حقيقية ..عم احمد ...رحمة الله على الصادقين

[راجيه الرضا]

زمان كان فيه راجل طيب كبير في السن بيصلي معانا في المسجد ، كان راجل زاهد وعابد ، كان نفسه يخلف ولد يدخله الأزهر عشان يبقى شيخ وداعية لما يكبر ! ربنا رزقه بـ 6 بنات ، وبعدها جاله ولد صغير سماه (أحمد) ، ومن ساعتها وهو معروف بإسم (أبو أحمد) وتقريبا محدش فاكر اسمه الحقيقي ايه ! .. أحمد دخل الأزهر بالفعل زي ماكان أبوه عاوز ، وربنا أكرمه بحفظ القرآن كاملا وهو لسة طفل صغير ، بعدها ربنا أراد يسترد وديعته ومات فجأة وهو عنده 10 سنوات ? ومن ساعتها و (أبو أحمد) ازداد زهدا في الدنيا !
(ابو احمد) كان راجل غلبان على باب الله ، مجتهد جدا في العبادة والقيام والصيام وحضور الدروس رغم كبر سنة ومرضه !
كان أكبر أمنياته يطلع حج أو عمره قبل ما يموت !
اتعرفت عليه في مسجد المدينة المنورة في المعادي ، كان بييجي دايما يحضر دروس هناك من أكتر من 20 سنة (أيام ما كان فيه دروس)
كان ساكن في 15 مايو ، وكان عنده عادة جملية كل أسبوع ينزل يركب من 15 مايو لحد المعادي مخصوص عشان يسلم علينا ويصلي معانا المغرب والعشاء في المسجد ويحضر معانا الدرس وبعدين يروّح
في مرة من المرات نزل من بيته بدري بدري ، فقال أروح أصلي العصر في مسجد أبو بكر (في ميدان الاتحاد في المعادي) وأسلم على الشيخ ابراهيم (إمام المسجد هناك) وافضل قاعد لحد المغرب وبعدين أروح مسجد المدينة أسلم على الناس وأحضر معاهم الدرس !
بالفعل صلى العصر هناك وسلم على حبايبه ، وفضل قاعد في المسجد لوحده بيذكر ربنا لحد قبل أذان المغرب !
شوية كدة ولقى راجل دخل المسجد ، قلع جزمته ومسكها في ايده ودخل يبص يمين وشمال ! مالقاش قدامه إلا (أبو أحمد) قاعد على الأرض !
فقال له : ياحج .. تطلع عمرة ؟؟
فرد (أبو احمد) من غير تفكير : أطلع !! ?
فقال الرجل : طيب يلة قوم جهز أوراقك عشان نلحق نطلعك مع المجموعة !! ?
طلعت ايه الحكاية بقا ؟؟
أتاري الراجل ده شغال مع تاجر كبير ، التاجر ده مريض بقاله فترة ومحجوز في مستشفى مشهورة في المعادي ، وبقاله فترة بيطلّع صدقات وبيحاول يعمل أعمال خير عشان ربنا يشفيه ! فقال للراجل اللي شغال معاه : روح شوفلنا 5 أنفار غلابة نطلعهم عمرة ، يمكن ربنا يشفينا ببركة دعاهم !!
الراجل غاب يومين ورجع للتاجر بكشف فيه بيانات أربع أفراد ! فغضب التاجر وقال له : قلتلك عاوز خمسة ! انزل اتصرف وهات واحد كمان ! فنزل الراجل محتاس يدور في الشوارع والجوامع ، فكان أول واحد يلاقيه أدامه هو (أبو احمد) ? .. بس كدة ، وطلع معاهم وعمل العمرة ? ?
أجمل ما في الموضوع إني قلت لأبو احمد : يعني انت قلتله "أطلع" كدة على طول ؟! من غير ما تفهم الموضوع ولا تسأل الأول ؟؟ فقال : هو أنا لسة هسأل !! بيقول لي تطلع عُمرة ! أقول له لأ ؟!
صدق رسول الله صلى الله عليه وسلم : اصدق الله يصدقك !
قال الإمام أحمد لابنه : يا بُـني انوِ الخير ، فإنك لا تزال بخيرٍ ما نويت الخير !
امبارح (أبو أحمد) جه على بالي فقلت أسأل عليه ، اتصلت بإمام المسجد فقال لي البقاء لله .. مات من كام شهر ?
رحمه الله على الصادقين .. وجمعنا بهم في جنات النعيم ??

عماد الشريف​