معلومات Noufshamri
- إنضم
- 4 مايو 2020
- المشاركات
- 1,036
- مستوى التفاعل
- 1,132
- النقاط
- 113
-وين المطبخ اللي بنيته أيسر؟!؟
- المطبخ؟! اااه المطبخ؟؟ بتعرفي شو؟ بما إنه رح نرحل...فش داعي نتكلف..و بعدين ايهم صار يشتغل و أنا ما بحكي معاه نهائيا وما بدي منك أي اشي الاتفاق موجود...ما تنزلي لتحت إلا للضرورة....
- إنت وعدتني؟! أيسر؟!
الحمل الوديع، اللي تحايل علي حتى أرجع...طلعت نيابه شوي شوي...
مسكني من إيدي و شد عليها كتير...
- مطولة و انتي بتحققي معي؟ كإنك أخدتي أكتر من حجمك؟ إنتي مين حتى تراجعيني بكلامي؟ أوعك تفكري إني ما بعرف بموضوع مرت عمك! بعرف إنها طردتك و عفكرة ههههههههههه هي اللي حكتلي أتصل فيكي....مصاري ما بدفع متأخر...بالمحكة ما بطلق أنا مش أهبل.....مع إنه مرت عمك استغلتني شوي بس يللا خمسين دينار حتى تقنعك على الكندرة....و بعرف إنه مكانك هون...هالمرة كندرتي فوق راسك بدك تقعدي و تسكتي....أنا نازل أحكيلهم إنك شرفتي...كلمة زيادة معهم أو بدون احترام الليلة بتكون جنازتك....و عفكرة أنا مش تبع سكن بعيد عن أهلي...أنا و ياكي باقيين هون....
أيسر بيحكي و أنا زي الهبلة طول الطريق بفكر كيف رح أفتح معه صفحة جديدة...هاي مش أول مرة بنخدع فيه و منه...وقفت بين حيطان الغرفة و حاسة الدنيا بتدور حوالي...تركني و نزل....
رجعت للزنزانة، للحبس..شو هو نوع الزلمة اللي بيستغل ضعف أنثى؟!
خطر على بالي ممدوح...
حسيت إني أنانية...بفكر فيه بس لما اتعرض للمشاكل...
فتحت باب السطح، قربت من السور بدون تفكير...المكان عالي...مرت عمي هي اللي اتفقت معه...مقابل مصاري......أيسر ضحك علي..أخوه هو اللي تحرش فيني...أخته هي اللي ذلتني....هو اللي طلقني قدام كل العيلة....يا الله...شو إني غبية.....الدنيا صارت تلف براسي و صرت أشوف مخرجي هو الموت...
حطيت إيدي على السور و انا بتطلع لتحت....أكيد ربنا رح يسامحني لو انتحرت هلا...
-منال...منال....
صحيت من تفكيري....استغربت....لقيت ساندرا مرت أيهم....
بدون ما أحكي ولا شي...قربت علي بسرعة و ضمتني....
-أنا آسفة، آسفة عاللي صار فيكي....أنا بعتذر لو طلع مني أي كلمة غلط....أنا....
كنت متشنجة و أنا بتطلع بعيونها....
مسكت إيدي بحنية...
-بوعدك إنه ما أتركك لحالك....والله أنا شفت الويل معه بس ما بعرف أتركه...ما صارلي زمان راجعة لعندهم...ما قدرت أتركه...ما قدرت...
ضلت متمسكة بإيدي...نزلتني على بيت العيلة....
دخلت بخطوات بطيئة....
شعور اللي ماشي باتجاه منصة الإعدام...
طلعت حماتي من المطبخ و بلهجة سخرية: أهلين...أهلا وسهلا والله....
نظراتها كانت من فوق لتحت و كأنها مش عاجبها بس كرمال إبنها رح تسكت...
كانوا عم بحطوا أكل...لقيت حالي بروح للمطبخ و ببلش أجيب صحون...
تقريبا بلعت لساني و نحنا على طاولة السفرة...الأكل كان طعمه حزن...
ساندرا كل شوي تقسم و تطعميني..الكل لاحظ اهتمامها فيني...
سماهر و أيهم كانوا مش موجودين...
عمي صار يفتح سير غريبة و تقيلة دم حتى يفرجيني إنهم عائلة مثالية...و بلهجة سلطان عثماني بفخم بالكلام...
-بابا أيسر بدي تحصرلي كم مدخل كهربا بالبيت...
على فكرة اليوم شفت أبو نصرت و كان مشتاق إلكم جميعا....مفكر بعد صلاة العشا يوم الجمعة أزوره بدي أشوف وقتي كيف لو بسمح.....