دردشة الشمالى

الحالة
مغلق و غير مفتوح للمزيد من الردود.
يالخبيرات بالشمالي الحين لما يقول الشمالي كلام وأنت تكذبينة وهو طلع صادق
طبعا أنا أعتذرت مرة وحدة وقلتلة سامحني ظلمتك وأسفة طبعا بيكون زعلان مررررررة أقوي شي
هل بيحقد علي ويكرهني ؟
بيطول ماينسى الغلط؟.
كيف أتصرف معه؟
طبعا قالي روحي بيت أهلك ماأبي أدخل البيت وأنتي موجودة وخذي أغراضك وش رايكم ما أدق علية لما تطيب نفسة لأنة يمكن يخليني أطول عند أهلي عشان يأدبني
 
  • تكفون ابي الرابط الي قبل هذا فك طلاسم الشمالي
  • سالت قبل محد رد علي تكفون الي تعرفه تقول
 
الشمالى (غير حقود ابد ابد ابد بس يحب يأدب اذا احد غلط )مايشيل فى خاطرة شى ابدانتظرى حتى يهداء وارسلى مسج اعتذار وسوف يرضى
 
بنات ضاع مني الموضوع واخيرا لاقيته

المهم بنات انا زعلت الشمالي الشرقي اللي عندي

وشكيت فيه وواجهته وطلعت ظالماه

وزعل كثير واعتذرت وقالي خلاص سامحتك من الاسبوع اللي راح

بس امس كنا جالسين وجات اغنية كارول سماحة ( خليك بحالك)

اغنية عن الخيانة حسيت انه انزعج وصار يقول استغفر الله بصوت واطي

وانا سويت نفسي ما انتبهت وجالسة امزح واضحك واكلمه

تعتقده لسا بقلبه شي وعشان كدا تضايق يعني افتكر اللي زعله

ولا ايش؟؟

يعني سامحني ولا حقد علي؟؟؟

وصراحة ظلمته كثير ذاك اليوووم
 
اممممم
انا زوجييييي ماخذ من الغربي والشرقيي
ومو عارفه هع هع احدد عدل بس قاعد اخذ من الاثنين
يااااربي
انزين شنو عن الخيانة واذا كان متمسك ببنات كان يكلمهم قبل الزواج ومستمر معاهم بس تلفون والله العالم وما خفي اعظم ..
هل يحبهم والا شنشوووووووو؟؟؟؟
 
ردو علي يازوجات الشمالي زوجي وغلط بحقي غلط كبير وطلقني وهو معصب والحين يبي يرجعني بس بدون حتى مايعتذر أنا ابي اتغلى عليه شوي وش رأيكم ياخبيرات الشمالي تعرفون كيف يبيني ارجع يستفزني بمسجات عشان اسوي له مشكله وأتكلم معاه لأني مرررره مطنشته ومارد عليه **
 
ياحبيبتي روكماني الشمالي لاتعتذرين منه في نفس الوقت روحي بيت اهلك ولاتزعجينه ابد لا اتصال ولامسج كم يوم من اربع ايام واكثر الي تقدرين عليه بعدين اتصلي او ارسلي مسج لاتعتذرين حسسيه انك ولهانه عليه او اتصلي عليه تتكلمي بأي موضوع يخصك وشوفي ردة فعله وصدقيني الشمالي مايتركك كثير بس هو ماراح يجيك انتي روحي لماتحسين انه هدا شوي والله يفرج همك وهمي ياقلبي والله يعينا على الشمالي
 
هلا بنااات
الشوشو حقي اتعبني
يبغاني احب امه اكثر من نفسي///// ههههه

اليوم يلمح يقول
العيد الماضي ماكنتو عندي0000
خلاص بعد سنه بتكوني راعية بيت>>طبعا كان يقولها على سبيل المزح الجاد >>افهموها:(
رديت: انو اهل بيتي اطفالي معاي وزوجي بيروح يستانس مع اصحابه
رد قالل هذا كله بيتك يقصد بيت الحموله انا ساكنه فوقهم
اهل بيتك امي وخواتي لاجو وخوالي وعمامي ههه يستهبل يقاله وهو بالاصل معجبه الكلام ومقتنع فيه:(
خليك عند زوجك واستقبلي ضيوفه
انا مشيتها قلت ابشر حبيبي من عيوني انا ما اقصر وياك:)اخاف انو يصر على انو اعيد عندو000 واقوم بالضحيه :(
كيف ارد عليه وكيف انا ما احب يغصبني

ابي اعيد عند اهلي000وهم بعيدين مررره اسافر بطياره لهم ويمر الشهورر وانا ما اشوفهم
وبحكم دراستي ما اقدر اروح الا بالاجازات0000

وهو كل يومه برى ولاداري عنا
كيف اجل لو بالعيد اصلن حتى لو عيدت كل وقته برى
ياذا الشمالي العله
 
رايت ..



لا يضيق صدرك يا قلبي رجلك شمالي شرقي طبايعه نفس طبايع اخوانه الشماليين الشرقيين !!

شوفي انا مدري عن طبيعه علاقتك معه او كيف تتعاملين معه ..

شكلك محبطه منه و ما تعبرين له بكلام حلو او تتلصقين فيه ..
هو مشكله الشرقي نقطتين !! انه ما يعرف يعبر عن حبه و لازم يتعلم منك .. يتعلم منك الكلام الحلو و يتعلم منك حتى الحركات الرومانسيه ..
بس هو عله انه مزاجي اذا قلتي له كلام حلو او بادرتي معه بلمسه حلوه او بحركه رومانسيه يذبحك بردة فعله البارده او حتى انه يقول لك خلاص عاد بلا مصاله او ملاغه !!

انتي هنا تولعين و يجيك احباط و ما عاد تسوين له شي !!
و هو يفقد حركاتك و كلامك بس موب عارف يقول لك وش فيك علي ليش طنشتيني ؟؟
يعبر عن احتياجه لحركاتك و رومانسياتك بانه يضغطك نفسيا يتلكك على اي شي !!
و ينتقد و يحارش و يدور الزعل !!!!!!!!

مشكلتهم تعبيرهم عن الاحتياج العاطفي تعبير مستفزززززززززززز!!!!!!!!!!!!!!!!!!

و هو استفزك استفزك الين جاء لك بكل صراحه قال تحبيني ؟؟
يعني جاء يجرجر الحكي منك !!

و بعد ترى هم حاسين بطبايعهم البايخه !!؟؟ يعني يدري انه جلف يدري انه ردود افعاله تنرفزك !!
بس هو ما يعرف الا ذا الطبع و ذا الاسلوب !!
وده يغير طبايعه لكن ما يعرف كيف !!

شوفي انتي حطي في بالك انه يحبك و يموت فيك و الا كان ما دور حبك و سالك صراحه هالسؤال ..

خليك معه واضحه بأحتياجاتك العاطفيه و الا بتموتين و انتي متحسره !!

لا تعلقين على علاقته في عياله تعبير مباشر لانه يفسره غيره !؟؟ و انك تغارين من عيالك !!!!!!!!!!!!

لا انتي اول شي غيري اسلوبك في الحياة تغيير كامل .. خليه يلاحظ الفرق ..
طبقي دروس البنات هنا عن ذوق الشمالي في اللبس في طريقه الكلام في الدلع ..
لا تقولين ما اقدر و ما ادري ايش !!
خليه يجي للبيت يتفاجئ بشكلك .. كذا انتي تثيرين الاسئله فيه وش عندك يا فلانه كاشخه ؟
وين بتروحين متى شريتي هذا اللي عليك !!
ترى عادي تلبسين البلوزه الف سنه و تتفاجئين انه يقول متى شريتها ؟؟

و خليك بشووووووووووووشه اذا دخل طيري عليه مثل البزر موب لازم تقومين تطامرين لا و انتي على الكرسي
قولي اهليييييييييييين وش اخبارك ؟ وش علومك ؟ كأنه ضيف من برا جاي
و انتي مبتسمه و مروقه الا وجهك يشع سعة صدر ..
خليه تطير عيونه في استقبالك له و عودي نفسك انك دايم تستقبلينه كذا هو مع الوقت بيصير يستقبلك كذا !!

و دايم تجنبي سواليف ضيقه الصدر او النقاشات العامه !! يعني لا تنشبين بحلقه على اختلاف سياسي و لا شي في الدوري الارجنتيني !!
هم ما يتحملون ان احد يخالفهم الرأي و يحسون انهم صح و ان ناقشتيه حس انك ند له !!
قولي اها صدق و الله شي عجيب !! طيب كيف يعني .. اسالي و خليه يجاوب اشبعي فيه احساس انه الفاهم و اللي يعلمك و يثقفك ..

و على العواطف و الرومنسيات هاذي يا قلبي عليك !!
شوفي تعودي و اكسري حاجز الخجل او حاجز الفشايل من ردود افعاله البايخه !!

يعني استغلي اي لحظه يدخل فيها الغرفه و خلي لك فيها روتين رومانسي معين .. لانه اكيد بحكم شماليته يستحي قدام عياله او حتى لو ما فيه احد بيستحي يقول لك كلمه حلوه في الصاله يخاف احد يمر و يسمع !!

يعني مثلا يدخل عقب ما يجي من الدوام يفصخ ثوبه روحي له و ابتسمي و هو يغير ملابسه ناظريه و قولي اي شي لو انك جايه تقولين له ترى حطيت الغداء ..
امسكيه و احضنيه خليك زي البنت الصغيره ام خمس سنين !!
حتى لو ما حظنك او حتى قال وش فيك وش جايك اليوم قولي بهدوء يعني مالي حق في حضن حبيبي ؟؟ احب شكلك و انت جاي من الدوام ..

بكره لو جاء من الدوام و راح يغير ملابسه و دخلتي عليه بنفس الابتسامه بيتوقع انك بعد بتجين تحضنينه !!

حتى لو فشلك و قال بلا حركات بزران و الا انا جاي تعبان مالي خلق .. عادي لا يضيق صدرك هم كذا ما يعرفون يعبرون !! ناظريه برومانسيه قولي ما احبك يعني ؟؟
حتى لو قال حبيني بس بوقت ثاني !! و الا اذا صرت رايق !!
قولي بكل ثقه انت حبيبي و قلبي بحبك بكل دقيقه و كل وقت ابغاه اصلا ما اقدر اقاومك !!
صدقيني شوي شوي بيصير يستمتع

هم كذا الله يرحم حالهم كلش عندهم لا لا لو بتتركينهم لانفسهم قعدوا مستوحدين بانفسهم

لا تقولين له انت جاف معي و مع عيالك غير ؟؟ انتبهي من هالنقطه !!

عموما حركه بعد الدوام هاذي انتي ادرى برجلك وش الوقت المناسب لها تبين تسوين كذا قبل يطلع المغرب بحكم ان كل الرجاجيل من بعد المغرب و هم مقفين الى تالي الليل !!؟؟؟

يعني انتي خلي لك كم حركه رومانسيه تسوينها زي روتين هو يتعود عليها و انتي ترضيك بدال هالجفاف اللي مضيق صدرك ..

و بالليل حتى لو نام عند العيال شوفي هاذي الطريقه قد طبقتها كم وحده من الزميلات زوجات الشمالي الشرقي ..

اذا جاء الليل و استعدوا للنوم تقرب منه و تبوسه على خده بنعووووووومه و تقول تصبح على خير يا حبيبي ..
و كل يوم كذا حتى لو انه جدار متنح و ساكت برضو تنشب له كل يوم كل يوم !!
هو يتبرمج مخه و بتلقينه اذا صار فيه النوم و منتهي و شافك نشيطه يجي يبوسك و يقول تصبحين على خير يفتك منك عشان ينام !!

و حتى تنفع لو زعلتي منه يوم تسحبين عليه و لا تسوين ذا الحركه يدري انك مولعه عليه !!

هو زي الطفل تعودينه على الشي تعويد !!!

حتى لو نام عند عيالك روحي و سوي له هالحركه كل يوم صدقيني بيتغير !!
حتى لو تناجينه قولي تعال دقيقه و ارجع نام .. و اذا جاء قال وش تبين لا تردين عليه امسكي وجهه و بوسيه وقولي تصبح على خير ..
قولي بس خلاص اللحين بنوم مرتاحه ..
حتى لو قال وش ذا البياخه و الا وش فيك اليوم !! قولي اكتشفت اني اعشقك و اموت فيك !!
اقلبي راسه قلب قلب !!!!!!

و لو نام عندك في يوم خلي يحس بفرق في النومه و لا تطالبينه بجنس خليه يحس انك نومته جنبك موب طلب للجنس ..
احضني يده احضنيه هو بكبره شوي و اتركيه لا تلصقين له يطفش منك ..
اذا نام عندك يوم و حضنتيه او حضنتي يده و راح للشغل ارسلي له مسج قولي احلى نومه في حضن الغالي الله لا يحرمني منك و لا من حضنك احببببببببببك ..


بين كل فتره و فتره ارسلي له مسج حب موب شعر او مسج من هالمنتشره لا ...
انتي اكتبيه بتعبيرك انك تحبينه و تحبين دخلته عليك و تحبين لمسته لك و حتى لو قال لك كلمه حلوه على طول بعد ما يطلع ارسلي له مسج انك انبسطتي و انك ميته عليه و انك ذايبه في دباديبه ..

المسج ينفع مع الشمالي الشرقي لانه يتعلم منه كيف يعبر لك !!
لانه يعطيه مساحه من الوقت يستوعب فيها كلامك و ممكن يرد عليك ..
يحتفظ بالمسج و يقراه بعد فتره ..
يقرا مشاعرك و يعرفها بدون ما تكونين قدامه لانهم سريعين التشتت بالرسايل يركز اكثر ههههههههههههههه

و لا تنتظرين انه يرد بمسج !! يكفي انه يقرا المسج و يخزنه في مخه !!

و اذا سألك تحبيني و الا لا جاوبيه بردي قلبه .. و قولي احبك و اموت فيك وادري انك تحبني و تموت فيني ..
ترى هم مره تاثر فيهم الايحاء يعني اقنعيه بكل شي تبغينه !!
دايم قولي انا احبك و ادري انك تموووووووت فيني ,., ادري اني ما اهون عليك ادري انك تبي تسعدني و ترضيني ..
اشوف بعيونك وشلون تعشقني !!


قولي امين الله يطلق عوف لسانهم و رومانسيتهم و يعطينا خيرهم و يكفينا شرهم يا رب ..
 
بووسي مادام هو قالك سامحتك خلاص لاتنبشين وانسي الموضوع وتغافلي تراهم مايحقدون ولو كان زعلان ما كان قلك سامحتك وامكن في شي مزعله مومنك انا دايما زوجي لما يكون زعلان يستغفر بتنهيدة انا اعرف انو زعلان من شي ...

لامعة اتفاهمي معاه وهوعلى قولتك مايكون متواجد فليه يحرمك من اهلك احلى شي العيد مع الاهل انا السنة دي زعلانة اهلي في العيد مسافرين وزوجي عنده عمل ... بس اتفاهمي بهدوء ومن غير عناد عشان مايصر على كلامه ...
 
لامعه ..

اتوقع زوجك يبي يعيش جو انك تدلعينه يوم العيد تطلعين ثيبانه و تحطين له دخون و تراكضين وراه ؟؟
و الا يبي يشوفك و انتي تشيلين و تحطين في الذبايح مع اهله و اخواته ..
 
ام احلى بنت ..

هههههههههههههههههههه لا خبيره و لا شي ..
بس الدنيا تعلم !!
و لولا الله و ثم ممكله بلقيس كان انا في خبر كان !!!

يعلم الله اني ادين بالفضل لكل اخت كتبت عن الشمالي الشرقي .. لدرجه جاني هوس بمواضيع الشمالي الشرقي و اطبق و اشوف النتائج ..

الله يجزاهم عنا كل خير يا رب و جعله في موازين اعمالهم ..
 
بوسي ..

الشمالي يتاسمح و يسكر الموضوع لكن يبقى في قلبه تاثير الموقف ..
قد صار لنا موقف من سنه تخيلي !! سنه كااااااااااااامله و كان الغلط عليه و انتهى الموقف و من يومه ما فتحت الموضوع لا بالزين و لا بالشين ..
و مره جاء بالتلفزيون برنامج عن موضوع مشكلتنا و توتر و تلخبط و غير القناة على طول و وجهه احمرررررر حسيته ولع !!

بس اتوقع انه خاف افتح الموضوع مره ثانيه او خاف اني اتذكر الموضوع ..
يمكن انه يبغى يمسح الموقف من ذاكرتي كلها !!!!
 
ماشاء الله عليك مترووووووووو
الله يجزاك الخير
حقيقى ملمة بالش ش
 
الله يسعدك يامترو ويفتح عليك

كلامك في الصميم ودرر ماشاء الله

وبما انك تستفيدين من كلام البنات عن الشمالي وتجاربهم معاه

فاانا بضيف لك عن قصصي مع زوجي الشوشو

وترى انا كنت اكرهه مره وادعي عليه بالموت

والله من جد بسبب الي كان يسويه فيني

وكنت مستخسره نفسي فيه لاني الحمد لله جميله ومتعلمه واهلي لهم مكانتهم واتفهم الناس واتعاطف معهم ومايعصبني الا الشديد القوي

وهو صراحه شكله : ( معليش اتكلم بصراحه : وجهه مره مو حلو )
( ترى انا لي عيوبي الكثيره ماابرئ نفسي لكن عندي منطق ومااتطاول على غيري )

المهم كنت اصبر نفسي عليه واكثر ماينرفزني انه بالرغم اني اكلمه بكل احترام الا انه يعصب على الفاضي والمليان ويمسح بي الارض

كان يجرحني مره ومايزال انه يهاوشني قدام عيالي

حتى هم احيانا يهددوني فيه ( لي حوالي 8 سنوات متزوجه وعندي ولد وبنت الولد7 سنوات والبنت 4 )

انا جنوبيه : عاطفيه , حنونه , احب الناس واتعاطف معهم , مستمعه جيده , احب اساعد وافرح من حولي , اتفهم الناس واجد لهم الاعذار , كريمه واحب اهدي لان ذلك يدخل الفرح على قلبي , صبوره , بطيئه الى حد ما , مااحب المشاكل ومااتحمل ازعل من احد او اعيش في جو مكهرب , حياديه وعادله ومتعاونه ومااحب احرج احد اطلاقا حتى لو اساء الي , هاديه وكلامي قليل لكن استمتع باالجمعه والناس , متردده احيانا خاصه لما اجي اشتري ملابس : احب اشاور .
الحمد لله جميله ومتعلمه وكنت مرفهه بحياتي ومستمتعه بها.

تزوجت : وحصل مالم يكن بالحسبان

اخذت واحد الله لايوريكم

عصبي مررررررررررررررررررررره لدرجة اني اخاف منه ومن شكله . يصايح ويرفع صوته ويتلفظ علي لاتفه الاسباب . وكان ها الشئ يصدمني و يجرحني جدا في بدايه الزواج لانه عمري في حياتي كلها ما احد عاملني بقلة ادب كذا .اي شئ ممكن يعصبه بسرعه ويخليه يفلت اعصابه ويتلفظ بكلام قذر.
والاحترام عندي مهم جدا لذلك كان ها الاسلوب مره يتعبني .
تكلمت وتكلمت لكن مافي فايده الحال نفسه ماتغير : قسوه وخشونه وسيطره وتحكم وعنف .

مافي بيننا حوار : انا كلامي قليل واذا جيت اتكلم معاه ماينتبه لي : يقلب بالتلفزيون او الجوال او عيالي فاانكشم واسكت .
سبق وقلت له : حرام عليك ساكته ساكته واذا جيت اتكلم شوي ماتقدر تسمعلي ؟
او يجيب تعليقات تجيب المرض : تكونين مثلا فرحانه ومبسوطه من موضوع معين ويقولك ها التعليق الي يجيب المرض .
ياحلو ابوي : كنت اسولف معه والحديث يتشعب ويضحكني و يقولي معلومات .
الي عندي فارغ : ما استفيد منه بشئ وبالرغم من ذلك شايف نفسه وياارض اتهدي ماحد قدي وانا الصح في كل شئ وغيري الغلط.
يتدخل في كل شئ حتى في المطبخ : احيانا القاه مطلع علب الجبنه الشيدر ومرصصها على الدولاب
واذا سألته ليش : حطيها لنا ناكلها عشان ماتخرب
انت وش دخلك في مطبخي ؟
الجبنه لها تاريخ واعرفه وانا احتاجها في الطبخ وماطلبتك تشتريها الا انا في حاجتها .

حتى اذا جيت اكنس البيت : تلقف وقال: لا مو كذا . كذا وبدأ يشرح .
فاانا عاد احتقره واقول هذا مورجال وشدخله في شغلي .
وكل شئ يدخل خشمه فيه ويتلقف .
ياكثر المواقف بس هذا بعضا" مما اذكر .

رايه فقط هو الصح ولايقبل النقاش مطلقا" وياويلك تجادلينه .
سبق اني جادلته من القهر : لاني دايما امشي واقول طيب طيب
وضربني شر ضربه .
واحتقرته اكثر واكثر لانها كانت كبيره جدا في حقي : انا
انضرب بعد ها العمر وعلى شئ تافه .

انا الان لم اعد اجادل بس اقول طيب : لكن هل انا مرتاحه ؟ لا .

اذا فرضا مرضت اوتعبت : مايسئل عني ولايقول سلامات . في حملي تعبت واذا اشتكيت قال كل الحريم كذا
واصبري
ومره مرضت امه : شال الهموم فوق راسه ونسى الصبر والتحمل وبغى يموت .

اذا رحنا السوق جنني : مايروح بسهوله : اقعد اترجى فيه فتره طويله وفي الاخير اذا رحنا جلس يصايح على ويفضحني عند النا س واذا بشتري شئ يسويلي تحقيق .


موكريم ولا بخيل .

يحب المدح وفيه التكبر والغرور : مره مدحته في شئ قال : ماني محتاج شهاده منك .

انا كني عدوته مايمدحني واذا مدح فكلامه قديم ومافيه احساس .

حقود واذا زعلت منه وماراضيته يقدر يقعد شهر بدون مايراضيني بس يعطيني اوامر سوي العشاء سوي كذا سوي كذا .
عنيد بشده حتى في الغلط وعنده قدرة تحمل شديده .

غلطه بسيطه : مثلا زاد الملح شوي في الرز : يقعد يسب ويلفظ وينسى كل شي سويتيه وكانك طول عمرك ماطبختي
شئ عليه القيمه .





مايحس في وعلاقته في مثل علاقة الضابط بالجندي : تحكم واوامر ومافي مشاعر .

مره كنت حامل وزعلني وبكيت بكيت بدرجه كبيره بغت تطلع روحي من البكاء : وما حرك ساكن اطلاقا" حتى مارحم الي في بطني لا يتأثر .
التغلي الي يسونه الحريم ماله وجود في حياتي .


مايحب يرمي شئ طفشني احيانا احس بيتي مليان قمايم


ميزته : يحب عياله مره ويلعبهم ويهتم فيهم . .
جدي في عمله .

لكن انا تعبت وكل مالي اتعب : لان حياتي جافه قاحله مافيها كلمة الحب .
اوامر في اوامر .
بشرتي بهتت وكلي صرت باهته وحزينه .
اشغل نفسي بعيالي وباالنت لكن عندي احساس شديد بالوحده .
سبق وشرحت له كل شي لكن مافي تغيير ابدا .
والله ان نفسي انكسرت معه : لم يعد فيه ذلك الفرح والاهتمام السابق لدي
من داخلي تعبت وكل مالي اتعب لان الاسباب نفسها .
الواحد في ها الدنيا مو محتاج شريك : يشاركه فرحته وهمومه وانا ها الشريك يقتل الفرحه ويزيد الهم هم .

اكمل فضفضه :

اذا قال كلمه تمشي

اذا عصب نسكت


يغلط دائما وما يعتذر


كلامه الصح وغيره غلط


كئيب ويجيب الكئابه


وعنده تشائم


واذا قلتيله سو مشروع اوسواي شي : طلع كل العيوب والمساؤي


والناجحيين يشوف انهم ماتعبوا لكن الدنيا تسهلت لهم


وروتيني مره ومايغير شئ


مثلا رحتوا مطعم : عمره مايفكر يغير الاكل , نفس الشئ .

مومنطقي ويعمم :

غلطتي في شئ مره فيختم عليكي ختم بالغلط .

-------------------------------------------

بعد ماتعرفت على بوصلة الشخصيه صرت اتقبله

جزاكم الله خير وكل مالي اتعلم منكم

الان الحمد لله حياتي كويسه

بس احيانا اصل لمرحله معاد اقدر اتحمل غصبا عني

-----------------------------------------------
سين سؤال بعد البربره الي فوق :

اذا ابغى اقنعه يسوي شئ معين كيف ؟



 
right ..

حبيبتي مشكوره على كلامك الحلو ..

شوفي كل اللي قليته كوم و ان عيالك يهددونك بأبوهم هذا كوم ثاني ..

هاذي نقطه ما ينسكت عليها شوفي يكفي الضغط النفسي اللي يجيك من الشمالي ..
انتبهي عيالك يصيرون مصدر ضغط ثاني عليك ..
خليك قويه قدامهم ..

لو تتفاهمين مع زوجك و تبينين انك معه مسالمه و تحت شوره و امره بي لازم يكون لك كلمه على عيالك ..
لامهك لو ما حشموك اللحين بيكبرون و بيسوون نفس الشي مع ابوهم ..

تعالي له من هالناحيه ..

و يا قلبي حياتنا كلنا كذا مع الشماليين .. بس وش نسوي !!!

تجيك حالات تطق جنوبك منه و من اسلوبه ؟؟
و الله سبحانه وحده اللي نرمي همومنا عليه ..

شوفي انا نفسي عجزت في الشمالي حقي .. ابغاه يسوي مشروع يسوي اي شي يحسن وضعنا و رافض

و يتلكك و يطلع الف عيب و عيب .. او حتى يطنش و لا يناقش المشروع معي ..
اكذب عليك اذا قلت لك لقيت له حل طنشت و بكيفه هو المسئول عن الماديات خلاص اذا انزنق بيعرف يتصرف !!


شوفي خذي لفه على مواضيع الشمالي ..
بتلقينهم كلهم نقطه ضعفهم عيالهم .. كل شي حطيه مهم بحياة عياله ..
نسوي مشروع عشان يلقونه عيالنا في مستقبلهم ..
بيكبرون و يحتاجون سيارات و زواح و لا نبي نقصر عنهم لا يشوفون اللي حولهم احسن منهم ..

العبي على هالوتر !!

احس العيال هم اقوى شي يأثر فيهم !!

و الا انك تجينه من مصلحته هو .. سوي كذا عشان يوفر عليك قيمه كذا !!
اذا سويت لنا كذا انت برتاح بيطيح عنك كذا !!

يعني حطي مصلحته قدام عينه ..

و الا اخر اسلوب يجيب معه فايده انك تمجدينه .. انت كريم و ما عمرك قصرت علينا ..
و دايم تدور راحتنا و ان ما ينقص علينا شي و ادري انك ما راح تترك هالشي في خاطري ..
و ما يقوى قلبك تحرمني منه و انت تدري اني ابغاه ..

و الله يسخر لك و لنا يارب .. و يعطينا الطاقه لهم !!
ادعي لي الله يرزقني الصبر و طوله النفس انا مشكلتي اكره الهواش و المشاكل و هم بائسهم شديد
و ما يملون و لا يطفشون !!
لدرجه اني صرت اتنازل عن الاساسيات مقابل اشتري راحتي من الهواش !!
 
لكي نغير و نتغير و نفيد و نستفيد و لنجعل الحياة مليئة بل أمل و المحبة

نطمح لتغيير زورونا على هذا الرابط و كونو عونا معنا

http://www.niswh.com/vb/showthread.php?t=288132

غدا بأذن الله هو الاسبوع الثاني فشاركونا من الان
 
الحالة
مغلق و غير مفتوح للمزيد من الردود.
عودة
أعلى أسفل