زوجي و اكل الخدامة

[ام غمازة]

مرحبا بنات انشالله القى عندكم اللي يريحني انا في بيتي ديوانية حق رياييل العايله كل خميس و المعتاد ان زوجي يطلب من بره ويوم قالي زوجي شرايج نخلي الخدامه تطبخ كل خميس قلتله لا عيب بحقي ان سالوك الرياييل منو طابخ بتقول خدامتنا و طبعا بيقولون حق حريمهم واخذو عاد الباجي انا اكلي زين بس ما اعرف اسوي كميات كبيرة و مع هذا قلتله ولا يهمك طبختله طبخة و كلوها كلها وقالي انها وايد حلوه والدليل ما بقى منها شي من بعده قلتله اي شي تبي انا حاضر بس شوي شوي علي المهم سافرت انا و امي سفرة قصيرة ب 3 ايام و لما رجعت بالليل قالي ترى خليت الخدامه امس تطبخ العشا مت من الحرة قلتله انا شنو قصرت انا ادري الحجي اللي بيي من ورا هالشي ليش تنطرني اسافر و تخليها تطبخ وتدري ان هالشي ينرفزني وبعد مو مقصر قايلهم هذا خدامتنا طابخته وايد فرحان المهم تنرفزت وقلتله بصراحه مليون مرة تحجيت بالموضوع هذا واذا انت ما تحسبلي حساب كيفك من يوم و رايح سو اللي تبيه ولا تقولي اي شي عن هاليمعه نا شايله ايدي دام ما في احترام حقي وانت تدري شبيتحجون الحريم بالعايلة ومفهمتك من قبل بنات صح اللي سويته ولا لا

 

[المواجهه]

كبري عقلك ترى إللي سواه عااااااااادي

 

[وهم79]

اختي وسعي صدرك ولا تسويها سالفه اغلب الناس الحين اذا موب الشغاله الي تطبخ يجوبون طباخه

اختي لتسوي سالفه على ولا شي
وبلعكس خليها تريحك وخليها تطبخ عنك لا يظيق خلقك على شي ما يسوى

 

[جراده شياكه]

ليش ثقتك بنفسك معدومه وتفكيري بحكي الناس

 

[مايصحش هالحتسي]

وانتى ليش تحسبين لناس الف حساب
سواء جابه من برا العشاء او الخدامه طبخته مافي فرق
ع الاقل انتى ارتاحي خلك ملكة لاتسوين شي ههه
لاتكبرين السالفة ياختى

 

[رموز عشوائيه]

اذا انتي واثقه من اكلك وزوجك معجبه اكلك خلاااااص لاتهتمي بكلام الناس ((((من راقب الناس مات هما))

 

[كلي مشآعر]

الموضوع عاااااااااااااااااادي .. وياليت كلنا نفكر زيك ان ازواجنا ماياكلو الا من ايدينا ..ههههههههههههه
انا زوجي يقول احب اشوفك في المطبخ .. صح ما عندي شغاله بس افرح يوم نجيب غدا من بره او من عند امه ^_^

 

[فداك الجرح]

انتي تبين تتهاوشين وبس..

عااااااااااااادي مافيها شي هالكثر شايلة هم الناااس ترى مابيجي منهم شي فلا تتعبين نفسج..

اركدي وخلي حركات الياهل ..

 

[مهجوله]

الحمدلله صاحيه انتي اذا ماتبين الشغاله تطبخ اطبخي انتي ولا اسكتي

 

[احلى حياه]

اخذي الموضوع عادي وخل الخدامة تطبخ مثل المطعم

 

[انوثتي سر جنونه]

لا حبيبتي انا معك ماله حق يخلي الخدامه تطبخ وانتي قايله له ماتبينها تطبخ وخاصه انك مفهمته كيف الحريم راح يمسكونها سالفه عليك ..
والي تقول ماعليك من كلام الناس الا عليها من كلام النا وخاصه حريم جماعتها ... شتبونهم يقولون عنها ماتعرف تطبخ ويومها موجوده يجيب من برى ولما راحت الخدامه هي الي طبخت لهم يعني بالعربي الفصيح الخدامه احسن عنها تعرف تطبخ وهي لا ..
بس مو معناتها انك تقلبين الوضع جحيم ع زوجك بس فهميه وحسسيه انه سوى شي مايرضيك وضايقك مررررررررررره ...
والله يوفقك ويسخر لك ياااااااااااااااارب والجميع ان شاءالله ..

 

[بنت قطر VIP]

خلي الموضوع طبيعي مع زوج بس قوليله مالك خص في الخدامه وكل كلامك يكون معاي تبيها تطبخ اوكي بس اتقولي انا عشان تعرف ان انتي لي معزبه لان بعض الخدامات الله يعزج .......
يستقون على المعزبه لما يشوفنها في خلاف مع الزوج عليهم وبتعلم كلما ها وشتيها تروح تركض تشتكي عنده لا حد يرد من البنات وتقول هل السالفه ماتصير تصير وصايره وااااايد وصايره معاي انا شخصياً فخلوبالكم من الخدم يمكن انتوا تشوفونه عادي بس والله الخدم ينخاف منه وااايد​

 

[ريمية]

لا تخلي للخدامة مجال تفرد عضلاتها قدام زوجك ...وزوجك يعجبه طبخها ثم يتفاخر فيها..ويعنني هي اللي تقوم بواجب

ضيوفه..لا انت اطبخي بنفسك واحتسبي الأجر اكرام الضيف وطاعة الزوج واذا ماكنت فيه خلي زوجك

يطلب من برى ..واتفقوا ع كذا

 

[بقلاوة]

[/QUOTقلتله لا عيب بحقي ان سالوك الرياييل منو طابخ بتقول خدامتنا و طبعا بيقولون حق حريمهم واخذو عاد الباجي انا اكلي زين بس ما اعرف اسوي كميات كبيرة و مع هذا قلتله ولا يهمك طبختله طبخة و كلوها كلها وقالي انها وايد حلوه والدليل ما بقى منها شي من بعده قلتله اي شي تبي انا حاضر بس شوي شوي علي المهم سافرت انا و امي سفرة قصيرة ب 3 ايام و لما رجعت بالليل قالي ترى خليت الخدامه امس تطبخ
E]

اختي لاتعفسين حياتك بلا معني ابحثي عن الحلول برويه مثلا اذا سالوه من طابخ مولازم يشرح يكتفي بمقولة طبخ البيت اوطبخ برا ليش التفصيل وهاذي اهون من خراب البيت والعفسه والزعل مدامك منتي موجوده ليش الزعل

 

[MalakAlrooh]

بالعكس هو جابلك الخدامه لتساعدك وتشيل شغل البيت عنك

مو انتي اللي تتطبخين عنها
انتي امريها
اوقفي على راسها علشان تتعلم

ولما تتعلم انتي ريحي
واهتمي بنفسك بس



ولما تشتهي تطبخين لنفسك تسوين


بس مب دوم


وما عليكي من الناس


ما فيه احين حد ما يستعين بالخدامه

 

[شوق الروح]

اتصدقين مريت بموقف مشابه لج بس الحمدلله الله ألهمني كيف أتصرف وانتبهت لغلطتي والحمدلله ما اتكررت المشكلة معايه..بشرحلك شو إلي كان ايصير أسلوبك في الكلام عن الشغاله يوصل لزوجج إنج واثقه في طبخها أكثر من ثقتج في نفسج..مثلا عن نفسي كنت أقول لزوجي: - "شو تحب الطباخة تطبخلك" ولا "شو تبغيني أقولها اتسويلك عالغدا؟" ووو وغيره..وكان يعلق ساعات عليه وايقول الطباخه شايلتنا شيل من دونها ما ندري شو انسوي وأنا على نياتي مو منتبهه المهم بعد فتره زاد النقد وقام ايقول انتي شو اتعرفين اتسوين أظني بدون الشغالة بتضيعين ومن الكلام إلي زايد ملحه وايغث المهم...كنت أدافع عن نفسي وأبرر إنه من قبل كنت أطبخ وأكلي حلو بس يوم جو العيال وزادت المسؤوليات ما أقدر أسوي كل شي في البيت واحتجت للطباخة ووو لكن ما ايصدقني..
المهم الحل إني بديت أغير أسلوبي كلامي عن الشغالة والطبخ وصرت أنتقي الكلمات إلي أستخدمها وإلي توحي بإلي أنا أبغيه (احفظيها صم عن غيب ترا مفعولها ولا السحر)..
1- لما أبغي أتكلم عن طبخ الشغالات أقول "الشغالة مو من فهمها الزايد ترا مافي شي إلي أعلمها إياه حتى خطوات الشغل البسيطه، ترى لو أتركها على عمها لااتشوف الهوايل خخخخخ (حتى لو الشغاله سوت شغله وعجبته لا اتطلعين نفسك هبله وغشيمه قوليله من وصاتي لها وإشرافي الدايم عليها!!)."
2- "لا تمدحينها إلا تسبقين مدح نفسج من مجهود إشراف وتذكير ومتابعة مستمره على شغلها وإنه انتي إلي علمتيها كل شي وإنه لكل حرمه طريقتها في تضبيط شغل بيتها وشغل الشغاله الزين دليل على شطارة معزبتها!!" أحلى كلام إيحاء ينغرس في عقله اللاواعي قبل الواعي هههههههههههه
3- يوم بتقوليله عن أنواع أكل العزيمه لربعه ولا أي وجبه عاديه من وجبات اليوم غيري صيغة الكلام وقولي "شو تبغينا انسويلك على العشا ولا شو ودك نطبخلك اليوم (مو شو أقول للشغالة اتسوي لأنه هالكلمه اتحسسه إنه مالك يد في المطبخ والشغاله هي المسيطرة)"
4- مهما كنت مبهوره بشغل شغالتك لا اتكثرين كلام جدامه لأنه يوحيله إنك أقل منها ولا من دونها ما تقدرين اتسوين شي، فمثلا قولي:"ولا لو الوقت يكفي ومشاغل العيال مو ماخذه كل وقتي وانت عادي عندك تتقبل روايح المطبخ كنت لبدت في المطبخ طول اليوم؟؟!!"
أهم شي لا اتحطين راسج براس الشغاله لو شو ماصار واتنرفزتي خليج هاديه..وردي بردود في صالحج مو اتطلعج ضعيفة الشخصية وما عندج ثقة في نفسج..وعن كلام حريم العايله قوليله مساكين "إلي ما ايطول العنب حامض عنه يقول، ولو اتكلموا أدري من قهرهم عندي إلي اتساعدني أضبط أمور بيتي وهم لا، وانت مو مقصر حبيبي في شي جبتها لي عشان أتفرغ لك وللعيال وشؤونهم، وأنا مو مخليتها على كيفها كله بإشرافي ومتابعتي، والحمدلله ماني من الحريم إلي ما صدقت جتها شغاله رمت عليها كل شيء ولا تدري شو ايصير في بيتها!!"
أتمنى أكون أفدتك وتقبلي مروري والله ايوفقك في حياتك الزوجية والعائلية اللهم آااامين

 

[يتيمة]

عادي اختي انا اشك انك لسى عروس جديده او ما عندك اطفال مشاغل الحياة اكثر من طبخة خلي الشغالة تطبخ واذا كلش الامر مأزمك اختي جيبي لك طباخة وارتاحي