تقبل الامر..خطط جيدا ..دع الندم ..ابدا الحياة

[راجيه الرضا]

المشكله الكبيره اننا بنتجوز واحنا عارفيين اللي فيها بس نبقي مش اد اللي احنا اختارناه ونحاسب شريك حياتنا عليه

اتجوز بالعقل حد مش مالي عيني ولا بتحبه وتقعد بعد كده تطالبه انه يتصرف ويملي عينك عشان تكمل الباكدج وابقي اخترت بالعقل وحبيت برضوا مفتنيش حاجه

اتجوز حد مسافر عشان عنده مرتب كويس يعيشني حياه كريمه وافضل ليل ونهار بشتكي من الغربه واني شايل لوحدي

اتجوز اللي بحبه وفي اول حياته وعيشته فيها معاناه بالنسبالي واوعد اني هستحمل وبعد شويه اتعب وازهق واعاير واضغط

اتجوز اللي مش مناسب ليا اجتماعيا عشان ده المتاح مقابل اني اللحق اخلف واكون اسره واقعد بعد كده اشتكي من اهله وعمايلهم السودا اللي بالنسباله عمايل طبيعيه جدا وهو مش فاهم حقيقي انت بتشتكي من ايه واتصدم من فرق المستوي واتعامل معاه بدونيه واقعد ابص علي الجوازات الاحسن واندب وابقي مكسوفه منه ومش عارفه اجمله ازاي عشان يليق بيا

واللي عاوز واحده بصفات معينه وملقاش واختار واحده بصفات تانيه وليل ونهار يقارنها بغيرها ويوصلها رفض وتقليل منها

انت اخترت اللي كان متاح لك وقتها وكنت راضي بيه بلاش تكبر لنفسك النواقص وتخليها تسيطر علي تفكيرك

محدش يا جماعه عنده كل حاجه
محدش متجوز جوازه فيها كل حاجه
الفكره في انك تتقبل وترضي انك اتحرمت من حاجات وترضي بنصيبك
تتقبل احباطك وانك هتفضل الحاجات دي بتضايقك وبعدين هتتأقلم عليها

تتقبل انك اخترت وتدي فرصه لنفسك تتعامل مع اختيارك بنفس راضيه وتعرف ان اي علاقه في الدنيا لو فيها تقدير واحترام وعطاء هتزدهر ولو مفيهاش لو مرتبط بمين هتبقي علاقه تعيسه وفشلها مسئله وقت

اتحرمت من حاجات وخدت حاجات

تقبل الامر وابتدي خطط ازاي تعيش مرتاح وتتعامل مع التحديات اللي بتحصلك بصدر رحب

دع الندم وابدأ الحياه

ويبقي الاثر
#ويبقي_الاثر


سارة سيف