زوجي عشقان

[صدى النور]

خواتي ..

زوجي اتعرف قبل سنة تقريبا على وحدة و اتطورت علاقتهم بالتلفون و وصلت لمرحلة العشق ..
هو مكذب عليها ببعض التفاصيل الصغيرة و مخبي عليها انه هو متزوج .. و عاطنها اسم غير اسمه الحقيقي ..

البنت طيبة و بت أجاويد و الكل يمدحها .. و صارت في الفترة الأخيرة تضيق عليه علشان يتزوجها و هو يتهرب منها .. لأنه مو عارف يصارحها بأنه هو متزوج ..

في المقابل أنا عرفت السالفة من كم شهر و صرت أتابع الموضوع معاه بين فترة و فترة .. يفضفض لي عن علاقته معاها و كيف انه هو يحبها و يحبني و ما يبي يجرح أي وحدة فينا .. و انه هو يبي ينهي العلاقة بس من غير ما يسبب ليها أي جروح أو يهينها ..

طلبت منه اكلمها .. بس هددني اني اذا قلت ليها اي شي او خبرتها او شي زعلها .. راح يكون ليه تصرف ثاني معاي .. و انه حياتي معاه راح تتغير ..

هو يعتبرها المنفس و ال عشق الممنوع ليه .. و يحبها لدرجة تذبح ..

و في المقابل انا واثقة انه يحبني .. و مستحيل يفارقني .. بس طماع و يبي الثنتين ..

محتارة شلون اتصرف .. أواجه البنت .. أطرش ليها رسالة و أخبرها .. أو أنتظر هو يصارحها ..

اخاف يصارحها بأسلوب عاطفي .. بأنه هي الحلم و الحب و العشق بس ما يقدر يرتبط ابها لأنه متزوج ..
و أخاف بعدين تتعقد الأمور أكثر و أكثر .. بأن مثلا ترضخ بأن تصير ليه زوجة ثانية ..

شيروا علي شلون اتصرف .. و أجبروا بخاطري

 

[دلوعةزوجي]

انتي من جدك تتكلمين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
البنت طيبة و بت أجاويد و الكل يمدحها
الطيبه وبنت الاجاويد ماتخون ربها ثم اهلها بمسمى الحب والهيام

صرت أتابع الموضوع معاه بين فترة و فترة
برافو عليك شاطره ذكيه شطوره وش حابه كمان تسمعين علشان تكملين هالمسلسل الفاشل اللي تنحيتي عن دور الزوجه واخذتي دور الام او الاخت او الصديقه

يفضفض لي عن علاقته معاها و كيف انه هو يحبها و يحبني و ما يبي يجرح أي وحدة فينا ..
اهانة صريحه لسموك وانتي قابله فيها

انتي لو تحملين ذرة حب لزوجك ماترضين بهالعلاقه المحرمه
انتي لو فعلاً تحبين زوجك كان انهيتي هالمهزله اللي صايره
شكلك فاهمه المصارحه بين الزوجين غلط شكلك فاهمه كيف تكسبين زوجك غلط
روحي خذي لفه بقسم الاستشارات وبقسم الزوج والزواج وشوفي المصايب وشوفي كيف الحرمه فينا تدافع عن مملكتها بشتى الطرق

 

[رندا كووول]

تصدقي قرأت موضوعك اكثر من مره ..احاول اتأكد انتي زوجته او اخته..
مدري مين الطيب فيكم انتي او زوجك او البنت..وخايفين ع احاسيسها ياحرام تتأثر وتنصدم لمّا تعرف انه متزوج..وهي طيبه وبنت اجاويد وتتعرف ع واحد بالحرام وتخون اهلها اللي وثقوا فيها وما تخاف من ربها ..
خذي موقف قوي قولي لزوجك يخاف ربه ف بنات الناس .ومايعلقهم فيه .ويصارح البنت ويقطع علاقته فيها ويتوب لربه ..ذكريه بالله ..شغلي عنده اشرطه عن العلاقات المحرمه ..قوي عنده الوازع الديني..حثيه ع الصلاة ف اوقاتها .
لاتكوني بارده وساكته كأن ماعندك غيره ولا همك .بدل مايهددك انتي هدديه بتركه لو مايتوب لربه ويترك المراهقه حقته ..
الله يهديكم

 

[صبرت ومليت]

ربي يعينك بس احس ان ما عندك احساس

اتوقع مادام يحبها بجنون فهو يقدر انه يتخل عنك

اصحي من نومك ........

 

[صدى النور]

بنات صعب الموقف اللي أنا فيه ..

ما ذكرت يمكن اني انهرت و بكيت و هددته بأن يا أنا يا هي ,, أول ما عرفت ,, و قطع علاقته معاها فترة كم شهر .. بس بعدين رجع ليها من ورايي ..

فالحين التصرف اللي قاعدة أسويه رغم انه يذبحني و يجرحني بس أكون معاه و لا يسوي كل شي من ورايي ..

خبروني شلازم اسوي ..

البنت ضحية و أنا كمان ضحية ..

بس زوجي الله يهديه حازم موقفه بأن هو ما يبيها كزوجة .. كثر ما ان هو بس تعود عليها في حياته و كحب سري في حياته .. مغامرة عايشنها بالسر ..

ادري السالفة غلط من الأساس .. بس اخاف اتصرف بقسوة و اخسر زوجي للأبد

 

[صدى النور]

في شي كمان لازم اضيفه

اني عندي مشاكل في الحمل .. و السبب مني..

و هالسالفة لاوية ذراعي .. يعني في النهاية ممكن يفرط فيني بسهولة .. علشان الأولاد و هالشي من حقه .. لأنه مسألة الحمل بشكل طبيعي طبيا مستحيلة ..

فلو عصبت و ضخمت الموضوع و عصبت و اتهاوشت معاه .. راح يمسك حجة الأولاد

 

[دلوعةزوجي]

تخسرين زوجك ليه انتي اللحين ماخسرتيه
فوقي من غفلتك يا ماما هو الان قاعد يخدرك بكلامه الوهمي المعسول وجالس يلعب على الحبلين لمصلحته هو
هل فيه زوج عاقل يسوي سوات زوجك
شوفي انتي امامك حلين
يا زوجك يقطع علاقته فيها وهالشي بيترتب عليه توتر ومشاكل لاكن نهايته سعيده
يا تسايرين زوجك اللين تدخل عليك بفستان ابيض وزوجك وقتها بيقولك هي زوجتي مثلك

 

[صدى النور]

دلوعة زوجي ..

زوجي يبكي دمووع و ألم و في حالة ما يعلمها الا رب العالمين و ندمان على علاقته ابها و يبي يصارحها و راح يصارحها عاجلا او اجلا ...

حالة عشق بمعنى عشق ... و انا اموت الف مليون مرة في اليوم على هالسالفة ..

بس مو عارفة شلون اتصرف ..

 

[دلوعةزوجي]

شوفي اول شي وش نمط زوجك مو لاننا بنراعي مشاعره لا لاننا بنعطيك حل لنهاية هالمأساه

 

[صدى النور]

زوجي شرقي جنوبي .. و أني غربية جنوبية

 

[صدى النور]

دلوعة زوجي ..

في بالي فكرة اني اراسلها بمعرف وهمي على الفيس بووك لأنه عارفة صفحتها .. و أخبرها بكل شي .. بس اكيد راح تنهار و تنجرح و راح تواجه زوجي و راح يعرف اني خبرتها و بيقلب الموضوع علي ..

شرايج؟

 

[دلوعةزوجي]

بخصوص الانماط انتظري تدخل حكيمه لهالنمط لان خبرتي للشمالي الشرقي
لاكن اقدر اقول ان الشرقي يخاف من كلام الناس تقدري تقولين له وش منظرك قدام اهلك واصحابك لما يعرفوا انك مخاوي وعشقان بالحرام وش نظرتهم لك وانت جارح زوجتك وتوهمها بحبك لها
يا عمري انتي فوقي ترى مافي شخص يحب ثنتين بوقت واحد واكبر دليل يوم القيامه الرجل اللي مايقدر يعدل يجي بشق مايل يقابل ربي
معناه ان القلب ما يحمل الا شخص واحد
بخصوص انك ترسلين لها احس هالشي بيقلب الطاوله عليك
لاكن سكوتك اكبر غلط
ادخلي على ملف الرجل الجنوبي واقرأي بتركيز
وبأذن اللع لي عوده

 

[صدى النور]

طيب زوجي لما يصارحها راح يقول ليها انه هو يحبها و يموت فيها و انه ندمان انه جذب عليها و انه لو كان في عالم ثاني كانت ممكن تكون زوجته بس في ظروفه كمتزوج صعب انه يتزوجها

تتوقعون بعد هالسيناريو شنو راح تكون ردة فعل البنت

ممكن تتضايق في البداية بس بعدين ممكن تقبل تكون زوجة ثانية بسهولة اذا اقنعها

لأنه قبل فترة صارحها بأن هو حامل سكلر و هي بعد حامل سكلر .. و ان ما راح يقدرون يتزوجون

فخبرته انها ممكن تعمل عملية ربط و ما تبي اطفال
بس تبى ترتبط فيه و هو راح يعوضها عن كل شي

البنت كاسرة خاطري .. و اني بعد كاسرة خاطر روحي .. و زوجي واجد تعبان و متلته بين الثنتين

 

[صدى النور]

السالفة واجد معقدة ...

و احس ما ليها حل الا ان يذبح وحدة منا ..

 

[انثى تعشق رجل]

طيب ايش رايك تكوني انت كبش الفداء ويذبحك في سبيل عشقه هذا

زوجك يكذب عليك ويستغفلك وانت بالمرره على نياتك
اسمحيلي هذي مو طيبة وحب خير للناس هذا هبل
اللي انت ساكتة عليه شيء حرام وبيخرب بيتك .. ومادام هي مستعدة تتزوج بدون انجاب
صدقيني بتقوله تزوجني حتى لو زوجة ثانية
ياقلبي هذي أكيد زي ماعرفت زوجك عرفت غيره وزوجك شبك معها واستمر
والحين خلص بتصيده وبتستر نفسها .. لكن المستورة مستورة حتى ببيت اهلها

تنطق عند اهلها وانت حافظي على بيتك وخذي زوجك لك لوحدك
وبما ان الامور خربانه والقصة معقدة لو انا مكانك باستخير
وأكلف احد من اخواني يوصل لاهلها لاخوها ويفضل يكون انسان متزوج وعاقل
ويشكي له من بنتهم ويعطيهم رقم زوجك خلي يسوو في اللي يخلي يتربى ويعرف ان الله حق
ومو لازم يعرفو اخوك .. يروح لهم على انه من اهل زوجك وعرف بالصدفة وقال بيلحق بيت اخوه قبل لا ينهدم

 

[قوتي بإيماني---]

حبيبتي انا لومكانك اعرف اخلي زوجي يكرهها ---كيف-----خليك دايما تكرهينه بالبنت---كيف----قوليلزوجك اللي تكلمك تكلم غيرك كيف تثق فيهاااااااااا غيري من نفسك ولاتهزك العلاقه اللي بينهم-----دوري كيف شخصيه زوجك تتعامل علشان تعاملين معه--------واهم شي خليه يكرهها بانه اللي تسوي علاقه معه لاتصلح زوجه ولاشي وعلى شوي شوي ---وحاولي تختبرينهااااا بالفيس ادخلي على صفحتهااا وسوي علاقه معهااا على اساس انك ولدوخوذي رقمهااااا وارسلي لها كلام معسول وانك تموتين فيهاااااااااااااااا بعد علاقتك معها بالفيس اذا صدتيها قولي لزوجك انا حبيت اختبر البنت طلعت بنت حرام وعندهااا علاقات واني سويت نفسي ولد ومشت عليهااااااااا ياترى يازوجي الحبيب ترضى تكون زوجه لك وام لعيالك بكره يصير واحد من عيالك مو لك اصلااااااااااااا وانتي وشطارتك اهم شي لاتتنازلين لهاااا

 

[اللمسة السحريةD]

السلام عليكم أختي ...
أول مشاركة لي في المنتدى الجديد .... بسم الله و على بركة الخالق نبدأ

الأخوات الغوالي ...حبيبات قلبي إشتقتلهم ...ما قصروا و رغم الصعقة و الإندهاش المسيطرة على كلماتهن ... إلا أنهن عزيزتي قالوا جواهر و ضربوا على التوتر الحساس عندك و أنت تعرفين هذا الشيء ...

لأنك عزيزتي قبل كل شيء و بعد كل شيء أنثى .... و قلبك دليلك .... وفي داخلك كل كلمة قالوها أنت تعرفينها أصلا ... إلا أنك تعيشين في نوع من النكران و عدم التصديق .. لأن برأيك مواجهة الموقف قد يخسرك زوجك ...

إذا لا ألعب دور العطوفة المتفهمة و لا إني أخسره ....

لكن و الله عزيزتي هذا التفكير بالذات هو الذي سيجعلك تخسرينه .....

سؤال أخيتي ... هل كنت لتقبلي برجل لا يظهر لك رجولته ؟ لا طبعا كنت لتمقتيه ...

نفس الشيء مع زوجك ...كيف تريدنه أن يحترم و يرضى على أنثى لا تظهر كبريائها ... أين هو كبريائك أميرتي ؟!

الرجل الشرقي يحب تلك المرأة الواثقة المتمكنة المعفمة بالكبرياء .... فكيق لك أن ت رغم أني أشك بأن زوجك شرقي و أناشدك بإعادة الإختبار ...

فكيف لك عزيزتي أن تنزعي تاجك و تلبسي نظارات الجدة بدلا عنه ....

هل تتوقعي أن المسايرة ممكن أن تحفظ لك زوجك ؟ هل تتوقعي الإستسلام بتلك الطريقة لواقعك دون الجهاد و النضال لما هو حقك الشرعي أمام الله و المجتمع سيساعدك ؟!

لا و ألف لا ... إعلمي و إيقني و تأكدي غاليتي بأن لو تلك الفتاة التى أستغرب كيف تصفينها بالعفيفة مقدر لها من عند رب العالمين أن تكوني زوجته الثانية فلا شيء سيستطيع أن يوقف قدر الله من أن يحدث ...

فيوم مماتك و يوم زواجك و يوم طلاقك إن كان سيحدث ... كل تلك الأحداث مسجلة في اللوح المحفوظ عند الله عز و جل قبل أن حتى تولدي أختي ...

لا نستطيع تغير تلك الأحداث الكبيرة ... إلا أن رب العزة وضعها كي يختبر إيماننا و طريقة تصرفنا و مدى تمسكنا بديننا الحنيف ... فهو خلاصنا الوحيد ...

نعم عزيزتي إذا كانت هي مكتوب لها أن تتزوجه فلا تسطيعين تغير ذلك ...إنما ما تستطيعين تغيره و التحكم به هو كيفية تقبلك و تصرفك مع القدر ....

ماذا أقصد بذلك ؟
عند وفاة أحبائنا ... نستطيع أن نقلب الدنيا بكاء و حزن ... أو نستطيع أن نستغقر لهم و نتذكر بأن كل نفس ذائقة الموت لا محالة و نقوي من صلتنا مع الخالق عز وجل ...

القدر حاذث لامحالاة ... إلا أن طريقتنا في التعامل معه هي التي نحددها نحن

الإنسان مخير اخيتي في كثير من الأشياء .... و أنت أيضا مخيرة هنا !

فإذا كان القدر كما قلنا ماض لا تغير له ... بالله عليكي هل تردين أن تزف له و يقال فلانة لم حتى تحاول أن تحمي حياتها و تسترجع زوجها ؟ ماذا عنك أنت كيف ستشعرين و أنت لم تبذلي كل ما عندك للمطالبة بحقك سايرتيه و أعطيتيه كل الدعم كأنك والدته و مع ذلك هو إمشغول بها و إزداد إستسخافه بمشاعرك...

النهي عن المنكر من عوامد ديينا الكريم ... عدم السكوت على حقك و على الزنا من خلق المسلمة الصحيحة الشجاعة...

كوني تلك المرأة عزيزتي ... قوي صلتك بخالقك و راحجي مفهوم الإيمان بالقدر عندك ... و صدقيني حتصيري ما تهابي مخلوق لأن الخالق معك ...

إستخيري المولى عز و جل و إعلمي أنه سبحانه مع المظلوم .... و أنت مظلومة فكيف بالله عليك تسمحين له بأن يدوس على مشاعرك و على كرامتك كزوجته بتلك الطريقة ...

فجري غضبك عليه و أطلقي العنان لمشاعرك ... لا عن طريق الأفعال بل عن طريق التفكير .... انا أريدك أن تكرهيه بعض الشيء ....فأنت محتاجة هذا الشيء

لأن هذا الحب الغير صحي ما ينفع عزيزيتي ...خير الأمور أوسطها ... فلا تخسري زواجك و كرامتك و صورتك أمام زوجك من أجل حب زائد أعمى ر مسيطر عليه .... حبيه أي نعم ...لكن حبيه بذكاء حتى لا تخسريه و تخسري نفسك


صلي ركعتين حاجة للمولى عز وجل أميرتي و بعدها إجلسي مع نفسك و حاسبيها جيدا و من ثم وفقا لزوجك و معالم الضعف و القوة فيه و في مجتمعك ... شغلي كيد النساء عندك و أبدأي بالله عليك بالعمل على إسترجاع بيتك !

أعذريني انا لا أستطيع أن أنصحك بالتعامل معه حسب نمطه لأنني أشك بأن زوجك جنوبي شرقي و ليس العكس ...

نصيحتي الأخيرة لك سيدتي هي مثل عامي الذي نتداوله ...

إلي يشتريني بالغالي أشتريه ... و إلي يشتريني بالرخيص ...شو أسوي ؟ أبيعه !

لأن ذاتي و شخصي أثمن من كل شيء و أي شيء ....

وفقك الله لكل ما يحب و يرضى و هدى لك زوجك و أبعد عنكم كل أولاد الحرام

أميييييييين

 

[رازيا]

ما شاء الله الحكيمات ما قصروا

 

[ملكة بعيونه]

تصدقون من الصدمه ؟؟؟
اشك انه هو الرجال داخل في
معرف زوجته ويبغى حل لمشكلته
لاني لحد لان مو مصدقه كلامها
اسمحيلي اخيتي أعتذر عن صراحتي ....
​

 

[صدى النور]

بنات ..

اللي صار انه زوجي كلم البنت و صارحها بكل شي .. باسمه و انه متزوج و بكل شي ..

البنت طبعا انهارت .. و ما رضت تصدق ..

اني في المقابل طرشت ليها رسالة على الفيس بووك .. و خبرتها ان تسوي بلوك و دليت لزوجي من كل شي .. و الا بيكون لي تصرف شرس معاها ..

و زوجي من امس و هو هيمان في الشوارع .. ما ليه حواس ... يقول لي ما يقدر يعيش من غيرها !!

و ما ادري شبيصير بعد فترة .. بس خايفة .. و قاعدة بس اترقب ..

للي يلوموني على ردة فعلي و طيبتي .. انا ما لي أحد في هالدنيا غيره .. أبوي متوفي .. و ما عندي خوات .. و امي ساكنة مع اخواني بغرفة صغيرة ..

و ما أقدر أحمل طبيعي .. فكافي المرض اللي فيني علشان يخليني اضغط على أعصابي و كبريائي و أتصبر عليه ..