ســـــــــــــــــاعدوني ... مشكلتي غير بالنسبه لي..

[إيمان2009]

بسم الله الرحمن الرحيم

أنا عندي مشكله الكل يحسبها بنظره سهله ولها حل وحلها معروف .. لكن .. اللي يعيش هالموقف يشوفه أصعب من أي شي مر عليه بحياته... أنا عمري بالعشرينات تحت 25سنه وتزوجت لي الآن سنتين .. عشت مع زوجي ملكه بدلعه لي وكلامه المعسول .. كنا نموت في بعض رغم أيام الخطوبه مايحبني ... كان يشوفني بصورة اللي يحبها قبل الزواج ... وكنت أدري وقلت بننسى ... بعد الزواج مثل ماكتبت لكم انه صار شخص في قمة الروعه ... شخص دائما الإبتسامه ماتفارق شفتيه ... والناس كلها مستغربه حتى أهله يقولون لي سركم في بطنكم لانسمع هواش ولاصراخ ... لكن احنا ماكنا نتهاوش .. نتناقش ولكن بغرفتنا ولين طلعنا ماكنا صار شي... بعكس مرت أخوه كل شوي في بيت أهلها... ماعلينا... بعد تقريبا 6شهور كثر الكلام علينا أمه تقو اني اكل حبوب منع الحمل وتشكك زوجي فيني... ولا تقول النتاس كلتنا مرت أخوك حملت وانت مرتك لسه مع انكم أكثر ناس تنامون ... الحمدلله والشكر .. تعبت من التفكير رحنا أكثر من مستشفى قالوا ولله الحمد إني سليمه ولكن زوجي طلع منه اعيب لايكمن شفائه ... آمن بالله وصبرنا لكن صرت أشوف زوجي هو اللي سبب حرماني من الأطفال ومقدر أقوله طلقني لأني أموت فيه وهو يموت فيني... لكن الأطفال شي كبير بحياتي ... صرت ماحترمه.. رغم هو يقدم لي الإحترام .. يوم أرضى عنه وعشر أكون زعلانه ... :tears: مشكلتي بعد اني لمن اسمع احد حمل ولاولد يضيق قلبي على نفسي .. غير أن أهله ماقالوا للناس ليه الله مارزقنا بعيال .. صاروا الناس يطالعون ان العيب مني ويحرجوني بالمجالس..كرهت نفسي وصرت أتخانق مع زوجي زياده... :sadwalk:تعبت من كثر الكلام ... وانعزلت عن أهله حتى يوم دافعت عن نفسي قدام وحده تقرب لهم ... هاوشوني وقالولي لاتفظحين ولدنا رغم اني بس قلتلها لحد يدخل فينا وروحي مرخي ولدكم لاتمرخيني انا ... بصراحه ماقدرت لأنها احرجتني وسط مجلس كبير من النساء... وزوجي قام يهاوشني ليه قلت لها هالكلام احنا ماتفقنا محد يدري... مع انه هو اللي قايل لها ان الهرمونات عندي مخربطه .. وانا وربي سليمه .. بس قلت رجال شفهمه وهو قال انا مافهم بهالأمور قلتها كذا ... وتحملت لكن لازلت أعاني والله لازال قلبي محطم أبي عيال وأبي زوجي .. محد فاهمني وانا ماودي أجرحه كثر ماجرحته... لكن أحبه ...:sadwalk:شسوي قولولي شسوي ؟؟؟؟؟ تكفون أبي حل صرت منعزله ماحب أسمع سيرة أهله أحسهم السبب رغم اني صابره على ولدهم إلا انهم ساعات يسمعوني كلام ويدخلون حتى بملابسي... تأذيت بمافيه الكفايه؟؟؟

تكفون ساعدوني...:busted_red:​

 

[إيمان2009]

نسيت ماقلت لكم لمن درى العيب منه رجع يكلم اللي حبها اول لكن ربي كشفهم وعلمته درس ماينساه. وابي اعرف ليه تتوقعون رجع كلمها رغم اني مو مقصره بحقه ولا بحق اهله بهذيك الفتره ؟؟؟ وهل تتوقعون بيرجع يكلمها من جديد ..

 

[ماهقيتها منك]

وش تبغين فيه وهو يكلم (الحين احنا نصبر علشان عيالنا )وانتي وش يصبرك
لو هو رجل يخاف الله ماكلم (عشيقته على قولتهم) الله المستعان
اذا كنتي تحبينه صارحيه يخلي المكالمات المحرمه
ولو هو يحبك ماسوى الي يسويه اسمحي لي اختي على الرد العنيف (هاذا مو حب)

 

[سأظل أدعو لك]

الله يفرج همك
الأستغفار شأنه عظييييييييييييم
إملئي حياتك به وستدهشك النتيجة

 

[برميتي]

لاحول ولاقوة الابالله
لاتيئسي من رحمة الله ادعوه وتصدقوا وافعلوا الاسباب
وبعدين حبيبتي اذا انتي مو قادره تصبرين اتخذي القرار وبلاش تعذيب بزوجك وشو ذنبه سواء تكلموا اهله بالصدق ولالا
لاتخلينه يكرهك اتخذي موقف اما توقفين مع زوجك بمحنته او تتركينه والله يرزقك ويرزقه

 

[*شموخ انثى*]

زوجك يتعرض لضغوط عشان كذا يكلم حبيبته خاصه اذا انتي حسستيه بنقصه وترى مو سهل على الرجال انو يكون عنده نقص وهو يتهرب من الي تذكره بنقصه ويروح للي تذكره بكماله حبيبتي افرضي ان العيب مو بزوجك فيك شنو راح تكون رده فعلك ترى العيال مو كل شي بالدنيا صحيح انو كل وحده تتمنى يكون عندها عيال بس احمدي ربك ربي اذا اخذ من العبد شي اعطاه شي حافظي على حياتك لاتخربينها بيدك اتمنى مايكون كلامي قاسي اعذريني حبيبتي

 

[جرحـ الزمآنـ]

الله يعينك ياقلبي ماعرف شقولك

غير ربي يعوضك ان شاء الله

وبالنسبة لاهلة

اطلبي تسكنين لحالك حتى تنفكين منهم ومن تدخلاتهم ​

 

[محبة الجنان]

حبيبتي زوجك يعيش حالة اكتئاب ولازم توقفي جنبه وهو مسكين اش ذنبه هو الي حط المرض لنفسه وحطي نفسك مكانه لو الله ابتلاكي وش راح يكون موقفك
بنسبه للناس ممكن انك تتفقي انت وزوجك انكم تقولوللناس انكم اجلتوا فكرت الحمل لاجل غير مسمى وتفهمي اهل زوجك هذا الكلام

 

[Golden Tulips]

مرحبا حبيبتي...

بقولج كلام يمكن يجرح بس هذا

 

[Golden Tulips]

مرحبا حبيبتي...

بقولج كلام يمكن يجرح بس هذا رايي وأتمنى إنج تتقبلينه...

أنا أعرف وايد ناس مثلج الله ما رزقهم بعيال... اتنفصلوا واتزوجوا... بس للأسف العيال طلعوا ناكرين للمعروف وعاقيين للوالدين... وفي منهم الزوج طلع ما يتعاشر مع إن الزوج الأولي كان ملاك...

نصيحتي لج وإذا أنا كنت بمكانج... إذا ريلج فعلا يحبج وإنتي اتحبينه خلاص تمي معاه بس بالمعروف... يعني تحترمينه واتصونينه... مب تنزليه في تهزيء ترى الريال بيمل منج وهو اللي بيقولج روحي ما أباج...

حطي نفسج بمكانه إذا العيب كان فيج وريلج عاملج بهذي المعاملة هل بيعجبج هذا الشي ولا حياتج بتكون كلها كآبه في كآبه...

حرام عليج خافي الله في ريلج إذا تبينه واتحبينه تمي معاه وإلا فاتركيه يشوف حياته مع وحدة ثانية يمكن اتحبه واتحافظ عليه...

ما اتخافين تتركينه وتاخذين غيره وبعدين الله يبليج بزوج خايس ما يخاف الله؟؟؟

فكري عدل و لا تهدمين حياتج بإيدج

 

[قطرة ندى33]

:sad_1::sad_1:

لاحول ولاقوة الابالله
لاتيئسي من رحمة الله ادعوه وتصدقوا وافعلوا الاسباب
وبعدين حبيبتي اذا انتي مو قادره تصبرين اتخذي القرار وبلاش تعذيب بزوجك وشو ذنبه سواء تكلموا اهله بالصدق ولالا
لاتخلينه يكرهك اتخذي موقف اما توقفين مع زوجك بمحنته او تتركينه والله يرزقك ويرزقه

 

[بنت الرحيلي]

ياحبيبتي اللهيفرجه لكي اختي امكن زوجك مافيه شي هذي عين صابتكم اليه كلمن حسدكم انتو مبسوطين يقلولكم انتو تنامون كثير انتوتحبون كثيرايش الكلم هذ ياختي هذي عين وحسد بينه انصحك روحي الي مشيخ خلي يرقيكم وانتي الجي الي الله وستغري كثيرى وادعاء ان اله يسخر لكي الله يفرجه لكي

 

[السحر الحلال]

ماانزل الله داء الا له دوااااااء
استعيني بالله واستخيريه
ادعي وقولي ياكريم يارحيم
رب لاتذرني فردا وانت خير الوارثين
اكثرررررررررررررررري الاستغفار في الساعة 500 مرة بالسبحة
​

 

[همـــس الروووح]

اتوقع رجعوعه للحبيبته منك لانك ممحسسته انك منهااااااااااااااره منه ومن اهله فراح يفضفض للغاليه

نصيحتي لك خليك انتي الغاليه ووضحيله وفهميه ان مافيها شي نخبر اهلك ان العيب منك

عشان اعيش حياتي لان هم يجبون سيرتي بين الحريم وانا اتضايق ونفسيتي بالحضيض فلو قتل لهم ان العيب منك راح تنقطع صيرتي بين الحريم واعيش معك بسلاااااااااااااااااااام


وانتي انسي هم العيال ونصيحتي لك اكفلي يتيم من يكون عمره شهر او شهرين وراح تحسين حياتك تغيرت وان ربك بارك لك بحياتك
واخر شي اطلعي روحي انتي وزوجك اتمشو تهنوووووووووو ولاتجيبين له سالفة العيال ابد

بامان الله

 

[جنا قلبي]

السلام عليكم
حبيبتي بااقولك رايي اتمنى انك تقبلينه
صحيح الاطفال نعمه من الله وحتى الزوج ايضا نعمه
اذا احترمتيه وقدرتيه بيحطك فوق راسه
بعوضك عن الاولاد خاصا ان العيب منه
وعيشــي حياتك مع زوجك الله يوفقك
وبيــصر والله حتى يدافع عنك ضد اهله والناس
وبصـــراحه انا اشوف لوكما بيتك بعيد عن اهله افضل حتى تتفادي المشاكل
وسبـحان الله الانسان مايدري عن اللي مكتوب له يمكن تفك عقده ويرزقــــكم
واوصيك بالدعاء لله سبحانه وتعالى​

 

[ملكة ببلقيس]

الله يرزقك الذرية الصالحة عاجلا
تفسيري لما رجع يكلم حبيبته انه كان يمر بحالة نفسية و كان يبغى احد يرفع من قدره ويواسيه ويخفف عليه من اللي به
وانتي اكيد انك انشغلتي عنه بذيك الفترة
ومو لاقي الا هي

 

[ملكهـ بقلبهـ]

اللهـ يكون بعونك اختي واكثري من الدعاء وقيام الليل واذا انتي تحبينه نفس ماقلتي ترى العيال مو كل شي في الدنياوبلاش تقولين لحد انه مريض صدقيني تنقص من هيبته وكل رجال مايرضى حد يعرف حطي نفسك مكانه مااتوقع ترضين ان احد يعرف انك ماتنجبين ولا عليك من كلام الناس والله اللي يمشي ورا كلام الناس يتعب ولا رح ينفعك ابد والله يرزقك ان شاء الله.....

 

[وردة الحنون]

الله يرزقج الذرية الصالحة الطبة المباركة

 

[ام مريمي]

اختي حاسه فيج وانج تكوني ام بس فكري بشي واحد

ترى العيال مو كل شي بهالدنيا

شنو بتسوين بالعيال اذا ابوهم مايعاملج زين ولايخاف الله بالعكس بتتمنين انه مايكون عندج عيال منه عشان ماتتورطين معاه

ترى مو سهل على الريال انه في شي ينقص من رجولته وخاصه اذا قمتي تحسسينه بهالشي

اعرف وحده ضار لها 20 سنه من تزوجت وماعندها عيال

والعيب من ريلها بس تقول ان العيب منها

لييشش؟؟ لانها تحبه ووقفت معاه

اذا تحسين ان حبج للامومه اكبر من حبج لريلج صارحيه بانج تبين تصيرين ام وخله يطلقج

بس فكري زين قبل لاتاخذين القرار

 

[نواره99]

ليش ماتكفلون يتيم؟تتبنون يعني؟؟ مافكرتي فيها ولج الاجر
ثانيا حاولي ماتجرحينه وماتبين له انه هو السبب يعني لو كنتي مكانه قلبج مابيعورج انه مايقدر يقدم لج الي تبينه
عبالج هو مايبي عيال بعد اكيد يبي ومتاثر اكثر منج
واذا حد سال قولي ماصار والحمدلله ع كل حال وكله خير لاتقولين العيب من زوجي بحقه مو حلوه
واكثري من الاستغفاار وقراه سوره البقره بنيه الحمل وربج كريم وروحي امريكا والمانيا شوفي مستشفياتهم هم مختصين اكثر وربج كريم