بيت العائلة ما له وما عليه

[راجيه الرضا]

بيت العيلة اتكلمي عنه شوية يا مايسة?

اولا بس حابة اوضح ان يستثنى من الكلام ده الزوجات الريفية لان ده بيبقي شئ اساسي ولو اعترضت هتدخل في مشاكل كتير ولكن لازم يقرأ المقال ده الزوج اللي من الريف برضة عشان يفهم ابعاد الموضوع ويحسن لزوجته

ايه عيوب بيت العيلة ؟
1/ الاغلب بيبقي في تدخل في الخصوصيات وبعض الحموات بتتدخل في خرجتي امتي كلتي ايه!

2/ الطفل بيتربي في بيئة مفهاش سيطرة عليه زهق من مامته عشان بتفهمه حاجة ينزل لجدته زهق من جدته يروح شقة عمو الطفل غالبا بنفقد السيطرة في توجيه سلوكه

3/لو الزوجة بتنزل تشوف طلبات ام الزوج غالبا مش هيبقي عندها وقت لا انها تركز مع الولاد ولا انها تركز في شقتها ومتطلبات بيتها

4/بيتعاملو بعدها ان ده فرض عين عليكي لازم تشوفي طلبات الكل وتخدمي الكل الا وبكده هتكوني بتعملي مشاكل ومينفعش ترتاحي الا لما كل شئ يخلص في البيت

5/الزواج معناه استقلال هي هتستقل وتروح بيت جوزها وهو هيستقل ويروح يكون بيت واسرة

سؤال هو مش مفروض تخدم امي دي تعبت لحد ما كبرتني وحقها مراتي تشوف طلبتها ؟

مفيش حاجة اسمها واجب عليها تخدم امي لو هنرجع للدين الواجب انك تجيب لزوجتك خدامة اصلا دور في الدين واسأل ..لكن للاسف معظم الرجالة عارفين انه من حقه يعدد لكن بعض الامور التانية في الاسلام بيتغاضى عنها..
امك مسؤليتك انت ممكن تطلب من مراتك وفضل من مراتك وأصل انها تساعدها لكن لازم تفتكر دايما ان الموضوع من مراتك اصل منها وكرم مش انه فرض عين عليها.

سؤال علي فكرة في زوجات بتبقي هي اللي حابة تعيش في بيت عيلة

اه في كده غالبا محدش فرض عليها تعيش الامر متروك ليها فبتقترح هي عشان مش حاسة انها مجبرة

سؤال طيب يا مايسة انا شاب ومحتار اتجوز في بيت عيلة ولا شقة مستقلة؟

والله طالما في اختيارين يبقي اختار الشقة البعيد بيت العيلة مشاكله كتير والبعيد حلو اوي وغالي اول ما بنقرب بتزيد المشاكل

سؤال طب يا مايسة ايه المشكلة لما تعيش مع حماتها هي مش قعدت مع مامتها تعتبرها مامتها وتراعي ربنا فيها ؟

عندك حق هي لازم تعتبرها مامتها وتراعي ربنا فيها لكن عندي حاجة احبك تعرفها انها حتي مامتها ممكن تختلف من فترة للتانية معاها ف مابالك لو اختلفت مع حماتها المووضوع مش هيمشي بنفس السهولة ومتقولش ليه تختلف؟ كلنا بنختلف

سؤال طب يا مايسة انا عايشة في بيت عيلة وخلاص بقوا شايفين ان ده شئ اساسي يتدخلو في حياتي واشوف متطلبات البيت كله ؟
مينفعش فجأة تتغيري والا انتي اللي هتكوني سبب المشاكل لكن بطلي تعيشي دور الجدعة طول الوقت وتدريجيا اعملي المطلوب منك فقط تديجيا اسحبي نفسك واخلصي اي حاجة بتعمليها لله لان غالبا محدش هيعترف بجمايلك واتكلمي معاه بهدوء خصوصا لو هو متفاهم..

سؤال طب يا مايسة احنا عايشين وزوجتي بفضل الله بتحب امي وبالعكس بتساعدها في تربية اطفالنا

تمام جدا طالما الزوجة مرتاحة والبيت مقفول عليكم بحيث انكم مركزين في تربية اطفالكم يبقي حلو جدا بس ده ميمنعش انك من فترة لتانية تشكرها انها بتكرم اهلك

طيب يا مايسة انا معترف بكلامك وشايف المشاكل اللي كل يوم بسمعها من امي وزوجتي لكن معنديش اختيار هكمل الفترة دي لظروف ما في بيت العيلة اعمل ايه؟

تمام ماتسمحش لحد يهينها.. قولها انا مقدر تعبك هتلاقيها مشيت معاك بمبدأ لاجل عين تكرم الف عين

مميزات بيت العيلة ان لو اهل الزوج كويسين بيبقو سند لبعض والبيت بيكون امان لو حصل حاجة عند حد

سؤال طيب يا مايسة هما فعلا مش بيراعو ربنا فيا خالص وبيشحنوا زوجي عليا طول الوقت ده كمان هو ودني وبيسمعلهم اعمل ايه؟؟
هتكلم عن الموضوع ده في مقال مستقل انتظروه?
#مايسة_كمال​