خلاصة تجربتي من زواجه علي ونصايحي للزوجات الاوليات (زوجات ناجحات)

الله يسخر لك انا زوجى متزوج على واستفدت من كلامك بارك الله فيك
 
حبيباتي جيتكم عشان اكمل

بالنسبه للرابط الي طلبت مني لتنظيم الوقت ان شاء الله راح ارسل لكم الرابط ولا يهمكم ..

وسامحوني على التقصير ..

.........

وعدتكم اني اتكلم عن كيف تغيرت بالنسبه للعيال ..

بس قبلها عندي نصيحه للاوليات والمجروحات من الخيانه

إياك يالغاليه انك تتكلمين قدام عيالك عن مشاعرك وعن احساسك بعد تجربتك المريره

او تقوينهم على ابوهم حتى لو كنتي بحالة انهيار ..

طبعا يمكن تسألوني هل اطفالي دروا عن زواج ابوهم ..

من اول يوم لما عرفت عن زواجه علي

كان يردد يقول عيالي آه عيالي لا يدرون بيكرهوني

لا يصير فيك شي عيالك ما راح يسامحوني

ما راح اقدر اسوي لهم ربع الي انتي تسوينه

عيالك متعلقين فيك ما يقدرون يعيشون بدونك

لا تتركين البيت وتتركينهم معي والله بيضيعون وبيكرهوني

لدرجة ان كان خايف اني اموت نفسي وبعدين يسود وجهه قدامهم ..

لدرجة ان كل ما عيالي يقولون نبي نروح بيت جدنا يقول بعدين

خايف لا يسمعون شي من هناك وينكشف لهم الحقيقه

........

الحقيقه مرررره وصعبه سواء بالنسبه لك او عيالك

زواجه عليك يعني كرهه لأمهم ولهم بالذات

يشعرون بالذنب رغم ان لا ذنب لهم خصتا الأطفال الي ببداية المراهقه

يحسون فعلا بالنقص لو عرفوا ان الاب تزوج على امهم

ورغم ان البعض ممكن يحس خلاص ان حياتهم انتهت الى هذا الحد

ويحسون بالنقص بغيابه عنهم ووو....

كلكم تعرفون هالشعور وما يحتاج اعطيكم وصف دقيق لمثل هالحالات

لأن شي يعور القلب خصتا ان الاطفال يحسبون ان كل مشكله صغيره او كبيره من ناحيتهم

او من ناحية الام لها يد بزواجه بثانيه ..

......

عيالي حبايب قلبي نور عيني

كنت قدر الامكان احاول اني اقول مريضه

لما يشوفوني فعلا تعبانه او مو قادره اشيل روحي

وسبق ذكرت ان حتى الشغاله كانت قدر الامكان تخبي

تعبي عن عيالي شالت البيت بأول اسبوع وكانت تهتم بكل شي

ونفس الوقت كنت احس ان عيالي ميتين خوف علي

البيت هدوء خايفين يزعجوني

مرات ومرات كانوا يدخلون الغرفه ويبوسون راسي ويطلعون

وبعدها كنت أغرق بأفكاري وحزني وادخل بحالة بكاء واحساس المراره آآآآه شعور صعب جدا وصفه ..

......

بليله من الليالي

كانت طليقته راسله اختها عشان تتصل على زوجي

وتقول له إلحق على زوجتك تراهي مريضه مره ولا هي راضيه تروح المستشفى

وقتها زوجي كان جالس على السرير وانا كنت اصلي المغرب

وكان اساسا جاي من عندها بالفتره الظهريه نفس ما كنت شارطه عليه من قبل

ومن بعد المغرب مالها شي ابدا وياما كنت اذكره بالشروط واقول إياك تحاول انك

يوم من الايام تحاول تقنعني عكس ما اتفقنا عليه

لأن وقتها خلاص ما بيكون مجال للتفاهم ..

اول ما خلصت صلاتي

قلت له عسى ما شر كنت تكلم مين ؟

قال كنت اكلم اختها وهي ....

قلت له ما تشوف شر

وعلى فكره الليله الي قبلها كانت تسوي نفس الحركات بالضبط

تمرض روحها وبعدها تطلع من بيت اهلها

وتتصل فيه لما يكون راجع لبيتي فبدل ما يرجع البيت

يروح يدور عليها بالشوارع

ولما رجع من عندها بالليله الي قبلها كانت الساعه تقريبا عشره بالليل

وهو كان يتصل فيني يقول انا زي المجنون الله يلع.... اليوم الي ...

الين ما ردت عليه حضرتها وقالت له اني قريبه من البر ما ادري كيف وصلت هناك

كانت تسوق وتبكي وما قدرت ترجع البيت انهارت او مدري وش ناويه عليه

المهم انها قدرت ان تخليه يتأخر عن بيته

لما بغى زوجي يرجع البيت

قلت له لا ترجع الا وهي معك

ووالله ان ما راح تدخل وان دخلت انا الي طالعه

موقفي كان على اساس اني ما مداني اني انصدم بزواجه

الا وهي قاعده تحاول انها تخرق شروطي من اولها على اساس ان الرجال

يمل من شروطي ويحس فعلا انها شروط تعجيزيه

وما قدر زوجي ان يقنعني او يهديني وما كان لها خيار

الا انها تجي تلحقه بسيارتها

ولما عرفت ان قربت

طلعت لها برااا

وتذكرت عشوت عيالي بدون ابوهم

ليله بعد ليله وهي كانت تحاول قدر الامكان تمرض روحها

او تحاول الانتحار وعيالي

آآآآآآآآآه اسألتهم واتصالهم لابوهم بدون ما يرد عليهم كان هالشي

يذبحني ويقتل كل رحمه للانسانه هذي الي ما تعرف شي ولا تحسب حساب

الزوجه الاولى ومشاعرها ومشاعر عيالها

لما وصلوا طلعت وانا دموعي خلاص نشفت من القهر

وعيالي نايمين وقتها

اول ما وصلوا

هو كان بسيارته

وهي بسيارتها

وانا بعباتي براا استنا

على طول رحت لها عندها

وهي نزلت نافذة السياره

وعلى طول قبضتها من صدرها وهزيتها

قلت لها هالمره الاخيره الي اسمح لك انك تخالفين شروطي

فاااااااااااااهمه وله اعيد

وهي بس تهز راسها وانا اساسا ما اشوف قدامي الا وجهها وكل شي حولي ظلام

وزوجي يقول خلاص بلا فضايح

وانا اقول له انا ما رفعت صوتي انا بس اتفاهم معها

ووالله اني ما قدرت اني اشيل ايدي عنها الا بعد مده حسيت انها ....



راجعه اكمل لظرف طارئ
 
سامحوني على التأخير حبيباتي

وكاني جيت اكمل لكم ...

كانت هذي الليله بمثابة الليالي السابقه الي كان فيها مشاكل

وخصتا من ناحيتها كانت تحاول تثبت وجودها بحياتي وتقدر انها

تاخذ نصيبها ونصيب غيرها سواء انا وله عيالي

لكن بالنسبه لي هيهااااااااات انا ما اعطي مجال ابدا

لحركات ممكن ان تاخذ حقي او حتى اقل القليل من احترامي لوجودها

لاني عطيتها مجال انها تثبت لي انها زوجه ثانيه محترمه مثل كثير من الزوجات الثانيات

الي ممكن انها ما تتدخل بحياة الاولى وتحاول انها تستقر بعيد عن المشاكل

وتخاف على حياتها الزوجيه من الانهيار ..

لكن بالنسبه لها شي ثاني كنت يوم بعد يوم اتأكد انها داخله وتبي الرجال بكبره

لكن ما تعرف طبيعتي الحقيقيه ولا تعرف وجودي بحياة زوجي وش يعني بالنسبه له

ولا تدري مدى تعبي وصبري ببيتي عشان تاخذه بسهوله وقتها ووقتي كمان

فلما اتصلت اختها وقالت انها مريضه

قال زوجي انا بروح اوديها المستشفى

قلت له اسمح لي ياما وديتها المستشفى لكن كل الاطباء قالوا لك

زوجتك مهي مريضه ما فيها مرض عضوي زوجتك ما تاكل عشان يغمى عليها

زوجتك تحاول انها بس تمرض نفسها لأجل انك تجيها بالليل

انا ما راح اسمح لك انك تسوي فيني كذا ..

وبعد مشاده بيني وبينه

ولدي قال شي :

لو سمحت يبه ما يحتاج تكسر شي ولا تصارخ على امي

انت متزوج واحنا عرفنا ان كنت تبيها روح لها امي مهي محتاجتك بشي

هذا ولدي .. حبيب قلبي

إلي كنت اظن انه ما يعرف

اتاري ابوه لما جاب لي عقد زواجه عشان يثبت لي متى متزوجها

خباه بدرج بالصاله وكان ولدي يدور على شي

ولقى العقد وقراه ووقتها عرف ان ابوه متزوج علي

وعرف اني ليه كنت تعبانه لكن كتم بقلبه ليالي

ووقت ما قال كذا لأبوه

بنتي كانت واقفه والله والله ما انسى هالليله

بنتي وهي واقفه صرخت صرخه وبالت وانتم بكرامه بمكانها

طلع زوجي واول ما كان يبي يركب السياره

لحقته بنته

قالت له كرهتك كرهتك لا عاد تجي البيت ما نبيك

الي ما يبي امنا ما نبيه

وخلاني مع عياله

واتصل فيني يقول لي انا ما بروح لها انا واقف براا

هدي عيالك قولي لهم هالكلام مو صدق

ارجوك سوي شي اي شي لا تضيعينهم

بعد ما دخلت بنتي البيت كانت حالتها حاله

تصرخ وتصرخ مانبيه خلاص ما نبيه

قعدت معها اقول لها يمه

هالكلام مو صدق

ولدي قال لي عن العقد
يقول يمه ترااا احنا كبار مو صغار

انا عرفت انه متزوج ليه تكذبين وكاتمه بقلبك ليه ما قلتي

وش راي جدي وجدتي وعماتي

قلت له كلهم راضين الا جدك

قال خلاص ما لنا اهل ما نبيهم

قلت له يمه شرع الله الله حلل اربع

قال يمه روحي قولي هالكلام لأحد ثاني

محنا عايشين بالبيت وشايفينك كيف معه

ياما كنتي تسوين وياما يمه بعتي ذهبك عشانه

وياما كان يتأخر وتبكين واحنا نحس فيك

شرع الله يا يمه , هذا ظلم

واتصلت بنتي على ابوها

وقالت له شوف الاغراض وكل الي كنت تجيبه لنا

بالفتره هذي والي كنا نقول وراه ابوي تغير علينا يجيب لنا

ويطلعنا ويدلع امي وووو

ما نبي منك شي ما يهمنا شي ما نبي الا امنا

لا تتوقع ان لو انك طلقت امنا نجي نعيش معك

لما خلصت المكالمه من ابوها

ارسل لي زوجي يقول

ضاع كل شي ما عاد يحترموني خلاص

شفتي بنتك كيف تكلمني ؟؟

ارسلت له قلت له لو تبي ترجع البيت حياك

لكن لسه ما بحط بذمتي واقول لك طلقها

انا افهم عيالك انك بتطلقها

لكن والله ثم والله ان رفعت صوتك علي يوم او انها اتصلت وقالت احتاج للكفن وتروح لها

ما راح اقعد بالبيت وعيالي خلاص انت عرفت انهم بصفي

ثم عيالي كبار وبسن قانوني انهم يختارون من يبون يعيشون معه

وانت عارف ومتأكد ان هذيك يبي لها من يربيها مو من تربيه ..

...........

هذي كانت نهاية قصة عيالي لما عرفوا عن ابوهم

خلال ثلاث ايام ابوهم رجع البيت

ماكانوا راضين ياكلون معه

ولا كانوا يرضون يقعدون معه

يروح لهم الغرفه كل واحد منهم ينام

وانا اقول لا تضغط عليهم مصدومين من الي سويته

الين ثالث يوم قلت لهم تراهوا طلقها

ولدي يقول : وين صك الطلاق

وانا اقول يالله ما توقعت انه ينتبه للسوالف هذي

قلت له يمه صك الطلاق لسه ابوك ما راح المحكمه

هو طلقها شفوي بس الين ما يروح المحكمه ووو

وسكت عن الموضوع

اما بنتي كانت كل ما تشوف ابوها تشرد منه فتره طويله

الين ما قعدت معها وفهمتها كل شي وطيبت خاطرها

وصارت بالبدايه تسلم عليه وتجلس ساكته الين

ما اشوي اشوي عادت لطبعها تدريجيا

لكنها من النوع الجريء مع ابوها تقول الي بخاطرها ونفس الوقت تعلق عليه كثير حتى بالمزح المهم انها توصل كل الي ببالها لابوها بأي طريقه وزوجي يحبها كثير ومدلعها ..

يعني زوجي يخاف من لسانها ونفس الوقت هي المفضله عنده

احيانا تعطيه نظرات احسه يخاف انها تفتح الموضوع وتقول له ليــــــــــــه ؟

بنتي شافت زوجته الثانيه لانها صديقة حماتي وكانوا يشتغلون مع بعض لما تعرف عليها زوجي

وتلاقت بنتي مع ذيك بمناسبة فرح

ولما عرفت بنتي من هي زوجة ابوها ؟؟

قالت كلام ما انساه ابدا

قالت انا نصحت عمتي ما تمشي معها ما عجبتني

وابوي ما شاء الله عليه يركض يتزوجها

بنتي الي يشوفها ويقعد معها تفكيرها زي الكبار لكن بجسد طفله

ملامحها بريئه لكن نظراتها للناس تقيس كل شخص على حسب العادات والتقاليد

ما عندها مانع تترك صحباتها كلهم ان عرفت ان يوم من الايام ان ما يصلون

وياما كانت مدرسه الدين تقول لي من وين لها بنتك كل هالمعلومات والكتب الي تجيبه معها

كيف تحضر للدرس من كتب اكبر من سنها ؟؟

وانا اقول لها عندنا مكتبه لكن تحضيراتها شي يخصها انا ما اتدخل فيه

ما شاء الله تبارك الله

يا رب فرحني فيها واحفظها لي يا رب العالمين

بنتي الله يحفظها لي من سن 8 سنوات حفظت سورة البقره كامله

وانا اساعدها كثير وكنت انقلها من مركز الى مركز من حبها لهذا الشي

والآن ربي يعطيني الصحه والعافيه واشوفها حافظه كتاب الله كامله

وبصراحه خلال الشهور السابقه وقفت عن التسميع لها واشوي اهملت بالمواصله معها

لكن...

رجعت لها وانا كلي قوه واصرار ان الله يعيني واقدر احقق لها احلامها

بصراحه بالفتره الاخيره لاحظت عليها العصبيه الزايده

ويمكن من النوع الي تقعد تفكر بإلي حصل كثير

لكن علاقتي فيها الآن صارت اكثر صراحه

فضيت نفسي لها حاليا انها تتكلم اكثر معي تقول الي بخاطرها

وبيني وبينكم صدقوني لما ينشال حدود الامومه بين الام وابنتها

راح تلاقين مفاجأت كثيره ما كنتي منتبهه لها بالسابق

اما الولد الله يحفظه لي

ما زال مستمر على نفس عاداته ما تغير شي

لكن الاحظ فيه من بعد ما صار هالشي

يتكلم كثير عن المستقبل

يمه بس اكبر بسوي لك اشياء كثيره

يمه ان رحنا المجمع ابراويك شي كنت حاط عيني عليه

لما اكبر ان شاء الله اجيبه لك

يمه انا ان تزوجت ما راح اتغير

بجيك على طول وما راح تحتاجين لأحد

افكاره الحلوه وكلامه يوسع صدري واحس

ان لو الله كتب لي اني اعاني من جديد بفقدان زوجي لا سمح الله

عندي الاهم عيالي وحبهم لي ..

شعاري اليوم مع عيالي :

رغم ان ما فيه ترتيب بالكلمات للشعار هذا الا انه فعلا ما احس فيه والي اطبقه حاليا

( ان كنت اعطيهم بدافع الامومه فقط فالأن اعطيهم بدافع الحب من قلب يحمل كل الأمل اني راح استعيد هالحب والأهتمام يوم من الايام )

اللهم احفظهم لي
اللهم اجعلهم بارين بي وبوالدهم
اللهم اجعلهم من عبادك الصالحين
اللهم سخرهم لطاعتك .

اللهم آمين لجميع اطفال المسلمين ..

لا تحرموني من تواصلكم عبر مشاركاتكم
 
ما شاء الله لا قوة الا بالله
اختي الحبيبة كنت احلم
اسال الله ان يبارك لك في ابنائك
ما شاء الله عليهم ربنا يحفظهم من كل شر
اكبر من سنهم بكتير
صراحة هو ده الرزق وهو ده العوض انه يكون في ابنائك
تستغني بيهم عن الدنيا
وتحسي ان تعب الايام وسهر اليالي لن يضيع هدرا
اسال الله ان يبارك لك فيهم وان يبعد عنكم الشرور ويرزقك الصحة والعافية
اعذريني لتاخري عليك في الرد
النت فصل عندي ولسه راجع حالا
اول ما رجع دخلت علطول على موضوعك
وفي انتظار باقي اضافاتك
ربنا ما يحرمنا منك ومن اللي بتفيدينا بيه
 
مااااااااااااااااأدري ليش كل ماأقرأ لك جزء من كلامك تدمع عيني؟؟؟؟؟؟؟؟؟؟
فيه سرّ غاااااااامض في شخصيتك يخليني أتعلق فيك أكثر وأكثر..
الله يحفظك ويرعاك..
واااااااااااااصلي منتظرينك..
 
السلام عليكم ورحمة الله وبركاااته​

دعواااتكم لي جدا محتااجه لها انا الان في محنة هالاختبارات الله يعين بس ​


حبيت اتطمن عليكم وعلى اخت غاااااليه علينا لا حرمكن الله جنااااانه​


بناااااااات عندي اقتررااااح يااليت المشرفااات ينفذوونه

وش رايكم لو تقفلون المنتدى لين تنتهي اختباراااتي

او على الاقل تمنعون كنت احلم من الكتااابه :32:

ترى والله حرااام ودي اذاااكر بس ماني قاااادرة

راح ادعي ان المنتدى يقفل بس عشاان اريحكم موشيء ثااني <<<< نذللللله بجد

لاتلوووموني ترى بس من حبي لمصلحتكم <<<< هذي الاختبارات تجنن الواااحد وتخلي ماااااله مخ ولا مخييخ ولا شيء :10::24:


دعوااااتكم ان ربي يثبتني ع عقلي وينجحني بس :32:​
 
كملي نحن في انتظا ر
كلامك مثل البلسم
موفقه يااختي كنت احلم ويخلي لك عيالك
استغفر الله واتوب اليه
 
الله يسعدج يا كنت احلم وين ما كنتي .. و يخليلج ريلج و عيالج :)

و يبعد عنج الحسد و المرض و كل هم يااااا رب
 
لا يا بنت السعودية
حرام عليكي
كده نزعل منك
دا انا اول ما افتح على قصتها علطول
بس هنعديهالك المرة دي علشان الامتحانات
وربنا يعينك
 
يا حبيباتي

والله ان لكم معزه بقلبي وربي يعلم ان

اتمنى لكم الخير من كل قلبي

عسى الله يسعدكم ويوفقكم

.....

بنت السعوديه الله يوفقك يالغاليه الموضوع حتى واصلت فيه

انتي حطيه بالمفضله على اخر رقم وصلتي له بالصفحات عشان تتابعي بعد الامتحانات

وعن جد بزعل منك لو ما اهتميتي بامتحاناتك

يلا اووووووووووت ولا عاد اشوفك لا بالماسنجر ولا هنا الين الاجازه ..

...........

حبيباتي ان شاء الله راح اضيف اضافه جميله فيها

بعض الامور الي تريح الاعصاب للي يحتاجون

تهدئت اعصابهم من التوتر خصتا الاوليات

سواء المهجورات او الي لسه يناضلون ببيتهم

عسى الله يستجيب دعواتنا لكم بالاستقرار والراحه النفسيه

ويجعل ما بينكم وبين ازواجكم موده ورحمه

حبيباتي اضافتي ..

دعوه جميله للهدووووووووء

دعوه جميله للطمئنينه والسكينه

حياتك ملكك انتي الي تديرينها بنفسك

حياتك المفروض تكون دلع وراحه واستقرار رغم

المشاكل والهموم بعد زواجه وبعد خيانته

انتي المهمه اليوم ...

ضحيتي سويتي سهرتي على راحته

آن الأوان للتغير آن الأوان للراحه النفسيه

انتظروني قريبا ان شاء الله ..
 
في انتظارك اختي الحبيبة
وياريت تطمنينا على صحتك
العملية اخبارها ايه
هل لا زلت تحسين بالام ام ماذا؟
وايه اخبار الرقية معاك
اسال الله ان يخفف عنك ويعافيك من كل سوء
 
كملي يالغلا اسال الله ان يمتعك بالصحه والعافيه واسال الله ان يشفيك يااااااااااااااااارب ياكريييييييييييييييييم كم احتاج لكلماتك وكم احتاج الى خبرتك في الحياة لتنيري الطريق لكل امراءه مكلومه وجزيتي الجنه
استغفر الله واتوب اليه
 
آآآآآآآآآآآآآآآآآآآآآه ياكنت احلم

والله مادري اقول ايش ولا ايش

من يوم الخميس طحت على موضوعك بالصدفة وكل يوم اقرا منه كم صفحة وبسرعة ابي اقرا كل ردودك والحين وصلت لاخر صفحة

كلامك عن الجنوبي صحيح مية بالمية

انا زوجي جنوبي كنت اقرا له مسجات كلام حلو لصديقاته ولما اواجهه يقول مساكين محتاجين من هالكلام انا اعتبره صدقة جارية
وتصدقين يقول لي من صجه ومن كثر طيبته وده يعطف عالغير وطبعا مايحلا له الا مع الجنس الناعم

وغالبا الزوج الجنوبي الغربي يخون زوجته الشمالية لاختلاف نمطهم كليا ولو تلاحظون اكثر حالات الخيانة يكون الزوج جنوبي والزوجة شمالية

مع انه يحب ان زوجته تشيل عنه اعباء البيت وتنظم حياته وفي نفس الوقت يبي اللي تقعد عنده وتدلعه وتمدحه وتهتم فيه وماتنشغل عنه

بس عندي مداخلة :31:

ليش وقت عزا ابو زوجك زوجك دخل وشاف طليقته يعني انتو عندكم اختلاط قعدة الحريم مع الرجال ؟

كيف يدخل وهي موجودة وليش ماقلتو له عشان مايدخل ؟

وعندي سؤال مادري ذكرتي الجواب او انا مانتبهت

كيف عرفتي انه تزوج وكيف عرفتي بعدها عن علاقتهم ؟

وبالنسبة لمرضك هذا من العين عشان كذا مايدرون كيف يعالجونه علاجك بتكثيف واستمرار القراءة والسبوح بالسدر

اعرف وحدة بنتها كان فيها عين قوية قديمة وقعدت شهر او اكثر ماتنزل درجة حرارتها والاطباء مو عارفين لها
بعدين طابت امها كانت تقعدها في طشت وتسبحها بالسدر مع القراءة وماي زمزم

وعندي سؤال ثاني بس برسللك عالخاص :22:

اسأل الله العظيم رب العرش العظيم ان يثبتك على طاعته يارب ويقويك ويشفيك من كل ضر وشر ويخليك لعيالك ويحفظهم لك ويصلح زوجك ويصرف عنكم فسقة الجن والإنس

آآآآآآآآآآآآآآآآآمين يارب العالمين
 
الله يوفقك لما يحبة ويرضاه
ياليت ياقلبي ترسلين لي النصايح ع الخاص
لانى بجد بحاجة ماسة لها ربي يسعدك ويخليك لعيالك ولايغير عليك زوجك اتمنى منك المساعدة
وشفاك الله وعافاك وسدد ع طريق الخير خطااك
لااله الاانت سبحانك انا كنا من الظالمين
 
أمة الله الضعيفه

الحمدلله لا آلام حاليا من العمليه نفسها الحمدلله

لكن آلامي حاليا تقريبا من الخاصره الى نهاية الرجل

من الجهة اليمين بسبب ما تبقى من اكياس بالاحشاء

ان شاء الله خلال هذا الاسبوع راح انتظر من دكتورتي اتصال

لانها وعدتني خير انها تعطيني التقارير مع النتيجه النهائيه لحالتي

والله كريم

هي متردده بإجراء العمليه للمره الثالثه

ونفس الوقت ما عندها اي تحليل طبي لحالتي الي تقول انها جديده من نوعها ..

حاولت قدر الامكان اني اعمل بحث لمثل حالتي

والنتيجه زيرووو امراض كثيره لكن ما في ولا حاله مشابهه لنفس حالتي

الله المستعان ...

.....

الاعراض الاخرى الي عندي

كل شي طبيعي الا ان مرات لما اطلع من البيت

احس النظر ينكسر عندي بدون سبب

يعني كيف اشرح ؟

عيني اليسار احس بأقصى اليسار لما اوجه

نظري لليسار احس الصوره منكسره

وكانت اول مره تحصل لي بسبب والله ما احط بذمتي

كنت توني طالعه من المستشفى

وزارتني زوجة صاحب زوجي عشان تتحمد لي بالسلامه

فلما شافتني على طول قالت لي

شكلك مو مسويه عمليه وش هالحلا وش هالزين

وقعدت طول جلستها سين جيم سين جيم

سويتي شد لجسمك

جسمك مشدود مره وش ذأه البياض

يا ربي كل شي فيك صغير كأنك بيبي

يووووه ولدك بطولك هههههه

تعليقات وتعليقات

وبصراحه ما استحيت وقلت لها اذكري الله

ضحكت وقالت ما شاء الله

وعلى فكره هذي اول زياره لها لي

وما اعتقد ان جيتها اساسا لاني مريضه

لان زوجها سنين يعرف زوجي ولا قد مره جت

وكانت تمر علي مناسبات كنت اعزمها او كانت تعرف ان عندي وفيات وغيره

ما كانت تجي

كنت متأكده انها جايه عشان تشوف حالي بعد ما عرفت انه تزوج علي

لانها قالت لي شي نبهتني اني اخذ هالفكره عنها

قالت يــــــــــــــــــــــــــالله والله تقطع قلبي

لما عرفت انها اعرس عليك

قلت لها وش دعوه شايفتني فيني شي وله ناقصني شي

عشان يتقطع قلبك

ضحكت قالت لا والله بس توقعت انك شي طلعتي شي ثاني

هذي حرمه ما ترحم الناس من لسانها

اكثريت الناس يتوقعون ان الزوج اعرس على زوجته الاوليه

لنقص بجمالها وله اسلوبها وووو

لكن الحقيقه عكس الاوهام ..

لان الرجال صارو يتزوجون حتى من غير اسباب

حبا وطمعا وانانيه ..

نزوات غير مدروسه ..

وبمجرد انها طلعت من عندي

جتني هالحاله ومستمره معي بين فتره والثانيه تجيني

وياريت انها تصون لسانها

لان اليوم الثاني زوجي جه وكان مره معصب

وقلة الحياء بالنساء وصل انها تصفني لزوجها

الله لا يحللها ولا يبيحها قلت لزوجي نفس الكلام يوصله

لصاحبه ولو كان عندي رقمها كان مباشره اتصلت فيها

الله لا يحللها انها تصفني لزوجها وبعدها تقول وتهدد زوجها اياك تفكر تسوي نفس فلان

ولا ابيك تماشي زوجها الا بالعمل ..

زوجها قايل لزوجي

يالله زوجتي قاعده طول الليل تمدح زوجتك

قال زوجي جزاها الله خير من طيبها

وتوقع زوجي انها واصفه اخلاقي وكرم ضيافتي

لكن لما استرسل زوجها بالحديث

قال له زوجتك وش اصلها بالضبط ؟؟

قال له ليه ؟؟

قال بس اسأل

قال له سعوديه ولكن امها مو سعوديه

قال ايه من كذا

قال له خير وش فيه

قال لا بس من كثر ما وصفتها زوجتي

قلت اكيد انها مو سعوديه

وحصلت مشكله بينه وبين زميله بالعمل

وزوجي اساسا هو ماسك مجموعة شركات وله اسهم بالشركه

يعني شراكه وغضب زوجي اكثر منه وحوله لقسم ثاني

بدون ما يقصر عليه بالنسبه للراتب

لان لمجرد عرف ان هي قالت له لا تماشي فلان

اخذ هالقرار عشان يأدب هالرجال وحرمته الي ما يعرفون ان الله حق

استغرب من هالناس الي يتشمتون بأوضاع الناس وكأن الانسان يعرف وش مصيره

ومتأكد ان وضعه بالايام الجايه راح تكون للافضل ..
سبحان الله الا دوام الحال من المحال

المهم انها لما طلعت من عندي مباشره

حسيت بتكسر النظر من جهة اليسار

وبعدها على طول صداع نصفي

لدرجة ان طول الليل ابكي بصوت مرتفع وضغطي

ارتفع فجأه ودقات قلبي زادت وهالحاله والله كانت

فيني من قبل الا تكسر النظر كانت للمره الأولى

ومن بعدها بين فتره وفتره يحصل لي كذا

لدرجة اني اشوف ناس بصورة متكسره يعني بشكل يخوف لتكسر النظر احس ان جزء من وجه الي قدامي مو زي الجزء الثاني

واستغربت ان ناس ثانين اشوفهم بطريقه صحيحه تماما

والله مرت علي ايام شكيت بحالتي اني خلاص ابستجن لو لا ستر الله علي

والقراءة على نفسي والرقيه اشوي اشوي احس حالتي تتحسن ..

زوجي صار شكاك بطريقه عجيبه واخر شي

اليوم بالذات كنت لابسه زي كل يوم لبس ناعم ومهتمه بنفسي ولما مريت جمبه

قال تعالي : قال والله اخاف اني انا الي احسدك

وكل ما امر من قدامه يسمي بالله ويمسكني ويقرأ علي

واحيانا يقول لي روحي لبسي شي ما يلفت نظري والله خايف عليك وكنت اظن انه يمدح حبا فيني

اتاري كلامه فعلا كان جاد فيه
لان صاحبتي اليوم مرت علي وحبسني بالغرفه

يقول ما تطلعين الا لما تبدلين ملابسك وترفعين شعرك

ضحكت قلت له وش فيك اكيد تمزح

لكن حسيت بصدق كلامه لما دمعت عينه

يقول بديت اشك بكل شي كل ما يجيك شي احس من كلام الناس

وكل ما اتذكر كلام الشيخ احس ودي انك ما تلبسين حتى قدامي

انا ادري الجمال مستويات وما في مستوى يحدد جمال المرأه

لكن رجاء خاص للنساء لا تقولين انا مو حلوه

لان الجمال درجات والي شابع من شوفت نفسه يشوف غيره

زي اي وحده لما تشوفين شنطتها ما تعرفين كم سعره لكن تقولين وااااو حلو يا ترااا هالبنات من وين يجيبون هالشنط

مع ان هي نفسها يمكن تشوف شنطتك احلى من شنطتها ..

هذا مثال بسيط واقعي ان الي عندك يمكن تكونين شبعانه انك تشوفينه كل يوم لكن الي يشوفك ما يشوفك نفس نظرتك لنفسك

بالتالي انتي تحاولين انك تتزينين اكثر عشان ترضين نفسك وتكسرين روتينك

وتتهاونين بالرقيه وتقولين ما في شي يستاهل عشان الفت النظر ولكن العكس تماما

صدقوني الناس يلاحظون على الوحده حتى صحتها حتى نشاطها

يحسدون الوحده على اي شي بسيط تافه لكن بالنسبه لهم شي ثاني ..
في ناس تذكر الله من اول ما تشوفينهم

وفي ناس في قلوبهم مرض وحسد وحقد ان شافوا الخير على الوحده

والله سبحانه وتعالى ما ذكرهم بالقرآن الا عشان نفهم ان الحسد والعين حق ويجب حفظ النفس بالرقيه

ووالله اني كنت ارقي نفسي واحيانا انشغل وبدل ما ارقي نفسي مرتين باليوم

كنت انسى مره وكنت اذكر مره ومرات كنت والله من كثر الظروف والمشاغل ألتهي

بالنسبه لماء زمزم والرقيه من بعد استخدامي للاوراق بعد نقعهم بماء زمزم وبعد ما تسبحت اكثر من مره بماء مخلوط فيه سدر

انقلبت احلامي الى احلام الله العالم وش معناته

وجوه اول مره اشوفها
لكن الي يلفت نظري دائما امرأه ورجل والرجل اكثر شي اشوفه

يخبون اشياء تخصني بمكان مهجور ويدفنونه تحت الارض ..

وكل مره اشوف هالاحلام اقول يا تراا وين هالمكان

احيانا احسه مألوف لي واحيانا احس ان هالمكان ما عمري جيته

لكن الي اعرفه ان الاغراض الي تم دفنها تخصني
اما الرجل بصراحه يشبه شخص تقدم لي قبل زوجي لكن حصلت مشكله بينه وبين زوجي

وصار النصيب مع زوجي

لان هو الشخص مع زوجي تقدموا لي بنفس الاسبوع

وفي بينهم قرابه من بعيد من كذا حصلت المشكله

والى يومكم لو التقي مع زوجته بأي مناسبه ما ترتاح لي مع ان ما سويت لها شي ..

والى يومكم الشخص نفسه لما يشوف زوجي يقول له كيف الزواج معك مرتاح ؟ زوجي يقول له انا مو توني متزوجها عشان تسألني الي يسمعك يقول امس كان عرسي ..

وبعد ما عرف انه تزوج علي قال لزوجي بتطلق بنت فلان خلااااااص

وحصل كلام واجد ونهايته ان زوجي حتى ما عاد يسلم عليه ولا يعطيه وجه

ولا بمقدوري اني اقول لزوجي ان هالشخص يشبه نفس الرجال الي يقرب له

خوفا من المشاكل ..

وانا ادري زوجي كيف ؟؟

الكل يقول لي ارقي نفسك بعد ما حصل لي كل هالاشياء ..

وبدوري اقول للكل ايه والله ارقي نفسك وعيالك و زوجك

ولو اقول لكم قبل كم سنه وش صار تعرفون ان حالات العين كيف؟؟

ولدي الله يحفظه لي من كل شر كان مره مهتم بنفسه دراسيا لدرجة ان هو الي يذاكر لنفسه ومتعود

شافته وحده من الحريم الي كانوا يجون لي وقالت كيف عودتيه

ووالله ان من اليوم الثاني

كل ما اوصله للمدرسه تجيه حاله من الغثيان ويبكي ويرجف وما يقدر يعدي باب المدرسه

الين ما وداه ابوه لشيخ لمدة اسبوع وما طاب الا لما جتني الحرمه مره ثانيه

وخذيت من اثرها ..

وقصه ثانيه كانت مشابهه لولدي ان الولد ما ودوه عند الشيخ يحسبون ان هو الي ما وده يروح للمدرسه ولا جه ببالهم ان عين رغم ان الولد متفوق

وما ساعد الولد الا المدير ان عرف حالته

لدرجة ان المدير عطاه اوراق امتحاناته يحلهم بسيارته الخاصه لان فهم ان حالته عين ما صلت على النبي

وبعدها المدير بنفسه كلم ولي امره وشرح له كل شي

وما شاء الله تبارك الله رجع الولد لحالته الطبيعيه

فديروا بالكم غالياتي على انفسكم وعيالكم وازواجكم

ولا تخطئون نفس خطأي اني كنت ما اهتم كل يوم لموضوع الرقيه

عرفت ان الرقيه ما ياخذ الا عشر دقايق بس ليه التهاون في شي فيه مصلحتنا وما شاء الله والله بركه بتحسين بالراحه بعدها
..........

ما حبيت اشرح حالتي اكثر من كذا مع اني طولت عليكم

لكن انا احس بآلام متفرقه واشياء غريبه بجسمي

لكن ما ابي اخوفكم وافصل حالتي تفصيل عشان مو كل وحده تدقق بنفسها ..
توكلي على الله ومن الرقيه راح تعرفين انك ان شاء الله طبيعيه ..
....

هوبيس

كتبت اسمك بالعربي هههههه

حبيبتي بالنسبه للاختلاط يالغاليه لما دخل بيت اهله وشافها

عادي يالغاليه لانها بالعده واساسا هي ما تتغطى

وقبل يومين مدري ثلاثه

راسله لزوجي رساله مطوله تشرح فيها

حبيبي فلااااااااان :31:

حبيت ابشرك اني فصخت العبايه
وفصخت الشيله

........

وانا ادري والله وش تقصد تبي بس تحسسه بالغيره عليها ...

وقتها جلست عند زوجي وقلت له

وش تحس ؟؟

قال ما احس بشي ما عادت تهمني ولا يخصني فيها شي ..

قلت له : سبحان الله في ناس يلبسون ويتسترون لوجه الله حبا وطمعا لرضا الله عليه وخوفا من الذنوب

انت قلت لها تلبس وتستر نفسها لما صارت على ذمتك

لكن هي سوت هالشي للعبد ما سوت هالشي طمعا بحب خالقها ..

قال صدقتي ..

قلت له ليه ما تغير رقمك

قال ما اقدر انتي عارفه اني معروف من سنين بالعمل وخارج العمل ومصالحي بباقي الشركات يتوقف على رقمي هذا ..

قلت له الله المستعان

قال اوعدك ..

قلت لا توعدني بشي بارك الله فيك تراني ما اشك فيك

ولا تتكلم بالموضوع لاني عارفه انك ما ترضاا على نفسك الفضيحه انك ترجعها ..

قال لا هي ولا غيرها خلاص انا والله ما ابي شي من الدنيا الا اشوفك بصحتك وووو

بالنسبه لكيف عرفت عن زواجه علي

شوفي موضوعي الاولي يالغاليه ذكرت فيه كل شي

.......

بكل صلاة ادعي الله عز وجل
ان يحفظ بيتي وبيت كل مسلمه
ويستر علينا دنيا واخره

وانتي يا اختي لا تنسين انك تدعين لنفسك وغيرك بدوام الصحه والعافيه والستر
وابعاد بنات الهوى عن بيوت المسلمات
........

طولت عليكم حبيباتي

ما راح اضيف شي الين ما ارسل للي راسلوني وطلبوا الرابط

اخاف يزعلون مني مالي وجه تأخرت عليهم :7:

بس اخلص من ارسال الرسايل ان شاء الله راح اضيف الاضافه الي وعدتكم فيها بعون الله

 
ارسلت للجميع ان شاء الله

بس الي ما وصل لها شي

تنبهني تراا والله رسايلي كثيره واخاف اني نسيت احد

او بالردود احد طلب مني شي ولا انتبهت

فنبهوني جزاكم الله خير

وان تأخرت بالرد فو الله ان مو السبب اني مو مهتمه بالعكس والله

اسعى اني اخدم الجميع بالمعلومات الي تهمكم ويفيدكم

وما اطلب الا الدعاء لي بالشفاء العاجل والستر والعافيه

ويجعلني قرة عين زوجي ويحفظ لي اطفالي

ووالله اني افرح لما اقرأ رسايلكم ان بعض الاخوات الله يسعدهم ان شاء الله استقرت نفسيا بعد قرائتها لموضوعي وطبقت بعض النصايح ورجعت ثقتها بنفسها وان الحياه حلوه رغم الهموم والمشاكل قدرت انها تتواصل مع ربها اولا ثم قدرت انها تستعيد نفسها ببيتها وعملت لنفسها حياة جديده قدرت تتأقلم على حياتها الجديده

انا اتأخر على الرد لبعض الرسائل وبعض الرسائل احس انها فعلا منهاره وارد عليها ووالله ان ما بيدي شي الا اني اكتب لكم من قلب جرب وعاش تجاربكم وانصح بما نفعني وان شاء الله ينفعكم

ولكن

يعلم الله اني اضيع بين اني اتابع المنتدى بالمواضيع او اني اضيف

او بين الرسايل او بمنتدى اخر لي فيه مواضيع يحتاج للمتابعه

او بحياتي مشغوله ..

فسامحوني ..
 
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك
أسأل الله العظيم رب العرش العظيم أن يشفيك

كما أسأله سبحانه أن يفرج عنج همج
و يجعلك قرة عين لزوجك دون سواك و
أن يقر عينك ببر أبنائك
آمين
يا الغالية
جزاج الله خيرا
استفدت منج وايد
بارك الله فيج
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل