في البداية هذه كلمتها: قصة اليوم يمكن تختلف عن القصص البقية..فيها اشياء وايد حلوة..مواقف جميلة اكيد صارت لكم يوم من الايام..احداث مهمة ممكن تصير في كل بيت..خلونا نشوف طريقة تربية بعض الاباء والامهات لأبنائهم..خلونا نتابع سلسلة حياة شخصين يستمرون بحياتهم وشخصين مايستمرون وشنهي الاسباب اللي خلتهم يستمرون او مايستمرون..
خلونا نعيش الحياة العائلية..العلاقة بين الزوجين..العلاقة بين الاب وابنه وبين الام وبنتها..والعلاقة بين الاخت بأختها وبين الاخت واخوها وبين الاخ واخوه..والعلاقة بين الاقارب..وشنهي المشاكل اللي تصير في البيوت..لأن مافي بيت من غير مشاكل..
الحزن والسعادة موجودين بحياة كل شخص فينا..علشان جذي شي اكيد في مواقف بتكون حزينة وفي مواقف مضحكة ومواقف تربوية..وغيرها من المواقف.. وراح نتعرف على شخصيات رائعة بتحبونها..ووراح نتعرف على محطة الوفاء في حياتنا..بس لازم تستمرون الى نهاية القصة..
كانت مريم توها رادة من الجامعة دخلت البيت شافت امها قاعدة تسولف في التليفون قربت منها وحبت راسها..
ام عبدالعزيز:لحظة شوي..قوة يمه..
مريم:الله يقويج يالغالية..
ام عبدالعزيز:تغديتي؟
مريم:أي تغديت مع ربعي بالجامعة..يمه من تحاجين؟
ام عبدالعزيز:خالج سلطان..
مريم(استانست):صج..عطيني السماعة..ولا اقولج لا..ماابي احاجيه..
ام عبدالعزيز:ليش؟
مريم:هو يدري شيمسوي..يمه انا رايحة ابدل وبنام لين مايأذن المغرب..
ام عبدالعزيز:على راحتج..(ردت حق اخوها)..انزين سلطان كمل السالفة..
مريم راحت فوق..شافت اختها موزة قاعدة على النت..
مريم:شتسوين عندج؟
موزة(تخرعت):بسم الله..الناس تسلم بالاول..
مريم:من تحاجين؟
موزة:وحدة من ربعي..ايش تبين واقفة فوق راسي؟
مريم:ولاشي..
موزة:روحي بدلي هدومج..
مريم:اكيد بروح بقعد انتظر أوامرج..وين هالة؟
موزة:وايش دراج ان هالة عندنا؟
مريم:شفت عيالها يلعبون برع في الحوش..
موزة:هي داخل في غرفتها مع خولة..
مريم:خولة بعد موجودة..ياسلام..عيل وين منيرة عنهم؟
موزة:ماادري..ياللا روحي أبي اخلص..
مريم:زين لاتحنين..
تليفونها يرن..
مريم:آلو..هلا نعم ايش بغيت؟؟...آسفة...قلت لك آسفة..
موزة(استغربت اسلوب مريم):من تحاجين؟
مريم:واحد ايش تبين انت بعد؟..لوسمحت انا مشغولة وفيني رقاد..فياليت تسكر..اي من صجي..ماراح اتحسف..مع السلامة..
موزة:مريوم من كنت تحاجين؟
مريم:مايخصج..
وراحت غرفتها..وركيض راحت موزة غرفة هالة...
هالة:اشفيج؟
موزة:مريم جاها تليفون من شوي وكان ريال وكانت تتكلم معاه وهي معصبة..
خولة وهالة استغربوا..
خولة:ريال من؟
موزة:ايش دراني..
هالة:انا بروح اشوفها..
دقت عليها الباب....
مريم:منو؟
هالة:أنا يالحلوة..
مريم(فتحت الباب وسلموا على بعض)
هالة:ايش عندج قافلة الباب؟
مريم:كنت ابدل ملابسي..
هالة:اخبارج؟
مريم:بخير..
هالة:شكلج تعبانة..
مريم:اكيد وحدة رادة من الدوام بتكون تعبانة..
هالة:ماني مطولة عندج..بس سمعت ان في واحد اتصل فيج من شوي..
مريم:اكيد موزو قالت لج..
هالة:المهم من اللي كان؟
مريم(قعدت):سلطان..
هالة:من سلطان؟
مريم:خالج الكريم..
هالة:مريوم الحين خالج صرتي تناديه سلطان؟؟
مريم:روحي سأليه شيمسوي فيني..
هالة:الله يهداج انت دوم جذي معاه..
مريم:شسوي..
هالة:ياللا أخليج تنامين..
مريم حطت راسها على المخدة وهي كل تفكر بكلام خالها..تحاول تنام لكن ماكو فايدة..اتصلت في رفيجتها فاطمة...
فاطمة:انت الحين من صجج متصلة فيني علشان هالسالفة مرة ثانية..حرام عليج فيني نودة..
مريم:فطوم حرام عليج..انا ابي مساعدتج..فيني صياح..أخاف خالي يقنع امي وابوي وحزتها انا مااقدر اسوي شي..
فاطمة:حبيبتي مريوم..ان شاء الله مو صاير الا كل خير..وكل شي بيصير ربج كاتبه لج..
مريم:بس والله خايفة..
فاطمة:تطمني..
مريم:إي قصي علي بجم كلمة علشان اسكر..
فاطمة:لا والله..بس شسوي فيج هذا حزته؟
مريم:خلاص روحي نامي..
فاطمة:لاتزعلين..
مريم:ماني زعلانة انا بعد بروح انام..
بعد مرور ساعتين..
في الصالة تحت....
هالة:اشلون مها خالي؟
سلطان:الحمدلله تسلم عليكم..
خولة:سمعت انها غيرت مكان شغلها..
سلطان:أي والله..راحت مدرسة ثانية..
خولة:ليش؟
سلطان:في وحدة من المدرسات كانت تأذيها وايد..فقررت انها تطلع..اشلونج ياام عبدالعزيز؟
ام عبدالعزيز:الحمدلله..
موزة تنزل..
ام عبدالعزيز:وين اختج؟
موزة:كانت تصلي..
سلطان:خليها على راحتها..عيل وين منيرة؟
هالة:قالت بتيي عقب العشاء..الظاهر عندها شغل..
سلطان:طبعا مديرة مدرسة اكيد بتكون مشغولة..
مريم تنزل تحت وتكتشف ان خالها قاعد ..سوت عمرها ماهي منتبهة..سلمت وهي تمشي مسكها سلطان من يدها..
مريم(لفت صوبه):نعم؟
سلطان:السلام لله..
مريم(من غير نفس):اعتقد اني سلمت..
سلطان:انزين تعالي قعدي..
مريم:مااقدر عندي واجبات..
سلطان:وواجباتج تنحل تحت؟..من متى؟
مريم:جايه اشرب ماي..وبعدين احلها تحت ولا برع..انت شيخصك؟؟
سلطان(عصب):مريوم احترمي نفسج..انت ناسية اني اكبر منج ولا اشلون؟
مريم خافت منه..
ام عبدالعزيز:مريوم صج ماتستحين على وجهج..هذا حجي تقولينه حق خالج؟
مريم(الدموع تجمعت بعينها وقررت الانسحاب من هالجلسة وراحت فوق)
ام عبدالعزيز:ماعليك منها..ياهل..
خولة:يمه مريم اشفيها؟؟..هي شكلها مو طبيعي..في شي صاير بينها وبين خالي؟
ام عبدالعزيز:اختج ياهل..
سلطان:مريم ماهي ياهل..تعرف كل شي..وعقلها يزن بلد ماشاء الله عليها..بس هي شوي متضايقة مني..استأذنكم بروح لها..
ام عبدالعزيز:خذ راحتك ياخوي..
هالة:يمه اشفيها مريم مع خالي؟
ام عبدالعزيز:الله يسلمكم في واحد من طرف خالج متقدم حق اختج..وهي حضرتها ماهي موافقة..
الكل استانس..
خولة:وليش خاشين عنا الخبر؟
ام عبدالعزيز:خالج ماكان يبي حد يدري..
موزة:عيل ليش قلتي لنا؟
ام عبدالعزيز:لأن مريوم مصختها..والريال زين وخالج يمدحه..
هالة:عيل ليش مريم ماهي موافقة؟
فوق في غرفة مريم...
سلطان:والله ماكنت ابي ازعلج..بس هذا واقع يمر في حياة كل بنت..شي طبيعي ان البنت بييها يوم وبتتزوج..صاج ولا غلطان؟
مريم:......
سلطان:مريم..أنا لو ماكنت احبج جان مااهتميت فيج..
مريم:خالي أنا آسفة ..
سلطان:وقبلت أسفج..موافقة؟
مريم:على؟
سلطان:على الزواج..
مريم:لا طبعاً..ماني موافقة..
سلطان:أي عاد ليش؟
مريم:انا ماابي اتزوج..يعني الزواج غصب؟
سلطان:ماهو غصب..بس انت اذا شفتيه بيطير عقلج..واذا قعدتي معاه بترتاحين له..
مريم:لاوالله..
سلطان:من صجي..تراج بتخسرينه..
تحت...
هالة:يمه من ولده؟
ام عبدالعزيز:ماادري..بس خالج يقول واحد ابوه كان يشتغل في الوزارة بس الحين متقاعد..بس شنو يمدح في الريال..تمنيت لها هالريال من كثر مايمدحونه..
وليد يدخل البيت..
وليد:السلام عليكم..
الجميع:وعليكم السلام..
وليد:سيارة خالي برع..عيل هو وينه؟
خولة:فوق عند مريم..
وليد:ايش عندهم؟
ام عبدالعزيز:تعال وليد اقعد عندي..
وليد: خير يمه؟
سلطان ينزل...
هالة:ان شاء الله اقنعتها؟
سلطان:راسها يابس وعنيدة..ليكون طالعة عليج ياام عبدالعزيز..
ام عبدالعزيز:بسم الله علي..ايش قالت؟
سلطان:انا اعرف شسوي فيها..
وليد:اشلونك خالي؟
سلطان:بخير..هالة تعالي شوي ابيج..
وليد:خير يمه شالسالفة؟؟
في المجلس..
سلطان:سمعيني..ابيج تقعدين معاها وتقنعينها بأي طريقة..على الاقل اول الخطوات واتشوف الريال..يمكن غيرت رايها..
هالة:بس خالي بغيت اسألك انتوا ليش مصرين على الريال؟
سلطان:هالريال ذهبه..ومستحيل اخليه يطير من يدنا..يوم رحت أسأل عنه..قالي واحد من الشباب ياليت يي يتقدم حق اختي من زود اخلاقه الطيبة مع الناس..
هالة:معاك حق في هالزمن يالله تحصل واحد زين..ابشر ان شاء الله بتوافق..
الصبح تقوم مريم وتتجهز للجامعة..تنزل تحت تحصل امها واخوها عبدالعزيز قاعدين يتريقون..
مريم:صباح الخير..
الجميع:صباح النور..
مريم(من غير نفس تتريق)
عبدالعزيز:اشفيج؟
مريم:من انا؟
عبدالعزيز:أي..
مريم:مافيني شي..يمه ابي حليب..
ام عبدالعزيز:متى امتحاناتج؟
مريم:اسبوع الجاي..
ام عبدالعزيز:ذاكري عدل يايمه..
مريم:ان شاء الله..
عبدالعزيز:انا بروح اسخن السيارة لين ماتتريقين..يمه تامرين على شي قبل لأطلع؟
ام عبدالعزيز:سلامتك..
عبدالعزيز راح..
مريم:ليش وين زوجته؟
ام عبدالعزيز:ماخذه اجازة اليوم..
مريم:ليش فيها شي؟
ام عبدالعزيز:يقول عبدالعزيز ان ولده سعود عنده موعد ويبون يودونه..
مريم:موعد شنو؟
ام عبدالعزيز:عيون..
مريم:ومشعل ايش بيسوون فيه؟
ام عبدالعزيز:بيظل عند خدامتهم لين مايردون..
مريم:من أمس ماشفت عيالهم اشتقت حق الدانة..
ام عبدالعزيز:لما تردين..روحي ألحين لاتعطلين اخوج..
مريم(تحب امها):مع السلامة..
ام عبدالعزيز:مع السلامة..
ركبت السيارة..وشغل عبدالعزيز اذاعة قطر للقرآن..انتبه لسكوت مريم الغريب..
عبدالعزيز:مريم اشفيج؟
مريم:مافيني..
عبدالعزيز:اشلون مافيج..انت ساكتة..
مريم:عبدالعزيز..
عبدالعزيز:لبيه..
مريم:انت تعرف شي..
عبدالعزيز:شي مثل شنو؟
مريم:يعني امي ماقالت لك شي؟
عبدالعزيز(يبتسم):بخصوص عريس الهنا؟
مريم:اللي هو..
عبدالعزيز:أي قالت لي عنه..وسألت عنه بعد..
مريم:بس انا ماابي اتزوج ياناس..
عبدالعزيز:ليش يامريم؟؟..بعدين انت مب صغيرة..
مريم:انا مااتحجى عن السن..
عبدالعزيز:عيل..شالي يمنع البنت في سنج انها تتزوج؟
مريم:ماادري بس انا خايفة من هالزواج..
عبدالعزيز:ليش؟
مريم:ماادري..
عبدالعزيز:انت استخرتي؟
مريم:تبي الصج؟
عبدالعزيز:أي..
مريم:استخرت..
عبدالعزيز:انزين وشالي حسيتي فيه؟
مريم:حسيت براحة..
عبدالعزيز:عيل ليش انت رافضة؟
مريم:ماادري..
بالجامعة....
عقب المحاضرة..تروح فاطمة الكافتيريا علشان تاكل..تشوفها مريم...
مريم:شتسوين بروحج مني؟
فاطمة:جوعانة..شسوي..تعالي قعدي تغدي معاي..
مريم:ماابي..ماني مشتهية..برد البيت..
فاطمة:ألحين؟
مريم:أي..
فاطمة:ومن بيرجعج؟
مريم:عبدالعزيز..
فاطمة:مو على اساس انه في الدوام؟
مريم:ولده عنده موعد وبيمرني..
فاطمة:انزين خبريني شالي سويتيه علشان موضوعج؟
في البيت ...قاعدة ام عبدالعزيز مع اختها ام يوسف....
ام يوسف:بخير..انت اخبارج واخبار سعود؟
ام عبدالعزيز:الحمدلله..وسعود كل مشغول وياربعه بالاراضي..
ام يوسف:زين يسوي..هذا لمصلحتكم..
يدخل عبدالعزيز مع زوجته أسماء وولده سعود ومريم..ويسلمون على خالتهم...
ام يوسف:اشلونج أسماء واشلون امج؟
اسماء:الحمدلله..تسلم عليكم..
ام عبدالعزيز:ايش قالكم الدكتور؟
عبدالعزيز:نظره ضعيف..
ام عبدالعزيز:صج..تعال حبيبي سعود..
مريم:عن اذنكم رايحة ابدل..
اسماء تقعد...
عقب الغداء في غرفة سلطان...
مها:اشلونها مريم؟
سلطان:ماادري عنها..
مها:ليحين معنده؟
سلطان:غصب عنها بتوافق..
مها:ليش تجبرها ياسلطان؟
سلطان:علشان مرة ثانية ماتعاندني..
مها:بس هذا زواج مو لعبة بينكم..
سلطان:الحين تتوقعين بزوجها واحد عادي..يايبه هالريال عجيب ماشاء الله عليه اخلاق وادب..
على الساعة 2 الظهر..في غرفة مريم يندق الباب...
مريم:تفضل..
ام عبدالعزيز:شيتسوين؟
مريم:ولاشي اقرا كتاب..حياج يالغالية..
ام عبدالعزيز(تقعد على السرير):ها يمه فكرتي بكلام خالج؟
مريم:.....
ام عبدالعزيز:ليش يايمه ماتبين تتزوجين؟؟
مريم:ماافكر بالزواج..
ام عبدالعزيز:بس حرام تفوتين الريال..
مريم:خلي خالي يخشه حق بنته اللي ماجات..
ام عبدالعزيز:ايش هالحجي؟..بعدين تعالي شالي بينج وبين خالج؟
مريم:ماقالج شالي سواه فيني؟
ام عبدالعزيز:لا..
مريم:اخوج العزيز يايمه..واحد من ربعه جاه وقاله ان رفيجه يدور على مرة يبي يتزوج..فقاله خالي انا عندي بنت اختي وجابهم عندنا..وهو يدري اني ماابي اتزوج..بالعمالة سوى هالحركة فيني..
ام عبدالعزيز:زين سوى فيج..لو كل الخوال مثل خالج جان كل البنات تزوجوا..
مريم:يمه!!
ام عبدالعزيز:وانا عند ربي صاجة..انت ايش سويتي فيه؟
مريم:يوم كان معزوم في بيت رفيجه خشيت تليفونه وطلع ونسى تليفونه..
ام عبدالعزيز(قامت):تستاهلين..فكري في الموضوع..وعرفي ان محد راح يجبرج على الزواج..
وسكرت الباب..
في بيت الجد بو سالم ..
بو سالم قاعد مع ام سالم..يدخل عليهم تميم وهو تعبان..تقوم ام سالم..
ام سالم(بخوف):اشفيك يمه؟؟
تميم:ماادري بطني يعورني..
بوسالم(يقوم له):ليش ايش ماكل؟
تميم:ماادري..أحس بألم فظيع..
ام سالم:بروح اجيب لك زعتر تشربه..
سلطان قاعد مع رفيجه عيسى..
عيسى:لوين وصلت سالفة بنت أختك؟
سلطان:عطني مهلة يومين بعد..
عيسى:ليكون البنت ماهي موافقة؟
سلطان:انت اشفيك ماتعرف دلع البنات..
يرن تليفونه...
سلطان:هلا يبه...انا ويا عيسى...اشفيه؟...انزين خلاص انا الحين جاي..في امان الله..
عيسى:ايش صاير؟
سلطان:ماادري بس ابوي يقول ان تميم تعبان شوي ويبيني اوديه الطوارئ..
عيسى:تبيني ايي معاك؟
سلطان:لا ماله داعي..تسلم..
في بيت بوعبدالعزيز...
قاعدة مريم على السرير وهي تفكر بموضوع الزواج..لين ماخذت تليفونها واتصلت...
مريم:السلام عليكم..
أمينة:وعليكم السلام..هلا مريم..
مريم:اشلونج أبلة؟
أمينة:الحمدلله بخير..انت شخبارج؟واخبار الجامعة؟
مريم:كل شي تمام..مشتاقة لج وايد..وياليت اشوفج..
أمينة:والله ياليت زورينا في المدرسة..
مريم:شسوي دوامي من الصبح لين العصر..مايمديني ازوركم..
أمينة:طمنيني أخبار الوالدة والخوات؟
مريم:كلهم بخير..وامي دوم تسأل عنج..
أمينة:أسألت عنها العافية..
مريم:أبلة بغيتج بسالفة..
أمينة:خير مريم..
مريم:أبلة انت مشغولة؟
أمينة:حاليا لا..قولي لي السالفة..
في بيت بوسالم...
تميم راقد على الكنبة...
ام سالم:ماادري هالولد ليش يصير فيه جذي..من يوم وهو صغير يصير فيه جذي..
بوسالم:منعيه من اكل المطاعم..
ام سالم:ليش هو من اكل المطاعم يصير فيه جذي..انت ناسي يوم كنا مسوين عزيمة على ردته من الحج صار فيه نفس الشي..
بوسالم:يمكن حد حاسده..
ام سالم:تهقى جذي؟
بوسالم:اقول يمكن..خلنا نوديه لعند شيخ يقرأ عليه..
في بيت بوعبدالعزيز..في غرفة مريم...
أمينة:حبيبتي مريم..أنت بنت وعمرج ماهو بصغير..وماشاء الله عليج جميلة وعاقلة وتعرفين الصح من الغلط..شالي يمنعج من الزواج؟
مريم:ماادري أبلة..بس احس اني ماني وجه زواج..أخاف اظلم الريال..
أمينة:بإيش تظلمينه؟
مريم:ماادري..ماعندي أي شعور اتجاهه..
أمينة:مريم توقعتج أذكى من جذي..
مريم:ليش؟
أمينة:اشلون بتحسين بشعور اتجاه شخص ماشفتيه؟..ولا كلمتيه؟!!..مو لازم تشوفون بعض وتتكلمون ويابعض..وتشوفون افكار بعض..يمكن يكون في تقبل في الموضوع اكثر من قبل..وعقبه استخيري مرة ثانية وشوفي رب العالمين شالي كاتبه لج..اللي اعرفه عنج يامريم وحدة عاقلة وتعرفين اشياء اكبر من سنج..استغرب من كلامج الحين؟!!
مريم:أحس الدنيا ملخبطة وماني عارفة افكر..
أمينة:اكيد تستحين..
مريم(تضحك):ايش دعوة..
تحت...
ام عبدالعزيز:وين عيالج منيرة؟
منيرة:ويا ابوهم رايحين الملاهي..قولي لي يمه ايش صار على موضوع مريم؟
وليد يدخل البيت..
وليد:يمه اخوج رقدوه في المستشفى..
ام عبدالعزيز(تخرعت):اخوي!!..من؟
وليد:تميم..
ام عبدالعزيز:اشفيه؟
وليد:قالي خالي انه تعبان وركبوا عليه المغذي وقالوا بيرقدونه لين مايسوون له تحاليل وفحوصات..
ام عبدالعزيز:فديته اخوي..ماقالك ايش منه صار له جذي؟
وليد:لا..
ام عبدالعزيز:عيل لاتطلع من البيت علشان تودينا عنده..روح خبر مريم خلها تتزهب علشان تيي ويانا..
فوق.....
مريم:تفضل..
وليد(يفتح الباب):لبسي ونزلي تحت..
مريم:ليش؟
وليد:خالج تميم في المستشفى..
مريم(خافت):اشفيه؟
وليد:تعبان شوي..بس ماعليه شر..لاتخافين..(بغى يسكر الباب)
مريم:وليد..
وليد(وقف):نعم؟
مريم:وليد تعال شوي ابيك..
وليد(قرب):خير؟
مريم:ايش رايك بالموضوع؟
وليد:قصدج موضوعج؟
مريم:أي نعم..
وليد:انت ايش رايج؟
مريم:ماادري ليحين ماقررت..انت ايش رايك؟
وليد:راي من راي خالي..
مريم:يعني موافق؟
وليد:وين بتحصلين احسن من هالريال..
مريم:انت شفته؟
وليد:أي شفته..ياللا قومي لاتأخرين..
في المستشفى...
في قسم الاقامة القصيرة....
ام سالم:زين قمت يمه..قوم اشرب هالعصير..عاصرته بنفسي..
تميم:مشكورة يمه..
سلطان:وين كنت قبل لتطلع؟
تميم:كنت ويا ربعي نلعب كورة ..
سلطان:وماكلتوا شي؟
تميم:تبون الصج..كنت ماكل من المطعم اللي جنب المسجد..
ام سالم:تميم؟؟..انت ياهل؟؟
تميم:السموحة يمه..
سلطان(يضحك):حمدي ربج يمه ان ولدج ضعيف لو كان دب ومع اكل المطاعم مايندرى ايش كان بيصير فيه..
بوسالم:وانت صاج..
ام سالم:وابوك يقول يمكن الولد حاسدينه..
سلطان:على ايش ياحسرة..
تميم:محتر ..
سلطان:روح انزين..من ايش احتر..لاتصدق روحك..هذا كله من اكل المطاعم..ماادري شيتحبون فيهم..
ينفتح الباب..ويدخلون بيت ام عبدالعزيز...ويسلمون على بعض...
مريم:سلامتك والله..ماتشوف شر..
تميم:الشر ماييج..كل من عينج..اسبوع اللي طاف يوم كنت اتعشى حسدتيني عينج حارة..
مريم:لاوالله..قاعد تنكت؟
تميم:من انا؟
مريم:انت تعبان ومحتاج راحة.......(يغمى عليها)
في هاللحظة سلطان فز من مكانه و.....................
