دروس تعلمتها بصعوبة

[راجيه الرضا]

صباح الفل على الناس الفل

دروس اتعلمتها بصعوبة

1- الفاشل كثير الشكوى، الناجح كثير العمل

كل انسان ناجح بيدور ديماً على حلول للمشاكل اللي بتعوقه، انما الفاشل فيكتفي بندب حظه و انه كان ممكن يكون في حتة احسن لولا الظروف، مش معنى كده انك لا تُحبط، لا احنا بشر احبط براحتك بس بعد ما تخلص من احباطك استعن بالله و لا تعجز

2- لا تقارن نفسك بأحد، قارن نفسك بنفسك

في التسعنيات المنافسة كانت محتده بين شركة مايكروسوفت و أبل، في اي بريزينتشن كان تنفيذين مياكروسوفت بيركزوا 70٪ من مجهودهم في شرح ازاي هم تفوقوا على أبل، بينما تنفيذين أبل كانوا بيركزوا على ازاي بيساعدوا المدرسين يدرسوا و الطلبة يتعلموا، ازاي بيخدموا العميل بتاعهم بشكل احسن، و على الرغم من ان مالك مايكروسوفت بيل جيتس هو من اغنى اغنياء العالم، الا ان أبل كعلامة تجارية انجح و أقوى

3- اقلع عن التبرير، و ابدأ في التصحيح

مشكلتي ديماً بعد كل وقعة اني كنت بحاول ادور على اسباب غيري تكون هي السبب في وقوعي، حال الببد، الاقتصاد، السياسة الخاطئة، لكن في الواقع كل الاسباب دي و ان كانت حقيقية و لا انكرها الا انها مخدرات تجعلك تتقبل فشلك في هدوء ،حلل اسباب الاخفاقات و صححها و انطلق

4- مساعدة الناس أول طريق النجاح

عكس ما يسوق دائما من محورة حياتك حول نفسك و ان محدش هينفعك الا نفسك لكن الحقيقة الخطاب ده في غلطة كبيرة ً و هي اعتقادك بان الاجر هتاخده من الناس اللي ساعدتهم، و هنا يكمن الفكر الغربي المادي، الفرق في ان المسلم يساعد لوجه الله، انا الغير مؤمن يساعد مقابل عائد، ديماً يقولوا الغرب ( if you give you shall receive) و ده لا قانون دنيا و لا طبيعة، احنا قانونا مختلف

" إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا " و ده معناه مش انك هتاخد اجر في الدنيا ،انت هتاخد اجرك اكيد من ربنا و يمكن اضعاف لكن مش شرط يكون مادي في الدنيا ممكن يكون في الاخرة و هي خير و ابقى

5- الاستمرارية

ما كنتش بصدق في الفكر ده ايه يعني استمر و انا مش شايف نتيجة، بحد ما تأملت ان كل فعل مستمر له تأثير مؤكد، خير الاعمال ادومها و إن قل، احنا بنتخن عشان كل يوم بناكل اكل غلط مع انه مش بكميات كبيرة، جلدنا بيستجيب للجاذبية و بيدلدل لتحت مع تقدم العمر و مع عوامل اخرى داخلية. نقطة المايه لو استمرت بالسقوط على صخرة هتفلقها نصين!! و هكذا من كل شئ حوالينا الاستمرارية بتعلى احتمال النتيجة و احنا في عصر اصبح الناس خلقهم ضيق و عايزين كل حاجة بسرعة نجاح سريع فلوس سريعة يخسوا بسرعة يطلعوا عضلات بسرعة كل حاجة بسرعة!!! رغم ان الخالق نفسه خبق الكون في عدة ايام مع انه قادر يقول له كن فيكون!! لكن دي رسالة و ناموس للكون كله، اعمل و استمر لكي تجني حصاد عملك

6- الشحنات المتضادة تتجاذب

السالب بينجذب للموجب، قاعدة مهمة، مينفعش تبيع المياه في حارة السقايين مش كده؟ عشان كده النظريو دي بسميها نظرية السوبر مان، سوبر مان واحد عادي جداً على كوكب كريبتون كل اللي حواليه زيه مفيهوش حاجة مميزة، بينما على الأرض كان يعتبر بطل خارق لانه مختلف، لو عندك مهارة او معاك سلعة حاول تتواجد في السوق اللي بيفتقر للسلعة او المهارة دي، لو هفتح فرن عيش مش هروح افتحه في حارة الفرانين و لا محل كهرباء في حارة الكهربائية بالعكس هروح افتح في مكان محتاج الخدمة دي و مفيش حد حواليا، فكرة السوق المجمع قد تبدو جيدة لكن المنافسة هتكون قاتلة، لو انت في شركة عادية فرصتك انك تكبر و تكون مميز اعلى من واحد في شركة مالتيناشونال

7- مفيش قاعدة ثابتة لكل البشر

حتى كلامي ده هو تجربة شخصية قد يناسبك و قد لا يناسبك ، المهم و انت بتحط قواعدك خلي ليك معيار صالح مرجعيته ربنا مش أي منهج فاسد

#شغفي

ا.أحمد سالم ​