

[فراشة طائرة]

هو يحاول انه يعاندك برفضه انه يجيب الخضار لك واكيد فيه سبب للعناد هذا
ومن ناحية انه جابه لامه المفروض ماقلتي له تجيب لامك وانا لا هذي امـــه ياليت ماحطيتي نفسك بالموف هذا اعرف انك انقهرتي بس المرأة الذكية تحاول انها تتناسى حتى لو غصب عنها يعني يوم قالك امي قالت لي جيب لي واخذت منها وجبت لك المفروض قلتي جزى الله عمتي خير كأنها حاسه فيني اني مشتهيته وبكذا راح تشوفي كيف بتكون نظرة زوجك لك ..
هذا رأيي

 

[قلب مكلوم]

اختي الكريمة ..

لا تسوي بينج و بين زوجك مقارنات مع اهله ..

شكلج توج متزوجه

حلي عندج طووووووووولة بال لو انج مستخدمة مع زوجك اسلوب التغلي و انج تتمنين ذا الشيء و حبيب قلبج ما بيقصر .

بقولج عن نفسي ..

احيانا واحنا بالسيارة ندور يجي شيء على بالي مشتهيته و مارين على المحل و نتعداااااااااه ولمن نقرب نوصل البيت اقول لزوجي اتصدق .. جااي في بالي شيء و مشتهيته حيييييييييييل .. يقول لي قريب والا بعيد اقوله ترى مرينا ع المحل بس ادري ان غلاتي عندك بيخليك تتعنى و تروح تجيبه لي .. وبعدها اسكت ولا كلمه اقولها له و لا اعطيه فلوووس اهو ملزوم يصرف علي مو انا اصرف على نفسي ..

وبقولك كلمة ثاااااانية .. من بدااية زواجنا كان يقولي زوجي لا تقارنين بينج و بين اهلي .. لمن سألته منو تحب اكثرررر انا او اخواتك ..

صدمني رده وبنفس الوقت كبر بعيني اكثرر

بعدها ما سويت مقارنات لان يقولي كلكم بكفة و امي و ابوي بكفة .. وكفة امي وابوي ترجح عليكم ..

حرمت اني اقارن

ماشاء الله تبارك الله ..

موفقة يارب ..​

 

[الجده الصغيره]

بصراحه موقفك خطأ......المفروض فرحتي فيه ولو كنت زعلانه وشكرتيه بس نبهتيه انه لو من المره الأولى كااااااان ألذ بكثير.........هنا بيفهم مغزى كلامك ويفرح بتقديرك له ويبحث عن رضاك في المرات القادمه......

 

[تومة الامورة]

انا فاهمة انتي ليش زعلتي انتي حسيتي انك مالك خاطر عنده بس نصيحة لا تزعلي من اي شيء ليه علاقة باهله وخصوصا امه ولا تحطي مقارنات انا لو مكانك يمكن تحز بخاطري بس باجامله واشكره واعمل نفسي فرحت انه تذكر ان نفسي بها النوع من الخضار صدقيني الزواج يبيله مسايرة ونفس طويل وصبر والله يوفقك.

 

[موسي فراوله]

ههههههههههههههههههههههههههههه

معليش اضحك وانتي معصبه

لكن من الذكاء أن الشخص مايدخل في نقاش او حرب هوا خسران فيها

وبما انك بمجتمع عربي ومع شمالي شرقي فراح تخسرررررررررين

مع أهله

لالالالالالالالالالالالالالالالالالالالا

تدخلي في مقارانات مع أحد بالذات مع الزوج اعملي اللي تبغينه

بطرق اخرى وانتبهي من المقارانات لأنه راح يئلمك بكلامه حتى لو بداخله العكس

وأسمحيلي ياقلبو طريقتك غلللللللط

مع الشمالي الشرقي لو قلتي قلبو حبيبي ابغا كذا كذا بأسلوب كوميديان ومبتسمه

حيقول لك لا قولي طيب قلبو

أرااااااااهنك لو ماحسيتي بنفسك غير بالمكان اللي تبغيه وماخذه غرضك وفوقه حبة مسك

تعاااااااااااملي بذكاااااااااااااء أدقني فن التحكم خلف الكواليس00

 

[وهم79]

اختي الغاليه
لا تقارني نفسك بالمه قالها البنات لكن انا بقولك شي ثاني
الي سوه زوجك يقهر وفقع المراره انا والله انقهرت لك التصرف معه رح يكون بدون زعل
بالحيله والكيد رح تاخذي منه وتحطينها بصحن وتخليها قدامه ولا تاخذين منها
وتجي تلبسي مغري وتغريه
يصير هو يبيكي وانتي تمنعي عنه الين ما خلاص قولي له انا ان طلبتني شي البيه لك لك انت الله يسامحك وبس اسكتي خليه يحس بالي حستيه لكن لا تقولي له كذا الا لا خلاص اخذ الي يبيه وتعاملي معه ببرود والمشاكل ابدا ما تنحل بطقاق والزعل والخناق بالحيله والمكر

 

[غلا روووحي]

هلا يااااقلبي انا شمالية شرقية يمكن لان هذا نمطي مااشوف بتصررف زوجج اي غلط بالعكس حسيت فيه لما طلب من امه شوي لج ماقدرتي هالشي خذ شوية حق زوجتة مانسى انها طلبته؟؟؟؟

ماادري انتي ليش زعلتي ليش ماجابه لج بالوقت؟؟
او ليش جابه لامه؟؟ امه هذي امه وحده بس ماغيرها لكن الزوجة في 4 وكلهم يجيبون عيال له؟؟؟
اختي كبري عقلج وعمرج حتى بينج وبين نفسج لاتقارنين نفسج بامه لانه ماله دخل في بعض غلا وحب الام غير والزوجة غير
امه لو تطلب كوب ماي وماجابه ربج يحاسبه لكن انتي لاااا؟؟ بالعكس المفروض تردين عليه تقولين له يعطيك العافية انك اهتميت بامك بكره عيالنا يهتمون فيني والحمدالله حبيبي مانسانس متذكر كون انه مانساج حلووو ودليل علا حبه لج وليش تقولين يخاف ازعل زعلي شين؟؟؟ ليش يخاف ليش ماتقولين يحبني ومايبي يقعد يوم مايكلمني ليش تشككين في حبه لج وليش تعتبرين اذا طلبتي شي وجابه علا طول دليل حبه لج؟؟؟
عااادي اهم شي جااابه ولانه يحبج جابه ترت مو ملزوم ياخذ شوي ويجيبه لج
حبيبتي زوجج يحبج حااافظي عليه والله يهنيكم وعن الزعل وبالتوووفيق ياقلبي واتمنى مازعلتي من كلامي ودعواااتج لي

 

[رجة بس برزه]

تصدقيني عاد يا معوده مكبرتها وهي صغيييييييييييييره الشمالي الشرقي أسهل منه ما فيه دغري ما عنده لف ولا دوران وما يحب كثر الهرج انتي كثرتي بطلبك للخضره وأذا ما جبها لو سكتي بيحس بندم وبيرجع لك لكن لا جلستي تقرنين بينك وبين أمه أجل خذي الي بيجيك الا اهله وبذات امه وانا معاااااه وانتي اكيد توك عرووووسه اصبري وخليك ريلكس مع الشمالي وبتكسبيه

 

[مليت اقول ياليت]

شوفي ياقلبي انا مارح اقولك انتي خطي انتي من حقك تزعلي وتتضايقي بعد موقفك ذكرني بموقف صارلي انا ام زوجي ماتطيقني بعيشة الله لان فيه شوية مشاكل بينها هي وامي وطبعا زوجي اخذني غصب عن الكل لان كان شاريني ويبيني المهم مره طلعنا السوق وشريت للامه ساعه فخمه مره وعطيتها هدية العيد المهم وبعد كم يوم اشتهيت اشتري للامي طقم قهوه يعني مفرش وتلبيسة مناديل وهيك يعني والمصيبه مثلك انه كان قدام عيونه وكنا بالسوق ورفض حاولت وبعد رفض مع انه مو غالي بس 120 زعلت وتضايقت وبينت اني زعلانه رجعت البيت وقايست الملابس الي شريتها وطلعت شوي ضيقه ومن بكره رديت ارجعها لنفس المحل وهو الي اشترى للامي ومو بس امي ولجدتي ام امي كمان يعني انتي لاتعاندين وتيبسين راسك اذا قال شي قولي اوك بيني انك زعلانه وصدقيني بيلين
عذرا على الاطاله بس حبيت اوضح لك مثال حي

 

[أم حميدة]

ختي العزيزة :
لا تحطي نفسك في موقف مقارنة مع أمه ، وهذا التصرف غير صحيح ( وجعلنا بعضكم لبعض فتنة أتصبرون ) سورة الفرقان

فأنت هو أنت زوجته ، وأمه هو أمه
والي مافيه خير في أمه مافيه خير في أحد

وأقول لك شيء ياغالية ، أن الذي منعك من طلبك ليس زوجك بل الذي منعك هو الله لأن الله هو الرزاق وكتب رزقك قبل خلق السموات والأرض ورزقك تحصليه كامل وما في أحد على وجه الأرض يمنع رزق ربي كاتب لك ،
ولما جاتك شوي من الخضرة الي تبغينها ، جاءتك أيضا من الله لأن ربي قدرها لك هذا الشوي ، وأعطاك هذا وقدر لك هذه القسمة ليختبرك ( ونبلوكم بالشر والخير فتنة )
يختبرك هل تشكرين الله أن جاءك ما تحبين أكله أم تقولين لا أريده عشان جاءت مش بالطريقة التي أبغاها
أو تقولين ،،،،،،!!!!!!!!!!!!!
كل هذا كفر بالنعمة ، لأن الإنسان إما شاكر للنعمة وإما كفورا مافي شيء وسط
فلما تقولين جاءتني ولكن ولكن ،،،،،، كأنك مش عاجبك الطريقة التي جاءتك ماتريدين فهذا نقص في الشكر فنقص الشكر هو كفر بالنعمة وهذا مايريده الشيطان أن يجعل الناس أكثر غير شاكر
( ثم لآتينهم من بين أيديهم ومن خلفهم وعن أيمانهم وعن شمائلهم ولا تجد أكثرهم شاكرين)سورة الأعراف

شفتي ماذا حصل مع قوم سبأ الذين تكلم الله عنهم في سورة سبأ ، فعندهم النعمة لكن بطروا فيها وتشرطوا على الله أن يبعاد بين أسفارهم وأن تأتيهم النعمة بطريقة ثانية بعد أن كانت الفواكه تطيح على سلالهم بمجرد أن يقتربوا منها بدون قطف فلما بطروا بالنعمة عاقبهم الله بالحرمان وهكذا سنة الله في كل من بطر بالنعمة وما حس فيها أن يعاقبه الله بالحرمان
لذلك قال الله تعالى ( ضرب الله مثلا قرية كانت آمنة مطمئنة يأتيها رزقها رغدا من كل مكان فكفرت بأنعم الله فأذاقها الله لباس الجوع والخوف بما كانوا يصنعون ) سورة النحل


وأنت مؤمنة أن الله رزاق فلا يكفي أن تقولي آمنت بالله وأنه الرزاق بدون أن ياتيك اختبار عليها ( ألم . أحسب الناس أن يتركوا أن يقولوا آمنا وهم لايفتنون ولقد فتنا الذين من قبلهم فليعلمن الله الذين صدقوا وليعلمن الكاذبين )
فالفتنة هو الإختبار
يختبرك الله ليتبين الصادق ومدعي ذلك
فتجدين مثلا الكيكة التي شريتها ووضعتيها في الثلاجة ، تجدين غيرك يأكلها فهل تقولين عادي ربي ماكتب لي أن آكلها أو تقولين ليش يأكلون وهي حقي وتزعلين وتنافخين وووووو ،
فإذا رضيت وقلت هذا ربي ماكتبه لي والحمد لله ، يزيد إيمانك
وإذا لم ترضي ينقص إيمانك وتعرض عليك نفس الإختبار كل مرة
فيعيدها عليك نفس الإختبار حتى تنجحي فيها فإذا نجحت فيها زاد إيمانك ورفع درجتك عنده لأنك قد يكون الله وضع لك منزلة لا تصلينها بأعمالك ولكن إذا نحجت هذا الإختبار .

لذلك إذا أردت أي شيء أول شيء أطلبيها من الرزاق ، ادعيه فهو الأول الذي ليس قبله شيء فإن طلبتيه منه سبحانه هيء لك أسبابه ( فابتغوا عند الله الرزق )
ثم اطلبي بلسانك من زوجك وأنت لا تنتظرين النتائج منه بل انتظريها من الله
ألا تقولين لا إله إلا الله ؟؟؟
يعني في قلبك تقولين مافي أحد يستحق أن يتعلق به إلا الله ومافي أحد يستحق أن أحبه حبا شديدا إلا الله ومافي أحد يستحق أن أتذلل له إلا الله
فعندما تطلبين شيء من أحد لا يتعلق قلبك بنفس ذلك الشخص بل خلي قلبك يتعلق بالله وينتظر النتيجة من الله

ماتقولين في الصلاة ( اللهم لا مانع لما أعطيت ولا معطي لما منعت ) ؟؟

المعطي والمانع هو الله
وعطاءه تربية منه للعبد ومنعه تربية للعبد

الله الرب المربي يربي الناس بالإيجاد والإعداد والإمداد

رضيت بالله ربا
أرضي بالله ربا يربيك
وبتشوفين الفرق !!!!!

 

[رياح الود]

تذكري دائما هذه القاعدة :اللي مافيه خير لامه واهله مافيه خير لبنات الناس
وبعدين تقدرين باسلوب زين وعن طريق المزح توصلين له وتحسسينه كانك مثلا تقولين ما شاء الله تنازلت ومريت المزرعة بدون ما تجيبين طاري امه

 

[امل2]

اولا اشكر جميع الاخوات اللي ردوا والله يسخر لكم ازواجكم ولايحرمكم جناته

ثانيا : انا مشحونة منه من كثر المشاكل لاني متزوجة ليا سبع سنوات ,,, وكلها مليئة بالمشاكل .. ومثل ماتعرفون من صفات الشمالي الشرقي انه مايعتذر اذا اخطا ولايحب زوجتو تزعل ولايحبها تروح لاهلها اذا زعلت,,, يعني بيجننني انا طفرت من العيشة معاه ؟؟؟!!

ثالثا: انا في فترة تردد وتفكير وحيرة من امري وترجيح لحياتي انا عندي منه بنوته وفي اخر زعل منه يوم رحت لاهلي بعد رجوعي ............ طلب مني ان لااذهب لاهلي عند الزعل ولاازعل نهائيا وان ارضى فيه ولااجادله ولا اناقشه في اي حاجه بس اطيعه وعندما ناقشته في هذه النقطة قالي : ان كانك ماتقدرين تحمليني فاخلاص عطيني فلوسي وتوكلي يعني يبغاني اخالعه وبرضه دايما يهددني بالثانية ودايما يقولي اذا بنيت بيت اللي فوق للثانية!!!

هذا غير الامور الثانية بس حبيت اوضح انو في امور وراء تصرفي معاه والخضره اللي كنت ابغاها كنت ذاك اليوم بروح لاهلي وانا من زمان ماخذيت معاي شي إلهم وانا مااكلها الا مع مجموعة يعني مااحب اكل هالنوع من الخضرة لحالي !!!


وعلى فكرة انا اليوم اول ماقمت الصبح كلمته عادي ولا كان شي حصل لكني ضاغطة على قلبي ..(اله وحده يعلم وش بقلبي عليه)؟؟؟


وانا بصراحة احس اني ماقدر اتحمله كل اهلي ينتقدون تصرفاته وكأن فيه حالة نفسية؟؟؟

وسبق طلق وعنده بنت تسكن معانا في البيت؟؟!!! وكثير مشاكل تحصل بسببها ؟؟!!

 

[سهم العشق]

شوفي يا اختي لا تقارني بينك وبين امه بالذات لانك ستتعبين 00 هونيها وتهون ولا تشغلي بالك في امور ما تستاهل الله يعنيك على زوجك 00​

 

[جنة أمل]

اختي ترى الزواج فيه مثل هذي المواقف كثير، كلنا نتمنى أنه ما يخطر على قلبنا شيء إلا ونلاقي الزوج طاير جايبنه لنا، لكن الدنيا ما دايما تمشي مثل ما نحب، أحيانا تلاقين الزوج يطير يجيب لك الشيء، وأحيانا يعطي للوحده طاف خخخخخخخخ. بس ما نقول غير الرزق على الله والله كريم.

 

[جامعية متخرجة]

تبين الصراحه الشيء اللي تخسره الوحده
لما تقارن نفسها مع أهل الزوج وبالذات أمه
ياشيخه زوجك فيه خير واللي فيه خير لأمه فيه خير لزوجتك
وبعدين امه من حقه يخدمها ويجيب لها لبن العصفور لو طلبته
وانتي غلطتي لما قلتي له جبت لأمك على طول إيه امه
ومن حقه يقولك امه غير إيه ياقلبي غير امه الجنه تحت أقدامه
مفروض تعينينه على برها بكل الأحوال والله تلاقينها بحياتك ويصير خاتم بيدك
وفيه خير افتكرك يعني جاب لك منه لو واحد يبي يعاند ومايبغى يجيب لك
كان شرى لأمه ولا فكر يفتكرك
الموقف حبيبتي مافيه أي شيء للقهر والزعل أقولها لك بصراحه
أبعدي الشيطان عن طريقك ويمكن نيتك طيبه لكن حطيتي نفسك في موقف سلبي وضدك

 

[فاقده الغاليه]

خخخخخ شكلك طالبه كراث ومن كراث مزرعه التركي بعد خخخخخخخخخخخخخخ
والله والله مكبره السالفه طيب يمكن يوم تقولينله ماله نفس واليوم الي طلبته امه كان مروق بعدين هذي امه ولو ماله نفس لازم يجيبلها لانه اذا قال لا بعقها وانتي ماترضين عليه

انتي شوفي نفسك احيانا يطلبك شي ولاتكونين مروقه