بنات تكفون ساعدوني زوجي بيضيع مني وحياتي بتنهار
بنات الله يجزاكم الجنه كلكم ان شاءالله تكفون ابي رايكم ودعواتكم لي انا اول مره اشتكي لاحد واكتب في منتدى لكن لما شفت اهتمامكم في بعض ومساعدتكم حق بعض قلت اكيد مابيقصرون معي وبعد تردد طويل قررت اني اطرح مشكلتي وابي رايكم بعد ماتقرونها انا كنت ابي اكلم الدكتوره ناعمه بس قالولي مو موجوده وبتطول على ماترجع وانو فيه استشاريات غيرها قلت ابي استشيركم اول اكلم الاستشاريات او ادخل دوره استراتيجيات التعامل مع الزوج الخائن تكفون بنات لا تخلوني انا ضايعه مدري وش اسوي.........في البدايه انا شماليه غربيه وزوجي شمالي شرقي ...متزوجه من 8 سنين ونص تزوجت صغيره حيل كان عمري 16 سنه وكان عمره 24 وقتها .. المهم بدت المشاكل مع بدايه زواجنا من امه وخواته والسبب الرئيسي الغيره انا حلوه حيل والكل يقولون عني ملكة جمال ماشاء الله ونعومه ودلوعه ورومنسيه هذي بشهادة زوجي من الاول وهوكان متحطم عندي حيل وهذا الشي مجننهن ..,..قبل لا نتزوج كان معروف انه ماعنده خرابيط ابد ولا يحب الاسواق ولا حركات الحريم وعبايه الكتف مستحيله ولما نطلع يقولي غطي عيونك لاحد يشوفها وبنات جماعتنا كلهم متحطمين عنده خصوصا انو توظف وظيفه مرموقه حييييل وانا من قبل عند اهلي البس كتف واتغطى نص وكنت مدلعه حييييييييل والتغيير هذا اللي مر علي من زوجي ماضايقني قلت اكيد لانه يحبني ويغار علي .....امه وخواته كانو يحنون عليه يبونه يتزوج علي وانا عروس لي 3 او 4 شهور من القهر اللي فيهم لما يشوفونه طاير فيني وهو كان رافض وكانو يوصفون له الحريم ويمدحون فيهم عنده وهو رافض وخواته كل يوم والثاني بالسوق ومايرضون احد يوديهم الا هو ويقولون له انت رح تمشى وحنا نتسوق واخته الثانيه تقوله تدري ان صديقتي معاي في الجامعه شافت صورتك وانجنت عليك تقول واو يجنن ابيه ابيه >>>شوفو النصابه هو عادي حيل والغالبه يقولون شين >>>وتعرفون كثر الدق يفك اللحام يبن يطيحنه بالحريم حسبي الله عليهن والحين تعالو شوفو مصيبتي زير نساء اعوذ بالله فيه مرض اسمه الحريم وتحققت كل اماني امه وخواته ....بدت السالفه واحنا لسه ماكملنا اول سنه زواج وكنت حامل بطفلي الاول وقتها ماادري وش جاني وقتها وحسيت انو في شي غير وقمت وفتشت جواله وكانت المصيبه مسجات واتصالات وحب وغرام من وحده وفيه تقريبا حوالي 10 ارقام بدون اسماء شيكت عليها كلها ادق واسمع الصوت واقفل وكلهم طلعو بنات انصدمت صدمه عمري وبكيت على مخدتي لين طلع الصبح وانا اقول هذا هو اللي ماعنده حرمات وخرابيك ...الارقام شكله ماخذهم من احد ولسه ماكلمهم بس كلم الاولى يعني هذي اول مره يكلم فيها حريم مسكت جوالي ودقيت على الرقم اللي مرسله مسجات وردت علي وحده وهزأتها وقفلت جاني بعد ساعتين ووجهه اسود ويتراجف ويقوللي اانا اسف واحبك وماادري ايش ومن هالكلام بعدها سامحته بس مانسيت ولا عاد وثقت فيه وصرت كل فتره اشيك على جواله واشوف المكالمات والخيانه واسكت واقول يابنت الحلال مشيها لا تسوين مشاكل مصيره بيرجع لك ..حملت بطفلي الثاني وولدت والاول عمره سنتين وكان زوجي مبسوط يعني الى الأن ماكملنا 3 سنوات زواج بعد ماطلعت الاربعين رحت وسويت نيولوك واعجبه حيل وكنت ادرس وهو وظيفته في مدينه ثانيه من زواجنا كان يجي بالويكند بس وسالفة اروح اعيش معاه مستحيله من امه المهم كمل ولدي 3 او4 شهور يومها فتحت جواله لقيت الامور متطوره كثير متعرف على وحده جديده ويطلع معها وصحباتها وبنات عمها كلهم يعرفونه وهي تحبه حيل وفيه علاقه قويه بينهم وهو فيه يمكن 20 وحده غيرها عنده ...جيت ناديته وقلت مني هذي قال ليش تفتحين جوالي ..انا اخانق مين هذي ياخاين وهو كل همه ليش تجين الجوال وجلس يصارخ ويخانق وقال مالك دخل ايه اكلمها واحبها وانتي انقلعي وبما انك فتحتي تلفوني انتي طالق قلتله بعد فوق ماانت خاين وكذاب بعد تطلقني وقام بعد ماطلقني وضربني وصفق راسي على الباب وجلس يرفسني ويتكلم علي وييحذفني على السرير وطق راسي بخشبه على طرف السرير ودخت وقتها والدم على وجهي وجو اهله وتدخلو وهو يقول طلقتها ماابيها ويصيح بااعلى صوته قام ابوه طلعه برا البيت وامه جات عندي وجلست تهدي فيني وتبغي تعرف الموضوع قلتلها انو خاين ومسكت جوالي ابغي ادق على اهلي وسحبت الجوال وقالت اذا رحتي حياخذ عيالك وبيتزوج وانتي الخسرانه قلت مايهم قامت قفلت علي الغرفه واخذت الجوال والصغار كانت خايفه احد من اهلي يدري ينفضحون وقتها وخصوصا لهن يد باللي صار وجلست و الباب مقفل علي لثاني يوم ..سوري بنات شوي واكمل نفسيتي حيل تعبانه اقسم بالله دموعي مو راضيه توقف مو قادره اشوف الكيبورد
اسم الموضوع : بنات تكفون ساعدوني زوجي بيضيع مني وحياتي بتنهار
|
المصدر : الأستشارات الزوجية العامة