مرحبا بنات
نعم اختصرت النهايه مع ان المواقف مع نغم لاتعد ولا تحصى وحتى مواقفها مع زميلاتنا ومكائدها لهن ولكنني ساكون مشغوله جدا غدا وبعد غد واعرف انكن لن تنتظرنني حتى يوم السبت....
على فكره يابنات نغم شخصيتها ابدا مو حلوه ,لكن فيها شغلات ماسمعت عنها الا من المنتدى مع انها موجوده فيها فطره , انا ما اقصد الملابس والمكياج وطريقه الكلام , اقصد الغموض صح مع البنات مكشوفه وتتكلم كثير عن حالها بس مع الشباب غيييير غامضه جدا وما تطيح واحد منهم على شي في قلبها ,, غير هذا انها مو بس تحب نفسها الا تعشقها لحد الجنون , مو مهم عندها كم تصرف او اي شئ المهم انها تدلع نفسها ,, تدلع روحها مو بس بروحات الصالون والملابس والاسواق بل حتى في الاكل مدلعه روحها يعني ماتحب تاكل وتتكلم في التلفون ولا تسولف ويا احد تعيش جو الاكل وتستمتع في كل لقمه تاكلها وتبدي هذرتها وسوالفها الي ما تنتهي بعد ماتاكل وتشبع بطنها , كل لحظه في حياتها تعطيها حقها وتركز فيها وما تحب تفوت لحظه من سعادتها , تدرون مع انها مو رشيقه وجسمها استغفر الله لكنها كانت تروح نادي رياضي عشان تغير جو وترفه عن نفسها في بركه السباحه مع انها ما تعرف تسبح بس تلعب بالماي على قولتها ,, وايد اشياء تنساها الزوجه بعد الزواج والحمل والولاده مع انها ماتكلف اكثر من ساعه يوميا يعني ساعه في اليوم للاهتمام بالنفس وتدليلها مو كثيره ابدا ,,مره من المرات كانت احد البنات الي معانا عندها شغلات تبيعها للاطفال تشتريها من الخارج ومسويه بزنس تبيع على الي تعرفهم تعرفون شنو خذت نغم ؟؟؟ اشترت منها اطواق شعر خاصه بالاطفال الي فيها ورده على جهه او بطه او ارنب او قطه وقالت لنا هذي انا البسهم في البيت وانسقهم مع بجايمي ,, ومن ضمن الاغراض كان في شنط للبنات الصغار خذت لها وحده وقالت هذي بحط فيها كريماتي وخذت خواتم اطفال قالت هذيلين بحطهم في اصابع قدمي بما انهم ضعاف وملونين ..
كانت نغم تحس روحها عروس كله منظفه الوجه واقنعه وسكرابات ومهتمه لاقصى الحدود في بشرتها وتحف اول باول ماتخلي ولا شعره تطلع وشعرها تحب تغير لونه وحتى اللبناني الي يصبغ شعرها ماكله بعقله حلاوه الحمدلله والشكر ومخليته من يشوفها ينسى كل الي بالصالون ,, تموت على شي اسمه حنه مع ان قليلين الي يحطونها تحب الحنه الخليجيه والسودانيه وتحط لها حنه مثل العرايس في كل مناسبه حتى لو كان عرس جاره جارتهم ,,, مع اني اكره الحنه بس كنت اشوف نظرات الرجال الي يختلسونها ليدها ....
تعرفون انها مسويه ثقب في السره مثل الي احنا نسويه في الاذن للحلق والاقراط مع ان كرشتها كبيره يعني بغض النظر ان كان حلال او حرام بس وحده بحجم بطنها مستحيل تسويه لكن ثقتها في نفسها ما تمنعها من شئ ...
تموووت على البخور والعود والعطور وحاطه لنا في المكتب مبخر كل يوم تبخر لنا المكتب ببخور شكل , تقول ما احب اقعد في مكان مافيه ريحه الطيب ....
تدرون كانت تقول لي مره وللعلم قالت لي جدام الشاب الي ويانا بالمكتب انها كل ليله تملي لها البانيو قبل لا تنام وتحط فيه فقاعات والماي ساخن وفي هالوقت تخلي المكيف يشتغل والبخور جدام المكيف عشان ريحه الغرفه تتشبع وتولع الاضاءه الحمره الي بغرفتها وتتسبح ولما تطلع من الحمام تشغل لها التلفزيون وتنسدح عالسرير ليما تنام , حتى لوكان هذا خيال تقوله عشان تغري الصبي الي معانا بس ترا قمه الاسترخاء والوناسه لو نسوي لروحنا هالخطوات الي قالت والله ننسى تعب اليوم والعناء ومشاكل الحياه وننام احلى نومه ....
مره من المرات كانت مصوره وخلتنا نشوف الصور مسويه حركات اغراء منبطحه على بطنها ومخليه نص صدرها مبين ,, او تطالع الكاميرا بنظره شهره واغراء انا ما اقول لكم روحو سوو مثلها بس ليش الوحده تستحي تسوي هالحركات لزوجها او انها تغريه بحركه او نظره وغيرها ما يستحي حتى من المصوره ؟؟؟؟
باختصار نغم غلط في غلط والي مثلها نهايته مع الاسف تعيسه حتى لوكانت بعد وقت طويل لكنها بلقيسيه مع انها عمرها مادخلت بلقيس ,, وانثى بمعنى الكلمه ,, تجمع الغموض وحب الذات وتدلل نفسها وتضع نفسها في اول اولوياتها .......
وهذا الي كنت ابي ابينه بالقصه ,, انج تتدللين وتتغنجين وتتلبسين وتتمكيجين لزوجج وفي نفس الوقت دلعي روحج واهتمي بروحج ورفهي عن نفسج ولا تبخلين على روحج ابدا ابدا لا بالمال ولا بالسعاده , واخيرا بيني روحج امام زوجج انثى رقيقه حساسه حتى لوكنت العكس مثل نغم الي قادره تبين لكل الشباب انها مظلومه ومسكينه وبريئه مع انها العكس ....
