زوجي قرر الزواج ثانية ... اطمع ان تجدو لي الحل الصحيح ليوافق على شرطي

انت توهمين نفسك ان باالبيت ضمنتي حياتك ولا الومك فموضوع زوجه افقدك حالك البيت لن يغير شيء توكلي على الله وادعيه ليل نهار وهذه هو امانك لمستقبلك ومستقبل عيالك
 
اللهم يارب الارباب وياخالق الخلق من تراب ويامغير الاحوال أسألك بكرمك ورحمتك ان ترحم حال اختنا وان تصرف قلب زوجها عن غيرها اللهم آمين آمين.
اختي طوري من حالك وغيري من نفسك عله يغير رايه ،قد يكون سافر لتلك البلاد وراء مالم يره عندك.... ومالم يكن اقدم على هذا الشي فالكرة مازالت في ملعبك.
ثم الله الله في الدعاء والاستغفار وقول لاحول ولا قوتة الابالله
 
♥بسم الله الرحمن الرحيم♥


عزيزتي :إذا أراد الرجل أن يتزوج فهو لن ينتظر منك أو من أي شخص الموافقة فهو سينفذ ما يريد إلا إذا الله لم يريد

عزيزتي :انت قلت أن زوجك لا يحضر للبيت إلا متأخرا وهو غير متواجد أثناد الوجبات أو للجلسة مع الأسرة يعني وجوده مثل

عدمه إذا لماذا إنكسار نفسك بهذا الشكل على إنسان لم يحس بقيمتك ولا قيمة أسرته عزيزتي إياك والطلاق أو أي شئ يؤدي

للطلاق وخصوصا أنك تحبيه(مع إنه عندي ما يستاهل الحب) من أجل أطفالك أولا وإستقراهم النفسي والمكاني وثانيا من أجلك

أنت، حبيبتي من تجربة على صعوبتها وألمها زواج زوجي كان خيرا علي من عدة نواحي أولها زادت مسؤولياته ولم يعد ذاك الذي

يكون خارج البيت للسهر إلي قرب الفجر أو نزهات البر والبحر ، ثانيا بعد مدة من زواجه عرف قدري وكان في بداية زواجه(يريد الفكة مني ) وكان مستعد للهجر والطلاق .

فأصبح يداريني حتى لا أطلب التنازل عن يومي وليلتي.

ثالثا أصبح كريما معي بعد تقصيره.

حبيبتي عليك بالإستخارة والإستشارة ثم الصبر والصبر بالتصبر أنا أعلم ماأنت فيه من الألم والحزن والقهر لكن إن بعد العسر يسرا إن بعد العسر يسرا.

أما بخصوص طلبك للبيت بإسمك إذا إستطعتي الحصول عليه خير وبركة لكن إن كان سيؤدي لطلاقك أو مشكلات فأنصح لاتصرين عليه، أوألطبي منه بيت بإسم أولادك إن كان ولابد.

وعليك بطلب مرتب لك شهريا وأن تكون ميزانية البيت بيديك وتصرفي فيه بحكمة

عليك بالإستغفار وقيام الليل فالله عز وجل أمرنا بالدعاء ووعدنا بالإجابة فهو قريب مجيب الدعاء.

حبيبتي خذي النصيحة من أخت في الله جربت ماتعانين منه الآن ورجاء أن تختصري على نفسك العذاب والألم من أجل رجل فآنطلقي من حيث إنتهينانحن المجربات.

أسأل الله لك التوفيق والسداد وأن يجعلك من الشاكرين وأن يسبغ عليك من فضله وبركاته من حيث لا تحتسبين.
​
 
الله المستعان

شوفي ياقلبي لما قرأت كلامك تحمست مرررررررررررررررررررررره مع اني لا اخفي عليك اني زوجة ثانية (مع انه مادري ليه دائما ملومة ) المهم انا حطيت نفسي مكانك واول شي اسوية ابين لزوجي اني ماني ضعيفة وقادرة على تحمل المسؤولية حتى لو هو غير موجود بحياتي في هذا الوقت الله ماهو مضيع احد بالنسبه للبيت غصب عنه يوفره لك سواء ملك او اجار حتى لو كنتي مانتي في ذمته والمصروف لاززززم تتفقون عليه قبل كل شي وتبيينين له ان كلما كبروا الاطفال زادت مصاريفهم ولابد من مصرووووف شهري ولا يتاخر ابد يعني لازم تتفقون على كل صغيرة وكبيرة على فكرة تراه محتاجك اكثر ماانتي محتاجه له والسبب الاطفال انا مجرربة المهم خليك قويه وفي نفس الوقت ذوبيه بالكلام المعسول مثلا ابشر يابو فلان حتى لو ما كنتي تريدين هذا الشيء يعني سوي اللي تبينه واصري بادب ماهو بطولة لسان اعذريني لكن ابي اشرح بصراحه واذا لا قدر الله وتزوج خليك في حالك ولا تسالي عنه كانه ماهو موجود يبي يشتاق لك اكثر صحيح انه في البداية يمكن يميل للجديدة بس ولا يهمك ولا كانهم في الحياة ارجوا ان تكوني فهمتي علي خلي همك الاول والاخير ابنائك يعني بلغة العامية اغسلي يدك منه وفي نفس الوقت لا تفكري انك تطرديه من بيته وعياله يعني اذا جا ياهلا ومرحبا والكلام الزين والدلع والكشخة وكل اللي يحبه واذا راح في ستين داهية بس عشان عيالك واولا واخيرا من جانب ارضاء ربك لا تفكري بالطلاق ابد لانه ماهو حل في حالتك ذي انا ماني استشارية بس مر علي العبر ومع الوقت بتصيرين الكل في الكل واعرفي نوع زوجك وعامليه على هذا الاساس لان الرجال مو سوا وخلي بالك على عيالك وان شاء الله يكبروا ويعوضك بالخير ......والله عندي كلام كثيييير لكن اترك المجال للاخوات الفاضلات,,,,,,,,,,,,,,,,,,,,,,,,, واسال الله العلي العظيم ان يسخر لك زوجك ويصلحلك عيالك آآآآآآآآآآآمين
​
 
الله يوفقكن اخوتي ريحتوني بردودكم
وعندي أمل بأن الله سيحنن قلبه علينا
الحمدلله على كل حال

زوجي ولله الحمد لم يبخل علي بالمال ابدا وأقسم بالله انه حتى لو تطلقنا معاذ الله من ذلك وبعيد الشر متأكدة بأنه لن يبخل علي ايضا فأنا بنت خالته قبل كل شئ ويعلم بأن لااحد لي غيره من بعد الله

ان شاء الله تكون سحابة صيف وتنتهي
والبيت بأصراري سأحصل عليه ان الله شاء ذلك


شكرا لكم جيميعا
 
الله يكون بعوونك ياااااااارب

والله ياقلبي الرجل اذاا حط الزواج براسه غير يزوجو لووو نتقطع غير كااد الله عز وجل ماارايد ذالك ..



وانتي خلك عند راييك ؟؟ لا تتنازلي مره

الله يكون بعونك وبعووني يارب...
 


قررت الطلاق
صار بيني وبينه كلام وقررنا الانفصال

الله ينتقم من كل وحدة تبني سعادتها على حساب غيرها
والله يشتت كل وحدة رضت بمتزوج وهي عارفة ان بيته بينهدم


حسبي الله ونعم الوكيل
 
لاحول ولا قوة إلا بالله

رددي اللهم اجرني في مصيبيتي واخلف لي خيرا منها


الرجل يخشى الطلاق ويحزن لما جرى أكثر منك


كوني مع ربك وسيفرجها عليك
 
الله يعينك حبيبتي
استمري على طلبك لانه اقل حقوقك لو بيت صغير تحسي فيه بالامان مع عيالك
ان شاءالله يكبروا ويعوضوك باعمالهم
 
ادعي الله ربي يصرف قلبو عن الزواج بثانيه واكثري من الاستغفار وتحري ساعات الاجابه

وربي يصرف قلبو عن الزواج ويردو ليكي الا المتزوج والله صعبه كيف تعطيها نفسها

والزوجه اللي يتزوج عليها تفهم منو ايش الاسباب مو مسألة شئ بس اسبابك اللي جابرتك تزوج

والله يعينك بس انتي كمان اضمني حقك ولاتموتي نفسك عشانوا وخليه لاتكثري عليه بس ادعي انتي

والاتهملي نفسسسسك عشانوا بكيفوا اهم شئ صحتك ونفسسسسسك
 
أولا: أدعو الله ان يقوي قلبك ويصبرك

ثانيا بالنسبة لأسئلتك:

هل أصر على رايي بطلب البيت لأني اكيده ان يملك المال

هل سيسمي البيت باسمك أو باسمه؟؟

اذا باسمك اكيد راح يطلب اسباب خصوصا انه راح يدفع ولازم تتمين على ذمته ما تكونين مطلقة لانه مستحيل يسوي بيت باسمج وانتي مو زوجته..
اذا تميتي على ذمته او تطلقتي البيت راح يكون باسمه وبيقولج حتى لو طلقتج بتعيشين في بيتي لانج بتربين عيالي..
وبما انه يملك المادة قولي له يابو فلان انت مقتدر والله انعم عليك والصراحة العيال كبروا وانا ابيك تطلع بيت ملك اسكن فيه انا وعيالي واربيهم واعتقد اني ماطلبت شي كبير وخصوصا انتم عايلة الله فاتح عليها والله يزيدكم ويبارك لكم في رزقكم والأقربون اولى بالمعروف...


الأمر الأهم لو تزوج سواء طلقني او ظليت على ذمته كيف احتوي عيالي ومابي نفسيتهم تتأثر
ابيهم اقوياء وثقتهم قوية

حبيبتي عيالج سواء ابوهم تزوج ،ماتزوج، طلق، توفى -الله يعطيه العمر- لازم تقوين ثقتهم بنفسم بتذكريهم بأن الله دائما معاهم وانهم يكونون مترابطين ويخافون على بعض ويعيشون حياتهم عادي، يلجأون لج في كل صغيرة وكبيرة وتوعدينهم بأنج تكونين جنبهم دايما اذا احتاجوا لج.. الاهتمام بدراستهم وطلعتهم وترفيههم حتى ما يحسون انه في شي تغير... عليمهم ان هذا ابوهم مهما سوا واحترامه واجب ولا تجيبين سيرته بالسوء جدامهم ابدا والاسلام وصانا ببر الوالدين والطاعة الا في معصية..

طبعا لو صار طلاق العيال بيكونو معي لأن ماراح يتحمل مسؤولية عيال ولو خليتهم عنده اللي بسويه ان بجيب لهم شغالة ومايشوفهم غير ساعة وانا مابي عيالي يضيعو وحضرته ينبسط وآخر همه العيال

مو مشكلة طلق او ماطلق العيال دايما لج الا الكبير 13 سنة المحكمة تخيره بس ما اعتقد ابوه بياخذه اكيد بيخليه عندج وحاولي تقربين بينهم الولد كل ما يكبر كل ما يحتاج ابوه واذا ابوه محد ومحتاج نصيحة رجال جده موجود (سواء ابو ابوه او ابوج) اي رجل عائلة فيه الصلاح والاخلاق...

كيف اقوي نفسي لو كان رايكم اني اصر على رايي بطلب البيت

البيت لازم تصرين عليه حتى لو لم يتزوج.. البيت سته وريلج قادر ليش ما ياب بيت من الاول.. هل انتم عايشين بالايجار؟؟

قولي له عادي تزوج ... الله يسعدك ويسهل عليك لكن لي شرط: واسأليه باقي لي احترام وحشيمة وانا ام عيالك؟؟ اكيد بيقول ايوة قولي ابي منك شي واحد بس ( بيت) واذا تردد حاولي تقنعينه وكوني جادة وصارمة وانتي تطلبين وعندج ثقة بنفسج واذا حسيتي انه مافي فايدة وابوه انسان ينضرب فيه المثل قولي ياعمي هذا اللي ابيه من ابو فلان بيت والباقي الله يسهل علية فيه

وبالتوفيق حبيبتي
 
مرة أبوه عساها هي بالمذله أيش عندها وذها تذلك لاتكونين أنتي ظبينتها
عالم منهيه
وقرارك جدا جدا حكيم
ماشالله عليك قادره تحتفظين بتوازنك الله لأيضرك
الله يلين قلبه ويصلحه لك ويهون عن الزواج كله
 
الى قبل يومين ومتحملة

لكن الآن انهرت ومو قادرة اتحمل شئ منه
خلاص لابيشتري البيت ولاحاجة مع ان عنده
والطلاق بيصير قريب بس انتظر العيال يخلصو هالترم مابيه يفوتهم شئ او مستواهم ينزل

بعدها بنقل اوراقهم لمنطقتي وبسكن بالغرفة تبعي بكرامتي
واللي هانت عليه 14 سنة عشرة علشان زوجة ثانية ماابغاه ولاابي احتك فيه


من باعني برخيص بعته بتراب



مشكورين خواتي على وقفتكم
 
هو يحاول يضغط عليك ..

تنازلي عن البيت في الأخير إن وجدتيه سبب لإفتراقكم

حياة أولادك مع والدهم أهم من المنزل ..
 
اختي واثقة شكرا للرد

اعلم انه يضغط علي
وانا اعرف زوجي اكثر من نفسه
ان وافقت باللي يبغاه راح يتمادى معي أكثر وأكثر
لكن البيت وماطالبت بقصر او فيلا بيت صغير يضمني انا واولادي ويحفظني من الناس
وكرامة لي قدام الكل سواء اهله او اهلي
لكنه مصر لأن يبيني ارضخ له غصب لأن عارف ان لالي سند ولاعون

لكن لي ربي هو اكبر من الجميع واملي فيه كبير بياخذ حقي وحق اولادي
 
انا الآن مااكلمه ولايكلمني

وحارمة نفسي من كل شئ لااكل ولاشرب لأني يأست من كل حاجة احاول اصبر نفسي وارجع من جديد

حتى النوم طلعت من الغرفة انام مع بنتي وماخليته يشوفني ولابي اشوفه


تفاهمت معه بالطيب قلت له وقت اللي تشتري البيت حياتك مع الثانية ومعاي بتمشي صح وبتكون سعيد
لكن بهالطريقة ارضخ واضل بالشقة مااقدر اتحمل احس صعب

على حياتي اليتم اللي عشتها لوحدي مارضخت لأي أحد
وماتعودت ياما غلط وغلط واسكت عنه

يسهر طول الليل واحينا من يطلع الصباح لين الفجر الثاني مانشوفه

كل طريقته معاي ومع الاولاد غلط بغلط عدا المصروف اللي يعطينا مايهتم بشئ ثاني

هذا كيف بيلتفت لنا لما يفتح بيت ثاني
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل