مرحبا حبيباتي
انا بكتب لكم كل فتره وفتره بس خلصت القصه بسرعه عشان الردود الي تنرفزني وتستعجلني
انا اكتب اكتب على مهل وعلى راحه عشان اعطيكم احسن ما املك لكن في بنات الله يهديهم مو ذابحهم الا العجل .....
على الرغم من اني مافي شخصيه ما حللتها في الشغل الا نغم ماعرفت شنو نمط شخصيتها حيرتني ,, احسها شماليه في قوتها وطموحها وعدم تسويفها او تأجيلها يعني تحب تسوي الشي حار بحار وما تخليه لي يوم ثاني ,, احسها جنوبيه في حساسيتها الزايده وعاطفيتها ودمعتها الي تطيح على اقل شئ بالاضافه الى كثر صداقاتها واجتماعيتها ,, احسها غربيه بسبب تفكيرها وطريقته وتهورها وعجلتها ,, احسها شرقيه في دقه تنظيمها وترتيبها لاغراضها يعني مكتبها كانه لوحه وشنطتها بعد وما تحب تشوف ورقه طايره مو محلها .....
ساعات اقول غربيه شماليه ساعات اقول لا لا شماليه غربيه ,ساعات اقول شرقيه غربيه واااااااااااي دوختني وانا مو عارفه هي شنو بالضبط لكني بصراحه مابي اقول ان شخصيتها ماسيه لانها تفتقر للكثير والاهم الروح الرياضيه بالاضافه انها وايد خبيثه ومكاره ودااااااااهيه ...
نغم شخصيه عاديه مثل وايد ناس لكن صار لها شئ في حياتها خلها هالشخصيه تتغير وتنحى منحى اخر ,, في وحده غيرها لو حبت وصرفت على الي تحبه وفشلت بتتعظ وراح يكون لها هالشي قاسي وعبره لحياتها المستقبليه , وحده ثانيه بتحاول انها تفشي غليلها وتفضحه عند زوجته وانتهى الموضوع بس نغم اختارت انها تسلك هالمسلك الوخيم ,, استنزاف يوسف المادي لها وصرفها عليه لمده 8 سنوات وحب بدون حدود ولا رقابه وامال واحلام يقظه ودتها بعيد خلتها تكره اي رجل وما تفكر في عاطفته وما تفكر الا في جيبه ومحفظته وكانها تنتقم لنفسها من الي سواه يوسف , المشكله انها مانست يوسف ,, احيان كثيره كانت تتنهد وتقول انا قلبي مجروح جرح عميق ولو يرجع يعتذر بس انسى الي صار ,, يعني الماضي لازال يلاحقها ومادامه يلاحقها هذا المبرر لتصرفاتها مع اني اشوف المبرر الوحيد لهالتصرفات هو البعد عن الله وغياب الوازع الديني والاهم غياب الضمير ....
يمكن تظنون ان نغم شخصيه سيئه في حياتها الاسريه وانا اقول لكم لااااااا ,, علاقتها مع امها مثل الصداقه , يمكن تكلمها وهي في الدوام مرتين او اكثر يسولفون مع بعض مثل الخوات ,, يطلعون مع بعض مافي مكان ما تروح له مع امها ,, دايما تشتري لامها هدايه وتقول فديت الوالده حبيبتي ,, عندها بر الوالدين شي مهم ,, دلوعه ابوها تموت عليه وتتدلع عليه مثل طفله ,, عندها اختين كبار ووحده اصغر كلهم متزوجات ومستقيمات وحياتهم الزوجيه ناجحه علاقتها معاهم حلوه بما انها مو متزوجه متبرعه لهم بمساعداتها اذا وحده بتسافر او بتروح مع زوجها فندق او بتطلع تخلي العيال عندها تموت على عيال خواتها وتشتري لهم بدون حساب وعلى انها حسوده عمرها ما حسدت وحده من خواتها تموت عليهم وما تطريهم الا بالخير ,, كانت حاطه العداوه لوحده معانا في الدوام لانها كانت متهاوشه مع اختها في مادري اي مرحله دراسيه هههههههه ....
عندها اخوان شباب اثنين واحد في المرحله الثانويه وواحد اصغر منها بسنه تموت عليهم ويموتون عليها ...
يعني لاحظوا انها مع اسرتها انسانه ثانيه تحب اهلها وما ترضى عليهم باي شئ وتقدس الروابط الاسريه ..
اغلبانا ينظر للعشيقه انها على خلاف مع اهلها او علاقتها سيئه معاهم وانها تضمر لاهلها الشر ,, لكن في عشيقات كثيرات علاقتهم متينه في اهلهم ......
انا مو قصدي امجد نغم واعطيها اكثر من قدرها لكن هذي لمحات عن شخصيتها ..
ياليت بدل ما نسبها ونشتمها ندعي لها بالهدايه لعل الله يستجيب دعوه وحده منا وتكون دعواتنا السبب في هدايتها وصلاحها.....
