شوفوا مصيبتي اللي ما تدخل العقل وادعو لزوجي بالهداية

عادي يمكن يغار من الولد انتي لاتسولفين فالولد كثير قدامه يمكن هو مقهور لانه ماجاكم اطفال ويشوفك متعلقه فيه
الله يرزقكم بالذريه الصالحه ياااااااارب ويسخرلك زوجك
 
السلام عليكم ورحمة الله وبركاته اختي الفاضله ان بعض الضن اثم والعجله بالحكم من أكبر المصائب ويجب علينا حسن الضن بالله في جميع الأحوال والدقه والحذر عند اتخاذ القرارات والحكم بها على الغير سبحان الله قد يكون صادفت مشكله بالعمل او خارج العمل مع زوجك في نفس الأيام يلي تم فيها زواج اختك بالصدفه وكانت هي سبب كدره يااختي الحبيبه ولست جميع الرجال يحب يصرحو بمشاكلهم ومعاناتهم لدى زوجاتهم واهلهم الأغلبيه منهم كتومين واما بخصوص نقص وغيره بأذن الله لا ممكن يكون نوع من العناد بينك وبينه بسبب تصرف او كلام وقع بينكم جرحه دون قصد منك استاء بسببه وعرف نقطة ضعفك وبالغ ولكن بطريقتك الحلوه الخلوقه اصلحي مابينكم بفضل الله وأكرمي اقاربه ورح تتفاجئن بالتغير وتشوفين حنانه وطيبته باءذن الله بس اكسبيه وراعي المشاعر والكلمااااااات بالذات قد يكون زوجك نمطه شرقي حاسبي بالكلام والتصرف امامه وربي يوفقك ويرزقك تؤم صالحين حلوييييييين يارب العالمين شكرا
 
قلة عقل المفروض يحب اليهال لانه محروم منهم ... وبعدين طفل ما يعرف الكلام يغار منه ؟؟؟ هذا اناني وغيرته فاضيه .... بس انتي الحين خففي من زياراتج لهم ولا تحرجين اختج اكثر وابعدي سيره الياهل من قدام زوجك يعني اذا تبين تشوفيه لا تقولين لزوجك ودني لبيت اختي .. اتفقي مع اختج ان تزورون بيت الاهل عشان تشوفينها والبيبي .... ولا تفتحين موضوعه مع زوجج ...
 
:icon26:عادي هو يغار مو من الولد من ابو الولد

لانو جاه عيال يمكن هذا يعتبر هذا نقص في رجولته،،

المهم الموضوع طبيعي
 
كارهه الظلم قال:
الهنوف حبيبتي ابي اقولك هالكلمات ياعمري ,,,, واتمنى تقبليها مني كأخت.........
1-خلي نفسك مكان زوجك ,,,, لو هو متعلق ببنت أخته أو أخوه الصغير وطاير فيه بالأمانه وش حيكون ردة فعلك؟
2- راعي شعوره كزوج غيور عليكي { الرجال مهما كبر يظل طفل صغير }تقدرين بأسلوبك تتفاهمين معاه
ويمكن لان لسى ما الله رزقكم بالذريه شايل بنفسه......؟
3-مهما حبيتي أحد لاتقولين هالشيء قدام زوجك بالمبالغه بالكلام حيل أنتي اكيد فاهمتني....
انتي لو يجيك في يوم ويقولك أنا أموت ببنت أخوي حيل وكل ماشافها مايخليها تمشي على الارض,,, والله يجن جنونك أقل شيء بتقوليله وانا {قد ايش تحبني} وليش تدلعها ومن هالكلام....{الغيره موجوده عند الكل }
4- ومن الخطأ أنك تقوليله عيال اختك ماعاد ابي اشوفهم { الرجال جبل بالعناد صدقيني } مالهم شغل بالموضوع وبينيله محبتك لهم ماتغيرت.......

5- جهزي نفسك وشكلك وقولي لزوجك خلينا نطلع نتمشى بره المنطقه يعني يعيد عن اللجه وحركة الناس وقبل كل شيء تعوذي من ابليس واقريء المعوذات وتوكلي على الله ,,,, وناقشيه بهالموضوع وقوليله من هالكلام الحلو بينيله انه هو الاهم بحياتك وبعمرك كله ماتشوفين غيره قوليله انا عارفه انك تغار علي وتحبني ولا ماتسوي كذا انت اكبر واعقل من انك تحط راسك براس طفل ومن هالكلام ,,,,,,{ ولو تجيبن له هديه يكون أحلى }
وقدامه قللي من كلامك ومحبتك لولد اختك....... لاتخربي حياتك على حسااب الغير.....

{ يارب أكون قدرت أساعدك ولو بالشيء البسيط وأعذريني على طول الكلام }
دعواتك لي الله يفرّج همي....وربي يريح بالكم ياارب
أنقر للتوسيع...


صح كلام االأخت
والله انا لو زوجي يجب احد من عيال اخوانه او اخوااااته ويصجني فيه كان طرررت من محلي
انصحك لاتبينين له حب ولد اختك

وانا كمان كنت حامل وكنت احب بنت أختي وفعلا حرمني منهااا بدايه زواجي بس بعدين الحمدلله
عادة الميااة لمجاريهااااا
يعني مالك الا الصبروترى ا الرجاال يغاااار
يعني انتبهي لبيتك ولزوجك لا يطير من ايدك لو ما يحبك كان ماغار عليك :blushing:

يالله الله يوفقك
 
الهنوف الحلوة قال:
مساء الخير للجميع.
أرجوكم لا تهمشوني ترى مشكلتي ما صارت ولا استوت مع زوجي اللي ما أدري بأيش أوصفه!!!
هل أقول عنه جن وقعد ؟؟!!!
واللا تخبل؟؟؟!!!
واللا عقله صغير؟؟!!

سمعوا سالفتي...
تزوجت من سنتين والله ما رزقنا عيال... وسلالمات ان شالله كلها سنتين مو عشرين سنة..
بعد سنة من زواجي اختي تزوجت وحملت من أول شهر.
اللي صار أن زوجي تبدلت ألوانه لما سمع ان اختي تزوجت وحتى لما خبرته كتم كثير تقولون كان الأمر بيدي. المهم ولدت أختي وجابت ولد مثل القمر وأحلى بعد من القمر. لكن اللي صار شي ما يدخل العقل والله ولا يقبله دين ولا مذهب. عمركم شفتوا رجال عمره 31 سنة يحط دوبه ودوب طفل ما تجاوز الـ4 شهور؟؟
يا جماعة المفروض الزوج إذا حب زوجته يحب أهلها بعد الصغير والكبير عشان الحفاظ على العشرة. أنا بموت على عيال اخته الأربعة وأعاملهم والله يشهد كانهم عيالي ويوم عيد يوم اللي يدخلون علي بالشقة.
لكن زوجي على الرغم من طيبة قلبه الا أنه صارحني وقال... ولد اختك الصغير ما أشتهيه وإذا كنتي تحبيني لا عاد تدخلينه شقتي لأني مش محلل ولا مبري لك ذمة !!!!!! تخيلوا!!!:surrender:
والله نزل علي الكلام مثل الصاعقة. مش بس كذا .. إذا جابته أختي لي يطلع من الشقة ما يشتهي رقعة وجهه. ويقول لي هاذي آخر مرة أشوفه في شقتي.
ويوم كان صغير في المهد حتى اختي ما بعد تطلع من الأربعين جاي ياخذني من بيت أهلي يوم رحت لها زيارة وطلعت له الطفل لكنه والله أحرجني قدام أخوي وصرخ في وجهي وقال ما ابي أشوفه!!
وإذا سافرت معاه وحبيت أشتري هدية حتى لو كان سعرها ريال نتشاجر ويقول لي هو مش ولدي وأنا مش ملزوم أشتري له.
والله رحت مرة بيت أهلي وشفته وحظنته من قلبي وأنا أبكي بحرقة وأقول اش ذنبك عشان يكرهك كل هالكره . لا ويقولها في وجهي أنا حاقد على ولد اختك ولا تجيبين لي سيرته. وإذا قلت له ودني شقة أختي عشان أشوفه يرفض و يقول لي خلي أبوك يجي يوديك له.
والله يا خواتي إني كتبت لكم باختصار شديد عشان ما أطول عليكم وبعدين تملون من القرآة.
واللحين هو مهددني ما أدخله بيتي...
بالله عليكم شوفوا لي حل قبل ما أجن..
أنقر للتوسيع...



من كلامك يمكن فيه سر زوجك يعرفه ومايبغي يعلمك

والله اعلم

جربي تناقشين معه من جديد

مابي اشكك بشي بس

مايكرهه الا فيه شي غامض

الله يصلح حالكم​
 
حبيبتي والله مشكلتك مشكله صدقتي الوحده تشوف اولاد اخوانها زي اولاادها خاصة اذا جو قبل لايكون عندها عيال بس زوجك اكيد هو عندو ازمة نفسية :sadwalk:نفسو يكون عندو عيال واتوقع انة يحس انة هو السبب بس هو معذور يتعقد لما يشوفك متلهفة على الولد الحل في رأي انك تتصرفي عادي قدامة لما يكون الولد موجود وماتجيبي سيرتة ابدا لفترة صدقيني راح ينسى ولما تروحي عند ولد اختك سوي الي تبغي ولاتجيبي سيرةلأهلك عن الموضوع.:bye1:
 
كل ما في السالفه

زوجك يغااااااااار

عاد انتي استغلي هالموقف

وحسسيه بحبك وان ولد اختك مجرد طفل والاطفال محبوبين عند الناس جميعا

وان شاء الله اذا جانا طفل ونحبه احنا الاثنين واختي تحب طفلنا ....

لا تعصبي وتاخذي الامور بحساسيه الله ينولكم بالذريه الصالحه ويفرح زوجك وكل هالغيره تتلاشى

 
اللله يرزقج الذرية الصالحة أخيتي لا تحطين راسج براس زوجج وما تا خذين المسأله عناد وحاولي مثل ما قالو خواتي قبل لا تيبين سيره الولد الله يحفظه جدامه وخليج عادي استغفري واااااااااايد عشان الله يرزقج
 
لاحول ولاقوة الابالله

الصبر يا اختي الصبر

ومع كلام اختنا الغالية كارهه الظلم
 
هههههههههه السالفة ومافيها ان زوجك اناني ويمكن انتي تتكلمين عن الطفل كثير وحقد..وغار لانه ماعنده اطفال..
اذا شفتي زوجك ماله داعي تجيبن طاري الوليد عنده..وبس انتهت المشكلة..وان شاء الله تحملين وتنحل..
 
زوجك طفل بقوة

ويمكنك دايم تتكلمين عن ولد اختك قدامه او محسسته انك تحبين ولد اختك اكثر منه

حاولي ماتتكلمين عن ولد اختك كثير لحد ماينسى هو من نفسه
 
يغار من طفل والله من جد مو صاحي
استغرب من اللي قالو تخيلي هو يحب بنت اخته صغيره اكيد بتنقهرين معقوووووله فيه بنات كذا اغار من طفله الحمد لله من جد العقل نعمه ..
القلب دكان كلن له مكان امي لها مكامن وابوي وخواتي واخواني وصديقاتي اطفال اخواني وخواتي عااااااادي وزوجي له مكان ونفس الشيء الزوجه معقوووووول زوجه تغار من طفل اجل وش بتسوي لو حب اخته او امه ياربي لا تبلنا :crazy:
 
حبيبتي الهنوف

اسمعي مني لاني مجربه نفس الموقف واعظم بعد

بتستغربين لو قلت لك ان زوجي بعد ماكان يحب اهلي ويعتبرهم اهله شلون تغير

حرماني وحرمانه من الذرية خلاه يتغير كثييييييييييييييييير

قام يحقد على خواتي بعد ماحملو وانجبوا

والمصيبه مو بس كذا

عيالهم اللي اعتبرهم فلذة كبدي قام يكرههم ويطيق العما ومايطيقهم !!!!


تبين تستغربين اكثر

في كل ولادة من ولادات خواتي يفتعل مشكله ويطردني من البيت


كل هذا يهون قدام " دعائه وسبه " لهالاطفال الابرياء

مرة من المرات ورب البيت ما انساها

ماشفته الا يدعي على عيال خواتي بالمرض الخبيث

هنا انا انهرت

مو لاني خفت على عيال اختي

لاااااااااااااا ، لاني ادري ان عيال خواتي اطفال ابرياء الله حافظنهم من كل سوء

اللي ضايقني هو زوجي

كيف يقدر يدعي وينطق بهالكلمات

من يومها عرفت ان زوجي " انسان مريض "

نعم انسان مريض وهذا قدري والله يعيني واوقف معاه واخليه يبرأ من هذا الداء


الموضوع مو سهل

ولو تعاملتي معاه بنفس اسلوبك هذا بتشوفينه يوم عن يوم يتمادى ويصرح بكراهيته لكل اهلك

اعملي زي ما عملت

وصلت لخواتي بطريقة غير مباشره اني مو دايما اقدر استقبلهم واستقبل عيالهم

قلت لهم ان زوجي صار يتحسس من كل الاطفال

واني قد ما اقدر ما ببين اهتمامي وحبي لعياليهم

خواتي وامي واهلي تفهمو الوضع وشجعوني

حبيبتي ما انكر هالموضوع سبب لي ارق شهور طويله ومعاناة ليومك هذا

لكني الحين مرتاحه نوعا ما

على الاقل ماسك لسانه عنهم

بيني وبينهم ادللهم وادلعم واحبهم ويحبوني وما تاثرت علاقتي باخواتي ابدا


وانت زي ماقلتي بعدكم سنتين

والامل كبير بالحمل ان شاء الله

لاتهملين علاجك وحسسيه دايما بانه بيصير اب في القريب العاجل

دايما تكلمي عن عيالكم ولا تجيبين طاري عيال احد بالمره


بينج وبينه قولي له حبيبي لا تحط نفسك في مقارنة مع ولد اختي

صحيح ولد اختي احبه ، لكن انت كل حياتي ومستقبلي معاك وانت ابو عيالي

لازم تبين له مكانته عندك

صدقيني هو بيتفشل من نفسه وبيصلح غلطه وشويه شويه بيتقرب من اهلك من جديد

والله يرزقني ويرزقك وكل محروم الذرية الصالحة
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل