بنتي

[همبا]

ساعدوني يا بلقيسات ... عندي بنت عمرها 3 سنوات وهي وحيدتي ( الله يخليها لي ويحفظها) ما شاء الله عليها صايرة شيطانه وايد وما تقعد بمكان الا وتعفسه وتضارب مع البشكارة ومعاي وانا اداوم واتم احاتي لا تضرب البشكارة وهذيك يمكن تضايج ويمكن تضربها واتم اوسوس طول ما انا في شغلي

صدقوني انا لوما حاجتي للشغل ما اشتغلت بس شو اسوي ؟!!!!

أبوها صار يضايق منها والله انها طول الليل تسهر مع انها ما اتنام الظهر !!!!!! عندها غرفة بروحها بس من دلع ابوها قامت اتنام عندنا واتسهرنا للثلاث ( عطيني ماي +وديني الحمام+قوليلي قصة+ ...

تدرون انها بدت اتبول بفراشها ( هالشهر سوتها مرتين ) مع انها ما كانت تتبول في فراشها بالمرة!!!

والله محتارة مب عارفة شو اسوي ... دخيلكم دلوني على طريقة

 

[محرومه من زوجي]

حبيبتي اعطيها جزء من وقتك للعب معها والمزاح
يبدوا ان ابنتك تعاني من الوحده
ولما يجيها اخ بتتغير وتكون هاديه,,
الله يخليها لك...

 

[نور البدر]

عادي حبيبتي في هالسن إنها تسوي جذيه .. في هالعمر هي أكيد تبغي تكون هي المسيطرة على الوضع .. ومن اللي فهمته من خلال كلامج انج وايد مدللتنها .. بحككم إنها وحيدتج .. ولو يا أخ أو أخت لها .. بتكون تصرفاتها أعنف مع الكل .. وأنا أكلمج من خلال تجربة ..

انتي تقدرين إنج تكسبين هالشيطنة اللي فيها بشي إيجابي .. في الفترات اللي تكونين فيها في البيت .. بعد الدوام ..

أول شي برمجي مفسج إنج ماترقدين بعد الظهر عسب ماتحس إنها وحيدة وانتي في الدوام وانتي في البيت .. وإذا مب قادرة إلا ترقدين الظهر .. وعيها الصبح وخلي الخدامة تشغلها وماترقد إلا يوم توصلين البيت بالسلامة طبعا بعد الغداء بتكون هلكانة من الرقاد .. ورقديها وياج .. ويوم بتنشين وعيها وياج .. وتمي وياها العبي ألعابها المفضلة .. ألوان .. تراكيب .. أي شي ممكن يشدها .. بس من دون تدليل زيادة عن اللزوم ..

علميها تبادل الأدوار بينج وبينها .. يعني هي تكون الأم وانتي تكونين البنت .. وقولي لها انتي ماما .. يالله لقميني .. يالله غسلي لي ايديني شي وساخة .. وجذيه .. لين تحس إن السالفة فيها تعب وتهتم من الحين إنها تحافظ على مشاعر غيرها ..

علميها إن كل شي فيه عقاب وفي ثواب .. وإذا عاندت طنشيها فترة مسوية عمرج زعلانة منها .. بس بيني لها الحب .. يعني ما له داعي العنف الزيادة .. خلج إنج زعلانة .. وهي بطنش .. وبتحاول تكلمج وانتي قولي لها إنج زعلانة لأنها سوت كذا وكذا .. ومرة من مرة بتفهم .. بس بالحنية والحب وبدون تدليل زيادة عن اللزوم ..

لأن كل المؤشرات اللي قلتيها تدل على إنج واااااااااااااااااااااااااايد مدللتنها .. الدلال الفاسد للأخلاق ..

وبالنسبة لليل .. إذا طلبت ماي عطيها .. بس قولي لها بحزم .. خلاص ارقدي .. ماشي ماي .. خلص ..

أتمنى إني أكون أفدتج عزيزتي وخبرينا شو بيستوي وياج الغالية

 

[تاج الماس]

السلام عليكم أختي

بصراحة أختي أثرت شفقتي عليك و على ابنتك الصغيرة الظاهر كما قالت الأخوات أنها مدللة كثيرا و لكن ما من مشكلة الا و لها حل بإذن الله المهم في البداية ألا تشغلي بالك كثيرا بالتفكير في هذا الموضوع لدرجة الإرهاق لانك ستتعبين نفسيا و جسديا أيضا أبعد الله عنك كل سوء

حاولي التفكير في جذور الموضوع لتعرفي أسباب هذه التصرفات و بمعرفة الأسباب يسهل عليك العلاج بإذن الله

أنصحك بقراءة كتاب (كتيب الجيب) للأطفال من عمر 2-5 سنوات جميل جدا و فيه حلول سريعة و عملية و رائعة لمعظم المشاكل التي تواجهنا يوميا مع أطفالنا

يسر الله لك جميع أمورك

 

[حب رومانس]

مثل ما قالت لج الأخت أنا بنتي كملت الثلاث والحين بالأربع فوقها ولد وتحتها ولد وهي اللي صايرة ولد تعبت وياها وايد شيطانتها أكثر من الولد بسبتها حسيت ولدي خكري وهي الولد تعبت لا عقاب ولا حنية ولا شيء نفع مزاجية وعنيدة جدا أن طق براسها هذاك اليوم صارت قمة في الأدب والأخلاق والمطيعة والمساعدة وأن طق صارت طول اليوم عنيدة وشيطانية وراسها يابس ولا أكبر عقاب ولا جزاء ينفع وياها ولا حتى ثواب

 

[همبا]

جزاكم الله كل خير خواتي ومشكووورة وايد يا نور البدر على نصايحج الحلوة ومن جد احسها جدا بتكون فعالة .... بدأمعاها من اليوم وبخبركم بالنتائج الل يساعدني.