حبيته وعزيته وسامحته ..شووفوا شلون جازاني

[إلى ربي المشتكى]

السلام عليكم خواتي الغاليات
كل مرة ادخل المنتدى واقول ان شاء الله تكون هذي اخر مشكلة اكتبها بحياتي ..بس للأسف أرجع بعد فترة صغيرة محملة بلهموم والمشاكل

مشكلتي باختصااار
انا متزوجة من سنتين وكنت حامل بشهري الاخير واكتشفت ان زوجي عنده ايميل ويكلم بنات بالماسنجر وبالتفون ....
وقلت لكم شلون واجهته اني خذيته وضميته بقوة وقلته سامحني اني ضيعتك من يديني بس شنو قصرت معاك وكلمته بكل هدووووء وخبرته اني يوم عرفت بهالشي ماكرهته بالعكس حسيت اني احبه اكثر واني متمسكه فيه اكثر وحسيته تاثر وايد خصوصا انه خاف علي لاني كنت توني راجعه من المستشفى وفيني تقلصات والم ولاده وقالي اعتبري ان الموضوع منتهي وحلف لي انه يحبني ومحد يملى عينه غيري صج ماقعد يبرر ولا يقولي الاسباب بس حسيته تغير بعدها قام يتصل دوم يتطمن علي وكل مكالمه ينهيها بكلمه احبج

بصراحه انتوا ماقصرتوا معاي وقلتوا لي ان الشي الي سويته هو الصح وان زوجي ندم وانه يحبني ..
فرحت حسيت اني انتصرت شكرت ربي وتحمدته انه رجع لي زوجي الي عرفته وحبيته
والحيييييين مشكلتي بعد الولاده ...
اكتشف انه مسوي ايميل ثاني ورجعت ريما لعادتها القديمة بعد وعود ماصار لها شهر تقريبا !!
احس اني بنهاااار خلاااص
ياناس ادري انه يحبني ومايقدر يستغنى عني بس ليش يسوي جذي
مشاعري ملخبطه احس بالمره الاولي اني ابجي عشان احبه اما الحين احس اني اكرهه

مادري ارجع اواجهه ؟
اسجل بايميل ثاني وخليه يكلمني وبعدها افشله اني انا زوجتك الي وعدتها ماترجع تخونها؟
اطلب الطلاق ؟
اخبر اهله واهلي عن سوالفه ؟

خواتي اطالع ولدي الصغير ونا مو متحمله اقوله سامحني بحرمك من انك تعيش مع ابوك لاني بالفعل احس اني مابقدر اواصل مع انسان خااااااااااين
بس شلون اخبر اهلي ونا توني بالنفاس شنو اقول للناس
ثقتي فيه انعدمت مابي اعيش دور الزوجه الشكاكه مابي اتحمل ذل الخيانه وسوي روحي مادري بشي
والله اني ماقصرت معاه بشي وبشهاده منه دايم يمدح فيني بس ليش يخوني ليش يكلم بنات الشوارع ليش باعني

مو كفايه اني سامحته وضميته على صدري وقلت له احبك يوم اكتشفت خيانته لافشلته ولاصارخت عليه صنته وحفظته والبي كل احتياجاته

احس ان اول مره افشل بحياتي وفي شنو باهم قرار اتخذته وهو الزواج
تتوقعون قرار انفصالي بكون صح ؟

 

[البنت وامها]

لا حبيبتي لا تفكرين بالطلاق
دوري لج حل ثاني
المره الاولى ما دخلتي احد بس هالمره دخلي شخص متفهم وممكن يحل الموضوع من غير ما يفضح
عشان يوقف عند حده وبيني له انج عطيته الثقه من قبل واستغل هالشي
بس هالمره صعب انج تردين تثقين فيه عشان يحتاط بتصرفاته

 

[إلى ربي المشتكى]

لا ياخواتي ماهقيتها منكم فوق 60 قراءة ومحد عبرني

صدقوني انا بحالة تشويش احتاج من يقولي نصيحه لوجه الله ويرشدني شسوي

اختي البنت وامها انا متاكده لو ادخل احد بينا راح تنقلب السالفة هو من النوع الي مايحب احد ينتقده او ينصحه او يقوله انت غلللللط

هو من النوع انه يسوي الشي من نفسه ولا تقولون له تعال سو جذي وجذي يعاند ويكابر ..

انا خلاص غسلت يدي منه احسه مابيعتدل اذا ونا بحملي وولادتي ماراعاني والله يابنات ماكمل شههههههههههر من السالفه الي راحت وقلت بيعقل ويصير اب ويتغير

ابي اسوي شي يفشششلة وخليه يرضى ينهي علاقته فيني لاني متأكده اني لو طلبت الطلاق مابيرضى

 

[البنت وامها]

حبيبتي انا من رايي تحملي
لان الحين ما في ريال ما يخربط سواء بالنت او بالتلفون
بس صدقيني مع الوقت راح يتغير
انا جذي ريلي كان يخون وكنت اكتشف ونتهاوش وتصير سوالف وايد
بس الحين الحمدلله تغير وصار يهتم ببيته وعياله
انتي بعد باجر راح يلهى بالبيبي وطلباته وطلباتج
ويبطل من سوالفه

 

[إلى ربي المشتكى]

مشكوره على تفاعلج اختي العزيزة

بس تعرفين احس اني انخدعت فيه مصدوومه منه لابعد درجة

يمكن اول ماعرفت بخيانته ماكنت مصدومه بكثر اليووووووووووم

المشكله يوم واجهته ماعصب ولا شي بالعكس خذاني بحضنه ونمت وهو ضامني وحسيته تقطعمن الالم والندم عشانه سوى فيني جذي وكان خاااايف علي
ونا عشاني صج احبه مابغيت اطول السالفة وحبيت اثبت له انه رجعت ثقتي فيه من ثاني يوم كلمته بكل حب وحنان قلت عشان يبين بعينه

لاتشرطت عليه ولافرضت عليه يسوي شي
بس الحين اشوف الموقع رسااايل راسلها للبنات بعد ساعتين من ليله قضاها بطولها معااااي حتى اذكر انا طلعنا من الليل للصبح ونام ساعتين وصحى على اللاب توب اقوله شفيك يقولي شغل والحين اكتشف انه صحى بس عشان يكلم بنااااات على الماسنجر ونا معاه بالغرفه !!
في نفس اليووووووم الي يقولي انتي الوحيده بحياتي انتي الي احبج انتي الي ماليه عيني مااقدر استغنى عنج

ماقدر اقول انه كذااااب ومايحبني لاني عارفه بحبه وخوفه علي
ولا انا غبيه وماافهم وهو يضحك علي
اعيش بدوامه (( ليش))
ليش الريال الي يحب زوجته يخونها ؟

 

[جراده شياكه]

دعي الخلق للخالق خلي زوجك له رب يحاسبه اهتمي بنفسك وبولدك وادعي له دامه يحبك هذا اكبر نعمه

 

[3soola.ad]

اااااااااخ ياقلبي

ماقي واحد ماعنده خرابيط

زعلنا وتضاربنا ولكن اخر شي

فكري ف ابنك اللي ماله ذنب

اشغلي وقتج معاه وانسي زوجك

اعطيه حقوقه وبس

ولاتواجهينه لانه بيكرهج وبيتعلق ف البنات والايميلات اكثر

 

[ايام غربه]

والله تعبنا من الخيانه انا عن نفسي ذقت طعم الخيانه والامر اللي صدق يعذب نسافر انا وياه ويتركني بالفندق ويطلع معها طبعا انا كانت مجرد شكوك لكن بعدين تاكدت وكنت مخدوعه فيه وسكت ولا ناقشته بس بينت له اني شاكه مجردد شك واني لو اتاكد مستحيل اجلس معه وصار يداريني او مايبي اني امسك عليه ممسك والحين لنا 3 سنوات من سالفه الخيانه اشوفه ماعنده خرابيط ولا مكالمات ولانت ولا غيره الله يسخره لك انا بقولك الرجال بيني له اني شاكه فيك لاتقولي متاكده بيطنشك ويسوي كل شي قدامك اتمنى فهمتيني واهتمي بنفسك والبيبي والله يعينا على الرجال ادعي لي ان الله يلهي من اردني اناوزوجي بسوء ويصلح حالنا

 

[البنت وامها]

حبيبتي صدقيني انتي زوجته وحبيبته وام عياله وكل شي بحياته
بس هذه نزوه والله ياعمري نفس اللي صار معاي
والحمدلله الحين كملنا خمس سنين وانشالله راح نكمل العمر كله مع بعض
وانتي بعد تحملي الحين في بينكم عيال لا تشتتينهم واهو راح يتغير
انتي الحين بالنفاس وهم بعد النفاس ضلي ببيت اهلج يعني زعلانه
انتي المره الاولى ما زعلتي هالمره اذا ما تبين تدخلين احد كبري الموضوع بس بينج وبينه
يعني زعلي وظلي ببيت اهلج من غير ما احد يدري ليش انتي قاعده عندهم
وخليه يستسمح منج ويحس بغلطته
وبيني له لو مره ثانيه عادها ما يلوم الا نفسه