تعالو نسوي جداول لعيالنا

[دروب الخير]

:clap:اشحالكم يا امهات...
دايما انا افكر كيف انظم جدول لعيالي...يعني انظم نومهم واكلهم ولعبهم وشو الالعاب اللي يلعبونها ومتى يجوفون افلام الكارتون..وشو بعد:flex:ايه..شو الادوات اللي لازم تكون عندهم من انواع ادوات النظافه والا غيره...يعني اريدهم يكونو اطفال متميزين ومنظمين...

شو رايكم يا بنات نفتح هذا الموضوع لتجاربكم في ترتيب جداول ابنائكم وافكاركم على انواع الاغراض اللي عندكم....انتظر ردكم..على فكره انا عندي طفلين ولين احين ما دخلو مدارس

 

[دلع وغنج]

فكره حلوه
مع اني غير منظمه ابدا مع اولادي
لكن نحاول لازلنا في بداية الطريق

 

[ام البطه]

انا افكر اني اوعيهم من الساعه عشر الصبح وعقب افطرهم والساعه 1 اغديهم اما الساعه 8 المساء اعشيهم...عقب يرقدون الساعه عشر ونص تقريبا...

اما عن الوجبات ما ادري شو هي النوعيه من الوجبات اللي اعطيهم...ياليت حد يساعدنا..وياليت بعد اسويلهم جدول ترتيب العابهم وهواياتهم...

 

[بلقيسية نيو]

بصراحة الاطفال ما يحبون الجدول المنظم انا نظامي وياهم التالي:
اصحيهم الصبح بعد ما يقوم اول واحد فيهم يصحي اخوانه(4 سنوات-7 سنوات-8 سنوات)
وبعدين نروح نفطر مع بعض بعدين لازم يتسبحون ويغيروا ملابسهم ويبدا النشاط اليومي
-لعب على الكمبيوتر (لازم ضرابه وترتيب الادوار)
-قراءة قصص (يخربوا المكتبة) بس لازم يرجعوا يرتبوها)
-شوي قناة طيور الجنة (يحبونها واااايد ويقلدوهم في الحركات بعد)
العصر لازم نجلس مع بعض وناكل حلويات ونشرب عصير)
-افضل انا نطلع المغرب يعني اسبحهم مرة ثانية ونطلع اي مكان حتى لو اروح بيت اهلي المهم انغير جو البيت
- الساعة عشرة يكونوا بفراشهم
هذا اللي قدرت اختصره لكم والسموحة

 

[سامية الروح]

فكـــــــــــرة جميلة ..... إذا طبقت للإقناع وبدون اصرار وترك مساااااااحة للحرية ..

لأن فرض القيود تؤثر على النمو العقلي لديهم ""

الذهاب للنوم مهم ... تحديد مسااااحة للوقت .. وكذلك الأكل ( الوجبات الرئيسية ) التي

يجتمع فيها العائلة ... برأيي هذا فقط مايجب التركيز عليه ..

وغير ذلك يكون بمراعاة الحالة المزاجية للطفل ...

وتعليمهم بالاقناع أهمية تنظيم الوقت و عدم تكديس الواجبات ...

لأن الهدف هو تعليمهم النظام وليس اجبارهم عليه ...

بااااااااااااااارك الله لنا ولكـــمـ في أبنائنا وجعلهمـ من الصالحين الباااااااارين

شكرا لك أختي ( مياســـة )

 

[سامية الروح]

بصراحة الاطفال ما يحبون الجدول المنظم انا نظامي وياهم التالي:
اصحيهم الصبح بعد ما يقوم اول واحد فيهم يصحي اخوانه(4 سنوات-7 سنوات-8 سنوات)
وبعدين نروح نفطر مع بعض بعدين لازم يتسبحون ويغيروا ملابسهم ويبدا النشاط اليومي
-لعب على الكمبيوتر (لازم ضرابه وترتيب الادوار)
-قراءة قصص (يخربوا المكتبة) بس لازم يرجعوا يرتبوها)
-شوي قناة طيور الجنة (يحبونها واااايد ويقلدوهم في الحركات بعد)
العصر لازم نجلس مع بعض وناكل حلويات ونشرب عصير)
-افضل انا نطلع المغرب يعني اسبحهم مرة ثانية ونطلع اي مكان حتى لو اروح بيت اهلي المهم انغير جو البيت
- الساعة عشرة يكونوا بفراشهم
هذا اللي قدرت اختصره لكم والسموحة

أعجبني نظامك جدا :icon30:........ مشاء الله ... حفظكمـ المولى

 

[دروب الخير]

اشكركم خواتي على ردودكم ماقصرتو....
اختي بلقيسه نيو وااااااااااايد عجبني جدولج لعيالج لانه اكثر وقتهم لعب وفي نفس الوقت ثقافه...يعني مايركزون على افلام الكارتون..ولدي كثير متعبني بس يحب يطالع افلام الكارتون اكثر يومه وعان كذا اخاف عليه واباه يقضي يومه لعب ووالعب تعليميه..وبعدين حلو انهم الساعه عشر يروحون فراشهم..بس بسالج الساعه كم ينشون الصبح..يعطيج الف عافيه...

اختي سامية الروح اشكرج على مرورج الحلو..والصراحه نبهتيني على شغله انه احنا ما نغصبهم على الشئ يعني نخليلهم مساحه للحريه...تسلمين ما قصرتي

 

[دروب الخير]

انا بحاول انشاءالله اوعي عيالي الساعه 9 الصبح على اساس يرقدون الساعه عشر الليل...
اوكيه بنات بسالكم شو انواع الصوابين اللي تستخدمونها لاطفالكم الصغار وكيف العنايه باجسامهم...
تحيااااااااااااتي لكم

 

[ريمان2008]

موضوع حلو كثير أنا ما أحب الأجازه علشان الفوضى ومافي نظام مع المناسبات والسهر
والحين أجازه عملتلهم دا النظام وليا ثلاث أسابيع إن شاء الله أستمر فيه طول الأجازه
نظامي كل يوم ما عدا نهاية الأسبوع
الصباح الساعه سته يصلو الفجر قرأة أذكار الصباح ويحفظو قرآن حتى لو آيتين ويراجعو لو سوره واحده من إلي حفظوها في المدرسه
يرجعو ينامو ثاني ويصحو على الساعه تسعه يفطرو يتفرجو قناة المجد للأطفال
الظهر أبدأ التدريس الكبيره عمرها عشره سنين أعطيها دروس في التجويد ويوم القواعد ويوم جغرافيا
ويوم إنجليزي ويوم رياضيات حتى نهاية الأسبوع
أخوها تمهيدي كل يوم نمسك القرآه علشان ما يتعبني وقت المدرسه
اعملهم وجبه خفيفه شربة خضار سلطة فواكه
العصر ينزلو الحوش يلعبو بالسياكل وإذا الجو غبار أشغلهم شريط رياضه يتريضو شويه
يجي أبوهم العصر نتغدا مع بعض ويرفعو السفره
المغرب نصلي جماعه ونقرأ أذكار المساء
أخليهم يشاهدو قناة سبيس تون
ويلعبو ويتعشو وينامو على الساعه تسعه

نهاية الأسبوع أبحث معاهم في النت على عمل فني للأطفال ونسويه مع بعض
او نفسر سوره من القرآن أو نقرأ كتاب

حلو النظام إذا أتعودو عليه الأطفال صدقوني راح يملو من الفوضى وهم بنفسهم يعملو جدول
علشان ينظمو وقتهم

 

[دروب الخير]

مشاء الله عليك يا ام ريمان...الصراحه انتي ان مثاليه حقا..
يعني منظمه جدولهم على النوم مبكر وعلى الصلوات وقراءة القران والواجبات وعجبني بعد انج قلتي انهم يشوفون قناة المجد لان هذي القناه مره مفيده وانا افكر اسوي مثلها لعيالي...بارك الله فيج والله يحفظلج عيالج..

 

[ورده]

اشكرج اختي مياسه على موضوعج

عني وعن عيالي وش اقول بس

لا نظام ولا حاجه المشكله مافيني طوله البال ما اعرف احس انهم متحكمين فيني 4سنوات و3 سنوات شرااااااااااااااااخ باعلى صوت لدرجه ان اذني اليمن توجعني كثير من الصراخ صوتهم حاااااااااااااد ودايما تخريب حتى الاكل ما ياكلو بادب

لا نوم عدل ولا حاجه ولسانهم ما شاء الله كل الي يشوفهم يقول لي شكلهم عندهم فرط في النشاط عالجيهم



تمنين اني اشارك وافرح بنفسي في موضوعك اني قادره اربيهم عدل ما في فايده اقولكم موقف مضحك..


في حركه في سوبر ناني اني اوقفه بجمب الطوفه بلثواني او الدقايق بحسب عمره تدروين وش يسوي
اول ما يخرب يجيني ويطالعني بعين حزينه ماما
اروح عند الطوفه

خخخخخخخخخخخخخخخخخخخخخخخخخخ
يعني انه كسر بخاطري قلت لها لا حبيبي انا الي لازم اوقف مهوب انت وتميت اضحك على نفسي وابكي ..


شكلي قلت قصتي اسفه على الاطاله يا مياسه كنت حابه اثريكي بقدراتي الخارفه اقصد الفاشله هههههههههههههههه



يله ان شاء الله البنات يفيدونا يا رب

 

[دلع وغنج]

ماشاء الله عليكم

انا حاولت اقومهم بدري بس فشلت فشلا ذريعا

وماعندي نظام لهم ابدااا

حاولت وماقدرت

 

[همس الغرام]

ريمان 2008 ما شالله عليج شنو أعمار أطفالج؟ وبنات أو أولاد؟ أنا معجبة ببرنامجك اليومي لانه مبارك وحافل بالنشاطات الدينية .
بالنسبة لي أنا أشتغل ودوامي يبدأ الساعة 8 و كل يوم أخذ أطفالي صغار مادخلوا المدرسة 2 الي أمي في الساعة 7 يصحون من النوم ويوصلهم أبوهم و نروح دواماتنا و بعدين أرجع اخذهم من عند أمي الساعة 2 الظهر و نتغدى سوى و بعدين أنام معاهم شوي و نصحى نلعب مع بعض أو يشاهدون التلفزيون أو يلعب بالكمبيوتر واجهز احتياجاتنا من ملابس وغداء لليوم اللي بعده الى أن يحين موعد نومهم الساعة 10 نفرش أسنانا مع بعض و ألبسهم ملابس نومهم و ينامون و أحيانا تحدث معارك و قت النوم وأتعب حيل و طبعا في تغييرات اذا عندنا مواعيد للمستشفى أو تسوق أو زيارات عائلية خلال النهار أو بعد صلاة المغرب لكن موعد نومهم غالبا الساعة 10 .
هذه اقتراحات لقضاء وقت الفراغ للأطفال الصغار:
التلوين
قراءة القصص
حفظ ايات من القرآن الكريم
اللعب بالصلصال
مشاهدة البرامج التعليمية بالتلفزيون
ألعاب تعليمية بالكمبيوتر
اللعب بالكرة أو بالتركيب
الاستحمام في حوض سباحة صغير أو وفي داخل الحمام مع الألعاب
اللعب بالدراجة أو السيكل
المشاركة في اعداد طبق من الكيك

 

[ريمان2008]

همس الغرام بنتي الكبيره عشره سنين وولدي سبع سنين والصغيره ثلاث سنين
حاليا ما عندي شغاله ولا ناويه أجيب ثاني والله البيت راحه من دونهم
وعامله جدول ليهم للترتيب والنظافه
الإقتراحات إلي حاطتها لتقضية وقت الفراغ مع الأطفال حلوه ومجربه

 

[همس الغرام]

همس الغرام بنتي الكبيره عشره سنين وولدي سبع سنين والصغيره ثلاث سنين
حاليا ما عندي شغاله ولا ناويه أجيب ثاني والله البيت راحه من دونهم
وعامله جدول ليهم للترتيب والنظافه
الإقتراحات إلي حاطتها لتقضية وقت الفراغ مع الأطفال حلوه ومجربه

ماشالله الله يحفظهم و يخليهم لج انا أطفالي سنه و نصف +4 سنوات
أهم شي اتعرفين تسوين كنترول وتتحكمين فيهم والخدم فعلا نكد في البيت لكن مجبورين فيهم شر لابد منه علشان يساعدونا مع شغل البيت وقت الدوام

 

[بسمة العمر]

موضوع جميل ودايم يشغلني وأنا معودة عيالي دايم على وضع جداول للأشياء الأساسية في يومهم
أنا أشتغل أطلع من 8 وأرجع 1:30
في هالفترة البنات مشركتنهن في مركز لحفظ القرآن من 9صباحا -1 ظهرا أربع أيام في الأسبوع
أما ولدي فينام على راحته ويقوم يشوف التلفزيون ويراجع حفظه قبل ما يروح مركز التحفيظ من 4 - 8 وأربع أيام في الأسبوع بعد
طبعا في المركز مش بس حفظ بعد أشغال يدوية وألعاب ورحلات ومسابقات
باقي الأيام مرات يروحوا الحديقة ومراكز الألعاب والبحر أو أماكن ترفيهية ثانية
في البيت
- يشوفوا التلفزيون (قناة طيور الجنة ماخذه عقلهم ) وقناة مواهب وأفكار وقناة المجد
- يلعبوا على الكمبيوتر
- يلونوا ويرسموا
- يقروا قصص
- يكتبوا رسايل أو قصص أو مذكراتهم
- يلعبوا البنات بعرايسهم والأولاد كورة
-نلعب العاب جماعية في البيت
من الأنشطة اللي بعدها ما بدأت
دورة في الخط عند أختي خطاطة رائعة
دورة في الرسم بعد عند أختي الثانية الرسامة
وكتبت قائمة بالأماكن اللي نقدر نروحها في للبلاد قبل السفر
مثل المتاحف ومركز الاستكشاف ومربى الأحياء المائية الجديد وحدائق الحيوان
وبدينا هالأسبوع رحنا مربى الأحياء المائية
أما أوقات الوجبات ثابت ما عدا الريوق
ووقت النوم على حسب بس ما يتجاوز 12
أدري طولت بس هذي أفكاري وجدولي لعيالي في الاجازة (طبعا هذا غير السفر لأنه له أفكار ثانية)

 

[دروب الخير]

ماشاء الله عليكم...جداولكم وااايد حلوه زاهم شئ الوحده يكون عندها نظام معين يمشون عليه عيالها عشان يتعودون على النظام...اختي ورده حاولي واتوكلي على الله صدقيني بتعرفين تنظميهم بس انتي حاولي كم مره...اشكركم كلكم على المرور وتسلمووووووووووو.

 

[ملاك زوجي]

اااااااااااه انا اعاني مع بنتي الكبيره عمرها 5 سنوات بس مسويه هي اللي فاهمه وكل شي تقولي انا حره وانا ماعندي مدرسه عشان انام وتموت بالسهر واحيانا ننام انا وابوها ولما نصحي الصبح نلقاها سهرانه ولا والى زادها انها عارفه ان الاجازه جايه وان عماتها راح يخلصون مدرسه وتقول كلهم يا ماما يسهرون بالاجازه قولولي كيف انظمها والاجازه جايه

 

[سنبون 2]

الله يعين عليهم بس

 

[دروب الخير]

الله يعينج ملاك زوجي..ما شاء الله على بنتج عمرها 5 سنوات وما تقدرين تسيطرين عليها...لا يا ملاك هذا اكبر غلط صدقيني انتي تقدرين تنظمين نومها لا تخليها ترقد الظهر والليل خلها تنام بسرعه...بعدين لا اكبرت الينيه شو بتسوين......الله يعينج.