يا بعد عمري والله
فرحت بردودكم ودعواتكم الطيبه الله لا يخليني منكم
ان شاء الله راح اروح لشيخ بس قاعده ادور على شيخ ثقه ان شاء الله خير خلال هاليومين ..
قعدت فترة ادور بالمواقع الطبيه عن حالتي لكن للاسف ما لقيت
وكثرة عندي الاحلام والكوابيس من قبل دخولي المستشفى الى الآن
ما ادري وش سالفة الحمامات كرمكم الله بالكوابيس والذئاب والاسود والنمور دائما احلم انهم يلحقوني او كلاب اعزكم الله ..
بالنسبه للسفر للخارج كنا نتكلم بالموضوع هذا انا وزوجي
لكن ننتظر تقرير العمليه ونتيجة المختبر ان كان شي بسيط راح اباشر بالعلاج هنا
وان كان شي لسه ما يعرفونه ولا يعرفون يتصرفون بمثل حالتي راح نشوف وين بتعالج
ان شاء الله خير يا رب
الله يشافيني ويشافي كل مريض ومريضه اللهم آمين يا رب العالمين
يا مجيب دعاء المضطر اذا دعاه ويكشف السوء اكشف عنا السوء يارب العالمين
حبيباتي سامحوني بالنسبه للرسائل ان شاء الله بالقريب العاجل راح اباشر بالرد عليهم ..
..........
نكمل يالغاليات ..
من بعد ما تكلمت عن الزواج التقليدي سواء من الاهل او من براا
وتكلمت كمان عن انك المفروض ما تستسلمين
لكن عطي نفسك فرصه انك تحزنين لا تكتمين مشاعرك ولكن لا تغلطين اخطاء ما تغتفر بالنهايه
وقت ما تكونين معصبه ممكن تاخذين قرار بهجرك لبيتك لتركك اولادك وتهجين او تفكرين بالانتحار او غيره
انا كنت بترك البيت لدرجة اني جهزت شنطتي والله كتب لي اني اصبر واواجه
وقعدت بيني وبين نفسي اخطط لحياتي الجديده
دام قعدت ببيتي معناته ياما بحصل مفاجأت تضايقني كلمات ممكن تجرحني
او ان الاقيه مشغول عني
اشياء كثيره طرت على بالي
لكن بالنهايه حطيت حد لنفسي اني راح اواجه كل شي
وما راح اتنازل عن ابسط حقوقي سواء بالشروط او الاشياء الي تضايقني يا اني
ابعدها عن بالي او اني اتناقش فيها او ان اخليه بأسلوبي ان يرحمني هو
لانه سبب بتغيير حياتي ..
خصتا ان كان لسه باقي ما يبي يخسرك فالافضل انك تستمرين على اسلوب
انك تجذبينه انه يرحمك ببعض الامور الي يحسسك انك منتي الوحيده بحياته
تبون اعطيكم امثله بس لا تقولون عني شريره
بس لا تطبقون الي سويته رجاء تراا قصتي غير عن قصصكم
مثال : من ضمن شروطي ان ما يجيب سيرتها لا بخير ولا بشر
عشان نفسيتي ما تتعب وعلى حسب اتفاقنا كان دايما يقول لي مثلا
اعتبريني ما تزوجت اساسا انتي الوحيده وبس
وما راح تشوفين شي يخليك تفكرين بالثانيه
طيب ...
يوم من الايام رجع من العمل وطبعا لما يرجع من العمل يمكن يكون مار عليها
بالفتره الظهريه لان هذا كان الاتفاق انه يروح لها بس وقت الظهريه وما يهمني ان
كان عنده عمل ولا قدر يروح لها واكثر الاوقات هو بالعمل عنده اجتماعات وكذا
يعني مو شرط ان يحصل وقت كافي لزيارتها
بس يومها لما رجع شفت عنده موبايل جديد
قلت له ما شاء الله شريته الا يقول لي لا بس غيرت موبايلي معها
لأن موبايلها ما يكتب عربي وهي تبي تدز مسجات لاحد او شي
مدري وش السالفه المهم ان عطاها موبايله وخذ موبايلها عشان هو يعرف يكتب انجلينزي وهي لا
وش سويت
من حرقة قلبي
سويت له شاي بكوب كبير وحطيت له الموبايل داخل الكوب وصبيت عليه الشاي
ووديته له
انصدم صدمه ...
وبكل هدوء تركته وقعدت بالحوش ابكي
جاني بعد فتره طويله يقول لي ليه طيب تسوين كذا
مو انتي الي تسوين هالحركات ومن هالكلام
قلت له انت السبب غيرتني صرت عميه ما اشوف وبكل هدوء
خليته يرحمني وبين كلمه والثانيه اقول له انا اغير عليك انت دنيتي
ومن هالكلام .....
وش قال ؟؟
قال طيب كان قلتي لي عشان اكسره والله اكسره لك ولا يجي شي بخاطرك
بعدها بشوي وطبعا سيناريو البكاء ماشي تمام معاي
يقول لي طيب ارتحتي بعد ما سويتي كذا ؟
فداك الموبايل ما يهمني
قلت له ايه ادري بتروح تشتري لها جوال ثاني
لسه بقلبي قهر ... وادري انكم انتوا الاوليات تحسبون وش بيصير وش صار وش ناوي يسوي
كله بوقت واحد ضغط بالتفكير على اتفه الامور وقهر والبال مشغول على اشياء ممكن تكون تافهه
لكن تأثر على النفسيه
مدري وش صار بعدها
لكن اليوم الثاني رجع بجواله وجاب لي جوال لي جديد كان نفسي فيه من زمان
وشفت الفاتوره بالصدفه ومكتوب فيه قيمة جوالي وبس يعني ما شراا لها
بعد شهر من هالحكايه
كان مدخل سيارته الوكاله
فأنا الي وديته العمل بسيارتي وعندي موعد بالمستشفى
لما رجعت البيت
اتصلت عليه وقلت متى ما تبي ترجع قول لي عشان اجيك
قال طيب
وما اتصل وفجأه دخل البيت اتاري جاي بسيارتها
ووقتها اساسا انا كانوا معطيني ابره مهدئه لأني كنت اتألم من خاصرتي وركبي قبل العمليه
ودخل سيارتها داخل المواقف بالبيت
وبس دخل يغير حسيت بنار بقلبي
والشغاله تهدي فيني تقول لي ماما قعدي وجايبه لي مويه
قلت لها ابي بيض بسرعه
كان تروح تجيب لي بيضه
قلت لها جيبي كل الي بالثلاجه
وقعدت ادور بالادراج على مفتاحها
ولقيت مفتاحها مخبيه فوق الدولاب
يعني عشان اني متر ونص ما راح اوصل فوق مثلا ههههه
وفتحت سيارتها و اتذكر اني شفت بقايا دخان عليه روج
طلعت تدخن الاخت بعد
وهات يا تكسير البيض داخل السياره
والشغاله تسحب فيني ولا هي قادره علي
ولما سكرت باب سيارتها الا من اشوف قدامي
زوجي ...
تخيلت ان بنصفع او بيجيني بوكس على عيني
لكن ما سمعت الا كلمة يااااااااااااااااااااااااااالله وش سويتي
دخلت غرفتي وانتظر الي بيجيني
قعدت على السرير ابكي
وهو طلع يودي سيارتها المغسله
ولسه باقي فيني قهر
رسلت له ان وديت السياره المغسله لا عاد تجي البيت
وان جيت وهي نظيفه كل شي منتهي بالنسبه لي
كلها دقايق وهو راجع ما وداها المغسله
رسلت لها رساله معتبره
قلت لها المره هذي بيض والمره الثانيه بحرقها لك
وما كلمني زوجي ليلتها ونمت عادي وانا مبتسمه
على ذكرى مريره
لما ما كان عندي سياره وهو كان ياخذ سيارتي
ويروح لها ويطلع معها
ولما كنت اخذ السياره منه لشي مهم
كان يرجع البيت لكن الصديق المزعوم الي كان يقول انه يوصله
ليه ما كان يوصله الين باب البيت
ليه كان يطلع من الشارع الثاني مشي يرجع البيت
الا لانها هي الي كانت توصله بعد ما يخلصوا كل شي مع بعض
يدخل علي وهو ما يدري اني انتظره بالطابق الفوقي اشوف هالمره من اي شارع
جاي مشي ياما وياما كتمت شكي وقلت عيشي بسلام لعل الله يفرج علي وينكشف المستور
وفعلا بعد اكتشافي لزواجه وخيانته لي لما قلت له كيف جت الين بيتي وش يعرفها العنوان
وين ؟؟
قال لي كانت توصلني لما ما كان عندي السياره
كانت تنزلني ببداية الشارع وعرفت وين ساكن
الله يالدنيا
والله مو قليله عليها البيض والزفار
الا اكثر من كذا ...
وش احساسك يا زوجي لما الي خذيتها والي كانت على ذمتك
تدخن ووين بالشارع وهي تسوق ؟؟
وانا لو ابي اطلع اروح اغسل وجهي من المكياج ولما يبقى اثر
للكحل داخل عيني تقول لي ما في طلعه روحي امسحيه عدل ..
كنت ما ارضى على نفسي بعد ما اكتشفت كل هالاشياء
كنت اباشر على انه يمشي على شروطي ما يجيب شي من عندها
ما ابي شي من عندها ابد ابد ابد
وطبعا رسلت لي ليلتها رساله حلوه
تقول ان كان هالشي يريحك فسوي الي ببالك
هو ما يقدر يطلقني
ارسلت لها ما عاد يهمني طلاقك ولا قد مره طالبته ولو طالبته ما راح يقصر
لكن انا ما عدت الانسانه الي سمعتي عنها يوم ومدحها لك يوم من الايام
انا الآن اخذ ما هو حقي من الاحترام والواجب عليه وعليك تحترمون هالشي
رضيتوا بشروطي ان ما يذكر اسمك عندي بالتالي سيارتك وش جيبها ببيتي
وما رسلت ولا شي بعدها وانقطعت الرسائل
وما عدت شفت منها اي شي
واليوم الثاني زوجي كان طبيعي معي
وصار يمزح يقول كلك نتفه كل شي فيك صغير
كيف تتحركين بسرعه وتسوين كل هالسوالف يا شريره
يعني كان يلطف الجو ...
.........
ان جاك زوجك وعليه بقعه من مكياجها
ان كان زوجك بيستحمل تصرفاتك ناقشيه بالموضوع
او سوي شي يردعها عن هالتصرفات السخيفه الي قاعده تسويه
وان كان زوجك ما يرضى على انك تناقشيه ولا فيه صبر على اي حركه منك
ابيك تحطين ببالك شي واحد وهو الاهم
دام هي قاعده ترسل لك حركات مثل الميكب او اي شي عشان ينهز بدنك من حركاتها
حطي ببالك انها مليوووووووووووون بالميه
مقهوررررررررره منك غيراااااااانه وما بيدها شي الا هالحركات السخيفه
وما تقدر تسوي شي عشان تبعد زوجك عنك الا بأشياء تافهه
وكل الي ببالها
لو انا ما اقدر اني اغيره عليها
يمكن بالحركه هذي تسوي مشكله بينها وبين زوجها
ويهجرها كم يوم ويجي عندي
لا تغامرين بأي حركه لو كان زوجك مو من النوع الحنون معك او الي يستعطف وضعك الجديد
وطبعا الانماط تختلف وانا نمط زوجي ان ما يحب يشوف الدموع
ونفس الوقت لما الومه اقول له مثل دنيتي واغار عليك وانا احبك
وهو من النوع العاطفي وهالشي يجذبه لمراضاتي اكثر لمجرد اني مو بايعته ..
لي رجعه
