ساعدونى مش عارفة احدد نمطى ونمط زوجى وحاسة انى بتعامل غلط وزواجى هيفشل :(

[marwa kamal]

السلام عليكم يابنات انا اسمى مروة صديقتكم من مصر وبتمنى تساعدونى فى مشكلتى ، هحكيلكم حكايتى باختصار انا من 6 سنين تقريبا عرفت زوجى عن طريق الصدفة بالجامعة وحبيته جدا وهو كمان حبنى ، كنت بشوفه حنون جدا عليا ورومانسي وعطوف وبيحبنى بس كنت بستغرب انى بحس انه بخيل ماديا ، يعنى مثلا مكنش بيجيبلي هدايا او يعزمنى باماكن غالية بس انا اديته اعذار وقتها انه مش معاه فلوس وعلى قد حاله وانه حتى مش بيجيب لنفسه اى حاجة ، كان بيفكر دايما ازاى يحوش عشان يعمل مشروع او يشترى سيارة وكان فى المقابل بيحرم نفسه من حاجات كتير لبس او خروج وكدة يعنى ، وانا كنت بشفق عليه وكنت مش بطلب منه اى حاجة مادية ، وفى مرة حصل موقف انى كنت محتاجة فلوس جدا ولقيته عرض عليا انه يديني فلوس من معاه واصر بس انا رفضت لانى عارفه ظروفه المادية وعارفة قد اية بيتعب علشان يحوش لمشروعه
المهم يا بنات هو من اول يوم قالى فيه انه بيحبنى كان عاوز يكلم اهلى ويخطبنى ، لكن انا رفضت وطلبت منه التاجيل ودة لاسباب مهمة لازم تفهموها ، هو اولا بيته فى بلد بعيد جدا عنى مسافة حوالى 7 ساعات ، والبيت كمان متواضع جدا وانا كنت واثقة ان اهلى هيرفضو الوضع دة ، طلبت منه نصبر لحد مايقدر انه حتى يستأجرلى بيت قريب وعلى الرغم من ان اهلى بيرفضو فكرة الايجار لكن قلت يمكن يقبلو مع الضغط لكنهم مستحيل يقبلو انى اتجوز فى البلد البعيدة جدا دى
المهم هو وافقنى فعلا و قررنا نستنى فترة لحد ما يقدر يستاجر بيت قريب وفى الوقت دة كنا بنتخانق كتير جدا وبنسيب بعض كتير والسبب فى كدة هشرحهولكم ، انا كنت بحبه بجنون وكنت غيورة جدا وهو كان بيستغل دةيعنى كل ما كنا نختلف فى حاجة ويزعل منى الاقيه يعمل تصرفات يوهمنى بيها انه بيكلم بنت تانية او معجب بواحدة تانية وانا طبعا بيجن جنونى وبتصل بيه ونتخانق ونرجع نتصالح وهكذا ، وكنت بكتشف بعدها انه ميعرفش حد وانه بيعمل التصرفات دى بس علشان يضايقنى ، وادة الى خلانى اشك انه يكون نمط جنوبي لان الدكتورة ناعمة كتبت ان النمط دة بينتقم من المرأة الى مش بتقدره عن طريق الخيانة ، وهو دايما فى الفترة دى كان بيتهمنى بعدم تقديره
بعد كدة اتفاجأت بيه بيقولى انا مش هقدر استاجر بيت انا عاوز اعيش ببيتى جنب اهلى وانتى المفروض تيجي تعيشي معايا هنا ، انا عارضته وهو اصر على موقفه واصر انه يتقدملى فى وقتها ، وحصل الى توقعته واهلى رفضو وهو كان متخيل انى هتمسك بيه بشدة وهقف قدام اهلى وانصدم لما لاقانى معملتش كدة مع انى فهمته من البداية ان دة الى هيحصل ، وفهمته كمان انى مقدرش ابعد عن اهلى المسافة الكبيرة دى ومقدرش اعيش مع اهله ، وطلبت منه انه يسيبنى بحالى وفعلا بعدت عنه ، واتفاجات بيه فوراا انى عرفت انه خطب بنت تانية ، طبعا انهرت جدا لكنى اتماسكت وقررت انى انساه ، وبعد ايام لقيته بيتصل عليا وبيقولى انتى السبب انى بدمر حياتى وانتى الى خليتينى اخطب بنت مش عايزها وقالى انه بيحبنى بجنون وميقدرش يعيش من غيري وطلب منى انى ارجعله ونحاول تانى مع اهلى ، لكنى رفضت تماما
هكملكم المشاركة الجاية

 

[marwa kamal]

طبعا اتصدم للمرة التانية من رفضي ليه وقلتله انت السبب لو كنت عاوزنى زى مابتقول كنت وافقت على الاقل على شرط اهلى واستاجرت بيت قريب وكنت هقف جنبك لكن انت عاوزنى انا اسيب حياتى بالكامل وابعد عن اهلى علشان انت تفضل جنب اهلك ودة مكنش اتفاقنا من البداية ، واتهتمه انه خدعنى وعلقنى بيه وضيع سنتين من عمرى وهو عارف ان اهلى هيرفضو ظروفه وكان ممكن من البداية قالى على امكانياته الحقيقية وانه ميقدرش يبعد عن اهله وكان يسيبلي القرار ، وغيرت ارقام تليفونى وبعد عنه وعرفت انه ترك خطيبته ولمدة اكتر من سنة كان بيبعتلى طول الوقت مع اصحابي رسايل علشان اوافق ارجعله ووعود انه هيعملى الى انا عاوزاه بس انا رفضت الرجوع وقلتله انى مش واثقة فيه ، وبعدت تماماوبعد فترة اتقدملى شخص وكنت هوافق عليه ولحد ليلة خطبتى كان حبيبي بيحاول يرجعنى ليه وانا رفضت تماما وقلتله مش هثق فى كلامك مرة تانية انا كنت معاك وانت الى ضيعتنى
والى حصل انى اتخطبت ومكنتش بحب خطيبي بس كنت متقبلاه بعقلى فقط ، وبعدها بايام عرفت ان حبيبي السابق خطب بنت تانية ، ومرت الايام وعرفت انه ترك خطيبته بعد ايام قليلة من خطبتهم وان حياته مدمرة ، وانا فى الوقت دة كنت ماشية فى تحضيرات زفافي على الرغم انى مكنتش بحب خطيبي نهائي ولا بقبله لكن كنت متمسكه بيه لانى كنت شايفاه انسان محترم ومتدين وخلوق ، وتمر الايام وقبل كتب كتابى بايام اكتشف ان خطيبي شخص غير ماكنت اتخيل تماما وانه بيكلم واحدة مطلقة مكالمات قذرة وبيكذب عليا بكل براءة ووداعة ومفهمنى انه بيكلم صاحبه وهو بقاله شهور غرقان فى القرف دة وانا مش حاسه ، طبعا تركته فورا واهلى ايدونى تماما فى قرارى والحمد لله ، وبعد فسخ خطوبتى بايام قليلة اتصل ييا حبيبي واترجانى انى اديله فرصة يكلم اهلى وانه مش عارف يعيش من بعدى وكل الكلام دة ، وانا رفضت للمرة التالتة
فى الوقت دة انا كنت بحس مشاعرى من ناحيته بقت محايدة يعنى مش بحبه بجنون زى الاول بسبب انى كنت حاسه انه خدعنى بعد وعده ليا وانه كدب عشان يحتفظ بيا اطول فترة ممكنه وانه لما وقف قدام اهلى رفض شروطهم بدون تفكير وضحى بيا بكل سهولة لانه كان معتمد عليا انى اقف قصادهم واتحداهم واجبرهم يقبلو ظروفه ، المهم يابنات بعدها اختفي من حياتى وعدت حوالى 3 سنين وخطب بنت جديدة خالص ، وانا فى السنين دى اتقدملى اكتر من واحد وكنت عايشة مكتئبة وشايفة كل الناس سيئة ومقدرتش اتقبل عاطفيا اى واحد من الى اتقدمولى، وفى الفترة دى سبحان الله يحصل ان ظروفه تتغير تماما ويشتغل فى مكان مرموق جدا ويضطر انه يعيش فى المكان الى كنت بطلب منه يستاجرلى فيه شقة وكمان يشترى فيه بيت ملك ، طبعا انا كل دة معرفتوش الا بعدها بوقت طويل ،وبعدها اتجوز وبعد زواجه بشهرين اتصل بيا تااانى وقالى انه ماشي فى اجراءات الطلاق !!
انا مش هنكر انى وقتها حنيتله لكنى رفضت تماما عرضه عليا للزواج حتى بعد ما حكالى على ظروفه اصبحت احسن بكتير من الاول ، وكان سبب رفضي ليه انى خفت انه يكون بيكذب وانه يكون مش بيطلق مراته ولا حاجة وانه يكون هيطلقها فقط لو انا وافقت اتجوزه ، كدبت عليه وقلتله ان فى شخص تانى انا عرفته واننا هنتخطب قريب وطلبت منه ميتصلش بيا نهائي وان اموره متهمنيش فى حاجة سواء طلق او لا

هكملكم المشاركة الجاية

 

[marwa kamal]

وفعلا بعد عنى فترة طويلة لحد مانا اتاكدت من معارفي انه طلق فعلا وان زوجته واهلها كانو ناس سيئين جدا ، قررت انى اتصل بيه بعد مااتكدت تماما من انه معندوش نية رجوع لطليقته وان طليقته كانت فعلا سيئة وانه مطلقهاش بسببي ، وفعلا كلمته وفى خلال ايام كنا اتخطبنا وبنحضر للزواج ، فى الفترة دى كانت علاقتنا مش زى زمان كانت فيها زى شوائب كتير هو كان شايل منى وبيتهمنى انى السبب فى تدمير حياته وانا كذلك كنت شايفة ان هو الى غلط فى حقي وموفاش بوعده معايا وانه نقل حياته بعيد عن اهله بعد سنين علشان خاطر نفسه ومستقبله وانه رفض يعمل كدة قبلها علشان يحتفظ بيا
كانت الخلافات بينا كتير وكان بيتهمنى انى بقيت جافة معاه وانى مش زى زمان حنونة وبهتم بيه زى الاول لانى زمان فعلا كنت مكرسة حياتى ليه ، بمعنى انى كل حاجة كنت بعملها عشانه وكنت مستعده اضحي بكل حاجة عشانه واتعب واتحمل عشانه وكنت بغير عليه بجنون وعاوزاه يكلمنى 24 ساعة ولما اتخطبنا اتفاجأ بان مشاعرى ناحيته بقت باردة شوية واهتمامى وغيرتى قلو كتير ، وانا برضو كنت متضايقة من كدة ونفسي علاقتنا ترجع زى زمان بس للاسف مكنتش عارفة اعمل كدة وبسبب دة كانت فترة الخطوبة مش كويسة ومرت علينا بصعوبة .
المهم يابنات فى فترة الخطوبة دى كنت انا بشتغل فى بلد ساحلية وكنت بحبها جدا وحلم حياتى انى اعيش فيها وهو كان عارف دة من زمان ، و اتفاجأت بيه بيقولى انه هيشترى بيت فى البلد دى وهينقل شغله هناك عشان انا بحبها وبتمنى مسيبهاش ، وفعلا عمل كدة وبدانا ندور على بيت فى حدود الفلوس الى معاه وكانت للاسف امى واختى بيتدخلو شوية وبيضغطو عليه فى المصاريف وهو بدا يتضايق منهم جدا ، ووقت شرا الاثاث برضو حصلت نفس المشكلة تدخل امى خصوصا انه يشتريلي اثاث غالي جدا وانا مكنتش بقدر اقف قصاد امى لانى عارفة انها ممكن تنهى الجواز ولانى كمان بخاف منها شوية ، حاولت انى اعدى الايام وبقيت اختار اثاث متوسط احاول انى ارضي بيه امى ويكون فى حدود امكانياته ، وهو كان بيتضايق جدا من تدخل امى وبيقولى انه عمره ما سمح لحد يملى عليه اوامر وانه مستحمل كل دة عشانى ، وللاسف كل الفلوس الى معاه خلصت واقنعته انه يستلف وبقيت اساعد كمان من غير مااهلى يعرفو يعنى كنت اشترى حاجات للبيت واكدب واقول ان هو الى اشتراها ، ولما الامور اتازمت جدا اتفقنا انه يستلف من صديق وان بعد الزواج نبيع نص الدهب الى اشتراهولى شبكة ونسد الدين وطبعا دة كله من غير اهلى مايعرفو
هكملكو المشاركة الجاية

 

[marwa kamal]

المهم يا بنات مرت الايام واتجوزنا ومحرمنيش من حاجة بكل امانة عملى فرح جميل جدا وكانت الايام ماشية بينا كويسة الحمد لله والمشاكل قلت ، قبل الجواز كان قالى مرتبك دة ليكي اعملى بيه الى انتى عاوزاه لكن انا رفضت وقلتله انى مش عاوزة حاجة لنفسي وانى عاوزة نبنى حياتنا سوا ونتشارك وكدة ، ولما جينا بعد الجواز بقيت فعلا اجيب حاجات للبيت من مرتبي ومكنتش بحوش منه حاجة لنفسي خصوصا كان علينا ديون بتستهلك اغلب مرتبه وهو للعلم مرتبي مش كبير حوالى ربع مرتبه بس وكان بيقارن بينى وبين طليقته وانها كانت بترفض تصرف مليم من فلوسها الخاصة وازاى انى احسن منها وكدة ، والحمد لله ربنا قدره باننا نسد الدين من غير مانحتاج نبيع الدهب وكنت فاكرة انه خلاص كدة مش هنبيعه لكنى قالى انه محتاج يبيعه علشان مشروع هيدخل فيه ، وانا يا بنات قبلها مكنتش فى بالى امور الماديات دى نهائي وكنت بستغرب اى زوجين بيتخانقو عشان فلوس وبقول عمرى ماهكون كدة بس كلام الناس والمنتديات خوفنى انى اكون بتنازل بكدة عن حقوقي وان دة ممكن يكون سبب فى انى اتنازل العمر كله وانى اخسر قيمتى عنده ، اترددت فى بيع الدهب بس مبينتلوش دة نهائي ومحسستوش بكدة وكنت على امل انه يقولى مثلا انه هيدخلى فى المشروع بنسبة بس مقالش وانا لمحتله انى عاوزة حاجة تكون باسمى واضمن مستقبلي ولقيته غضب جدا وقالى ازاى بقيتى تفكرى كدة وانه مبيحبش ابدا الست الى تفكر فى كدة وان كل الى يملكه هو فى الاخر ليا وبيعمله عشانى وعشان اولادنا فى المستقبل ، وفعلا بيعنا الدهب وداريت عن اهلى كتير لان دى حاجة مرفوضة تماما تماما عندنا وخصوصا امى هتعتبره بالشكل دة طماع ، المهم يابنات احنا بقالنا سنة متجوزين وكل شوية بفكر انى مملكش اى حاجة وان كل حاجة باسمه وانى شاركت طول السنة دى بمرتبي وكان ممكن انى مثلا اقسط بيه سيارة او اشترى لنفسي اى حاجة وانا والله العظيم اخر همى الفلوس ولا بيفرق معايا اى حاجة من كدة بس خايفة جدا من الى بسمعه انى بكرة يسيبنى ويتجوز واحدة تانية تاخد كل دة والكلام الوحش والحكايات الى بنسمعها ، هو مش بخيل عليا ولما بطلب اى حاجة بيجيبهالى بس برضو الشيطان بيفضل يوسوسلي ان دة واجبه ناحيتى وان المفروض مشاركش ابدا فى مصاريف البيت وبدات افكر انى اقوله كدة بس خايفة يكون دة تصرف غلط ، خايفة الجفاء يزيد بينا لو عملت كدة وخايفة برضو اخسر قيمتى عنده انصحونى يابنات اعمل اية