زوجي بهدلني وأنا تعبت أرجوكم الحل

[المـــلهمة]

السلام عليكم:21:

بنات أنا سالفتي طويييييله و أحاول أقولها بإختصار

أنا للآسف ما عندي حظ بالرغم من توفر جميع المواصفات عندي

ما أمدح نفسي لكن هذي الحقيقه ... :10:

تزوجت من قريب لي وكانت ببداية زواجنا مشاكل من أول أسبوعين زواج بدأت المشاكل .. بدايتها طلب مني أدخل المطبخ بحجة إنه يريد أن يتذوق شيء من يدي ورفضت كوني عروس وتوني بشهر العسل...ورحت بيت أهلي أيااام وبعدها تراضينا ...
واسبوع وتخانقنا على سالفه تافهه كان غلطان فيها وأنا انفعلت وطولت لساني عليه وتفأجأ من طولة لساني سبيته وجاء عطاني كف بصراحه كف عادي وما يوجع بس أنا من الصدمه مسكت ايديه و دفعته وزعلت ورحت لبيت أهلي أسبوع ... وبعدها تراضينا...
وبعد شهر اكتشفت عنده رسايل بالجوال من بنت طبعا الرسايل كانت غراميه وشوق... قلت له انصدم وقال هذي وحده واطيه واهلي يعرفون بسالفتها ...وكنت بقولك بس كنت مستحي منك لان توك .. وهذي البنت هي اللي تلاحقني واصلا هالرسايل قديمه بس خليتها عندي استفيد منها !!!! كذاب ما صدقته
المهم سبحان الله بعدها 3 ايام شفت عنده شي ما يرضي الله
كرهته وخفت منه وسكت ما قلت له ولمن نزلني ع بيت اهلي كزياره لهم ...اتصلت عليه وقلت له ماراح ارد معاك لاني شفت هذا الشيء... بدأ يحلف ويلف ويدور ويوهمني اني غلطانه وان اللي شفته كان مجرد شيء عادي واني ظنيت فيه سوء ... لكن ما رجعت له وبعدها باتصال مني خبرته اني حامل .. والاخ بعد ما عرف اني حامل تركني ببيت اهلي وما عاد يسأل ولا يعرف اخباري وقلب الموضوع علي وبين للكل إني أنا الغلطانه مش هو الغلطان وقبل ولادتي بشهر ...تراضينا يعني قعدت ببيت أهلي 7شهور بقدرة قااادر ورجعت له ,, وكنت مستبعده اننا نرجع لبعض ..بس قلت عشان اللي ببطني ارجع له ويا ليتني ما رجعت ..كان متكبر علي ومغرور و طلع على شخصيته الحقيقيه كان يتعامل معاي معامله عاديه وكان أيام يسهر برا و يوم يومين يجلس وكان يقول لي كنت بطلقك أول ما تولدي وكنت خاطب3 بنات ولعلمك أهلهم وافقوا واحترت بمنو أخذ وفجأه جاؤا أهلك وتوسطوا بينا ورجعتي لي ,,, أنا انقهرت من كلامه ... بس سكت وما رديت وسويت حالي أذن من طين وأذن من عجين...
المهم بعد الولاده وبعد ما خلصت نفاس اتصل يبي يأخذني قلت اصبر أيام البنت (بنتي) تعبانه قال عادي رايحه لبيت أبوها
وأنا اصلا كنت اتعذر لأن كانت عندي حساسيه مفرطه بالبطن واستحيت ارجع ويشوفني بالمنظر هذا فتعذرت بالبنت
عصب وقفل السماعه وبعدها كلمته قلت البنت بخير قال وبعدين قلت ماراح تجي ؟ قال الحين بترجعين ..احتري ما راح أجيك ..إذا تبين ترجعين ارجعي بنفسك:19: ما راح أجي أخذك
وأنا وحده يا بنات عندي كرامه وعزة نفس جلست ببيت أهلي وعمر بنتي ألحين 6 أشهر وما فكر يردني خلاني معلقه الله يعلقك أموره مثل ما علقني حسبي الله عليه...
ونسيت أقول هددني بالزواج علي ..إذا ما رجعت !!!!
وأنا أشوفكم تتكلمون شرقي شمالي جنوبي غربي وما ادري أيش؟
وما فهمت...مع إني قرأت موضوع صفات الشرقي والشمال إلخ
وما فهمت ... يا ليت تقولون لي أنا شنو و زوجي شنو؟
وكيف أحل مشكلتي مع هذا الزوج السيء؟

زوجي نوعا ما عصبي بس مو كثير و مغرور متكبر (ما ادري على ايش؟ من جماله ولا من مكانة عمله ! )
يلعب ألعاب الGAME ويدخل النت كثيييييير
يفرح وبنبسط كثير لمن أكون ببيت أهلي
يحب مشاهدة الأفلام الاجنبيه
ما يعترف بحبه لي إلا مره أو مرتين بس
دائما أتزين له مع ذلك قليل جدا جدا يمتدحني
عندما ننام يبتعد عني ويعطيني ظهره
وكثيرا ما أردد في نفسي ( مالت على اللي تتزين لك:30: )
وبعدها صار لبسي عااادي بجامه عاديه سبورت عادي
جلابيه عاديه وخليت قمصان النوم وما عدت أفكر فيها والسبب هو.
ما يبادر ويرسل لي رسايل حب أو دعاء حلو إلا لمن أرسل له يقوم يرسل لي !!!
من ناحية النفقه ما يصرف علي ولا قرش أما على البيت يصرف ويقول أنتي موظفه شيلي حالك وتحملت مصارفي لبس وخدامه ومراجعات مستشفى كلها من جيبي ...
ومن تزوجنا إلى هذه اللحظه ما أهداني ولا هديه !!!
وحتى السفر ما سافرنا أبدا ...

ما تهنيت بشبابي ولا فرحت مثل باقي البنات بزواجي:8:
أحس كلامي مو مرتب سامحوني اكتب بعفويه وأسرد الموضوع على طول ... :10:

أتمنى تلاقون حل لمشكلتي وتقولون لي أنا شنو شخصيتي و زوجي السيء أيش شخصيته ؟
ولا تنسون تدعون لي بالخير والتوفيق ...

بنات أنا أحب الضحك وأحب أنكت وأسلوبي مرح بس من تزوجت طفت شمعة الفرح عندي وصارت الدمعة رفيقتي
وصرت حساسة جدا وأبكي بسرعه
والله بالرغم اللي سواه فيني إلا أني للحين شاريته عشان خاطر هالبنت الصغيره :11:
ومن تجاهه الآن ما أحبه و لا أكرهه شعوري عادي اتجاهه

يا ليت وحده خبيره أو عندها خلفيه إنها تعطيني المشورة والرأي
السديد بهذا الموضوع ...

 

[المـــلهمة]

ع فكره النك مشترك بيني وبين أختي

 

[قمر بلامنازع]

كان الله في عونك يارب
وفرج همك
ورده لكي ردااا جميلااا​

 

[كاتياباسل]

شوفي عزيزتي أنتي قلتي كل شي سىء بزوجك
وغضيتي النظر عن تصرفاتك،،،وكأنه هو الغلطان بس
**بكون صريحه معاك ولاتزعلي**
ياعمري أنتي من أول أسبوعين زعلتي ورحتي أهلك علشان شي تافه،>>(علشان طلب يذوق من أيديك:33: بس)
وين عقلك بهالوقت؟؟؟ المسألة مو مستاهله زعل وهواش،،،لا وتدخلي أهلك كمان!!!!!!!!
بعدها بأسبوع >> ومثل ماقلتي زعلتي((لسبب تاااااااااااافه))
تصارخي بوجهه وتردي له الكلمة بعشر،،،حتى أظطر يضربك،،
ياااااااااااااااالله عروسه تسوي كل هالشي!!!!!
العروسة تكون كلها نعومه وحياء حتى ماتطالع بوجه زوجها ،،،مو تصارخ وتهاوش ،،،،وليت ع مشكله محرزة!!!!
أنتي ياقلبي قلبتي شهر عسله من البدية نكد،،،ونكدتي ع روحك بعد،،،ونشرتي غسيلك عند أهلك مع أن المفروض مو أي شي يصير على طووووووول بيت أهلك!!!!
الحيييييييييييين بعد كل شي تلوميه!!!!!!!!!
زوجك حب يأدبك بطريقة ثانية وهي التطنيش!!!
صار قوي ،،،وداس على قلبه!!!!
حاولي تصلحي ما أفسدتي وأكتبي كلللل صفاته علشان البنات اللي لهم علم بالشخصيات يعطوك نمطه،،،وتعرفي كيف تتعاملي معه
وبعدين بين الزوج وزوجته مافيه كرامه،،،أرجعي بيتك،،،ولما يشوف بنته وتتربى بينكم راح ينسى كل شي ويتعلق فيكم
بشرط تغيري من عصبيتك،،،وتحتوي زوجك بحبك،،،وتوزني الأمور بميزان العقل،،،ولاتدخلي أي شخص بينكم
زوجك يحبك بس أخذ بخاطره،،،ويبي يعطيك درس!!!



أتمنى أن أفدتك بشي،،،،،،،،،،،،،،،،،،،،،

 

[حدود الحب]

مااعرف شو فيها لو طبختي له ! تراج ببيت بروحج مااعرف العروس صح تدلع بس مب معناته ماتسوي كوب شي حقها وحق زوجها انا مع الاخت كاتيا باسل
والله يهدي سرج امين ويسخر لج ريلج

 

[أسماء زكي الدين]

انظري عزيزتي سأحاول أن أتخيل نفسي معكما في البيت - من خلال موضوعك أولا ثم لي إضافة - وتحملي كلامي على ثقله
بصراحة من أول أسبوعين عملتي له نكد .. يا ربي طلب طبخة طيب أنا بعد اسبوع من زوجي طلب مني زوجي أطبخ لصاحبه !!!

وكل كم يوم تركتي البيت ورحتي بيت أهلك زعلانة
نفسي افهم كيف يستقبلك أهلك ويطاوعونك في أن تضيعي نفسك وزوجك وبيتك ...

اتصلتي به تخبريه إنك حامل ماذا كنتي تنتظرين منه أن يركض غليك ويقبل يديك ويأخذك على بيتكما؟!
أظنه قال ما شاء الله حامل كنت شفتهاعروس ولا شفت معها هنا العرسان علشان أتورط ببيبي الحين وحمل ووحام وهم؟!
لما اصبح على علاقة مع فتاة أو فتيات فهذا معذور واحد تزوج ومن بداية زواجه لم ير الدلع ولا السعادة فليبحث عنها بعيدا عنك أنت أعطيتيه فكرة إن الزواج هم وغم ونكد ... والحرام حلو ...................

المهم بعد الولاده وبعد ما خلصت نفاس اتصل يبي يأخذني قلت اصبر أيام البنت (بنتي) تعبانه قال عادي رايحه لبيت أبوها
وأنا اصلا كنت اتعذر لأن كانت عندي حساسيه مفرطه بالبطن واستحيت ارجع ويشوفني بالمنظر هذا فتعذرت بالبنت
عصب وقفل السماعه وبعدها كلمته قلت البنت بخير قال وبعدين قلت ماراح تجي ؟ قال الحين بترجعين ..احتري ما راح أجيك ..إذا تبين ترجعين ارجعي بنفسك:19: ما راح أجي أخذك

بصراحة ولا تزعلي مني كثر الله خيره إنه اتصل بك وظل منتظرا إياك حتى تخرجي من نفاسك ليس بعيدا أن يكون قد قال في نفسه احتمال تكون نفسيتها أفضل بعدما وضعت وعادت طبيعة جسمها له وأكيد ستكون أهدى وتراعي بيتها فما وجد منك إلا صدا وإبعاد وقد أخذ عذرك تكبرا منك عليه ومحاولة لإزلالة أو وصلتي إليه رسالة أخرى إن الإنجاب هم جديد يضاف إلى هم الزواج ولو نفر من البنت ستكونين أنت السبب فقد أمتل رأسه أن الأم وابنتها ليس من ورائهما إلا المعاناة فلماذا الزوج والانجاب؟؟؟
وكان أفضل أن تتصلي به قبل أن يهاتفك وتخبريه إن عندك حساسية وتريديه أن يصطحبك للطبيبة ووقتها لم يكن ليضغط عليك في العودة


أنظري عزيزتي من خلال موضوعك الذي طعمتيه بين كل كم جملة وجملة بوصفك لزوجك بالسيء

والله لا أراه هكذا - من خلال موضوعك ...
ومن موضوعك فأنت قد أظهرتي نفسك مغرورة ومتكبرة ولكني أيقن أنك لا تعرفين كيف تسيرين حياتك ولا كيف تتعاملين مع زوجك

وهذا يحتاج منك تثقيف نفسك من هذه الناحية وانسي لنا بيت أهلك فهو ما جعلك كل يوم والثانية تاركة بيت ززجك ولا تنتظري أن تعيشي في بيت زوجك كما كنت تعيشين في بيت أهلك ... ولا يعاملك نفس معاملتهم لك فبينكما ما لم يكن بينك وبين اي أحد من أفراد أسرتك مهما كان - وأكيد أنت تفهمينيي ولذا فعليك احترام ذلك ...


لي عودة فموضوعك يحتاج لوقفة طويلة​

 

[hadifa]

الأخوات ما قصرن في الردود

أستغرب من الأهل أين دورهم ​

 

[BEBO1975]

حبيبتي بالبدايه حبيت اسألج شنو رأي أهلج بالموضوع هل أهما راضين عن تصرف واهماله لج أكثر من ستت أشهر هذا أمر مو طبيعي.

بصراحه هالانسان في شي مو طبيعي وله في شخص اول مره يصير اب وردة الفعل عده عاديه لافرح بالطفله واحلى ايام عمرها مرت من غير ما يشوفها تكبر جدامها وبعدين يا عزيزتي اهو اب ملزم بجميع المصاريف لج وللطفله وليش انتي تصرفين من جيبك ، واهو مرتاح من وضعه بهطريقه
((حسبنا الله ونعم الوكيل))
واهله ليش زوجوه يوم انه مو قد المسئولية وله بنات الناس لعبه

غروره دليل على عزت نفسه وأنتي بعد مو رخيصه شوفي حبيبتي يمكن أنا أعطيج رأي وغيري تعطيج رأي بس تبين الصيحه إلى تفيدج ((صلي قيام الليل وبسجود قولي كل إلى بخاطرج حق رب العالمين ثقي بالله ماراح ترفعين راسج الا ورب العالمين جبر بخاطرج وهداج للطريق الصحيح))

ومن ناحية شو نمط شخصية زوجج يأريت يا حبيبتي تدخليل على (( اختبار نمط الشخصيه)) ومعاج ورقه وقلم وكل نقطه قريبه من شخصية زوجج عطي عندها علامه وبعدين ببين معاج شنو نمطه وراح تعرفين كيفية التعامل معاه

 

[.PRADA.]

يؤيؤ انتي ضيعتي نفسك الله يهديك , لاتعطين نفسك هواها اررركدي وتعلمي وش نمط زوجك
بس شكله شمالي غربي او جنوبي غربي اقري كثير في هالنمطين وشوفي ايهم هو زوجك

والحقي نفسسسسك لانخربين بيتك بيديك واتقي الله في زوجك ترى والله انتي السبب في تصرفاته ​

 

[همي وهم غيري]

ما شاء الله البنات كفوا ووفوا ما عندي شي اقولة

 

[المـــلهمة]

أنتي أنتي أنتي

أنا والله ما قصرت معاه بعد ما رجعت له قمت أطبخ له وأغسل وأقوم بكل واجباته
وبالأخير قال لي كلام كسر قلبي قال لي الطبخ والغسيل وإلى آخره من الأمور المنزليه ما تهمني !!!
تركتيني وأهملتيني!!! انصدمت أنا أهملتك بأيش قال ما ادري اسألي نفسك لا تسأليني

جنني ... إذا بخاطرك شي قوله ..أنا شو دراني !!!

وأنا ألحين ببيت أهلي استحاله اتصل عليه وأقول له برجع لك !!

وبعدين أنا رجعت له من قبل وجرحني بكلامه لي لمن قال كنت بطلقك وبتزوج !!!

ما يلبي طلباتي إذا كان ودي أخرج أتمشى أو نسافر ...كان يتعذر بأعذار واهيه ويتهرب

وبالنسبه للبنت بين فترة وفتره يجي يأخذها مني يوم و يردها

وكان ما يصرف عليها إلا لمن طولت لساني وقلت له أنت ابوها وملزوم تصرف عليها

والحمدلله قام يصرف عليها وأي حاجة محتاجاها أقول له ويجيبها وأحيانا يجيب لها حاجات أنا ما طلبتها منه!

بنات والله مو قادرة أفهم هذا الزوج أحسه أناني ما يحب إلا نفسه

بس تصدقون هددني بالزواج وإلى الآن ما سمعت بخبر بزواجه تتوقعون مجرد تهديد و تخويف

مع إني والله ما حسيت بغيره ولا بحرقة قلب عااااادي يتزوج

وأنا قلت له إنك ما تباني ولا تفكر بي ..قام يبرر ويقول كيف ما أباك وأنا أقول لك بأخذك وتتعذرين بالبنت

وكيف ما أباك وأنا اتصل عليك آلالاف المرات وما تردين وبعدها قام يسبني ويشتمني

وبالنسبه لأهلي قالوا لي توك صغيره والرجال ربك بيهديه وأهلي من النوع اللي ما يحبوا يتدخلوا بحياة حد

حتى لو كانوا أبنائهم

وكله يقولوا لي على كيفك و على راحتك وهذي حياتك ... لدرجة إني طلبت الطلاق منه وقال لي بالحرف

الواحد طلاقك متعلق ببنتك اتركي البنت وأنا أعطيك ورقة الطلاق...

وأنا ما عندي اخوان عشان يتفاهموا معه ...نحن كلنا بناااات و آبوي طيب مررره وما يباني أتطلق مع إني أصريت

على آبوي يروح يقوله إني يطلقني وقال لآبوي حاضر ( كذاب ما وفى بكلامه )

والآن معلقه

وللعلم متعوده ببيت أهلي من أيام ما كنت بنوته إن طلباتي مجابه و ما أحد يكسر كلامي

و هذا الزوج صدمني كل ما أقول له شي يقول لا لا لا لا لا

حتى تدليع لي كعروس ما دلعني و لا أهدى لي هدايا ولا يطلعني و لا يسفرني ولا يصرف علي أبدا

زوجي سيء بليد المشاعر معي , ومع غيره من الفتيات اللي يعرفهن أحسن شخص رومانسي

سيء يقهر ... زوجتك تعاملها بجفاء وبنات العلاقات المحرمه تعاملهم أحلى معامله !!!!!!

ليه الدنيا بالمقلوووووب !!!!!!!!

وسامحوني بس لا تقولوا إني غلطانه ,,, هو الغلطان حملت و ولدت هديه ما شفت منه كلمه حلوه ما

سمعتها منه !!! ليه متزوج جمااااد !!! و ألا انسانه بلا روح !!!!!

 

[الملاحه]

عزيزتي ردي لبيتج وزوجج وافتحي صفحه جديدة مبنيه على الاحترام والنقدير من الجهتين

 

[موزتين]

صدقيني هو يبيج بس يبي يأدبج
انتي كلميه وقوليله انا برجع البيت شوفي شنو بيقول بس حاولوا تتفاهموا قبل
ترا بيت الاهل غير وبيت الزوج غير
لازم في تنازلت مو كل ما تتمنينه يجيج
اهم شي الاحترام خلي الهدايا والكلام الي ما يودي ولا يجيب احبج اموت وفيج وها الخرابيط ترا ما يقدم ولا ياخر
اهم شي المضمون وهو القلب
ترا انا كنت مثلج دلوعه هلي واي شي اطلبه يتحقق بس يوم تزوجت انصدمت حسيت بسؤؤليه وتعبت بس الحمد لله
ما في شي يبقي علي حاله اهم شي تحسين ان الانسان الي قدامج حاط لج مكانه بقلبه
استخدمي عقلج وانسي العاطفه وكلام الافلام الفاضي
والله يهدي سركم

 

[عابرة في الحياة]

ليه يا امي الدنيا فوضه عنده ..!

لو انا منك يعلقني 7 شهور والله

ثم والله لاخلعه ,, الحين دقي

على محامي شاطر وكلميه

واخلعيه والخلع يكون انك تردين

له المهر فقط لا غير .. (( بدون

الذهب والملابس و..و..و..الخ .

تحياتي والله يرزقك باللي احسن

منه عيشي حياتك وارمي بنتك

بوجهه (( وهيه رضيعه )) على شان

يتحملل مسؤوليتها ..

 

[الجده الصغيره]

بداية حياتك غلط....زعل وهواش ومدة يد....بصراحه يبي لك إعادة هيكله لحياتك من خلال تكثيف القراءه والاطلاع....وما توقع انك بتعرفين نمط زوجك لانك ماعاشرتيه زين وعرفتي طبايعه........اكثر وقتك زعلانه عند اهلك...

الركاده حلوه والثقل صنعه مثل مايقولون....رتبي حياتك من جديد وربي يعينك.........

 

[الشام شامي]

يا حبيبتي لا تزعلي مني بس الظاهر اتك قسيتي عليه لان النساء اكثر تحمل من الرجال ولك بالصبر ما بعد الصبر الا الفرج تبين رايي ارجعي لبيتك خلي احد يوديكي للبيتك احد من اهلك ونظفي بيتك وتزيني وروشي بنتك ونوميها قبل ما يجي وخلي احد من اخواتك يجيبو لكي عشاء وفتحي صفحة جديدة معليش اكسري على نفسك وحزاري تطلعي من بيتك مرة تانية ولو زعلك الا ادا هو اخدك لبيت اهلك وخلاكي ساعتها لا ترجعي لا بشروط ولكي الحق ساعتها والله الحظ واحد لو غيرتي زوجك عشر مرات حظك هو هو ....وانصحك اكتمي مشاكلك اكتميها لا طلعيها لاهلك وصدقيني تحمليه واعطفي عليه ولا تصدقي انو اتنين وتفاهمين الا واحد طاغي على التاني الحياة كلها تعب وشقى وصبر وتحمليه في مثل يقو (((نار زوجي ولا جنة اهلي))) صدقيني الوحدة بس لتتزوج ما ترتاح الا بيت زوجها وهلا صار عندك بنت تصوري يربيها هوي واهله وماتتدري شلون نفسيتها ولاتربى عن زوج امها واهانة وزلتعوزي من بليس ورجعي ارجعي تقبلي من النصيحة اكبر منك بيوم اعرف منك بسنة

 

[a3ali]

بصراحة قصتك مشابهه لحكايتي والله إني أقراها ودموعي تهدر من القهر والظلم إلي شفته من الحقير من رأي الشخصي إنك تعطينه فرصة ماهو عشانه عشان بنتك أرجعيله وخليه تحت الأختبار كم شهر وأنت خلك ذكيه غيري من تعاملك معه يمكن يتغير إتجاهك ويحترم نفسه ويحس بالمسؤولية و أنه الآن صاحب أسرة ولازم يحافظ عليها وإذا أكتشفتي إنه يمثل أو رجع لخرابيطه ويهنيك بيكون من السهل إنك تتخذين قرار ما تندمين عليه في المستقبل وماتلومك بنتك إذا كبرت وعرفت سبب طلاقك من أبوها و أتمنى إني أفدتك بشيء...
أماموضوع الطلاق المحاكم موجوده تنهي لك الموضوع ...

 

[المـــلهمة]

أختي أسماء زكي الدين أنا بإنتظارك

 

[المـــلهمة]

شاكره لكل الأخوات اللي أعطوني حلول
بس محتارة وحده تقول أخلعيه و وحده تقول أرجعي

استحالة أرجع من تلقاء نفسي ( عيب عندنا الوحده ترجع بدون ما يجي زوجها يراضيها ويأخذها)
وبالنسبة للخلع مو قادرة أخلع

وفعلا أنا ما عشت مع زوجي فقط مدة3شهور وليست متتاليه شهرين ببداية الزواج وشهر قبل ولادتي

وباقي الايام ببيت أهلي ... لأن هالإنسان ما يتعاشر وما أحد يجلس عنده

أحيانا أحبه وأحيانا أكرهه كره العمى ...واحيانا ما أحبه ولا أكرهه

و بنتي هي سبب المشكله ... لولاها كان مطلقه من زمان بسببها ما تطلقت

بس ما أقول إلا الحمدلله على نعمة الذريه لمن أشوفها أرتاح وأنبسط

وأشكي عليها همومي مع إنها ما تفهم لسه صغيره ... كيف تبوني أعطيها لأبوها

معناتها حكم على نفسي بالمووووت ..إلا بنتي هي روحي الثانيه ...

 

[الدمعه الحزينه4]

مادري ليش الواحد يسوي كذا يمكن في الاول انتي تدلعتي شوي بس من حقك عروس
وكان موقفك قوي لين قلتيله انك حامل كبر راسه وقال ترجع عشان بنتها
المهم الي راح راح ارميه وري ضهرك
واستخيري واذا تبغين اطلاق اعطيه بنته
وهو يعرف انك ماراح تعطينه البنت عشان كذا يماطل
وفكري فيها لو يبغي البنت كان اخذها ولا رجعها لك صح ولا لا
بس هو يبغي يضغط عليك
المهم انا ماانصحق في روحت المحكمه لانك تعتبرين ناشز
عزيزتي ادخلي علي قوقل واكتبي معلقة جده وراح يطلع لك قصتها اقريها وطبقيها
انا مااعرف اطلع الرابط
بس اقريها وشوفي كيف بذكاء قدرت تاخذ حقها وحضانت اولادها
لازم تقرينها
وتقبلي مروري