تجمع امهات الاطفال الاشقياء قصصنا وحلولنا ونتايجنا

[انين الخريف]

السلام عليكم


انا كتبت هذا الموضوع بعد مافاض بي

وبديت افقد صبري

مشكلتي اولادي الثلاثه الله يحفظهم ويصلحهم


قمه الشقاوه والاستعباط والعناد


امس عرفت ان علاقتي فيهم ماهي زينه


اللي صار الله يسلمكم

كنت مواصله لين الفجر لين راحت بنتي وابوها للدوام وللعلم بنتي الكبيره عندها فرط حركه


رجعت نمت لين الظهر

صحيت على آلآم رهيبه في بطني وظهري

جات بنتي نزلت ملابسها ورحت صليت وصحيت اختها الصغيره 4 سنوات عنيييييييييييييييده وغامضه وهاديه وبكايه

حطيت لهم اكل جا ابوهم وانا تعبانه بس مابينت


وحطيت له اكل طبعا تعرفون الرجال كيف يتدلع ويتطلب وحطي جيبي لدرجه والله العظيم رميت اللي في ايدي

خلاص صرت احس اني اكل شوك من كثر ماهو يلح عليه وهو عارف بعطيه بس مو مخليني اجلس

(عنده زكام خفييييييييف طلب مضاد وهو عارف انه في ثلاجه غرفتي والا اروح اجيبه قلت له خلاص انت روح على ماتخلص من دوره المياه اطلعها لك بس كنت مره متنرفزه )

رحت اعطيته الدواء

ونومت بنتي الكبيره ووصيت الصغيره اني راح انام شويه لاتزعجيني وخليت فاصل غرفتي مفتوح كالعاده عشان لو تبغى شي تجي

طبعا ولدي الصغير 2 لسا نايم لانه نام ع ال3 فجر

رحت انام حسيت بشي كابس على نفسي ومتضايقه مره

يالله نمت

قومت زوجي 3 ونص للصلاه

ولما رجع قلت تكفى بنام شويه


طبعا يابنات كنت في كوابيس وجن ومشاكل وماني قادره اتحرك من التعب

قال خلاص وشوي ارسل بنتي الكبيره انا مدري متى قالت لي قومي قلت شويه

جا هو صحاني لقيت الساعه 5 وربع

زعلت لانه ماصحاني اصلي

وضيت ويوم اطالع في البيت يالله مو هذا بيتي كل شي مقلوب فوق تحت

صليت وطلعت

لقيت الصغيره لاعبه باغراض اختها والصلصال وسخت فيه كل شي والا لوان الشمعيه

طبعا فتحت الغرفه واختها نايمه واخذت من الدولاب وخربت بالمناسبه قفل الباب

والله يابنات ماخليت كلمه شينه ولادعوه الين قلتها وضربتهم ضرب


بتقولون انتي غلطانه

غلطانه وستين غلطانه

بس كانت حالتي النفسيه عدم

كابوووووووووووووس مخيف

ومرض

وتعب نفسي

وشقاوه موطبيعيه


صليت المغرب

وتمددت على سجادتي واسمعهم يخربون

واقول في نفسي خليهم يحرقون البيت

تعبت تعبت تعبت

غيرت ملابسي ولبست عدساتي ورسمت حواجبي ومشطت شعري وتعطرت وحطيت روج

وطلعت ما اعطيتهم وجه

زوجي قال نبغى حاجه ناكلها حطيت القهوه على النار وبعدين قمت ارتب من جديد وماجهزت القهوه الا خلصت شغلي

كل هذا وجسمي كله يوجعني


ياربي سالت نفسي

ليش اولادي يسوون كذا

رغم اني اموت في النظافه والترتيب والنظام والهدؤ

للعلم اولادي علموني كيف اموت من العصبيه وكيف يطلع صوتي


حتى بعد ماهدينا شوي سحب ولدي الستاره لين انكسر الحامل حقها

وبعدها كان قاعد يشرب رضعته واخته اللي اكبر منه تجري حواليه ضربت رجلها الرضاعه بغت تكسر سنونه



(تعليقات اولادي )

بنتي الكبيره تقول :انا راح اخلي المدرسه تصير امي انتي متوحشه صدق وللعلم كانت اكثر وحده تخرب في البيت بس مع المدرسه خف احتكاكي فيها وصارت احسن من اول


بنتي الوسط اذا جيت اضربها تستسلم وبعدين تبكي وتجلس ماسكه فيني وتخرب بعدها اكثر

امس سالتها ليش تاخذين اغراض اختك وتخربينها وتخربين البيت انتي زعلانه انها تدرس قالت ايوه خليني اروح معها

طيب اذا هذي مشكلتها كيف احلها


ولدي الصغير اي كلمه يقولي لا ومسوي رجال من الحين واحس انه بداء يساعد اخته في الخراب

يفتحون المويه سواء ويكبونها ع الفرش

يفكون علبه فاين كامله سوا لو حصلوها

باختصار يتعاونون ع الخراب بشكل رهيب



خلاصه الموضوع انا تعبت منهم وماودي اصير كذا هم اللي حدوني

وللعلم امس يوم يقلبون البيت ابوهم جالس معهم بس مو داري عن احد قاعد الجهاز بحضنه ومادري لين صار جالس بين الركام وكبوا يمكن جركل مويه

ويمكن مايكون صحاني لولا الدمار عشان يجلس ع المنتديات


فكرت اني لازم اصلحهم واصلح حالي

لازم اعالج المواضيع بطريقه عقلانيه

بس كيف ابداء

تصدقون اولادي مايخلوني اجلس دقيقه مرتاحه يعني لو فيه برنامج ودي اتابعه وقفلت عليهم لين ينتهي البرنامج اروح والله العظيم غرفتهم كانها غرفه عمال واذا سالتهم قالوا ليش تقفلين علينا

والله والله ماعمري شفت زيهم يارب يهديهم

اللي عندها اقتراحات

حلول

نتايج تحطها

وراح ابداء بخطتي اليوم ان شاء الله

واعلمكم اذا خلصت منها

اتمنى تتفاعلون مع الموضوع اكيد فيه مثلي والنسبه تتفاوت

 

[دنيتي لكـ]

ككككك اذا لقيتي الحل علمين انا مثلك مايقصرون ابد..

جربت الضرب والمدح والهديااء مافاد

اذا جيت اطلع اتوعدة لا تسوي ولا تضرب واعطيك واسويلك وحيات لمن تنادي..



آخر مرة عند اهلنا شرين معكرونه كرتون مشكل وحطينه فوق علشان المخزن راقي الشيخ ويجدع مع الدرج ويضحك على الصوت وجميع الاشكال اختلطت مع بعض..

 

[انين الخريف]

اهلين دنيتي لك


والله شوفي يمكن العيب فينا

احنا عصبيات


انا سمعت ان الطفل يتأثر من حاله امه

يعني انتي مادورتي والبساط احمدي يصيرون اولادك تمام


وكمان اعرف ناس عصبيين بس اولادهم هادين

والسبب عدم وجود تدخلات في التربيه


انا بصراحه اجتمعت


انا اقول لا وجدتهم تقول ايوه

وربي معاناتي الحين 10% من لما تكون جدتهم هنا

لدرجه يجيني شعور بالاحباط


وللاسف مازال المسلسل مستمر

 

[انين الخريف]

وين البنات

معقوله اولادكم كلكم هادين ماشاء الله

 

[انين الخريف]

انا اليوم سويت حاجه واعطت نتيجه مقبوله


بنتي اللي تخرب على اختها اكيد عرفتوها

قلت لها احنا بنام شويه

بس انتي عسوله وشطوره انتبهي للبيت

وش تبين لعبه اعطيك قبل انام


تبين اقلام ورسم ولا ايش

خفت تكون في نفسها وبعد ما انام تجي تاخذها بطرق ملتويه


اختارت لعبه ثانيه كنت مخبيتها في دولابي

وهذي فايده لما تكون فيه لعبه مره متعلق فيها الطفل وتشيلينها بدون مايدري

انتبهي تشيلين لعبته قدامه

راح يكون لها اثر عليه قوي مره (مجربه زمان )


المهم قمنا وصلينا العصر

وكنت معبيه المسبح مويه (بلاستيكي )

طبعا ولاول مره

ولما وديتهم قلت علشان انتوا شطار




النتيجه


خف الخراب



وصاروا الحين صح ينططون ومزعجيني مره

بس البيت لازال مرتب




ومضه""""

الحين كل مادخلت غرفتي وطلعت

بنتي الكبيره تبوسني (مره تحب المويه والسباحه)

وتقول والله حلو المسبح ياماما

هاه وش سويتوا انتوا

 

[دلوعةزوجي]

حبيبتي انتي السبب100%100
نومك اولا مو منظم علشان كذا اولادك مو منظمين
حاولي تنامون سواء
بقولك اصحى الصباح وبعد ماتطلع بنتك الكبيره وابوها انتي خلصي شغلك اللي باقي وجهزي الاشياء اللي بتسوينها للغداء
روحي خذي غفوة بسيطه وبعدين صحي اولادك وفطريهم وسولفي لهم وانتي تفطرينهم انوا اليوم اللي بيجلس عاقل بأسويله المسبح واخليه يسبح والعاقل بأشتري له دفتر والوان
قفلي كل الغرف والحمامات جيبي العاب بسيطه بالصاله وخليهم يلعبون فيها
ضربك لهم مايحل شي الا يزدون عناد
لو خربوا حاجه خليهم هو اللي يرتبونها
ياقلبي الاساس انتي نومك ملخبط ومأثر كثير بنفسية اولادك

 

[صبا بردى]

أنين حبيبتي لاتشكيلي أبكيلك عندي أربعه ماشاء الله تبارك الله فيهم الخير بس ارتحت شوي لما دخلو الكبار الروضة ..جربي تدخلي بنتك الروضة ولازم تعدلي نومك ياقلبي

لأن نوم الليل مهم جدا للجسم سواء أنتي أو عيالك

 

[لمسه دفا 8282]

ملاحظه...اول شي اتمنى انكم تستبدلون كلمه اشقياء بكلمه حركين ​وبعدين ياعمري نادرا ماتلاقين الحين اطفال هادين والسبب ا لاول هو عصبيه الام لوكل ماغلط طنشتيه اوتجاهلتيه يكون افضل وكثري من الاستغفاركل الاطفال كذا الله يهديهم ويعيننا

 

[عيوف]

حاولي تتغافلين عن بعض الأشياء يعني مو تقعدين لهم ع الصغيرة والكبيرة !!!!

وحاولي بالحرمان من أشياء يحبونها مو بالضرب !!!

كوني هادئة أو بالأصح حاولي ذلك ... حسسيهم بالثقة وانهم قد المسؤولية ... حتى لو كانوا صغار ..يفهمون..

أغدقي عليهم حب وحنان وضميييييييييييييييييييييييهم بقوووووووووووووووة مع الدعاء ... وبتشوفين إذا ما تغيروا ...

 

[سهم العشق]

ما شاء الله عليكم الله يحفظ اولادكم ان شاء الله 000

 

[ميوسه]

عزيزتي


حددي مكان معين لهم او قسم خاص فيهم يكون امن ومكان لعبهم وقفلي الغرف ودورات المياه

نظمي نومك واصحي معاهم

استخدمي التايم اوت او الوقت المستقطع للعقاب وحددي مكان معين او زاويه اذا احد سوا غلط يروح للمكان وبدون مايكون في وجهك تعابير غضب او فرح

وانتي نفسك عليك حق اذا مو ملحقه شغل بيت واطفال وبيت جيبي شغاله لو بالساعات او مرتين بالاسبوع تنظف لك وتفرزن وتشيل عنك


وعودي زوجك ينتبه لهم واطلعي وخليه يجلس عندهم لو ساعه رفهي عن حالك حتى تستعيدي نشاطك بالبيت


بالتوفيق

 

[بيضاء قلب]

والله أغلب الأطفال الأيام هذي حركين وعنيدين ..الله يصلحهم ...
لكن حسك عينك يكون الضرب هو طريقتك في التربيه ... لأنه مايجيب أي نتيجه بالعكس يزيد عنادهم
ويصيرون بس يخربون في البيت يبغون ينتقمون منك ....
تجاربي مع أبنائي ::::
*إذا منعتهم من شي لازم أوضح لهم سبب المنع ... لأن الأطفال ماينفذون الكلام إلا إذا اقتنعوا فيه ...
* إذا سووا شي غلط قدر الإمكان أبتعد عن العصبية ... بكل هدوء أقول ( ماما زعلانة منكم ... لاعاد تكلموني ) << الله يحفظهم كل شي إلا زعلي ...
* في كل وقت أحضنهم وأبوسهم << صرت مدمنه .. وأكثر من كلمة ( ياحبيبي ... ياعيوني ...) أتغزل في عيالي هههههه
* أمدح وأمدح وأمدح أوصلهم السماء ... يموتون بالمدح ويصيرون مطيعين ...
* إذا عاندوا على شي ومافيه فايدة أشغلهم بأي شي بطريقة مفاجئة مثلا أقول يووووه نسينا نسوي .....( أختار أي شي ) يالله يالله نروح نسويه ... على طول ينسون الأطفال الشي اللي كانوا ناشبين فيه
* أحرمهم من الأشياء اللي يحبونها لو سووا شي غلط ولازم أكون حازمة
* وفوق هذا متعبيني الله يهديهم .... هو بصراحة الأشياء اللي أسويها تجيب نتيجه بس يبغالهم صبرررررررررررر وطولة بال ....
ولا تنسون الدعاء لهم بالهداية والصلاح ... احذروا تدعون عليهم ... فربما صادفت دعوتك وقت إجابه ...
وشي مهم لازم إنتي وأبوهم تتفقون على طريقة التربية ... لايجي كل واحد منكم بشي ويتشتتون الأطفال مايدرون وش الصح من الغلط ..
وحاولوا تسمعون وتقرون عن تربية الأطفال .... أنصحكم تسمعون لميسرة طاهر كلامه دررر...

بس هذا اللي عندي وإن شاء الله نستفيد من باقي الأمهات ...

 

[انين الخريف]

حبيباتي والله


والله ماتركت شي من اللي قلتوا

بالعكس هذا منهجي

ماخليت شي زين الا سويته


واقرا واقرا واقرا واطبق

بس من جد تفلت اعصابي منهم

وانا للاسف امسك نفسي واتحمل ضغوط كثيره وبعدين انفجر زي القنبله النوويه

ونومي ماقدرت اتحكم فيه لاني اصلا عايشه بقلق

وكل شي اتحمل مسؤليته حتى زوجي هو ولدي للرابع واشقاهم للاسف


اليوم طلعناهم ولما رجعت شلت كل شي عنهم خطير ونمت في غرفتي ساعه

مااااااارتحت

رحت بينهم ونمت وللاسف ماوقفوا من صراخ للعب لمضاربه والمصيبه

انجن ولا يرمون انفسهم في الارض ولا يطلعون ع الكنب وماخلو شي الا سووه


بعدها سويت العشا

وعشيتهم وسريع سريع ذاكرت لبنتي ونومتها

باقي الحلوين الاثنين

جبتهم معي مره فوق نغسل ملابس

مره نروح نلعب سوا عند ابوهم في الغرفه مع انا ازعجناه وهو جالس ع النت بس كنت محتاجه اضحك لاني بديت اكتم

وشوي اخذتهم وعند التلفزيون

وشوي نلعب

وبعدين نومت البنت ورحت جهزت لبكره سويت اللحم المفروم وسلقت المكرونه وحطيتها في الثلاجه

عشان بكره اسوي مصقعه ومكرونه بشاميل لو تاخرت في النوم


المصيبه لو نمت في الليل

وصحيت الفجر وضروري عشان المدارس لايمكن انام لين 2 او 2 ونص الظهر وبيضيع اليوم كله وانا نايمه

ففضلت اني انام بعد الفجر لين الظهر

واستقبل بنتي وزوجي واغديهم على خفيف

وبعدين بس اخذ لي قيلوله لين العصر افضل

وكذا يصفى جوي

مع اني ما افضل سهر الليل بس الشكوى لله من القلق اللي فيني

وبالنسبه للمفرزنات انا اسويها وثلاجتي مليانه وما احطها الا في حال ما اقدر اطبخ

زوجي يحب الطازه

الشغاله بصراحه جبتها ومرررره ما ارتحت وتبت منها

للعلم بيتي دوووووور وملحق


وام زوجي تاخذ شهرين ثلاثه من بدايه الدراسه وناخذذها لين الصيف وتعيش معي

ولما هي في الديره (ديرتنا )

نسافر لها اسبوعيا

بالله بعد هذا تبغوني اركز في شي

اسال الله ان يأجرني ويعظم اجري

 

[انين الخريف]

بنات ما ابغى اهرج لحالي

وين تجاربكم

 

[صبا بردى]

هلا أنين كيفك ياقلبي..

الله يساعدك شوفي أنا ساكنه في غرفتين بيت اهل زوجي مع أربع أطفال وزوجي أخوهم الخامس

وخالتي ماتطيق وولدي الثالث فطوول الوقت محبوس في الغرفة وهو حركي كثييييييير الله يحفظه فتخيلي الوضع بس !!!!

أنت الحمدلله في خير ونعمه بس ناقصك شوية تنظيم وصدقيني بتمشي أمورك ..وادعي لعيالك كل يوووم مع الفجر بالسكينه والهداية وأن الله يجعلهم قرة عين لك وللمسلمين ...

وصدقيني بتتسن الأوضاع بشكل كبير

 

[fif girls]

من شاف مصيبة غيره هانت عليه مصيبته
عندي بنوته مطلعه عيوني بس تكسر وين القزاز وهاتك ياتكسير تعبت معها أخر شي ضربتها والمشكله انها صار أي شي تسويه خطاء وتشوفني زعلت تقول بتضربيني <<<<<توجع بالقلب
وأخر مستجداتها تطب مع الغسيل بالغساله <<<<وش رايكم؟؟

 

[دلوعةزوجي]

من شاف مصيبة غيره هانت عليه مصيبته
عندي بنوته مطلعه عيوني بس تكسر وين القزاز وهاتك ياتكسير تعبت معها أخر شي ضربتها والمشكله انها صار أي شي تسويه خطاء وتشوفني زعلت تقول بتضربيني <<<<<توجع بالقلب
وأخر مستجداتها تطب مع الغسيل بالغساله <<<<وش رايكم؟؟

يارب سترك وش تطب ياحليلها لا يصيبها شي
انتبهي وقت الغسيل اتأكدي انها بعيده وقفلي الحمام او ماتخلصين لا تنسين وتخلين باب الحمام مفتوح ترى جاهله ماتعرف ولا تفهم

 

[نجوى صالح]

طيب حبيبتي بما ان بيتك دور كامل
الغرف اللي ما تحتاجونها يوميا قفليها
و ارفعي مفاتيحها
و الالعاب لا تصير كميتها كبيره
علشان ما تتعبك بجمعها
كل واحد لعبتين و السلام
دولايب الملابس
و الاحذيه و المخزن كل شي حطي له مفتاح
و بكذا راح يخف عليكي الشغل كثير


و انتهي لزوجك لا تخلينه يتعلق بالمنتديات كثير

 

[همسـ(أنثى)ـات]

انا ولدي الله يهديه عمره سنه وشهرين مطلع عيوني الولد من جبته صياح الى الحين وبالذات اذا طلعت معه ما اتهنا في طلعتي لدرجة اقوم من المكان ارجع البيت .. واذا ماخذته معي انشغل فيه اخاف عليه فاحسن لي اقعد في بيتي ..

والحين قام يمشي والكل يقول لي يالله احملي عليه صار رجال .. وين صار رجال وهو للحين صياح ومجنني .. لكن ماذاقوا اللي ذقته الله يصلحهم بس

 

[منيره.]

الله يعينك عليهم ودايم اسالي الله الاعانه واذا جيتي تنامين قولي لبنتك يالله انا الحين بروح انام وانتي الحين حرمت البيت والمساوله عنه ولازم حرمت البيت تهتم فييه ولا تسمح لحد يحووسه خليها تعيش جووووو وتهتم فيه
واهم يحســــــون لانهم عارفين ان احد بيجي يرتب بعدهم وانتي اذا شفتيهم حاسو خليهم يرتبون وكل ماحاسو اهم الي يرتبون حوستهم عشان مره ثانيه معاد يحوسون لانهم عارفين اذا حاسو بيرتبون


بـــــــــس لوني مكانك كان اول ما اصحى من النووم واشوف المشاهد الحوسه وابوهم قاعد وسطهم على النت اول شي اسويه اصرخخخخخخخخخ صرخه تطيرهم كلهم وتصحي النايم على النت وبعدين اضحك على حااالي >> اعرف نفسي