بموت غصة وقهر..شوفوا حواري مع زوجي يوم قلت بشتغل ..

[قلبي]

السلام عليكم ورحمة الله وبركاته

خواتي حبيت أخذ رايكم في هذا الموضوع شو أسوي فيه وكيف أثبت حقي من البداية وتكون لي شخصية مايقدر حد يمشيها على كيفه ...

المهم أنا طلبت من ريلي أشتغل..فتفاجأت إنه يقول ..وايد زين أنا موافق الصراحة إنتي قدها وقدود فرحت وقلت له الصراحة الشغل وناسة فقال صح غير جذي بنقدر نسافر برا في الإجازة نص التذكرة عليج والنص الباقي علي وغير جذي بنوفر لبناء البيت ..(إهني أنا أحترقت وكل مرة أسكت عن حقي وكاأتكلم خجل منه وإستحياء ,, لكن قلت خلاص لازم تكون لي شخصية وشخصية قوية ) فقلت ياااااااااسلام ,,لا طبعا هذا المال ملكي وأنا القيمة عليه وأتصرف فيه مثل ماريد ..إنس إلي في بالك ..طبعا هذا بإسلوب راقي ..ومزح مع إستخدام عبارات الجدية ..المهم كان يقول أنتي بتطلعين من البيت على إحسابنا ولازم إتشاركين في دخل البيت.. مع إنه ماشاء الله الراتب يكفي .قهر والله المهم ماعلقت ورد وقال الشغل وايد زين ..وسكتنا

طيب خواتي أنا خاطري أشتغل بس أخاف باجر يتعذر وماينفق علي ويحرجني كل شوي في المال اللي عندي ويقول نحن شراكة وزوجين ولازم نضحي ..ولا أخفي عليكم قبل أنا إشتغلت والصراحة كان يوم أطلب منه فلوس بشتري شي يقول وراتبج شو سويت فيه ..وصار مايزكي عن ذهبي ويقول أنتي زكي أنا طبعا هذا الموضوع كان عادي عندي وصرت أزكي عن ذهبي ..بس ياخواتي صار كل ماقول له أريد أشتري شي من الأثاث يتحجج ومن غبائي كنت أروح وأشتري الأثاث ..بحجة إني ليش أذل نفسي ..

من رايكم أشتغل ولاا لأ ..تحرج عن المشاكل؟
وإذا إشتغلت شو الطريقة اللي أتبعها ويا زوجي وكيف تكون لي شخصية قوية ..أنتظركم خواتي ردوا علي الله يرضا عليكم .. بموت غصة وقهر

 

[ام شوق]

عزيزتي سمعيني يا قلبي انتي لازم تشتغلين لان الوحده اللي تشتغل تثبت وجودها وتكون لها خصوصيتها

بالنسبه لزوجج ما يحق له ياخذ درهم واحد من راتبج واذا خذا او عطيتيه من راتبج تأكدي انه تعتبر صدقه عليه الشرع يقول,

واذا الزوجه تشتغل وتكون غنيه ملزوم شرعا ان الزوج بعد يصرف على زوجته

 

[زمان الصمت]

صحيح الشرع يلزم الزوج بكسوه زوجته مو العكس مع ان ها احد اسباب تركي للوظيفه زوحي قام شوي شوووي يعتمد على راتبي؟؟

ايه والله نبي نعرف الظريقه كيف تمنعيينه باسلوب يفكر براتبك ؟؟

 

[ام عبادي]

اختي اذا زوجج راتبه زين وماعليه قصور لا تشتغلين لانه راح يعتمد عليج في كل شي لاني انا صار لي هالشي مع زوجي وكنت كل ما أقوله انت وين راتبك يقول لي انا علي ديون :in_love: اشدعوه اش هالديون اللي ماتخلص طول هالسنين بس في يوم من الايام قررت اني اقدم استقالتي وتفجأ طبعا زوجي بهالقرار وبعد الاستقاله اكتشفت اشياء كثيره وصار يعطيني مصروف 4500 شهريا يعني طلع كذبه لاديون ولا شي حااااااااااااااااااااااااااسبي اختي اذا زوجج من النوع الاتكالي اخذيها نصيحه لاااااااااااااااااااااااااااااااااا تشتغلين

 

[زهرة البوادي2006]

اختي نصيحه لما تشتغلي وفكرتوا تشتروا بيت او ارض او سيارة لازم يكون لك النصف اختي اشترطت على زوجها ولما بنوا البيت كان لها نصف وله نصف في ملكيه البيت والسيارة باسمها وسيارة باسمه حاولي تاخذي حقش والله يوفقك

 

[قلبي]

خواتي الحبيبات أم شوق وزمان الصمت وأم عبادي ..أشكركم على ردودكم ..المشكلة خواتي إنه يعرف هو إن هذا المال حقي ولازم مايسألني فيه ..بس يتحجج بمسألة إن مادام إحنا خليناج تروحين وتشتغلين وهيأنا لج الجو ..فرد لهذا الجميل لازم تساهمين في البيت ...قهر

وأنا أعرف وحدة من العايلة تخيلوا خواتي هي تشتغل وساكنة بيت أهل زوجها وطبعا ..راتب زوجها كل ينفقه على بيت أهله وهي تنفق على نفسها وزوجها من راتبها ..وغير جذي يوفرون للبيت وطبعا يوم سألناها قالت أن أم زوجي تمسك العيال فلازم أنا أساهم معهم براتبي ..قلت صح كلامج تعطينها شي من الراتب تشترين لها بس مب تنفقين أنتي على البيت ..

يشهد الله إني أريد أشتغل مب للحاجة بس لنفسي أتعرف على الناس ياخواتي لاتنسون الشغل يقوي الشخصية كثير ويكون للمرأة كيان وعندها مالها الخاص بالتالي الزوج يعمل لها ألف حساب ..وأنا الصراحة أموت في هلي وودي والله أخدمهم بكل مالي لأنهم تعبوا علينا ولاردينا لهم شي بالذات البنت تتزوج وتطلع ..والولد يكون له الفضل على واللديه .

وأنا قررت ماأستسلم لكلام زوجي,, ولا أقول مابشتغل علشان أخاف إن المشاكل تزيد ..أريد أشتغل بس في نفس الوقت نريد طريقة نتبعها مع الأزواج اللي يعتبرون مشاركة المرأة العاملة في جزء من البيت شي ضروري ..

لاااااااااااااااااااااازم نلقى حل ولا نتنازل عن طموحنا أبد ....يالله فزعتكم خواتي علشان الكل يستفيد ..
يارب نوصل لحل ...

 

[مرجانة]

حبيبتي اشتغلي عشانك إنتي تكوني مستقلة وشخصيتك تصير أقوى
بس لازم تعرفي كيف تحتفظي براتبك ولما تعطي زوجك من الراتب
بتفهميه من طيب خاطرك بتعطيه مو لأنو طلب منك
وأنا برأيي من أول راتب تاخديه قوليله إنك داخله بجمعية
وبعدين بيتعود إنو راتبك مو معك
وقبل ما تاخدي فلوس الجمعية فكري بمشروع صغير
حتى لو ما كان ناجح المهم يعرف إنو ما في أمل بفلوسك

 

[قلبي]

حبيبتي مرجانة أشكرج على ردج ..صدقتي هذي طريقة حلوة عيبتني ..لازم نشغل فلوسنا مانخليها في البنك ...:icon30: :icon30: :icon30:

يالله خواتي خلونا إندور على حلول أكثر حتى إذا تعرضنا لأي مسائلة نعرف كيف نرد ..بس
أنا خايفة يوم بيسأل مثلا متى فلوس الجمعية بتاخذينها وبعدين يبدا ماينفق علي في هاذي الحالة شو نسوي ..؟؟؟؟؟؟؟

المشكلة إنهم يصيروا إتكالين درجة أولى ...فهل الحل إن نساهم بشيء من الراتب للبيت ولا الأفضل إن مانتنازل عن حقنا أبد خوفا من إنهم يتعودون علينا ويتكلون علينا في أمور البيت ..

يالله الصرااااااااااااحة والله هم وقهر ..أنا ماأدري الزوجات إلي يشتغلون كيف يتصرفون في هاذي الأمور ..

 

[قلبي]

خواتي الحبيبات فزعتكم لازم اليوم أقرر وأرد على زوجي ..ولازم يكون قرار صحيح ..
والله محتااااااااااااارة ..الله المستعان

 

[حبيبي دقايق من وقتك سلف]

معاشج لج كاااااااامل ولاتدفعين له ولا ربع ومع هذا خذي كل شهر الففففف
لاتعودينه وتغلطين غلطت غيرج الي مازالن ايعانن !!!!!!!!!!!!

 

[الموج الثائر]

حبيبتى انتى ادرى بظروف بيتك وبزوجك ... يعنى اذا كان يريد منك ان تشاركى معاه في بناء البيت قولى خلاص نتفق من الاول انه سادفع مبلغ معين انتى تحدديه ولازم تكتب البيت باسمك مثله تمام والا لن اشارك ... وباقي مرتبى لا دخل لك به ولن اصرف شيئا على المنزل

وليس عيبا ان تشاركى زوجك في شئ ولكن مع حفظ حقك واذا كان فعلا محتاج واذا رفض موضوع الشغل قولى اوكى خلاص وبعد فترة كلميه مرة تانية

ممكن ان تقولى كذلك اتريد ان تاخذ منى ثمن موافقتك على عملى لم اسمع بذلك اخبرنى من يفعل ذلك

 

[قلم اخضر]

رتبي امورج الماديه من الأول ومووووووول لا تضعفين جدامه لأنه الريال يتلون حسب المواسم موسم الخيانه تلقينه طيب وحنون ويسويلج الي تبينه خصوصا سالفة الفراش والموسم الثاني حزة الدفع لأي مستحقات ماليه للبنك .. للمقاول
تلقينه آآآآذان صاغيه لج ويرد على اتصالاتج ويبلج هدايا ....... خبره حبيبتي
انا عن نفسي خليته يتحسب عمره بيسوي الي يباه بس من اشتغلت فهمته انه ابويه خلا 70% من راتبي ينزل في حسابه عشان يوفرلي اياه ويشتريلي اراضي مع اخواني والباقي يدوبك قسط سياره ومبلغ صغيرون حق امي وبترول
ما عيباه وقام ينافخ عليه بس زوجي خواف من قتله اذا عندك شي روح كلم ابوي يسكت ويطلع وتم على هالحاله فتره بعدين عرف ان الله حق وانه جدول التزاماته للبيت بيتم مثل ما هو وانا ما راح اغطي عنه شي
لا تخلينه يلعب على حساب راتبج شوفيلج تتبيره ولا سوي مثل ربيعتي قالة حق ريلها انها بتشتغل بس راتبها بيكون محلي يعني شويه مب اكثر من 5000 وبعد كمن شهر سوت سالفه انه واحد من اخوانها مديون وبينسجن ولازم حد يدفع عنه وفقالتله انها خذت سلفيه من البنك 200000 وبتدفع 3000 شهريا قسط والف حق اهلها والف يدوبك يكفي بترولها ؟؟
وهي اصلا فاتحه بالــــ 3000 حساب توفير و1000 داشه ابهن جمعيه مع موظفات في الدئره وراتبها يعدي 10000 بس ماقالتله كل شي في البنك ياحبي ينزل بالتمام والكمال
اتصرفي بس خلي ايده في الماي البارد قبل ما تحرقين جدول الإكسس الي بيسويه حق راتبج ؟
واذا حابه تشاركينه بشي خلي كل شي موثق بالأوراق والنص بالنص يا عيوني

 

[عطر الليل؛؛؛]

فكرة قلم اخضر رائعة والبنات بعد ما قصروا ..

لا تبلغينه كم راتبك بيكون ..

قلليه مرة ان شاء تقولين 2000 ريال لاني على بند احتياطي مو ثابت ..

وسايسيه الحين لين تظمنين الوظيفة .

لا تخبرينه عن هالخطط الا لما تضمنين الوظيفة وقبل نزول الراتب الاول باسبوعين تقريبا ..

بعدين قولي هالمبلغ البسيط دخلت به جمعية مع صديقاتي بالدوام علشان انميه ..

واحفظه مادام مبلغ بسيط وما يسوى ..

يعني اعتبرني ما استلم راتب ..

 

[النرجسية]

تحيااتي إليك يا (قلبي ) ..
حلو إنك تفكرين تشتغلين .. لكن أنا أقولك حاجة :
سمعت من أحد الشيوخ : خروج المرأة من منزلها للعمل معناته أنها أخلت بجزء من مسئوليتها في البيت .. ولهذا عليك أن تصرفي على نفسك .. وأن كان هناك شغاله أعطيها من راتبك وكذلك السواق
وش بقى من هالراتب وإذا قدرتي توفرين ادخلي جمعيه ..
أنا ماجبت هذا الكلام من عندي .. لأنه الازواج اشتكو للشيخ وهو معروف بالسعوديه
قال : تصرف على نفسها لأنك أهملت جزء من دورك في البيت
وإن كان زوجك مبسوط .. كبري المخدة ونامي

 

[Pink Dove]

ياحبيبتي كثير من الشيوخ قالو ان المرأة تأخذ من حق زوجها وبيتها عشان تشتغل ولو طلب منك مساعدة في البيت بيكون من حقه عادي وهو يتكلم صح .. طبعا هذا ليس تحيز بس أنبهك للنقطة ,, الرجال كلهم لو اعتادوا على ان المرأة هي اللي بتساعد وبتصرف وبتسد ,, بيكبر راسه حتى لو معاه فلوس ,, وبصراحه انا لو مكانك مااشتغل ابدا ,, وليه اشتغل واتبهدل وفي النهايه يااما ياخذ من فلوسي وسضيع الباقي على اشياء تافهه واولادي محتاجينلي ,,

اجلس في البيت معززة مكرمة وهو يصرف علي وفي هذه الحالة لو طلبت منه اي شئ يعطيني لانه دخلي الوحيد

 

[Pink Dove]

أم فصول ,, سلمت يمينك ,, هذا مااردت قوله

 

[قلبي]

جزاكن الله خيرا أخواتي الصراحة إستفدت منكم كثير ..أنا الصراحة خاطري أشتغل للأسباب منها مساعدة أهلي ..تدرون أن الريال مايعتبر من واجباته مساعدة اهل الزوجة ..وفي أزواج يبخلون على أهل الزوجة بالهدايا البسيطة وشوفي حال الزوجة المسكينة اللي تود تفرح أهلها وأخوانها أو تهدي لصديقتها شيء كيف حالتها مع الزوج الذي يرفض وبشدة ..الصراحة هذا الأمر يضايقني وايد ..وأبكي كثيرا بسببه لأني ماأعرف كيف بيحس بأهمية هذا الأمر ..والله أعرف حريم نص راتب أزواجهم للأهلها ..الصراحة ماأدري الغلط منا ومن طريقتنا أو أسلوبنا ..الله أعلم ..

 

[قلبي]

زوجي طيب بس هذي نظرته أنه مب لازم هو يشتري هدية للأهل أو الصديقات ...وعند نظرة أن الزوجة لازم تساعد زوجها مادام تشتغل ..أنا مب مشكلة عندي بساعده أكيد بس ماأبي يتعود علي ..وبعدين مايصرف علي ..من أيام كنت حابة نصيف برع رفض بحجة مضيعة الوقت ويوم كلمته عن الشغل قال ياسلام بنسافر برع نص التذكرة علي والأخر عليكي يعني ماكانت علت رفضه مضيعة الوقت بل لأن التذكرة والسفرة بتكلفه ..طيب ليش التناقض ..

 

[أمل كبييير]

ياقلبي والله كانج تتكلمين عني
كنت اشتغل هو ما يطلب مني فلوس بس لما ابي شي دايما الرد معروف الحين صعب انتظري لين يخلص القسط الفلاني ولين ارد دين اخوي وجد جدي والقصد اكفي نفسي مذلة السؤال واشتري اللي في خاطري طبعا اتكلم عن كماليات اما الضروريات بامانه يوفرها حتى لو يتسلف
بس من وين يتسلف يتسلف من عندي قلت ماعليه احسن ما اروح اضيع فلوسي واقول انا وانت واحد تمينا نكتب كل مبلغ يحتاجة
سبحان الله سارت لي ضروف واستقلت وبصراحة ارتحت لان فلوسي ما اتهنى فيها كل يتسلفها واخواني ينصحوني ان السالفة طولت صح انا اثق فيه بس من اللي نسمعه والله نخاف
المهم بعد ما استقلت نهاية الخدمه بعد اتسلفها وكتبنا كل اللي لي عنده وبدأنا اشتريت سيارة جديدة بنصف المبلغ عن طريق راتبه والنصف الثاني يسددها شهريا بس المشكله لاني تعودت ما اطلب فلوس سرت اصرف فلوسي في اشياء احس ما بيتقبل اطلبها منه مثلا هدايا لبنات عمي في زواجهم ترميم لاسناني وتقويم يعني هالا شياء اللي يشوفها مب ضروريه
بس الحال مثل ما هو الراتب قبل نهاية الشهر مخلص واقساط 3 سيارات احيانا اعذره واحيانا اقول ليش اللي يرتب نفسه وينظم اموره الماليه بيرتاح بس الحين 8 سنوات زواج والحاله مثل ما هي شهر اوكي وعشرة شحات
والله يعين

 

[النرجسية]

كنت ياخواتي موظفة .. وراتبي اصرفة على نفسي وعيالي وبيتي بعدين ما كان ذاك الراتب بس أنه يوفينا حصلت ظروف واكتشفت إن الحاضنه حقت عيالي .. تضربهم( كانو في حضانه أهلية ) ولا عندي أحد من أهله وأهلي بالمنطقة .. أخذتها براسي وجلست .. والله بعد كم شهر طلبوني معلمة ورفضت كان الراتب 6000 ريال مو عشان زوجي أو إنه مبسوط لا والله بس وين أودي عيالي قلت : والله لو عشرة آلاف ماأروح تفاجأت الموجة وقلت : يمكن فيه وحده محتاجة لهذي الوظيفة وظروفها أسوء حاولوا يوقعوني على ورق بأني رفضت الوظيفة رفضت : خفت يجي يوم احتاجة وأكون قطعت رزقي بإيدي .. والله إن زوجي ما زعل .. أنا أحب الشغل .. وزوجي وده .. وكلمته كذا مره عن الشغل رد علي وقال : امسكي عيالك واللي تبينه اجيبه .. الحمد لله مأقول إني اشتري ماركات بس مرتاحه الفلوس تجيب مشاكل وحساسيه بين الزوجين .. يمكن أنا أنا ندمانه على رفضي لهذا العرض بس عيالي عندي فوق كل شي .. ولأن زوجي رافض فكرة الخادمة نهائياً .. يأختي ارتاحي وإذا لك شي بتآخذينه ..
وادعي هذا الدعاء ( اللهم سخر لي من وليته أمري ولا حول ولا قوة إلا بالله )