شغالتي وموضوع زوجي اللي محيرني

[ميااده]

السلام عليكــــــــــم كيفكم بنــــــــــــات؟؟؟
ادخل في الموضوع على طول انا موظفة مؤقتا يعني بين فترة وفترة يجيني تعاقد , زوجي ولله الحمد مو مقصر علي بس فيه مشكلة راح يجينا شغالة وزوجي يقول انتي ادفعي راتبها اذا جات انا ماعندي مانع لكن عرفت في الاونة الاخيرة ان سلفاتي موظفات رسمي ورواتبهم ماشاء الله عالية ضعف راتبي مرتين لكن ازواجهم هم اللي يدفعون للشغالات واحس اني لودفعت احس اني ناقصة عنهم واذا حصل بيني وبين زوجي اي مشكلة اقول في نفسي والله مادفع غيري لايدفع ولاشي ولايتعب نفسه ويعني مو بس ادفع الشغالة رايح يكون لبسي واغراضي الشخصية وكمان اي واجب علي سواء وحدة ولدت ولا تزوجت رايح انا اللي اعطيها مع ان في الصيفية وايام الاجازات ماينزلي راتب
بنـــــــــــــات والله موبخل مني لكن ابغى احس اني مثل اي زوجة بالعالم لها حقوقها قولولي كيف اتصرف معه وكيف اقنعه وهويقولي ترى زوجات اخواني يدفعون وانا قلت لاوالله انهم مايدفعون ؟؟
ارشـــــــــــــــــــــــــدوني للحل؟؟؟؟

 

[سمر الحلوة]

مثل سالفتي موظفة عقد كمان غير تحريش اهلة اصرف علي اللبيت اساعدة مابيبن بيعينة طماع

 

[اة من ظلم البشر]

هونيهاوتهون ياختى واللة يفرج كربتك وتراكثر الدق يفك الحام يعنى كررى على زوجك لين يقتنع بس لاتسببين لنفسك مشاكل وبهدوءودلع ان شاء اللة يقتنع

 

[اميرة ذوق]

اتركي الوظيفه ما دامك بالبدايه نصيحة مجرب والله تعيشين تعاااسه مع هالراتب الي الكل يطالع فيه حسبي الله ونعم الوكيل

 

[سمر الحلوة]

اسمعي انا قرارتخذتة اذا يتمنن عليك بروحة وجية لمدرسة حطي سواق لاتصرفين علي البيت بطقاق مالة شي عندك رقم حسابك رقم سري لاتعلمينة بة راتبك وش كثرة لاتعلمينة بة

 

[سمر الحلوة]

لاتتركن الوظيفة لانة ماتدرين الرجل هو يطلقك او تعيشين معة عز نفسك الوظيفة مستقبلك لاتتركينة اذا يبلشك علي راتب اصرف هو يصرف جمعي فلوس حساب ثاني حولي الي حساب ثاني بدون مايدري انك عندك فلوس لاتعطينة فلوس بيدة اشتري اغرض لبيت شوية حق 200 ريال حق توصيلة لك مدرسة بس باقي خبية لاتعطينة صرافة يصرفلك انتي اصرفي ا او احد من اهلك يصرف يجيبة لك المهم لايعرف وش بقي بصرافة فهمتي سوي مثلي

 

[ميااده]

المشكلة ابغى اسعد اهلي من خلال راتبي لان عشنا ظروف قاسية قبل ماتزوج والله احس اني ادخل الفرحة على اهلي مااقدر اترك التعاقد بعد ماشفت الفرحة بعيونهم الله يخليهم لي يارب وخصوصا ان مالهم دخل الاشي قليل

 

[ام فيصل2222]

أنا رأيي من رأي الأخت سمر الحلوة الله يحلي أيامها وأيامنا جميعا الرجال ماينعطى وجه لآزم بالبداية مشاكل لكن كثر الدق يفك الحديد طنشي لآتكونين مثلي أنا مصروفي 400 وكل شي فيها زوجي يقول مالي دخل لوتبين تحرقينه شايل يده فيها جوالي وكل أغراضي وحتى لو بسير على أحد أو بيجيني أحد الحلى وتوابع الضيافة منها هدية زواج أو مولود منها لو أقوله جب لي معجون أسنان من البقالة يخصم من المصروف و و و و أنا ندمااااااااااااانة على سكوتي من أول ومستحيييييييييييل يتغير فنصيحة لآلآلآلآلآلآلآلآلآلآلاتكونين مثلي

 

[سمر الحلوة]

شكر لك يام فيصل انا اكلمكم لاني عايشة التجربة رجلك اذا يوديك مدرسة كل صبح يجيبك تصرفين حق توصيل 200 ريال لبيت اغراض اكل بس انتي اشتريهن انتي حاسبي ماهو تعطين بيدة فهمتي وباقي مالة شغل بة لاتطمعينة من بداية اذا شغالة تجبين عشان عيالك اذا مايدفع انتي ادفعيها بس ماتشتغل غير عندك لاتخلينها تروح اهلة يشتغل عندهم اذا تكلم قولي هذي انا ادفع راتبها بس نصيحة اذا انتي تعاقد لاتقدمين مدام زوجك مايدفع تخافين تورطين مايجك تثبيت فهمتي

 

[&دانتيلا&]

على الأقل قولي الوقت اللي يكون فيه تعاقد بادفع الراتب.. ووقت مايكون عندي تعاقد انت تدفع..
شوي شوي لحد مايتعود على الدفع.. هو بس خايف يتورط في رواتبها ومايقدر يسدد.
واكيد الفرحة اللي تشوفيها في عيون اهلك تنسيك كل التعب.

 

[ام مــنــاف]

لاتقلبي ابدا بهذا الشرط ولاتحاولي تقبلي على اساس مع الوقت رح يرضى او تقدري تقنعيه
بيصير بعد كذا كل شي عليكي
الله يهدي زوجك ويسخره لك

 

[الشتاء الدافئ]

بما انك لستي رسميه فريحي نفسك من هالدوامه ..الموظفه تكرف وتعبها رايح لغيرها ..شوفي اللي ماشاءالله نايمات الضحى ومريحات رجيلاتهن ومعتنيات بعيالهن ومسيرات في العصر وماليات الاسواق ماشاء الله ايش الفرق بينا وبينهن والله ان عندهن الشغالات وساكنات الفلل ولابسات الذهب وهن مادفعوا ولا ريال وانتي ياللي تكرفين موزعتن راتبك على اهلك وعيالك وشغالتك ورجلك واهله.. لآ والوزاره ظالمتك في مستواك ومستحقاتك وبالعه حقوقك ..اقول راتب العاطلين الفين ريال يبدا السنه الجايه وبيشملك ماقصر ابو متعب ..اسمعي نصيحة موظفه رسميه تعاني من 16سنه وكبري المخده واهلك رزقهم على الله ..

 

[كرااميلا]

الله يرزقك من واسع فضله ويغنيك
وييسر لك جميع امووورك

 

[سمر الحلوة]

لاتردين عليهن مايعرفن مصلحتك اذا طلقك زوجك او تزوج عليك وش تسوين

 

[مـــاربيل]

حبيبتي جيبي الشغاله واعطيها راتبها انتي واذا انتي مو بالبيت وديها عند اهلك
يعني قسمي شغلها بينك وبين اهلك بكذا تكوني خدمتي اهلك وريحتيهم
وحسستي زوجك انك ما تصرفي عليه وراتبك مو ملكه
مساله الملابس والاغراض الثانية والله لو راتبك مليون هذا حق عليه كسوتك وسد حاجة البيت ولا تتنازلين عن هالشي واتفقو على هالشي من اولها علشان ماتندمين تالي

 

[candy candy]

حبيبتي الحال من بعضه ان زوجي مبسوط ماديا واهله كذالك ولا هو في حاجه لراتبي ابدا ومع ذالك انا ادفع راتب الشغاله بالرغم اني الان في اجازه واللي ينزللي ربع الراتب والشاله هذي تشتغل لي ولااهله في نفس الوقت لان شغالتهم سافرت ولا حارمني اعطي اهلي او اساعدهم لوبريال مع ان اهلي محتاجين وظروفهم زفت وطيبين معه للغايه بس وش قولك في اللي ينكر المعروف
الله يعين مايتعب اللي الحرمه مكروفه من كل النواحي ولا نهايتها الله يعلم بهامن رايي لا تسوين اللي سويته من اول يوم سلمته بطاقتي وانا اضحك حسبته بيخاف الله فيني بس للاسف رجال مايحبون الا انفسهم