تلك أنصاف حكايات ..فاسمعي النصف الآخر من الحكاية

[راجيه الرضا]

في مرة كنت في مول وسمية كانت بتعيط , فأنا أخدتها في حضني جامد وقعدت أتحايل وأهزر معاها لحد ما ضحكت

وقتها بالصدفة رفعت راسي لقيت بنتين وقفين بعيد بيبصوا عليا وسمية وفي نظرة انبهار في عيونهم , وتخيلت الفكرة إللي بتدور في بالهم عن الأب الجميل الكيوت ,

إللي هو أنا

إللي البنات دي ماشافتهوش إني قبل الموقف ده بدقايق , كنت اتعصبت على سمية وزعقتلها بغير وجه حق , فإتصدمت من معاملتي فراحت معيطة

.....

واحد كان زميلي في الشغل في فترة من الفترات , وهو كان شاب ماشاء الله عليه طول بعرض بوسامة ,,, باختصار كان فتى أحلام معظم البنات وكانت البنات في الشغل أصلا بتتطلع ليه بانبهار

في مرة جه الشغل ومعاه علبة هدايا وفيها شيكولاتة وورد , وحكى للبنات إن دي هدية عاملها مفاجئة لزوجته النهاردة لما يروح علشان يفرحها

انطلقت الكثير من الحيح وانت ازاي كدة

وواحدة بعدها قالتلي بهيام

" يا بخت مراته والله , أمور ودمه خفيف وكمان بيفهم وبيعرف إزاي يسعد حبيبته "

ضحكت وسكت

لأني كنت عارف إن سبب الهدية إنه قبلها بيومين ضربها بالحزام لدرجة إن جيرانهم اتصلوا بأهلها يجوا ينجدوا بنتهم , وزوجته سابت البيت , وهو جايب الهدية دي لمحاولة تهدئة زوجته وأهلها

.....

من فترة كان فيه منشور انتشر جدا عن ولد بيحكي هو وزوجته إزاي انهم اتجوزوا بخمستلاف جنيه بس , بدون التعقيدات بتاعة الشعب المتخلف وإنهم هايعيشوا بحاجات بسيطة لحد ما يكبروا في حياتهم سوا

تقريبا البوست ده حقق عشرات الألاف من الشير وانبهار البنات والشباب بيه كان فوق الوصف

نص الحكاية التاني بعد سنة بالظبط لما البنت كتبت إن الولد إللي هى ضحت علشانه وماطلبتش منه أي حاجة زيادة , بمجرد ما الشغل استقر معاه وبدأ يبقى معاه دخل جيد , رماها حرفيا وطلقها وقالها مالكيش عندي حاجة

وهى كتبت تحكي إللي حصل وإزاي إنها كانت مغفلة

.....

**أنصاف حكايات **

كل القصص المنتشرة على السوشيال ميديا خصوصا _ إن صحت _ فهى مجرد نص حكاية , لحظة واحدة مجتزئة من الصورة الكلية

الشباب الصغير هنا أو البنات , أحيانا بيرسم حياته على كدب البعض بيحب يرسمه عن نفسه لجمع اعجابات ربما أو الإدعاء بإنه شخصية غير شخصيته الحقيقية

والنتيجة إن البنت أحيانا إما ترسم شكل معين _زائف_ للحياة الزوجية , كلها حب وورود وداديب , وبعد الزواج تُصدم بالحقيقية فيحصل خلاف يخلي حياتها وحياة زوجها في مهب الريح

أو تخاف من الزواج نفسه من كل المشاكل إللي بيتم الكتابة عنها من بعض المعقدين ممن مروا بتجارب سيئة

فتؤدي في النهاية لعزوف البنت عن فكرة الزواج

.......

فعلشان أريح كل المقبلين على الزواج من اخواتنا الصغيرين

الزواج مش حلو كله , ومش وحش كله

الزواج مش رحلة غرضها الاستمتاع وبس

الزواج مسئولية وبناء حياة كاملة هايكون فيها الصعب والحلو

فبعيدا عن أي حاجة بيتم نشرها أو بيتم قرائتها

إختاروا الشخص صاحب الخلق والدين ، علشان يبقى شريك في الحلو

ويبقى سند في الصعب


علي عبد الله علي

 

[دانسميز]

كل مواضيعك جميلة ومفيدة ياراجيا... بارك الله فيك حبيبتي ?...

 

[راجيه الرضا]

كل مواضيعك جميلة ومفيدة ياراجيا... بارك الله فيك حبيبتي ?...

وفيك بارك يا غالية