تخيلكم ساعدوني من الضياع

أ

أسيرة القلب

New member
إنضم
2008/04/02
المشاركات
51
بسم الله الرحمن الرحيم


ماأعرف من وين أبدالكم القصة .. يليت تساعدوني خلاص أنا ضعت بدخل في الموضوع وما بضيع الوقت أنا متزوجة صارلي تقريبا سنتين عندي ولد والحين أنا حامل . المهم بدايتي : تزوجت تحت رغبة أهلي من ريلي اللي يقرب لي كنت رافضتنه بس تغيرت وأصريت عليه لما جو أهل ريلي يخطبوني أمه كانت رافضة لأن كانت من بينا مشاكل عائلية كبيرة في ذيك الفترة لكن الريال أصر علي ولما سمعت أنه هواللي يبيني هني غيرت رايي وقلت أبيه. كتب كتابه علي وعطونا المهر وفلوس الزهبة وكانت فلوس الزهبة أبدا مايقطن حتى هلي زيدو لي من عندهم قلت حق أمي أنا راح أقول لهم أنه الفلوس مايكفن أبدا أمي قالت لأ لاتقولين عيب تقولين ونحن وين رحنا .. قلت لها يمه اللي ختشو ماتو . المهم دقيت تيلفون لهم أخبرهم .. تتوقعون شوكان الرد؟؟؟
بكل جفاء : نحن ماعندنا زياادة أنتي تشترين من الغالي خفي وبيزيدن الفلوس !! هذي العمة .
هني أنا يتني صفعة على ويهي وقلت التوبة أطلب منهم شي ماأدري منو صار المسؤؤل هم أو هلي .
الأهم : تزوجت بس بمنو أبدا بريلي أو أهل ريلي أمه أو أخوه


يليت ألقى منكم ردود على وعسى ألقى بويهم الخير علي لأن القصة مو هني وبس القصة أكبر من هالكلمتين . أحيان أفكر والعياذ بالله بالموت وأحيان أفكر
 
حبيبتي كملي وانشالله نوصل لحل بس قبل كل شي قوي وازعك الديني
وصلتك بالله عشان ماتفكرين بالانتحار والعياذ بالله وتذكري
((إن الله لايغير مابقوم حتى يغيروا مابانفسهم))
 
كملي حبيبتي وكلنا اذان صاغيه

والله يفرج عنك
 
تسلحي بالايمان ومن رجاء الله ماخاب

تابعي وحن معك يا قلبي
 
مشكورات خواتي على الردود والله ريحتوني وشجعتوني أكمل .

ببدالكم من عند عمتي أم ريلي :

بسم الله ...
وصلت عندهم البيت وصرت وحدة منهم وفيهم أنا ما أعرف اذا نسوا المشاكل اللي صارت بس شكلهم من الناس اللي مايسامحون مع أنه الغلط صار من الطرفين . المهم بعد زواجي بأسبوع أنا ماشفت الخير منهم المفروض يستحون ويخيلون لكن ما أدري هالعمة شو صنفها أنا مشكلتي ما أعرف أصناف الناس أتعامل مع تعاملهم وياي ..
أم زوجي متعودة تصحي ولدها قبل كل صلاة ومرة قالت قبل العرس أنا ماراح أترك أولادي تحت يدين حريمهم على بالي كانت تمزح لين ما شفت بعيني .. شو كانت تسوي أنا من عادتي ما أقفل باب بيتي لأني أعرف محد رح يدخل أو يمكن حد بيحتاج شي لأنه مسافته غرفتنا من الصالة بعيد . كانت تدخل لين غرفة النوم تصحي ولدها سكتت أول مرة وثاني مرة ...الخ كنت أقول في خاطري هذي أمه وما أريدها تحس أني بعدتها عن ولدها بس الكوب أنسكب صرت أقفل الباب ..تظنون أنها تركتنا .. صارت ترمي علينا الحصى من الدريشة الشباك على قولتها تصحي ولدها أنا كلمتها وقلتلها عمتي ولدج عنده حرمة عيل ليش زوجتيه وأنا أصحيه من نومه ويقوم بعدين أنا أكون نايمة والانسان وقت النوم الصوت العالي المفاجئ يرعبه مع مرور الايام تغيرت لكنها تذمرت لما تدق علي الباب تقول أني أتصيمخ أنا مب هذا اللي جالطني .. كانت تشوه صورتي جدام زوجي وجدام الحريم وجدام أهلي تقول أني أرقد لين الظهر وهي تعرف أني أسهر بالليل وما أنام لين الفجر وأني ما أدخل المطبخ وأني أزعل من أي كلمة كانت تبكي قدام ولدها تشكينه له وقدام عيالها وتقول لهم الحريم مو كذا وأني ماأقعد وياها وأنا أقعد معاها وأتغدى معاها وأحطي لها قهوة العصر أحيانا وأتعشى معاها ونقعد أنا وزوجي لين الليل حتى والله أني صرت أكره بيتي أحس بكآبة لما كنتأقعد فيه لأني تعودت أقعد معاها بس عمرها ما أذكرتني بخير لما تنيمت بنتها في المستشفى كنت أقوم من الفير وأقول حق زوجي خلنا أنروح ناخذ لهم الفطور اللي أنا سويته صح أني ما دحيحة لكن مني فايدة مقارنة بسلفتي يلي كانت تمدحها كل حين وكل ساع قدام أولادها وقدام زوجي تقول عنها الطباخة والمربية وأبدا ماتصرف مثل باقي الحريم ولدي رح يرتاااح معها وهي تركز عالجانب المادي قدام زوجي لأن ايده قابضة يعني رح تكون الزوجة المثالية .. تتوقعون المديح طلع صدق على أوصافها ؟؟ أبداااااااان عمرها من يتنا ماطبخت للبيت بعد أنا كنت أطبخ لهم لما أشوف نفسيتي مرتاحة ومستعدة أنجز والنوم لين الليل وشوف ماتنشااف ألا بالليل والمصاريف حدث ولا حرج زوجها ماتراعيه حتى لما مايكون عندها شي اللي تبيه بتاخذه .. الله يشهد على كلامي عنها أني ما أبالغ اللي كان حلو في شخصيتها لسانها العسل وبس يعني مثلا رح تقول لج آمري تدللي ووقت الجد ماتشوف منها شي واذا قالت شي تلقين العمة تفطس من الضحك على كلامها .. مع أنها كانت تجرحها بالكلام أحيانا لكن عمتي ماأدري ليش كذا معاها زينة هي وحدة قوية حقها ماتسكت عنه واللي في خاطرها بتقوله مايهمها أحد على حد قولها ايها وتدلع أحيانا قدام زوجي وأتي تقول لي أنتي تغارين على زوجك وأنا جد أغار .ز المهم عمتي مازالت تمدحها وماتحب تشوه صورتها مع أنه دمي أنا اللي مختلط في دمها لكن تقول لي أم عمتي أهي كذا مع أهلها مو زينة ما أدري شو سويت أنا مرة قالت لي أنا أحب الطيب وياي وكيف الطيبة عندها يعني لاتوين لي شي بس سولفي معاي وأنا مو مقصرة لكن ماتحمل مني كم مرةأحرجتني قدام عيالها وأنا ساكتة أخاف أرد عليها يقول مرت أخوي لسانها طويل مع أنه شخصيتي قوية وما أخاف من حد لكن من ييت تزعزعت ما أبي زوجي بعد يزعل مني لكني مليت منها وعيالها الشباب مايحترموني والسبب هي عكس سلفتي اللي حاسبيلها ألف حساب .. أنا ما أدري كيف أعاملها لما تعبت من آلام الولادة طلبتها هي مع أنه أمي قربي ومو محتاجة لها دخلتها معاي غرفة الولادة وقلت لها عمتي أنتي مثل أمي سمي الولد مثل ماتبين تسمينه وكنت أسألها عن أشياء أنا أعرف أجابتهن بس علشان أحسسها أني أحبها وأبي أدخلها في حياتي مثل أمي لكن شو كانت النتيجة .. لما قعدت معاي في المستشفى بكتني دم مو دموع لو تعرفون شو سوت معاي؟
 
أنا رح أكمل بس يليت تتجاوبون معاي واذا مالقيتو الحل يمكن تتعرفون على شخصياتهم من خلال كلامي لأني ماعندي خبرة كافية في الناس وشخصياتهم وكيف أتعامل معاهم شعاري في الحياة ما أحب الكذب والنفاق : العين بالعين والسن بالسن.

أم زوجي تحب ولدها دايم قاعد معاها وذا قعد عن شو تتوقعون تحكي له ؟ " عن النسوان والحريم وزوجة فلان ، وأنه الوحدة الفلانية جابت ولد والثانية جابت بنت والثالثة جمال الكون عليها والرابعة ... الى آخره يعني زوجي يعرف الحريم اللي بمنطقتنا كلهن , كم كرة كلمتها في هالموضوع قلت لها اذا انتي متعودة تحكي لولدك كأنه مثا بنتك قبل الزواج أحكي لي أنا تبتسم لي لأنها عارفة اللي قاعدة تسويه وما ترد علي لأنها ما تركت هالطبع فيها .. الحين أنا ما أعرف كيف أتصرف الكلام معاها مايفيد وزوجي يحب يعاندني أحيانا وهو مايقدر مايساير أمه " قلت يمكن مو لازم أخليه يقعد مع أمه هذا قدامي وكذا تقول من وراي عيل شو تقول .
زوجي طيب معاي لكنه مايحكي اللي بخاطره وكم مرة حاولت أفهم شو بداخله بس ماقدرت اللي عرفته عنه انه مايحب يزعل أحد , ماينام وأهو مرتاح يحس بتأنيب الضمير واذا أحد مزحت معاه مزحة ثقيلة يزعل لكنه مايعبر ولا يبين على ملامحه أحس أنه ما عنده شخصية واذا أحد قاله شي يسكت عنه .. الناس تحبه ودايمن ينذكر بالخير لكنه معاي واحد ثاني مايحب يدلعني ويقول لي أنا ما أعرف لدلع البنات لما ربيت أبدن ماجاب لي هدية ومرة قلت له وين هديتي قال لي فالك طيب رح تلقين أحسن هدية . وما شفت منه شي وطلعات مايطلعني أنا راسي مشوش ماأدري عن منو أحكي بالضبط الضغط اللي فيني متراكم علي , أحكي شوي عن هذا وبعدين أتركه وأتذكر الثاني وفعايله سامحوني اذا شوشت عليكم . بس يليت ألقى حل . حتة صرت أكلم نفسي أحيان وبصوت عالي كأني أكلم شخص مو نفسي
 
الله يساعدك وشكلها ام زوجك قويه الشخصيه استخدمي معاها كل الاساليب الطيب والهديه والمعا مله الحسنه والله بتتغير الكلام الطيب له مفعول السحر
 
اهلين يا عيوني..
قصتك تتكرر على مر الزمان واختلاف المكان مع بعض الاختلافات..
بالنسبة لام زوجك انت لازم تتغيرين معاها. ما اقول لك كوني شريرة معاها بس لازم يكون لعلاقتكم حدود.. خصوصياتك لا ترضين لها تتدخل فيها ابدا ولا تتكلمين لها عنها..من اساسه ماله داعي تعرف كل شي.. وانت ممكن بحسن نية تسولفين معها و تطلبين منها شغلات على اساس اظهار الاحترام لها و هي ما تشوفه سنع هي تشوفه ضعف وتقدر تستغللك من خلاله (بيني و بينك هذا خلل في الشخصية)..من هنا و رايح محد له علاقة فيك حتى لو اضطريت تكونين ساكتة طوووووووووووووول اليوم. اذا احد غلط عليك في مجلس لا تسكتين ابد ابد..ان سكتي مرة بيمصخونها كل مرة و الي ما يحس بقلة ادبه من نفسه لازم انت تحسسينه فيه..بالله عليك اذا احد طول لسانه عليك ليه ما تدافعين عن نفسك؟ اذا انت تقولين انها اصلا ما حاسبة لك حساب و خلت الرجال بعد ما يحترمونك ليه خايفة بعد على مشاعرهم؟؟ يوم هم ما حسبو لك حساب لا تحسبين لهم انت بعد و البادي اظلم!!صح ولا لا؟
انا ما ودي احرضك على فعل الشر و لا اقول لك اقربيه لكن انت تقدرين تقوين شخصيتك بنفسك بدون ما تتعدين حدودك..شي ما يعجبك قولي ما يعجبني بلطف بس لا تجاملين لا تخربين حياتك و تضيقين صدرك علشان حاجات ما تسوى و ناس ما تستاهل..ادرسي اخلاقيات مرت اخو زوجك و شوفي شلون هي كاسبتهم و صيري اشطر منها..وانا ودي اتابع معك ان شا الله و ابيك تكملين الموقف الي تكلمتي عنه عشان اعلمك وين غلطك و اذا ودك تذكرين بعض المواقف عشان نعلق عليها و نصححها.. انا و الله انقهر لما اشوف الناس الطيبة تنداس و الناس الشريرة ما لها الا الاحترام. باكون معك اذا حابه تكملين و ادعي الله دايما في صلاتك و انت ساجدة ان الله يريك الحق حقا و يرزقك اتباعه و الباطل باطلا و يرزقك اجتنابه.. وكثري منالدعاء قائمة قاعدة..
اسأل الله ان يفرج همك و يهديك الى خير العمل و يلهمك الصواب..
اختك المحبة..
 
مشكورات خواتي
خاصة تميمية أشكرج من قلبي أحسك حسيتي فيني أنا لما شفت ردودكم تشجعت أنا ما أبي غير أحد يشجعني .. بصراحة عندي أمي تقول لي أذا عمتك قالت لك شي لا تردي عليها واذا سوت معك كذا لا تردي عليها أنتي سكتي وخليكي أحسن صرت ما أحكي لأمي شي لأنها تضعف من شخصيتي لاني عارفة أن الناس اللي تسكت تنداس خاصة مع ناس مثل هذول .. أنا عشت معاهم سنتين سلفتي من أيام متهاوشة مع الشغالة وكل واحد حط لها ألف عذر ومحد لامها .. أنا قبل لاتجي سويتها مرة أو مرتين كانت عمتي تقول لي أنا ما أحب أحد يتهاوش مع شغالتي أنتي تبين تهربينها من البيت وتقد تحط علي قدام عيالها هي قدامي الحمل الودود أنا مرات أكون مارة وأسمعها تسولف عني بالعوف حتى مرة قالت لي سلفتي أنتي الكل حاط عليكي .. أنا ما عرفت شو أرد عليها .. هي لما جت عندنا كانت تهرب لما تشوف زوجي أونها خجلانة والحين ماكملت سنة وألسانها أطول منها حتى مرة قالت له يالبخيل ومرة قالت أنته مزعج وهي تضحك.. زوجها يسولف معاي عكس زوجي الهادي اللي ساعات اهي اللي تحاول تتحرش فيه حتى تطلعه من هدوه معاها .. أنا أتضايق الجرأة مو لها الدرجة. الحين أنا محتارة لأن عمتي أحيانا تقعد تمدحها من دون مناسبة وتقول يحليلها فلانة مرت أخوك مسكينة حتى مرة فتحنا موضوع الشغالة قالت أخت زوجي انا هالشغالة ما أحبها تنظيفها مو زين وأنا أيدتها قلت لها معك حق ما عجبها عمتي الكلام قالت زين مرت أخوكي تمدحها وتقول أنه ما في أحد مثلها .. أنتو لو تدرون مطلعة روح الشغالات من الشغل قالت أخت زوجي اي مرت أخوي توقف على راسها لين أتسوي اللي تبيه . لما أختليت بزوجي قلت شوف تنظيف هالشغالة .. شو قال لي والله تقدرين توقفين على راسها .. هني أللي أستوعبته كأن زوجي يبيني أقلد مرت أخوه .. أنا مشكلتي يا خواتي أني ما أعرف كيف أخبي مشاعري كله يبين على وجهي خاصة الغيرة أبي حل بس لها الشي وبكون بألف خير أبي أخيط بوز عمتي وما تقعد تذكر مرت أخوه قدام زوجي وخاصة والله يشهد لما أكون موجودة
 
كان الله في عونك عزيزتي

بس لازم تحطين حد في تعاملهم معاك....اثقلي عليهم خليهم يحسون بقيمتك وبوجودك

لازم تنتقدين شغلات تكون بسيطه في البيت...بس يكون انتقادك في محله

عشان تعرف عمتك انك مستقله بذاتك....وانتي لازم تحاولين تكسبين اخت زوجك في صفك عشان تصير هي توقف

بجمبك في مواقف معينه....واهم شي زوجك ارضيه ولا تهمك امه ...وترى الرجال يعرف اذا زوجته سنعه او لا

حتى لو كان من النوع اللي يسكت وما يعبر عن مشاعره...ولازم تمدحين امه قدامه وتحطينها على راسك

عشان هو يحطك على راسه....بس بصراحه عليكي بالدعاء والتقرب الى الله

الله يفرج همك عزيزتي
 
مرحبا الله يعينج فديتج والله يجزيج خير الجزاءع صبرج هذا مشكلتنا الطيبين الساكتين ياكلون حقنا
انا راي من راي تميميه وبع مثل ماقالت ملاك الليل تكسبين اخت زوجك وزوجك باقي احلى طااااااف
دخلي من اذن وطلعي من اذن حاولي قت ماتقدرين تسوييين طااااف عشان ترتاحين نفسيه وانشغلي ف عيالج وف بيت خلج بعيده عن عمتج قد ماتقدرييين وامج لازم تعرف بعض تصرفات عمتج عشان اذا صار شي تعرف من بدايه من غلطان واللله يوفقج يااااااااااارب ويعيييييييينج فديتج وصبري من شوف اخرتها خخخخ
 
حبيبتي اهدي كدا وركزي
ماحدهينفعك والله
نفس مشكلتي حماتي ام زوجي وتطلقت فركزي
لانها لوماتحبك من البدايه فانتهي الموضوع لن تحبك مهماحاولتي فكبري دماغك
واقفلي بابك عليكي
واشغلي حالك باي شئ تجنبيهم لاقصي الحدود لايهمك تسمعي شيئامنهم المهم زوجك كيف يعاملك طيب معكي خلاص
حاولي تكسبيه هو لانه لو تمسك بكي اكثر يمكن يفكر يبعد عنهم وترتاحي اهداي كدا وحاولي تحلي المشكله ولاتكبريها معهم
لن يفيد صدقيني بل سيكرهك اكثر ولاتحكيله عنهم حاولي تستقلي عنهم باي طريقه
والله يعينك
 
نصيحتي لك......عيشي لنفسك!!!!!!!!!!
مو لانك انانية بس لانك لازم تعيشين مثل غيرك مرتاحة و متهنية..
اشغلي نفسك عنهم باي شي تحبين تسوينه..اهتمي بنفسك لااااااااااااخر حد و خلي زوجك يلاحظ هالشي.. بس مو احد غير زوجك من الرجال..تعاملك مع اهله خليه رسمي ..انتبهي تبينين له انك غايره من زوجة اخوه لان هذا بالنسبة للرجال دليل نقص فيك.. ياحبيبتي انت اطيب منهم كلهم لكن لا تخلين طيبتك تخرب عليك ولا تقبلين باي مجال للمقارنة بينك و بين اي احد ثاني .. فهمي المقابل لك ان كل انسان له شخصيته وله ايجابياته .. والله ميز كل واحد عن الثاني بشي معين و مو لازم الناس تصير نسخ طبق الاصل من بعض.. وزوجك اكبر مثال..شوفي شلون يختلف عن اخوه!!! صح ولا لا..؟ هل يقبل انك تقارنينه باخوه؟
الله يوفقك و يسخر لك زوجك..واحنا في خدمتك ياقلبي..
 
على فكرة...
اذا تحبين تعرفين نمط شخصيتك انت و زوجك ابحثي في المنتدى عل و عسى يساعدك في التعامل مع زوجك..
او مكن احنا نساعدك باعطائك بعض الافكار عن الشخصيات..
لي عودة ان شا الله..
 
يجب تسجيل الدخول أو التسجيل كي تتمكن من الرد هنا.
عودة
أعلى أسفل