ساعدوني في اتخاذ الحل السليم تعبت من التفكير

[احساس مؤلم]

السلام عليكم

انا فتاة لدي وسواس واتعالج عن طبيبة نفسية وضعي عاااادي جدا اعيش حياتي كسائر الناس تمت خطبتي مؤخرا لاحد اقاربي انا نويت اني اقوله على امر العلاج والطبيبة بس قلت بعد الملكة بيني وبينه انا استخرت في البداية وتمت الخطبة كلمت الاخصائية في الموضوع قالت لي الموضوع عادي بما انك ناوية تقولي له ولا تخبي عنه ولو تبغي مساعده مني انا حاضرة

انا اللحين خااايفه لو قلت له وما تمت الامور وانتهى كل شئ فشله قداام الناس

وش رايكم

اخليه بعد الملكة بيني وبينه وانا ما ادري اصلا هل في ملكة او لا

او نخبره قبل الملكة ؟؟ ومين افضل يقول له امي او اناا


لا تبخلوا علي بمشورتكم

 

[logic-active]

لا تخبرينه يمكن يغير رايه فيج
خلي الامور ع طبيعتها
وبعدين ليش تتعالجين عند دكتورة مو عشان تفتكين وتتخلصين من الوسواس ! ليش تشهرين بمشكلتج عند ريلج

بس ابي افهم طبيعة الوسواس يعني هو مؤقت ولا دايم ؟
لان اذا دائم خبريه لان بتضطرين اتروحين الدكتورة كل اشوي وهو بيسالج وين تروحين

 

[احساس انثى1]

انتبهي تقولين له شي عاد تعرفين الرجال تفكيرهم سلبي انتي حاولي تخبين قد ماتقدرين حتى بعد الملكه لا تقولين له واذا صرتوا ببيت واحد وقتها عاد براحتك بس انتبهي انتبهي ترى ممكن يغير رايه فيك او اي غلط يشوفه منك او تصرف يحط في باله انو انتي فيك الشي الفلاني يعني بأختصار اي حركه ماتعجبه حتى لو كانت براءه منك ممكن يعزيها للوسواس حبيبتي

 

[كان الحب لك]

انتبهي لاتقولين ابدا

ولاتبينين انك تاخذين علاج نصيحه والله

 

[سوووكرة]

حرااااام يابنات هذا من الخدااااع

لازم تقولينله قبل حبيبتي وانشالله انه يقدر الوضع وماتصير مشكله

بس اللي بيبدى بالغش بيلوومك بعدين وانتي تخيلي لو هو اللي مريض وماقالك

 

[logic-active]

حرااااام يابنات هذا من الخدااااع

لازم تقولينله قبل حبيبتي وانشالله انه يقدر الوضع وماتصير مشكله

بس اللي بيبدى بالغش بيلوومك بعدين وانتي تخيلي لو هو اللي مريض وماقالك

حبيبتي هذا مش خداع!
هذا تصصرف بحكمة
وانتي تعرفين تفكير الرياييل مايصدقون يشوفون عيب فالحرمة عشان يشوفون غيرها !!
وبعدين ماهو الرياييل تصرفهم فيه الخداع وبلاوي فليش ندقق و نوسوس تصرفاتنا معاهم و نحط الذنب علينا

اختي صاحبة الموضوع نصيحة لاتقولين حق ريلج بغير رايه فيج ترا الرياييل يموتون ع الواثقة من نفسها اما اللي فيها عيوب و تيلس تتشكى بيقول انا استحق وحدة احسن منها ليش اكمل حياتي معاها باجر بتيبلي الوسواس شراتها

 

[الجده الصغيره]

لا تخبرينه يمكن يغير رايه فيج
خلي الامور ع طبيعتها
وبعدين ليش تتعالجين عند دكتورة مو عشان تفتكين وتتخلصين من الوسواس ! ليش تشهرين بمشكلتج عند ريلج

بس ابي افهم طبيعة الوسواس يعني هو مؤقت ولا دايم ؟
لان اذا دائم خبريه لان بتضطرين اتروحين الدكتورة كل اشوي وهو بيسالج وين تروحين

رايها سليييييييييييييم 100%

 

[مشتاقة لك]

أستشيري أبوك أو أخوك

 

[احساس مؤلم]

حيرتوني يا بنات

ابويه قال لا تقولين

وسواسي في العبادة الدكتورة قالت لي في يوم ان شاء الله تسيبين العلاج بس بيطول العلاج شويه

انا محتارة استخرت قبل الخطبة اني اقله او لا بعدين فضلت اسكت وتمت الامور بس اللحين خاايفه يتم كل شئ وبعد ما يعرف يزعل ويقول ليش ما قلتي لي من اول وانا ما ابغى اخسره

بس في الاخير لازم يعرف من بيجيب لي الدواء من بيوديني العيادة واذا سألني عن الحبة وش اقول بعدين

فكرت اتصل عليه واحلفه ان الموضوع يتم بيننا ما يقول لاحد بس بقوله اني حبيت اعطيه فكرة عن الموضوع لاني خفت تزعل بعدين

والله تعبت من التفكير في هذا الموضوع مو قادرة افرح واجهز زي باقي البنات خايفه كل شئ ينتهي في لحظه يا رب تمم لي فرحتي

ولو ما رضي وانهى الموضوع فشله قداام الناس

يا رب يارب يا رب يسر اموري وتممها لي على خير

 

[احساس مؤلم]

نسيت اقولكم ان الدكتورة والاخصائية النفسية نصحوني اعطيه خبر والاخصائية قالت لو تبغيني اكلمه اوضح له الموضوع انا مستعده والدكتورة برضه قالت لي خليه يجي معك عالعيادة حتى اوضحه الموضوع

 

[مَلآمِحْ حُلمْ]

لا تقولي له مرض بسيط وتشفين إحذري لا تقولي له بس إهتمي بالعلاج ...​

 

[نورة النورة]

لا حول ولاقوة الا بالله
اعتقد الافضل ان تخبريه
لانه عاجلا او اجلا سيعرف
وسيشعر انك خدعتيه وغششتيه
فالافضل ان يعرف وهو يختار
والله معك

 

[احساس مؤلم]

اللهم يسر لي الخير حيثما كان

اللهم تمم فرحي واسعدنا فيه

 

[فيافي 2]

اختي ابشرك يمكن تتشافين بعد الزواج علشان كذا لاتقولين له شيء لان الوحدة راح تخف عليك والعاطفة عندك تمتلىء وبعدين الأحم احم فهمتي يخفف في بعض الحالات من الوسواس على حسب طبيعتك .واستخيري الله يوفقك .

 

[القلب الحاني]

لا تخبريه لان بعض الامراض النفسيه تدهب والوسواس مرض نفسي لاتوهمي نفسك عيشي حياتك معاه وانسي لان علاج الوسواس النسيان وعدم المبالاه وبالرك الله لك وبارك عليك وكتب لك السعاده في الدنيا والاخره

 

[الحالمة الناعمة]

رايي ان تقولي له .. انتي او الاخصائية تكلمة بالتلفون وتخبرة ...
انا ما اايد الخداع صراحه

ولو انا سويت كذا ..

 

[ليه ياحظ!!!]

نصيحتي لاتقولين له افضل لك بكره يعايرك واذا شفتيه انسان فاهم

وراقي ويحبك ذيك السااااااااااااعه قولي له

 

[مناااكير]

استخيري مرة ثانية

 

[سحر البرآءة]

رائي انك تستخيري وتقوليه على انه يتم الموضوع بينكم بسررريه تامة ويكلم الدكتورة عشان تعطيه فكره عن حالتك وتطمنه
بس اهم شي كووووني على يقين انه لو ماتم الموضووع ثقي انه هذا امر الله
ونتيجة استخارتك لربك صرفه عنك وربك عرف وين الخير لك
لانه بكرة لمن تتزوجي اكيييد بيعرف انك تراجعين عند دكتورة...وعلى طوول بيقولك لييش ماقلتيلي من اوول
ولاااتتعلقي في الرجال بزياده يعني كووني راااضيه بالنتيجه بعد الاستخارة ويااارب يكوون متفهم لحالتك ويتمم امورك على خير​

 

[احساس مؤلم]

معليش بنات ابغى اراء اكثر ياليت البنات اللي ما ردوا يعطوني رأيهم في الموضوع

واللي تقول قولي له هل افضل اهلي يكلمونه او اناا علما اننا مخطوبين بس