بنات شوروا علي انا صار لي ساكنه مع اهل زوجي 5 سنوات في غرفه انا و ولدي و زوجي يشتغل في العاصمه و يرجع في الويك اند ...
تعبت من السكن عندهم ابي ارتاح و استقل بحياتي عيزت احاول معاه يا يطلعنا بروحنا يا يودينا معاه يقول لا صبري يطلع القرض و نبني ارضنا و انا ما احب ابوظبي ما اريد اوديكم هناك.
انا اشتغل من 7-5 العصر و ارجع البيت لحجرتي ع طول العب مع ولدي 4 سنوات ادرسه و ارقده و مرات يطلع يلعب مع عيال عمه اللي معانا في البيت بس ساكنين في قسم من 3 غرف و صاله يعني قسم لوحدهم و عندهم باب برا البيت و باب داخل . و انا اتم بغرفتي بروحي و الله ما حد يقول امر عليها اسلم اشوفها حيه والا ميته لا حرمت اخو ريلي و لا عمتي الا اذا كانو يبون حايه مني
و اذا زعلوا عيالهم من ولدي يهددونه انهم يحبسونهم عنه و محد يلعب معاه لدرجه انه يقول ماما انا ليش ما عندي اخوان ( انا مسقطه 6 مرات )
احس نفسي غريبه عنهم بعدني ما اتأقلمت على طبايعهم كلهم من قبيله وحده و انا الغريبه بينهم اهلهم ما اعرفهم الا بالشكل بس
نفسيتي تعبت احاول ما ابين لزوجي المشاكل و الحساسيات اللي تصير اقول ما اريد اعكنن عليه هو راد يرتاح في الويك اند صبري و الله تعبت
اذا تغدوا او تعشو كلو بروحهم و ما يخببروني تيب الخدامه اكلي لغرفتي حتي يوم يكون زوجي موجود بعد ياكلون و ما ينادونه
اذا راحوا عند حد من اهلهم راحو بروحهم ما يعزمون علي و بعدين يقولون هذي ما يت و لا قدرت حد تصير اشياء في البيت ما اعرف عنها الا بعد مده
يتكلمون من وراي و توصلني الاخبار و انا صابره و ساكته و محشمه بس يلين جيه و خلاص ما اقدر اتحمل اكثر ياني القولون بس من كثر السكوت و الصياح تعبت ابا اطلع بيت بروحي او ياخذني عنده كلمته اليوم قالي طلعي بس بروحج ....... شو اسوي شوروا علي جزاكم الله خير
انا حالتي مشابهه لحالتج تقريبا بس يوم ريلج مش في البيت شو ايلسج بيت اهله انا لو ريلي سافر ولا سار مكان بيغيب على طول اشل قشي واسير بيت اهلي يوم يرد ارد مالي حايه ايلس عندهم وهو محد
سيري عيشي معاه في بوظبي احسن لج الدوام يعطون بدل سكن احسن له من حياة الهياته والصياعه و الله يعلم شلة شباب عزابيه بروحهم
وبعدين ليش تشلين هم وتحزنين ما في شي في الدنيا يستاهل
اسمعي الكلام من اذنج اليمين وطلعيه من اليسار شوفي ولا كانج شفتي شي لا تصيرين حساسه بزياده هذي الدنيا ما تتغير انتي غيري من نفسج ما تقدرين تغيرين الناس انتي لا تهتمين سيري الدوام ويوم تردين من الدوام ادخلي غرفتج وسكري عليج الباب وارتاحي ولعبي ولدج وعشيه ودرسيه ونامي مرتاحة البال وشوي شوي ريلج بيقتنع يمكن ما يقدر يتحمل مصاريف شقة او يمكن مخطط عشان يبني قريب حاولي تفهمينه
ترى في هالدنيا اذا تبين تعيشن مرتاحه لازم اطنشين تثقين في نفسج ليش منو هم عشان يتكلمو عنج ولا شو فيهم زود هالكلام اما من غيره او من فراغ ما عندهم سالفه تكلموا عنج اهم شي انتي اشغلي وقتج اقضي وقتج بالمفيد حاولي تكسبين ريلج وتفهمينه وتخلينه يفهج
كيف اقدر اقنعه اسير عنده ، يوم تيني عروض عمل في ابوظبي يرفض مجرد اني اروح الانرفيو يقول لا و بس هو ما يحب يناقش .. راضيه لو اسكن معاه بغرفه الحمد الله بس معاه بروحنا ..
اباكن اتخبرني كيف اقدر اقنعه شو لازم اسوي او اتبع اي اسلوب معاه راسه يابس و راسي ايبس اخاف اقول لدوامي يطلعولي بيت و اشل ولدي و اروح اسكن فيه واذا يبانا ايينا او ايتم وين هو فيه .. خلاص طفرت .........
اولا ودي اوجه كلمة لبعض الاميرات اللي على طول شككوك في زوجك .. بما انه بعيد عنك .. وبما انه مع شلة انت ما تعرفيهم ...فاحتمال انه يلعب من وراك
حرام عليكم ...انتوا بكذا تعيشونها في جحيم الشك..!!!
اختي ام سلطان ...مو كل رجل يبعد عن زوجته للعمل معناه انه في احتمالية انه يخون!!!!
50% من الازواج يفرض عليهم عملهم الابتعاد عن بيوتهم وزوجاتهم اغلب ايام الاسبعوع ..هل معناته انهم في احتمالية انهم يخونون؟؟؟ او يصيعون على قولة بعض الاخوات؟؟؟
اذا كل واحده بتفكر هذا التفكير...راح تكون حياتها جحيم ...
في مثل يقول المتهم برئ الى ان تثبت ادانته...
هل لاحظتي على زوجك اي شي مريب؟؟؟ وانت تعرفين وش اقصد ... يعني مكالمات غير طبيعية .. يعني هاجرك في الفراش ...لا يشتاق لك
لا يا اختي لا تفكرين ان زوجك مرتاح انه بعيد عنك ...بالعكس هو يشتغل ويشقى حتى يوفر لكم عيشة كريمة ..هي اول كم سنه من الزواج صعبة شوي ...يضطر الازواج الى التعب حتى يرتاحوا بعدين
لا تنكدي على زوجك من هذه الناحية ...اعطية الثقة في نفسة ..وانت ايضا ثقي فيه حتى ترتاحي ..الا اذا كنت ملاحظة علية اشياء غريبة
اما بالنسبة للسكن مع اهل زوجك ...هو في كذا حل
1- حاولي ان زوجك يسكنك معه في المنطقة اللي هو يشتغل فيها...لكن بدون تعنت ويباسة راس لانك انت اللي راح تخسرين راحة بالك وبيتك اذا يبستي راسك
2- انك تذهبين بيت اهلك وقت ما يكون هو في شغلة .. وترجعين قبله بيوم حتى تجهزي له غرفتكم وتجهزي نفسك لاستقبالة
3- ان تعيشي مع اهل زوجك لكن يجب ان تتغيري ...نعم اختي ...
هم قبيلة ..عددهم كثير وانت واحده ...نعم واحده فقط ..فالطبيعي انك انت اللي تكونين محتاجة لهم اكثر من احتياجهم لك..
يعني انت تقولين ما احد يمر عليك ولا يسأل عنك
حبيبتي ..انت المحتاجة لهم ..انت بادري ...اسألي عنهم ..هم اهل زوجك واهل ابنك
باين من كلامك انهم ناس في حالهم..حاولي تكسبينهم ...
شوفي عمري كل واحد يسوي لنفسة ...اذا انت عطيتي الزين راح تحصلين على الزين
واذا انت عزلتي نفسك عنهم ..هم مو محتاجين يسالوا عنك
اذا ما يشوفونك تختلطين معهم شي طبيعي انهم ينسوا حتى انك موجودة
حاولي تتقربي لهم وراح تشوفين النتيجة
اختي الحبيبة كثير من الزوجات عايشين مع اهل ازواجهم ...لو كل واحده منعزلة عزله تمامة عن اهل زوجها ..كانت الدنيا في حال ثاني
انا واحده عايشة مع اهل زوجي ..وانا لي 22 سنه متزوجة ..لكن عارفة كيف اكسب الكبير قبل الصغير
والله يا اختي يحلفون براسي ..تعالي شوفي خوات زوجي كيف يحبوني ..ما يشكون خيط في ابرة الا بشوري ..والد زوجي ...يعاملني احسن من بناته ... اخوانه ... قمة في الاحترام معي ...
اهلة كلهم يحبوني ...ليش لاني بذكائي كسبتهم
وهذا الشي مخلي زوجي يقدرني بشكل كبير جدا...طلباتي اوامر
وان شاء الله في اقرب فرصة تحصلين على ما ترغبين به.. لكن لا تتوقعي بين يوم وليلة راح يكون عندك بيت ..لا يبغي لك شوي صبر ..اهم شي اكسبي اهل زوجك ... وراح يكون زوجك مثل الخاتم في صبعك ...انت محتاجة الى احد يعبي لك وقت فراغك ..وانت عندك اهل زوجك ..استغلي الفرصة و خليك قريبة منهم ...
وابعدي الشك عنك وربي ييسر لك امرك
اختي عنقود عنب انا ما اشك في زوجي حشا و الله زوجي انسان مستقيم يخاف ربه و حركاته و طلعاته سواء عندي او بعيد اعرفه و اعرف جدوله كله و لازم يشاورني لا راح او يا من مكان يعني من ناحية الثقة موجوده و الحمد الله و اللي يبا يخون يبخون لو بروحه او وسط عالم ما يهمه شي
ثانيا اهل زوجي ما اشوفهم اشوف الخدم اكثر منهم و العيال ، ام زوجي حرمه طيبه و قويه شوي ما تجلس في البيت و انا اعدها حسبه الوالده لازم اتسير عند هذي و هذي و ترجع البيت عند نومي انا وولدي و هي تحب ولدي اكثر يمكن لانه وحيد ما ادري
، حرمه اخوة ما تقر في البيت كله عند اهلها بتيني اذا تبا شي مني بس ، انا ما اقدر ايلس عندها لان زوجها دايم في البيت اللي هو اخو زوجي
انا بالعكس عمري ما قصرت فيهم من اي ناحية كانت بس هم طبعهم هم الصح و العالم غلط لو شو الناس يقولون ما يرضون على نفسهم دايما يغلطون الناس في اي شي لو تافه و رايهم اللي صح و دايما اللي في البيت يطلع برا و تسمعينه من الناس و انا ما احب ها الاشياء و الخصلات فيهم
اريد اصبر بس و الله ما عاد اقدر اتحمل ( فيه اشياء ما اريدها تطلع برا و ما اقدر اكتبها) الكل يمدح فيني من اهلهم او حتى الجيران بس خلاص اريد استقر احس حتى في البيت ما فيه خصوصيات من اي ناحية كانت لا لبس لا اكل لا تلفزيون اقدر اشوفه معاهم في الصاله اتفه الاشياء لازم يدخلون فيها
شو اسوي ما اعرف اشكي لمن ما اقدر اشكي لزوجي و اقوله اهلك و اهلك مب حلوه و هذيل مهما كانوا اهله و انا الغريبة و ما اريد اضايجه بالحاحي بس كل ما انسى يذكروني بافعالهم مليت
