خواتي اليوم طبعاً مارحت الدوام
وكالعادة هو طلع من هنا
واستلمت اوراقه من هنا
اقول اللي خلاه ينسى ورقه بيخليه ينسى شي اكبر
دورت وقلبت الأوراق
لقيت فواتير الجوال طبعاً مافتحها في ظرفها للحين
فتحتها انا وشفت صفحة تحويل الرصيد
كل الأرقام ارقام اعرفها بأستثناء رقمين
اتصلت على الرقم الأول..ألا وحده سودانية
قلت لها السلام عليكم
ردت علي.وعليكم السلام
قلت اختي أني متزوجة ؟
قالت نعم
قلت ترضين تحصلين رقم وحده عند زوجك أو تكتشفين ان زوجك يحول رصيد حق وحده
قالت لوالله مأرضى
قلت لها طيب ممكن تفسرين لي وجود تجويل رصيد من جوال زوجي لجوالك بالتواريخ المذكورة
وسردت لها التواريخ والوقت
قالت لي والله مأعرف زوجك ولا أحد يحول لي رصيد
وهيا نمشي انا وأنتي نقابل زوجك
خخخخخ
طااااااااااااااح وجهي
تذكرت زوجي دايم يقول لي مستشار المدير عندنا سودااني
قلت لها اختي زوجك وين يشتغل
قالت لي في ...................
وطلع نفس شغل زوجي
عاد انا دوروني ماتلقوني اعتذرت منها وقلت يبدو ان فيه خطأ في الرقم
أنا آسفه أختي
هذا بالنسبة للرقم الأول
اتصلت على الرقم الثاني وطبعاً هذا نصيبة أكبر من التحويلات
أول رنه وطلعت لي نوااااااااااال
تحب غيري وجايل تقول لي وماراعيت شعوري..أو كما قالت نوال
وطبعاً اختكم ماتحفظ اغانيها
اتصلت مره ومرتين ماردت
المره الثالثه وانا أغلي ردت الهانم المصونة
الووووووووووو تقولها وهي شكلها تفرك عيونها
قلت السلام عليكم
قالت وعليكم السلام
قلت ممكن اتعرف
قالت انتي مينونه
متصله هالحزة عشان تقولين ممكن اتعرف
قلت حبيبتي الساعة 11 الحين وانتي ماقمتي
قالت وانتي شيخصج
قلت تهمني صحتج وابيج تنامين في الليل بدري
عشان السهر مو زين عشانج
قالت اني شكلج فاضية
قلت لاوالله الا انتي اللي فاضيه وحقيرة وماعندج دم
قالت ليه ........
قلت ممكن تفسرين لي وجود رقمج عند زوجي
وتقولين لي اش حقة يحول لج رصيد كل كم يوم ميه وأكثر
قالت ومن يكون زوجج
قلت أوووووووووه من كثرهم ماتعرفينه
قالت أيه كثير كثير
بتخلصين وبتخليني انام والا لا
وبندت الجوال بوجهي
ارسلت لها مسج اذكرها بربها وا الدنيا دواره ودعيت عليها لو مأبعدت من زوجي ان الله يوريها في نفسها وبيتها ماتكره
بعدين بندت الجوال
وطرشت لها مسج ليش بندتي الجوال إذا انتي صادقه وشريفه وعفيفة ردي علي رسيني على بر
اتصلت بعدها بشوي ردت
قالت انتي ماتقولين لي اش تبين
قلت ابي اعرف الشخص اللي حول لج فلوس بتاريخ كذا وكذا
وش علاقتج فيه
قالت عطيني اسمه
ضحكت ضحكة دلع
قلت لها ياحياتي تنكتين حتى وانتي للحين ماصحصحتي من النوم
كم واحد محول لج رصيد في هالتاريخ
تدرين انتي شكلج تحبين التعدد في العلاقات
وعشان مأضلم كل اللي تعرفينهم
إذا جا زوجي بأتصل لج من جواله يكون احسن
عشان اسمع ترحيبج فيه
قالت انتظرج
وطبعاً انا طنشتها
ومن جا زوجي وأنا ماخذته بلالدلع مع شوي زعل
لحد ماخليته يلاحقني في البيت يقول لي بس ابيج ترضين علي
قلت له امس تهاوشني
واليوم تصرخ علي وعلى عيالك
خليت نفسيتي تعبانه
وبسببك غبت من الدوام
والحين جاي تقول آنا آسف ببساطة
وتميت ادلع عياللي والعب فيهم وأهو مأعطيه ريق حلو
لحد مأخذني بيدي الغرفه وتم يحضني ويصيح ويقول انا مأحب الا انتي
وكلام الرجاجيل اللي ماينعرف صدقه من كذيه
طبعاً وآنا كل كلمة أمطها واتدلع عليه
لحد ماجننته
وحلفت بيني وبين نفسي اني لأنسيه اياهم
في قلبي حسره
وراجعت نفسي
عرفت يمكن الشي الوحيد اللي ينقصني حبة الدلع ومط الكلام
والا آنا دايم اعتني بنفسي وانيقه في لبسي ولحمد لله
بس الحين اللي ابي شوركم فيه
وش اسوي مع هالحقيره
انا فكرت اني اكرهه فيها بطريقة غير مباشرة
طبعاً أنا ماقلت له اني شفت ارقام أو اتصلت على احد
بس افكر اجيب له قصص عن اللي من هالنوع من باب السوالف
والأمراض و و و و
وهي افكر اطرش لها رساله اقول لها لو تسمعين بس وش يقول عنج
يقول هذا تعرف غيري عشرة ولو فيها خير ماخانت زوجها واهلها
ويقول مافيج شي حلو
ودي اخليها تلعن اليوم اللي عرفته فيه
انتو اش رايكم ؟؟؟؟
تصدقون اني بغيت اطلب منها اني اشوفها في مكان عام
ابي اشوف شكلها واعرف وش اللي فيها مو فيني
شورو علي ياخواتي
