بعد معاناه مع الريجيمات تعالوا شوفو وش سويت

[زاحفه]

السلام عليكم ورحمة الله وبركاته
الله يصبحكم ويمسيكم بكل خير...
وجعل الله ايامكم في حب وسعاده....

بعد معاناه مريره مع الريجيمات وكل يوم افتح النت ادور لي على افضل ريجيم
مره كيميائي مره فيزيائي مره رياضياتي <<<STOP
و اتحمس واقوم اطبع في ذا الاوراق واعلقها على الثلاجه ومن اليوم الثاني
تلاقي لسته بالطلبات
قريب فروت , بروكلي , كرفس ,تونه , وجبنه مدري وشسمها
الحمد لله والشكر على نعمه .. بعدها اتحمس واعلن قراري ....
وداعا للدهون .... وداعا ايها الاكس لارج ...
وخلاص ببدا من يوم السبت ....
>>> مدري ليه اللي بيسوي ريجيم يقول ببدا من يوم السبت؟؟؟؟؟؟؟؟
طيب الربوع وش فيه مسكين

موب من ايام الله ؟؟؟ :dunno:

المهم اني ابدا في الريجيم ولايجي نص اليوم الا وانا دايخه ومصدعه

ونفسي تقلب والنهايه يخلص الاسبوع واكون نزلت كيلو او اثنين بس عظامي
احسها مكسره من الارهاق...
او اني اخربها احد الليالي واسري على الثلاجه....واخرب ابو الريجيم ...
الين ماهداني الله لهذا النظام الرائع واستمريت عليه الى هذا اليوم
لانه برنامج مره ممتاز.. صحي.. ومريح ومايتعب ....

طبعا النظام من راسي واعمله ارتجالا
وراح يكون سهل على الجميع ومايحتاج ورقه وقلم ولا طباعه ولامقاضي
يعني كل اكلك من الموجود بالبيت والمتوفر...

وعشان تتحمسوا وتدخلوا معاي في الجو انا نزلت 13 كيلو و وصلت ولله الحمد
تقريبا لوزني المثالي ومو بس انا اللي طبقته كمان ثنتين من صاحباتي جربوه
وحده نزلت 20 كيلو ولازالت مواصله والثانيه نزلت تخيلو يابنات من وزن 75
صايره الحين 50 هاااااه اشرايكم ؟؟؟؟؟؟؟؟؟؟:clap:
احد تحمس معي ؟؟

طبعا نظامي هذا سبق وكتبته في احد المنتديات وحقوق الطبع محفوظه

 

[مـــيرة]

حمستينااااااااا ........

يالله شنوووووووو الرجيم

 

[بلقيــس 2009]

ماشاء الله تبارك الله ...
الله يعطيك العافيه ياليت لوتكتبينه لنا ونكون شاكرين لك.......
انا بصراحه لي فترة مبطله ريجمات بس تخفيف بس وزني ينزل ببطء واحس لازم نظام معين علشان امشي عليه واهم شي صحي ومضموون ......
لاتطولين علينا يالغلا انا يبلي 15 كيلو على شان اوصل للوزن الي ابيه ...

 

[الرزيـــــنة]

ماء شاء الله الله يوفقك وينحفك ونتي بصحه وعافيه
بس ياليت تعطينا نضامك في الرجيم وجزاك الله خير

 

[الطبعَ الخجوُل]

ههههههآآي

دمك عسل

ننتظر الدايت ويارب يهنيك

 

[زاحفه]

الله يعطيكم العافيه حبايبي والله مانزلت هذا الموضوع الا وانا عارفه ان الكثيرات تهمهم
الرشاقه والصحه قبل كل شي واتمنى افيد كل شخص بس ابيكم تجربوه وتشوفوا كل خير
باذن الله تعالى ..
اول شي نعرف ان الرسول كلامه منزل من عند الله عز وجل ( وماينطق عن الهوى
ان هو الا وحي يوحى علمه شديد القوى )
وفيه احاديث كثيره للرسول (اللهم صل وسلم عليه) في آداب الطعام لازم نخليها قدامنا واكدوها العلماء في عصرنا الحاضر...
مثل حديث "ثلث لطعامك وثلث لشرابك وثلث لنفسك "
واحنا الله المستعان نخليه ثلث للسلطه وثلث للوجبه الرئيسيه وثلث للحلا
وحديث "لاتخلط الطعام على الطعام " يعني مو تعبي السفره و تجلس تاكلي من
كل شي... كفايه ان الطبق الواحد مخلوط فيه سبعين مقدار بصل وطماط
ولحم و الخ الخ....
وكمان فيه مقوله من احد الصحابه يقول "نحن قوم لاناكل حتى نجوع واذا اكلنا لانشبع"
يعني اذا انتي شبعانه مو لازم اذا انحط الغداء او العشاء تقومي تاكلي

والقوانين اللي من عندي هي الاتي: <<< الله يستر
_السكر ممنوع
_المشروبات الغازيه ممنوعه
_العصائر المعلبه اللي كلها سكر ممنوع
_الحليب والالبان كاملة الدسم ممنوع
_الشوكلاته والسغاليف من حلويات وغيره ممنوع :no:
_النشويات رز مكرونه بطاطس ممنوع
_الشرب اثناء الاكل او بعده على طول ممنوع .. <<<< وش خليتي ؟
_واهم شي لاتجوعين نفسك اذا جعتي خذيلك أي شي تاكليه بس يكون خفيف

طبعا أول مصحى من النوم كنت أشرب كوب نسكافيه عشان أصحصح
و اكتشفت انه يسد الشهية...
ولاعاد أشتهي آكل شي طوال اليوم فصرت أغصب نفسي وآكل شي مع النسكافيه
وغالبا يكون 3 حبات تمر وهو أفضل شي على الريق..
أو آكل توست أو ساندويش بر بجبنه شرايح قليلة الدسم..
واذا اني مره رايقه سلقت لي بيضتين مع كوب حليب بس من دون سكر
احط عليه ملعقة عسل...

وكل وحده لاتحرم نفسها من أي شي متعوده عليه اذا متعوده تشربين الحليب
البارد >> الصافي, المراعي.. تعودي تشربيه خالي الدسم وبدون سكر..
والسوق مليان بدائل صحية حتى الكورن فليكس فيه بر....
طبعا البر نفس الابيض سواء الخبز أو الرز بس البر يكون فيه ألياف أكثر من
الأبيض والألياف لها فوائد كثيرة وأهمها انها تسهل عملية الهضم ..
و تمنع الامساك ..<< ماتعرف الباقي خخخخ
وجتلي حاله كم اسبوع طحت في المويه كنت اشرب 3 كاسات (ماء) على الريق
والله احس جسمي نظيف .....

طبعا الفطور أهم وجبه ولازم تفطري حتى لوكثرتي ما يأثر على الريجيم
لأنك بتحرقي سعرات اذا انك طالبه او موظفه بتحرقي السعرات طول اليوم
وكمان ربات البيوت اكيد بتصحى وسيده على الكرف والشغل ...

واذا جعتي روحي دوري لك شي تاكليه فاكهه خضروات اشربي عصير طازج
بدون سكر مع قطعة بسكويت أي شي موجودعندك بس يكون مافيه سكر
وخالي الدسم ..

الحين نروح للغداء طبعا أكثر شي كان يقهرني في الريجيمات انه العايله يضربون
في الكبسه والايدامات وانا ياحافظ علبة تونه مغسوله بماي وربع رغيف بر
وحبة برتقاله كني سندريلا ( ايام الفقر ) <<<< يمديكم عالتشبيه
طبعا اذا كان غداكم كبسه لحم كلي لحم وخلي الرز واذا هو كبسة دجاج كلي
دجاج وخلي الرز <<<< ماعندها الا الكبسه خخخخخخخ
يعني كلي اللحوم والاسماك والدجاج لانها مفيده بس لا تاكلي النشويات مثل
الرز والمكرونه والبطاطس ...
وطبعا كلي معاها سلطه وخضروات خس جرجير أي شي موجود ...

واذا انك طالبه او موظفه وبترجعين البيت وتنامين على طول ممنوع الغداء الثقيل
وخليه بعد ماتصحي وكلي لك شي يسد جوعك اذا انتي جوعانه حبة فاكهه
او عصير فريش.. وارقدي

بعدها بساعه ساعتين سوي لك كوب شاي اخضر مر مع نعناع او حبق ياعيني
واذا فيه زنجبيل ياسلام سلم...

عاد صاحبتي اللي نحفت مره كانت تسوي ثلاجه (ترمس) شاي اخضر مع زنجبيل مع نعناع وتجلس تشرب فيه طول اليوم....
جينا للعصريه اذا انتو في منطقه معتدلة الاجواء اطلعي هزي طولك شوي
وامشي لك نص ساعه او ساعه حسب المقدره
وخلي احد يمشي معك يونسك وماتحسي بالوقت ....

واذا عندك جهاز سير او اوربت ترك بالبيت يكون احسن قومي الحين نظفيه من
الغبار اللي تكدس مدري من متى... واسحبيه لعند التلفزيون واذا جاء مسلسلك
المفضل او الفيلم او أي برنامج تتابعيه قومي اشتغلي عليه واتفرجي..

والطالبات الله يوفقهم ان شاء الله اذا راحوا للمدرسه او للجامعه يحاولون يمشون
الصباح في الساحه حتى لو ربع ساعه وقت مايكون الجو معتدل شوي ...

عاد وقت العشاء نفس الشي تاكلين أي شي بس يكون خفيف قليل الدسم وبدون سكريات ونشويات وحاولي قد ماتقدري قبل النوم ب3 ساعات ماتاكلين شي منشان مايتكدس الاكل في بطنك ولا ينهضم زين..
واذا حصل واضطريتي تتعشين معزومه مثلا او عندك ناس ...
اشربي لك كوب شاي اخضر وحاولي تمشين شوي في البيت في الحوش
في الشارع أي حته...
بس موب تضربي في النعمه كلي على خفيف وركزي على السلطات والمشاوي وغيره

بعدين روحي خذي لك دش وادخلي فراشك واتعوذي من الشيطان واقري الاذكار
ونوم العوافي ان شاء الله
واعتذر عن الاطاله حبايبي بس حاولت اني الم الموضوع من جميع جوانبه..
واللي عندها أي اسئله انا حاضره باللي تبونه...

 

[ماتميزني القاب]

الله يعطيك العافيه ويستفيد الجميع وانا اضيف على كلامك ان تدعي الله
ان يساعدك ويقويكي

 

[بلقيــس 2009]

الله يعطيك الف عافييييييه
بغيت اسالك في كم تقريبا نزلتي الوزن ؟
مشكووووورة مرة ثانيه والله ينحفك وينحفنا بصحة وعافيه يارب......

 

[مراثيف]

:icon30:الله يعطيك ألف عافية على الكلام الحلو الي كله فوائد وإن شاء الله نستفيد منه كثير واشكرك جدا على روحك المرحة واتمنى تكتبي كثير في المنتدى علشان نستفيد من كلامك :icon26:

 

[زاحفه]

اختي العزيزه بلقيس 2009 تقريبا خلال شهرين ونص خسرت 13 والحمد لله مارجعت اكتسبتها مره ثانيه
لاني صارت عادة تخفيف الاكل عاده طبيعيه عندي حتى معدتي الظاهر صغرت هههههه
وانصح جميع الاخوات بالرياضه فهي تساعدك على الخساره بشكل اسرع وينشد جسمك معاها
حتى لو وقت قصير...
انا كنت امشي 10 دقايق فقط لا غير في الصباح حسب ضروفي بذاك الوقت والحين
صرت اطلع مع صديقاتي نمشي بمنتزه مغلق لمدة ساعتين تقريبا ومع السوالف مانحس
بالوقت
وانا من فتره لفتره اذا مليت اشغل لي شريط واجلس ارقص ارقص اطلع الحره اللي فيني
والله اكتشفت انها افضل رياضه ههههه تستمتعين وتنحفين ...

واشكر جميع الاخوات بدون استثناء على التشجيع وانا حاضره لكم باي استفسار

 

["أميرة بكلمتي "]

رجيمك صرررراحه حلووومره تراني ابداء من بكره ههههههههههههههه الاحد خساره

 

[زاحفه]

السلام عليكم
تحيه لجميع الاخوات اللي ردوا عالموضوع واللي ارسلوا لي عالخاص ...
وابي اقول شئ .... اللي يجي بسرعه يروح بسرعه وهذا ينطبق على الريجيم
كل ما نزلت كيلوات بسرعه كل ما كسبتيها بسرعه لا وزياده عن الاول
وكمان ودي اقول شي واحد للبنات اللي يبون ينحفون .. انتو تبون تنحفون عشان الزواج المهم
اللي بعد شهرين عشان الفستان يطلع حلو يعني تدورون اسرع طريقه للرشاقه ؟؟؟
بقولكم بكل صراحه نظامي اللي حطيته لكم مو لها الشي انا اهم شي عندي اني انزل وزن
باعتدال واحافظ عليه ...
الحين احنا على مشارف شهر 2 ولو بديتوا بالنظام من الحين وبانتظام ما راح يجي الصيف
الا وانتوا نازلين وزن بشكل رائع واجسامكم حلوه ولو مشيتوا عليه بانتظام أؤكد لكم راح تخسروا
اكثر من 25 كيلو....!!!
بالله كم مره جربنا انواع الريجيمات والانظمه ؟؟ وكم مره استمرينا عليها الى نهايتها ؟؟
وقد ايش ظلينا محتفظين بالوزن اللي خسرناه ؟؟

بالنسبه لي وبكل صراحه ولا مره لاني اخسرها بسرعه وارجع اكتسب ضعفها باسرع وقت
النظام هذا علمني كيف استمتع باكلي وانا مرتاحه لاني باكل اي شي بشرط يكون خالي من الدسم
والسكريات والبلاوي الثانيه اللي تضر اجسامنا اكثر مما تنفعها
علمني كيف اطبخ الاكل الصحي واقلل من الزيوت والمقالي باكلي واعوضها بالشوي اللي هو
بالواقع الذ ..
بديت عادات صحيه حتى مع عايلتي الصغيره قللت الزيوت والسكر بطبخي
سرنا نشري جميع المنتجات اللي نحبها لكن منزوعة الدسم
الحلى اذا بسويه ومثلا كمية السكر كوب لا انا احط ربع كوب مثلا
صواني الخضار المقليه مثل المسقعه .. المقلوبه .. صرت ارش على الخضار كميه قليله
زيت زيتون وشوية بهار وملح واحطها بالفرن تطلع الذ واشهى وصحيه اكثر
خلي الواحد على الاقل ياكل بدون مايحس بالذنب بكل لقمه يحطها بفمه

وبالتوفيق ان شاء الله للجميع وتحياتي لكم ​

 

[القمر المضيئ]

مشككككككككككككككوره ياعيوني وتسلمين على الرجيم الله ينحفك وينحفني ويعطيني قوه الاراده يارب​

 

[افياء]

الف شكر لك نظام حلووووووووووووووووووووووووووووووووووووووووووو وبسيط ومريح

 

[coffee]

تسلمين على المعلومات والدفع لنا للرشاقه الله 13 كيلو والله ما ابي غير نصهم تخيلي واكون راضيه يالله الله يعطيني الصبر...تسلمين حبيبتي.

 

[hassnaag]

 

[ام رنون]

صراحه هذا الرجيم فضيع
انا اتبع مثله تقريبا"
وبصراحه حلو لانج ماتملين بسرعه
وبعدين ماتحرمين نفسك من اشياء كثيره
صحيح ان النتايج يبي لها شويه صبر
بس وش ورانا يااحنا يالاكس لارج
والنسكافه صح تسد الشهيه انا وحده صديقتي
خبرتني عنها ولوتشربون عصير جريب فروت وشاي الرجيم رويال
وثمان اكواب ماي في اليوم وعصير ليمون ياسلام ولااحلا
بتحسين انج خفيفه وان المعده صغرت عن جد
واحب اضيف شي بعد لو تصومون الاثنين والخميس خير وبركه
منها الاجر ومنها الرشاقه
والف شكر للاخت زاحفه وان شاء الله البنات يستفيدون

 

[حياة زوجها]

الله يجزيك ألف خير والله الواحد بيحاول ادعيلنا يا أختي وجزاك الله ألف خير

 

[ضحـــى]

تسلمين وجاري التطبيق:icon26::icon26:

 

[زاحفه]

الف شكر حبايبي على ردودكم ويارب تنحفون جميعا وانتوا بصحه وعافيه
ويالله شدوا الهمه وبالتوفيق...
اختي ام رنون مشكوره على الاضافات عزيزتي وذكرتيني بنقطه مهمه عن المويه
فعلا هي مفيده كثير وهي كمان افضل مشروب للي يسوون ريجيم
و تنظف الجسم من السموم خصوصا اذا كانت عالريق
والمشروبات الثانيه مثل القريب فروت والشاي الاخضر اكيد مفيده ودايما موجوده
في اغلب انظمة الريجيم عاد انا اعز الاناناس موووووووت يقولون يحرق السعرات
واختكم ماصدقت خبر وادهرت عليه ..
وفعلا الصيام مهم في فترة الريجيم وانا نزلت برمضان اللي راح 3 كيلو وكان اكلي
طبيعي جدا بالعكس كنت اتوقع اني زايده عالاقل كيلوين وتفاجأت بوزني
لكن مع العادات الجديده بالطبخ صارت صحيه اكثر واخف
وجزاك الله خير ام رنون على تذكيرنا بصيام كل خميس واثنين بس موب عاد نصوم ونسوي
سفره من هنا لهناك ونطب في النعمه .. على هونك على هونك .. وان لبدنك عليك حقا
تحياتي لكم ​