حكاية غربتي .........

بالا نتظاار
ودعواتك لي
 
اقسم بالله انها طولتها على غير سنع يعني ماباقي الا بارت واحد وجالسه تمطط فينا كذا ياليت اللي يكتبوا القصص يكتبوها في موعد محدد لان كل ماطالت يصير مالها طعم ابد
 
صبااح الخير لاهل الخير
دائما رائعه لك حبي
لوريس​
 
بسم الله الرحمن الرحيم
اولا ,,حزنت كثير على حاالكــ واعجبني طموحكــ وحبكــ للنجااااح
امممم بكيت معكــ بموقفكــ بالموول احزنـــــــــــــــــــــي مرررره,,


امممم عجبني اصراركــ على المواصله وانكــ ماتكلمتي لحد ولافضفضت كبرتي بعيني والله ماشااااء الله عليـــــــكـ
وفرحت بخبر طلاقكــ وطريقتكــ في الانتصااار عليه,,,والله ماينساااكــ طووول عمره بنت ولاعشرة رجااجيل تباركــ الله
وتحمست الآن لحفله التخرجكمــ
واتمنى لكــ التوفيق من كل قلبي والله يسر لك امووورك وعقبال ماتجيبين لنا شهاده الدكتورااااه وراس مرفووع
ويحمي البطن اللي حملك >>على قولت السوورييين
وهانحن بإنتظــــــــــــــــــــــــــــــــــــــــــــــــــاركــ(قلب دكتواره)
 

ماشاء الله اعجبني اسرارك واصلي

يوم ويك اند رااح تكامل



 
انتي قويه وكتومه وعصاميه ولديك احساس باالمسؤوليه والاعتماد على النفس.......وكلها نقاط ايجابيه ونادر ان تتوفر في المرأه ........... ولكن قد يكون الكتمان لامرك عن اهلك هو سببا في تماادي زوجك بأمره .....وهذا للأسف أكتشفته مؤخرا ......... تعلمي من أخطائك .....وهنيئا لك بطلاقك وخبراااتك ....ولا تحزني على الالم الذي تستشعرينه بدااخلك ...لأنه سيعطيك الطاقه لتندفعي للأمام لتعملي وتعملي كما حملك على تحمل المصااعب لنيل الماستر .......مودتي
 
سامحوني بنات اتاخرت عليكم ويعلم الله قدايش كنت مشغوله
كان عندي موتمر وسافرت له يومين ورجعت بس والله غضب عني وشي ضروري جاء وبدون ترتيب
بس والله انتم في بالي وكل شوي افكر فيكم لاني وعدت اني اكتب البارت واعرف كيف يكون الاحساس والانتظار
ومشكورين علي الدعوات الحلوه والله يجزاكم كل خير

نكمل .........

مثل ماقلت لكم في الجزء الاخير اني خلاص رتبت حياتي بدون زوجي وبدات صفحه جديده
وغيرت بيتي وغيرت اشيا كثيره عشان استقر واتفرغ لدراستي ومستقبلي
وكان موعد حفل تخرجي بعد اسبوعين
وكنت متردده اني احضر الحفل او لا
وخاصه ان كان في تكريم لي في الحفل
صديقاتي كلهم مجهزين ومبسوطين وينتظرون الحفل بفارغ الصبر
بس انا مادري ليش ماكنت متحمسه وكنت خايفه في نفس الوقت
افكر ان خالد حيكون فيه لان تخرجوا هوا كمان معايا
طبعا هو حفل كبير لكل الجامعه
وكيف راح يكون الوضع وهوا معايا في نفس الوضع
نسيت اقلكم شي ان احساسي ومشاعري تجاه خالد انتهت وانتهت للابد
والله يابنات حتي اسموا كرهتوا وكل شي يتعلق فيه
تصدقون لدرجه اني لمن اسمع شخص باسم خالد اتعب واحس بغصه في قلبي
من شده الكره طبعا هذا كان في البدايه بس الحين انتهي الامر
فخالد كان ومايزال ماضي قديم وانتهي
ولحضات اليمه في حياتي كانت واتغلبت عليها الحمدلله
طبعا قرات كتب كثيره واستفدت من النت بشكل كبير
واتواصلت من كثير من الدكاتره عشان اجتاز هذيك المرحله وابدا حياتي من جديد صح
كان عندي اصرار اني احسس نفسي اني ماتزوجت ولاجربت الزواج
وفعلا قدرت اني اكون كذا بيني وبين نفسي
وحسيت ان حياتي مع خالد ماكانت الا مسلسل شفتوا وانتهي وهاانا الان عايشه حياتي مع نفسي
يمكن يكون ضرب من الجنووون بس كنت ابي اسوي واستمتع بحياتي وماابغا العلاقه تاثر فيا وفي مستقبلي
سوا الطلاق او حياتي مع خالد
لدرجه اني لمن اتدكر واتكلم عن اللي صار لي مع خالد عادي كاني قرات قصه في كتاب وبحكيها لصديقتي او لوحده من خواتي
وطبعا اللي تسالني كيف قدرت اكون كذا واطبق هالشي
بقولكم احنا بشر ونقدر والله سبحانه وتعالي قادر علي كل شي
بس الاهم اننا نتوكل علي الله ونتسخير ونبدا بالعمل والتغير مو بس كذاا
لا مافي شي اسموا مستحيل في الدنيا وانا وانتي وغيرنا يقدر
بس للاسف في ناس كثيره يكون الماضي مصيطر عليهم وعلي تفكيرهم
وخاصه مع الزوج ولمن يكون في حب بينهم
انا ماخفي عليكم كنت احب خالد في بدايه حياتي معاه لانه زوجي خلاص والحياه بدون حب ولاشي
بس بعدين انتهي الحب وتحول لكره بسبب الافعال والتصرفات
وتصدقون الحين لمن اشوف بنات مطلقات واحس انهم مكتئبين وحالتهم حاله انقهر كثير واستغرب
وخاصه انهم اتطلقوا بعد معاناه مع هالزوج
ليش الندم والكابه .... نقدر نطلع من هالشي بس للاسف مايبون
حياتهم صارت ومازالت اسيره لهالزوج وللماضي
والله في بنات حتي زواج مايبون يتزوجون يقولون مانقدر نعيش مع واحد غيروا
ويكون هو اتزوج ونسيها وعاش حياته ومبسووط
هذا ضرب من الجنوون وحرمان من ابسط حقوقك
لانه وبكل بساطه لو يحبك ماطلقك فخلاص شوفي حياتك
تصدقون صديقاتي بعد ماعرفوا اني اتطلقت يقولون لي قلب
انتي اللي يشوفك يقول ماتطلقتي اتزوجتي من كل الفرحه والراحه اللي عايشتها
حتي حزن مافيكي ولا اي اثر ولو بسيط ....... ماشاءالله تبارك الله
كنت اقولهم انا ماوصلت لهالشي بسهوله .... اشتغلت علي نفسي كثيرر وكان عندي اصرار اني اكون كذا واحسن من كذا ان شالله

نرجع لموضوعنا والحفل .....
طبعا مثل ماقلت لكم حنت مابي اشوفه ولا عيني تجي في عينوا
وخاصه ان الحفل مكس وصديقاتي معايا وهما مو عارفين اني افصلت عنه في ذيك الفتره
وكنت اعرف ان راح يكون في شي غريب ...... وخاصه لهم
يعني في الحفل كل امراه مع زوجها وكل بنت مع اخوها
ويتصورون ويباركون لبعض
وانا اكون في الحفل ومع طليقي ومايصير كل هذا وخاصه امام الناس
شوي كانت صعبه وكنت افكر فيها كثيررر
وكانت عندي رغبه اني ابعد عن الشر ومااحضر الحفل وخاصه ان اهلي مايقدون يجون ويفرحون في
فقلت مااحضر افضل .... وفي نفس الوقت كنت اقول حرام اضيعها يعني الانسان كم مره يتخرج في حياتوا
ولحظه ماتتكرر لحظه التكريم ...... وتوزيع الشهاده
خاصه هنا في اوروبا عندهم حفل التخرج شي مقدس وشي مايتفوت مرررره
كل استاذاتي يقولون لي نبي شوفك بالروب التخرج ونتصور معاكي
يعني حفل كبير وعلي مستوه .....
لمحت لصديقه لي اني يمكن ماحضر او بالاصح مترره ومالي نفس
قالتي لي انتي مجنووونه المصيبه انك هنا مو في بلدك وناجحه ومتفوقه وتقولين ماابغا احضر .....
بعدها صليت الفجر واستخرت ونمت
صحيت الصباح قلت ابغا احضر والله معايا حيكون .....
جهزت للحفل وجاء موعد الحفل ....
طبعا الحفل كان في الصباح في فندق فخم ....
وصلت الحفل وكان مليااان وماشاءالله الاعداد بالالاف
والناس مبسوطه وتصوير
وكل شخص معاه قريب له
ياام يااب يااخ ياخت يازوج ياخطيب يابوي فرند طبعا للاوربيين ههههههه
الا انا كنت الوحدي ومادري وين اروح ومع مين اجلس
لقيت مجموعه من صديقات لي في الجامعه جلست معاهم
بس كانوا مشغولين بالتصوير مع العايله والاطفال تعوفون يوم عظيم يوم النجاح
حاولت اني ابين للي حولي اني طبيعيه وعادي
والبنات يسالوني وين زوجك تعالوا اتصوروا ومدري ايش
وانا ابتسم واقول ان شاءالله
طبعا في هالفتره انا ماشفت خالد مررره وكنت ادعي في نفسي انه مايكون في ولا يجي
طبعا الهوتيل كبير جداا وممكن يكون خالد في اي زاويه من زواياه
بعدها بساعه تقريبا
حسيت بضيقه وقلبي في غصه مدري ليش .....
واكتشفت ان خالد موجود
كنت طالعه باللفت لقسم التصوير .... طبعا كان في فوتقرافر من الجامعه يصور كل خريجه
وجاء دوري وموعدي ورحت ....
وانا في اللفت وقف اللفت عند الدور الثالث ودخلوا طلابه .....
وكان من بينهم خالد وزوجته ......
حسيت وقتها اني انا في موقف بايخ
حاولت اتجاهله واتماسك نفسي واكون طبيعه
طبعا كان ينظر ليا نظررررات غريبه
نظرات شوق وحنين
وعيونه فيا حزن وهو ينظر لي ....
وصلت اتصورت لوحدي مع تجاهل كامل لخالد وكانه مو موجود
ومشيت وبدا الحفل ....ولحظه التكريم
ونادوا اسمي وطلعت علي الاستيج اخذ شهادتي
وصديقاتي يصفقون ومتحمسين لي ..... وكنت وقتها حيل مبسوطه وفرحانه
حسيت اني انتصرت وربي عوضني عن كل لحظه الم ذوقتها مع خالد
لمن وصلت لمكاني سجدت سجده شكر امام صديقاتي وبكيت ....
صديقاتي يحسبونها دمووع فررررح مايدرون انها دموع حزن والم وفرح وكل شي
وبعدها بساعه نادوا علي اسم خالد وطلع الاستيج وصديقاتي يصفقون له بحكم انه زوجي وانه ولد البلد
وانا والله يدي ماقدرت ارفعها حتي مجامله بس امام صديقاتي عشان مايحسون بشي وخاصه في الحفل
حسيت ان يدي ثقيله حيل .... وصديقتي تقولي قلب هذا زوجك صفقي يابنت وصوريه والله ماشوفته لمن طلعتي كيف كان مبسوط ويصفق لك .......
وسويت نفسي اني مشغوله بالكاميرا واصور وانا ماصورت ولاشي ......
كنت في الحفل احاول اتجنب وابعد عن تجمعات واماكن الطلبه كثيررر
عشان لاتجي عيني في عينوا او يكلمني او يقول شي .....
عدا الحفل علي خير وانتهي .......
وبعدها سمعت ان خالد رجع البلد ومايفكر يرجع يكمل دراسته
وانا بدات دراستي وكملت الحمدلله
طبعا صديقاتي كان لهم الخبر صدمه لانهم يقولون
ماعمرنا حسينا انك يقلب مو مبسوطه او تعاني من شي كنت مبسوطه وشكل حياتك اوكي وتمام
قلت لهم مافي نصيب نكمل مع بعض وبس
ويوصلني كلام من صديقات لي ان خالد يسال عني وعن اموري وكملت دراسه او لا
رجعت بلدي او لا
تزوجت او لا
انا معاد يهمني في شي ابداااا
وسمعت ان زوجته طالبه الطلاق منه وعند اهلها بعد مانجبت ولد منه
والله اني راحمتها وقلبي معاه حيل
والله لو اعرفها من قبل ماتتزوج كان قلت له ابعدي وريحي دماغك
بس سبحان الله نصيبها ..... الله يعينها علي مابتلاها

وهذي اخر قصتي وتمت وللله الحمد علي خير
واتمني انها ماتكون قصه وبس نقراه وبس
اتمني ان كل وحده تستفيد منها في حياتها وتحاول تصحح اوضاعها وامور حياتها
وتفكر بالعقل لا بالقلب
والله يكتب لنا ولكم الخير ياااارب ويرزقنا الجنه ونعيمها

احبك كلكم
اختكم قلب دكتوره ان شاءالله قريب


​
 
ماشاء الله لاقوة الا بالله
ان رائعه ياقلب
عجبني اصرارك وقوتك وثباتك رغم الظروف اللي مريتي فيها
الله يكتب لك الخير ويحقق لك كل الامنيات​
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل