سلسلة هدوء التربية

[راجيه الرضا]

الهدوء دايما بيكسب ?

شكوى الأمهات المتكررة

أنا أم عصبية ، بتعصب ، بصرخ ، بضرب ، أعمل ايه ؟

علاقتى بأولادى سيئة
أنا حزينة و غير راضية عن نفسى

نسأل الأم بتتعصب ليه
تقول من الضغوط و المشاكل
اعمل ايه ؟ ?

الهدوء سلوك

و السلوك مبنى على فكرة ثم مشاعر

يعنى لو ضبطت أفكارى و مشاعرى أقدر أكون أم هادئة

يعنى مطلوب منى أكتم فى نفسى و أحزن ؟

لا طبعا
بس برضو الأطفال مش أداة لتفريغ الأفكار و المشاعر السلبية

الموضوع محتاج وقت ..

أكيد

عشان كده قررنا نحاول سوا

مع بعض هناخد حبة خطوات تساعدنا فى الهدوء مع النفس و الأطفال و العالم المحيط ..

أول خطوة النهاردة هى
?الملاحظة ?

نلاحظ تصرفاتنا و تصرفات الأطفال
امتى احنا بنتعصب ؟
امتى هما بيتعصبوا ؟
هل بيقلدوا تصرفاتنا و كلامنا وقت العصبية ؟
لو هما أخوات ، الكبير بيتصرف مع الصغير إزاى ؟
ايه الأفكار الى بتجيلى و بعدها بصرخ أو بضرب ؟
ايه مشاعرى قبل العصبية و بعدها ؟

ندون كل ده
مع تدريب النفس على كظم الغيظ

ده مش امتحان مفيش درجات عليه
ده كشف
نشوف احنا وصلنا لفين عشان نعالج

و لحد ما نتقابل تانى
احضنوا أطفالكم و عرفوهم بحبكم

ربنا يعين كل مربى بيحاول
و مهما حصل هيفضل يحاول ?

صفحة عفراء ​

 

[راجيه الرضا]

مرحبا بكم فى سلسلة هدوء التربية ?

المرة الى فاتت طلبنا منكم نلاحظ نفسنا

و نشوف ايه الى بيحصل أوقات الغضب و العصبية سواء معانا أو مع أولادنا

ايه الفائدة من الملاحظة ؟

أننا نشوف أنفسنا فى عيون أولادنا

و بعد الموقف ما يعدى نبص عليه تانى من بعيد

هل فعلا كان يستاهل كل الى حصل ؟

هل لو حد كان عمله قدامى كنت هشوفه مربى أصلا ؟

مع الوقت هكتسب حيادية

و الحيادية هتعلمنى أفكر بشكل منضبط من غير ما أخد كل حاجة على أعصابى

طب ايه علاقة التفكير بالعصبية ؟

لو رجعنا كل حاجة لأصلها

هنلاقى الأفكار هى السبب وراء أى سلوك بيصدر مننا بشكل عام

مثلا :

أنا مضغوطة طول اليوم و محدش مقدرنى
أنا حياتى سيئة
أنا مش عارفة أنجح فى أى شىء
أنا أم فاشلة

الأفكار دى بتردد كل يوم لوقت طويل فى عقلك
و بالتالى بتشعر بالضيق
و بالتالى هتعصب و أغضب

الأفكار السيئة المستمرة بتدمر حياتك

و العمل ؟

احنا محتاجين نفكر بشكل مختلف ?

إزاى ؟

نضبط الأفكار السيئة الى فى حياتنا
و نحاول نعدلها

مثلا أنا مضغوطة و محدش حاسس بيا
أحاول أخد وقت راحة
أعمل حاجة بحبها
أحتسب وقتى لله
أفكر أن الدنيا دار بلاء أصلا و عمرنا ما هنرتاح فيها
و أن الآخرة خير و أبقى

أنا أم فاشلة
لا بالتأكيد
فى حاجات بتعرفى تعمليها و حاجات لا
فى حاجات انتى شاطرة فيها و بتحسنيها جدا
حاجات تانية محتاجة تدريب
و مش مطلوب منك تعرفى تعملى كل حاجة و الله
المطلوب منك سعى صادق
أنك تدى نفسك حقها و تدى الآخرين حقهم
على قد ما تقدرى

الأفكار كتير و طريقة تحليلنا ليها مختلفة

المهم أعرف ايه الى هيأذينى أنا و أولادى لو فضل بيتردد فى عقلى و صدقته مع الوقت

و أن الدنيا عمرها ما هتكون كاملة و جميلة
أمال هننتظر فى الآخرة ايه ؟

الفكرة دى بس هتحسن حاجات كتير فى حياتنا
و هتخلى كل الأفكار السيئة ملهاش قيمة عالية فى نفسى

تانى حاجة أنى أقلل توقاعاتى لأولادى
مش لازم يحسنوا كل شىء
و لا يكونوا أبطال خارقين

كفاية أنهم أولادنا
رزق ربنا لينا
أمانة فى أعناقنا

الواحد لما بتجيله هدية من حد بيحبه بيخاف عليها أوى و بيعاملها بتقدير كبير

أمال لما تكون الهدية دى من رب العالمين
المفروض نتعامل معاها إزاى ؟

الحسم و الإنضباط مطلوب
مش بقول هندلعهم بس

الطبيعى التوازن و إعطاء كل ذى حق حقه

و لكن العصبية و الغضب الزائد برضو مش هو الأصل
و خصوصا لما ألاقى نفسى بستخدم أولادى لتفريغ شحنات سلبية جوايا ?

النهاردة بطلب منكم تفكروا
و تحاولوا تعديل أفكاركم
و بالتالى هيتعدل سلوككم و سلوك أولادكم فيما بعد

استعينوا بالله
الطريق طويل هنمشيه واحدة واحدة سوا

جعل الله الطمأنينة فى قلوبكم جميعا ?
استعينوا بالله ?

يتبع


منقول عن صفحة عفراء فيس بوك​