انا امر بوقت صعب و محتاجة مشورتكن يا بنات و يا حريم ،
انا معرسة صارلي 3 سنين ،
من عرست و انا و اهل ريلي بمشاكل ، لأنهم مايبوني لولدهم ، و انا و ياه للأسف تزوجنا عن حب ..
في بداية زواجي اجهضت 5 مرات وهذا كله في سنة وحدة و الي هي الاولى ،
و عقب سنة الله رزقني وحملت و يبت ولد ،
وولدي الحينه عمره سنه ونص ،
و انا حملت بالغلط ، ريلي كان في حاله ماعرف كيف اشرحها لكن ، كان يقولي بخاطري ي.... داخل ، و انا اقوله مايستوي بتحملني و انا ماقدر ولا فيني حيل احمل و ولدي صغير و ماعندي بشكارة (خدامه) ، و اهلك وياي في ضغوط ومشاكل .. لا تسوي جي فيني دخيلك ، و رفض وقالي يعني معقولة من مرة بتحملين ، و قلتله الله اعلم لكني اسمع من الحريم يقولن يستوي من اول مرة و ماطاع يسمعلي و سوى الي براسه
وبعد شهر ونص اشوف وضعي تغير وعرفت اني حامل و تأكدت بالفحص المنزلي و طلع موجب ، و يلست اصيح و افكر بحالي و وضعي في هالبيت ويا اهله و حالتي انا ،
تكلمت وياه وقلتله ماصدق فالبدايه وبعدين يبتله الجهاز وقلتله شوف بعينك انه موجب يعني حمل ، و قالي طيحيه ( اجهضيه) قلتله انته السبب الحين تقولي اجهضيه ، اهلك لو درو بتستويلي مشاكل ومابيخلوني بحالي ،
اهله يعاملوني فالبيت معاملة الخدم يبوني اطبخ واغسل الملابس و اكويها و انظف وايلس طول يومي ادور بين الطوابق فوق وتحت انظف واغسل وغيرها ، والحين انا حامل ويوم خبرتهم بحملي ما قالو لي غير لا تقوليلن انج ماترومين ع الشغل الحريم الاوليات اشتغلن وهن حوامل ،
وكلمت ريلي وقلتله ترا كل يوم التعب يزيد وانا الحين فالشهر الثاني و 4 ايام ، وماخليت شي ماسويته عسب انزل الجنين ، ولدي يبا يرضع ويبا اهتمام وماعندي حد ايوده طول الوقت ع جافي اشله ،
واهله مب راضين يرحموني واييبون بشكارة ع الاقل تساعدني في شغل البيت
و المشاكل كل يوم تزيد ليش ماسويتي هذا يافلانه اقولهم تعبانه او نسيت او سرت الحمام او اي شي ، يزعلون ويخبرون ريلي بأني ما اسوي شي ويالسه ودوم تعبانه واشتكي من الحمل و يسبوني ويشتموني ويعطوني كلمات تجرحني وكل الي يقولونه لازم تشتغلين ماعندنا حريم يالسات فالبيت بليا شغل ، وطبعا انا يوم حملت بولدي سرت بيت اهلي وحصلت رعاية ولكن صارتلي مشاكل بعد السبب اني ودرت بيت اهل ريلي و ريلي و سرت بيت اهلي لين اربي واكون في رعايه ،
واهلي الحينه انتقلو مكان بعيد وماقدر اسيرلهم ، و اوضاعهم استوت صعبه ، ومب كل مرة بحمل بسير بيت اهلي ويوم ارد بيت اهله القى ازفت معامله، هاي مب حاله الصراحه
وقبل اسبوع كنت انظف الحوي ، او الحوش مادري شتسمنه ، المهم كنت انظفه(بالبروش) و الحوي قد 8 سيارات ، و نزفت و سرت الطواري و قالتلي الدكتورة اجتمال الجنين مايتم فبطنج لانه النزيف وايد ، وحتى لو خذتي حبوب التثبيت ، وانتي تشتغلين فالبيت مثل هالاشغال مابتقدرين اتيبين عيال حالج حال غيرج،
ومن رجعت من الطواري قالولي يله سيري المطبخ جهزي الفطور .. وسرت رغم التعب و يلست افكر بحالتي و من شفت جي الحال زاد و ريلي بعد عافني وابتعد عني وقام يسهر ويطلع برع مايرد الا الفير بسبب كثرة التشكي علي ، قلت ماشي حل غير اني انزل الي فبطني ، وهذا غصبن عني والله يعلم
ما بيدي حل ،
والله اني اكتب و قلبي حزين وكسير وماخليت حد ما رمسته من اهل ريلي قلت يمكن يرأفون بوضعي الحينه ، انا فيني الضغط و عندي فقر دم وراثي ولازم دوم اخذ فيتامينات واكياس الدم وحبوب الحديد ، و وضعي صعب دامني حملت مابيخلوني اسير العياده واخذ اكياس الدم شرات قبل في حملي بولدي ، وغير حبوب التثبيت والمتابعه الطبيه كل اسبوع ..
ارجوكن انصحني ، ترا بيني و بين الجنون شعره ، افكر اني اجهض الجنين و افكر اني انهي حياتي قبل اجهض اللي فبطني ، وافكر اني اطلق او انفصل عن ريلي وافكر باشياء وايد ،
ابتعدي عن التشكي حذاري تتكلمين عن اهله قدامه ما دام هو شايف خلاص،،
دافعي عن نفسك وحقوقك بهدووء وكيد وبدون مشاكل قولي تعبانه وما اقدر والدكتورة منعتني من الشغل وخليهم يضربون روسهم بالطوف ..
يوم يومين شهر شهرين وبيتعودون بس اول فتره يحتاج لك صبر ،،
إنت عاجبنك كذا عايشة دور الضحية والمظلومة؟
لحد متى بتظلي على هالحال؟
حرام عليك ارحمي نفسك
حامل وفقر دم وغيره
كلمي زوجك إنك ما راح تشتغلي بالبيت
وأهم شي صحتك إذا هو مو مهتم
ولا تنكدي عليه كل يوم بسبب هالموال
وأهله؟؟؟؟
حبيبتي من اليوم ورايح مالهم كلمة عليك
قولي لهم تعبانة وممنوعة من الحركة
بيتكلموا وبيعصبوا وبعدين؟؟؟؟؟؟؟؟؟
دخلي من هاي الأذن وطلعي من هاي الأذن
يعني طنشي
وبيتأدبوا وبيجيبوا شغالة
وابدي اشتغلي بالإيحاءات على زوجك علشان يطلعك بيت مستقل
حللي نمطه وشوفي الأسلوب اللي يناسبه
كلامكن صح ، اقوم اشتغل فالبيت من الفجر ومن اطيح ع فراشي و خصوصا وقت الي ريلي موجود فالغرفه اكون في حالة يرثى لها ، تعبانه ، هلكانه وجسمي يعورني ، وماقدر اتحرك خلاص وابا ارقد وعادي ارقد بدون ما احس من الارهاق والتعب ، وجتى ولدي مرات ما ارضعه ولا اغير لبسه وبمبرزه الا بالغصب ،
وانا ماحب هالشي لأنهم يظنون اني انا السبب واني ادخل بعقله هالكلام ، مع اني ما اقوله شي وكلما سألني ليش ما انتظرتيني ورقدتي قبلي ؟ ..
اقوله سامحني من التعب رقدت ، و وقتي كله منظم ارقد الساعه 10 اقوم 5 الفجر و ماشي بعدها راحه ولا اقدر اسير حجرتي ،
واهل ريلي مايقصرون فيني بالكلام والتجريح ، وانا اسكت واقول الله يعوضني خير ، واكتم بداخلي الحزن وما اخبر ريلي عن شي ،
و بالعكس هم يلي يخبرونه ويحطون بعقله كلام عني ، و يوم حملت بولدي سرت بيت اهلي غصبن عني انجبرت بعدما تعبوني وهلكوني و 5 مرات اجهضت حرام بسبت شغل البيت و اركب الدري (السلم) لين غرفتي وانزل عشرين مرة فاليوم ،
والخدم مايبن يشتغلن فبيتهم يشردن عقب شهر ، مايستحملن هالاشغال ، مزرعة البيت و غسيل السيارات .. غسيل الحوي ، تنظيف سطح البيت ، ووو ، مايستحملن يقولن ماشفنا ناس جي واول مرة نشتغل عند عايلة جي يشغلن الخدم فالبيت ، وبراتب قليل ، وماشي اجازة وماشي طلعه وووو
شو الحل برايكن ، انا تكلمت ويا ريلي بخصوص البيت والسكن بروحنا وكم مرة حاولت وياه ولكن ماشي فايده ، يقول يالس فالبيت ومحصلي كراج جاهز و غرفة وحمام عزكن الله ، و البيت كبير ، والاهل حوالي ، اقوم الصبح اشوف الوالده والوالد جدامي ، و خواني يلعبون ويا ولدي ، والاهل يتيمعون كل خميس ويمعه ، ومافينا ع بيت بروحنا ومسؤولية اكبر ..
وبالنسبه لحملي الصراحه مابا اضحي فيه ولا ابا اضحي بحياتي ، والله انه هذا كله بسبت الوساوس الي براسي ، لا ليلي ارقده شرات الناس ولا نهاري حلو ، كله تعب وهم وتفكير ومشاكل ،
والله اني كم مرة حاولت اطنش واطنش كلامهم واسلوبهم وتعاملهم وياي ولو ماسويت شغله فالبيت او تعذرت لهم بتعبي يجذبوني ويقولون اني مابا اسوي شي فالبيت !! والتطنيش هذا للاسف تزيد منه المشاكل و توصل للتهديد بطردي من البيت وتوصل اكبر من هالشي .. ريلي بارد يتهرب من كل شي و اهله قالوله دامك فبيتنا مالك اي كلمه فالبيت ولا لك رأي ، و مرتك تحت ايدينا ونحن نربيها !! كيف التربية هاي ماعرف الصراحه
الي تمر بحالي و وضعي ربي يعينها ويصبرها الصراحه ، اتريا مشورتكن شو لي علي بالضبط اسويه ،
سامحوني بتعبكن وياي
بس انا مب فاهمه ع نمط الشخصيات و غيرها ياليت حد يوقف وياي ويفهمني كيف اتصرف ☹
والله مابقى من الصبر فيني شي ولا بقى من سعادتي شي ونفسيتي تعبانه حيل ، لدرجة اني صرت خالية من المشاعر و ريلي يتهرب دوم مايبا يرد البيت عسبت اهله مايشتكوني له ، والله مالي حد اكلمه في مرضوعي غيركن ارجوكن ساعدني
الصراحه قمت افضل الموت ع حياتي هاي و طول اليوم بالموت ع نفسي واقول الموت حق وافضل من الدنيا و ظلمها وعذابها
هلا و مرحبا ، شكرا يالغاليات ع ردودكن الطيبة ، اتقبل منكن اللوم ، خصوصا بموضوع اجهاض الجنين ، كلامكن صح ، اقوم اشتغل فالبيت من الفجر ومن اطيح ع فراشي و خصوصا وقت الي ريلي موجود فالغرفه اكون في حالة يرثى لها ، تعبانه ، هلكانه وجسمي يعورني ، وماقدر اتحرك خلاص وابا ارقد وعادي ارقد بدون ما احس من الارهاق والتعب ، وجتى ولدي مرات ما ارضعه ولا اغير لبسه وبمبرزه الا بالغصب ،واذا سألني ريلي اقوله انته تعرف الاجابه مايحتاي اقولك انا شو مسوية وشو بلاني ، ف شو يسوي يسير ويكلم اهله ،يقولهم مرتي مب خدامه وانتو تخلونها تسوي شغل الخدم وماتجابلني ولا تهتم بولدي وفيني وماتهتم بغرفتنا ويصير بينهم مشاكل واحتكاك وانا ماحب هالشي لأنهم يظنون اني انا السبب واني ادخل بعقله هالكلام ، مع اني ما اقوله شي وكلما سألني ليش ما انتظرتيني ورقدتي قبلي ؟ .. اقوله سامحني من التعب رقدت ، و وقتي كله منظم ارقد الساعه 10 اقوم 5 الفجر و ماشي بعدها راحه ولا اقدر اسير حجرتي ، واهل ريلي مايقصرون فيني بالكلام والتجريح ، وانا اسكت واقول الله يعوضني خير ، واكتم بداخلي الحزن وما اخبر ريلي عن شي ، و بالعكس هم يلي يخبرونه ويحطون بعقله كلام عني ، و يوم حملت بولدي سرت بيت اهلي غصبن عني انجبرت بعدما تعبوني وهلكوني و 5 مرات اجهضت حرام بسبت شغل البيت و اركب الدري (السلم) لين غرفتي وانزل عشرين مرة فاليوم ، والخدم مايبن يشتغلن فبيتهم يشردن عقب شهر ، مايستحملن هالاشغال ، مزرعة البيت و غسيل السيارات .. غسيل الحوي ، تنظيف سطح البيت ، ووو ، مايستحملن يقولن ماشفنا ناس جي واول مرة نشتغل عند عايلة جي يشغلن الخدم فالبيت ، وبراتب قليل ، وماشي اجازة وماشي طلعه وووو شو الحل برايكن ، انا تكلمت ويا ريلي بخصوص البيت والسكن بروحنا وكم مرة حاولت وياه ولكن ماشي فايده ، يقول يالس فالبيت ومحصلي كراج جاهز و غرفة وحمام عزكن الله ، و البيت كبير ، والاهل حوالي ، اقوم الصبح اشوف الوالده والوالد جدامي ، و خواني يلعبون ويا ولدي ، والاهل يتيمعون كل خميس ويمعه ، ومافينا ع بيت بروحنا ومسؤولية اكبر .. وبالنسبه لحملي الصراحه مابا اضحي فيه ولا ابا اضحي بحياتي ، والله انه هذا كله بسبت الوساوس الي براسي ، لا ليلي ارقده شرات الناس ولا نهاري حلو ، كله تعب وهم وتفكير ومشاكل ، والله اني كم مرة حاولت اطنش واطنش كلامهم واسلوبهم وتعاملهم وياي ولو ماسويت شغله فالبيت او تعذرت لهم بتعبي يجذبوني ويقولون اني مابا اسوي شي فالبيت !! والتطنيش هذا للاسف تزيد منه المشاكل و توصل للتهديد بطردي من البيت وتوصل اكبر من هالشي .. ريلي بارد يتهرب من كل شي و اهله قالوله دامك فبيتنا مالك اي كلمه فالبيت ولا لك رأي ، و مرتك تحت ايدينا ونحن نربيها !! كيف التربية هاي ماعرف الصراحه الي تمر بحالي و وضعي ربي يعينها ويصبرها الصراحه ، اتريا مشورتكن شو لي علي بالضبط اسويه ، سامحوني بتعبكن وياي بس انا مب فاهمه ع نمط الشخصيات و غيرها ياليت حد يوقف وياي ويفهمني كيف اتصرف ☹ والله مابقى من الصبر فيني شي ولا بقى من سعادتي شي ونفسيتي تعبانه حيل ، لدرجة اني صرت خالية من المشاعر و ريلي يتهرب دوم مايبا يرد البيت عسبت اهله مايشتكوني له ، والله مالي حد اكلمه في مرضوعي غيركن ارجوكن ساعدني الصراحه قمت افضل الموت ع حياتي هاي و طول اليوم بالموت ع نفسي واقول الموت حق وافضل من الدنيا و ظلمها وعذابها
السلام عليكم، بكلمك بصراحه ولو سمحتي لا تلوميني انتي ما خليتي فيني عقل، خيتي شوفي انتي الحين زوجه ولا خدامه؟؟ ، ولو ع كلامك خداماتهم هربوا، يعني حتى الخدامه ماترضى بعيشه كذا، وانتي راضيه، وحبيبتي ماهو من حقوق الزوج انك تنظفين بيت اهله انتي عليك ف بيتك او الاصح غرفتك، وزوجك اذ ما يبي يطلع من بيت اهله ب الطقاق فيه، لانه ماهو اللي يكرف ويتعب والله حتى الحيوانات عايشه احسن من حياتك وحتى اللي زوجها متزوج عليها احسن من حياتك، ي بت الناس اشتري راحتك، روحي بيت اهلك وعيشي معززه مكرمه مو تركضين من غرفه لغرفه، وزجك حيف ع الشنب اللي فوجهه قالوا له مالك راي فبيتنا وسكت ،! ، زوجك للاسف احسه عاجبه الوضع ولا ما كان يسكت، والحين زوجك لو يبي راحتك كان طلعك من البيت واذا عن اهله خميس وجمعه زوروهم وما يحتاج قناع الخدامه اللي ملبسنك اياه، اطلعي بيت اهلك، وقولي لهم ايش صار ب الضبط وقولي يقولو لزوجي ما دام انت ف بيتنا مالك راي وزوجتك نربيها، وخلي فيها رجال يتفاهمون مو بايعينك اهلك، واذ عن بعد بيت اهلك بقول من يبيك تعنا لك لو طريقك كله شوك، هذي معروفه عاد وطز ف اهل زوجك وطز ف زوجك، وربي قهرتيني اسفه اذ جرحتك بس شكلك من النوع اللي يتعلم بعد ما ينجرح « قهرتيني والله مره مره مقهوره.
