بصراحة عقدتوني

[دانـــة]

السلام عليكم ورحمة الله وبركاته

شلوووووونكم ياصبايا

مادري شقولكم .. بس الصراحة تعقدت من الخيانات !!!

المنتدى عجبني حيل وادمنت عليه وصرت دوم اتابعه .. وادخل هالقسم واشوف المشاكل وادعي للجميع

بسسسسسسس

تعقدت تعقدت تعقدت .. صارت نظرتي تشاؤمية وكرهت الدنيا

يعني خلاص كل الرجال خاينين ؟؟ خلاص مايصير الوحدة تتعامل بطيبة لازم حذر وأنانية وووووو .. الخ؟؟؟

انا بصراحة اتأثر وايد بالسوالف وبالمحيط اللي حوالي .. وسوالف الخيانة وايد مأثرة فيني

وقاعدة أفكر وين الكلام هذا (( كوني له أمه يكن لكِ عبد )) ؟؟

وين مواقف التضحية والطيبة من الزوجات والتقدير من الأزواج ؟؟

صار لازم مانتعامل بطيبتنا ؟؟

الزواج عن حب والزواج التقليدي كله نفس النهاية ؟؟

كلها فترة والزوج يمل ويخون؟؟

يعني اللي تعامل زوجها بالحسنى والدلال والاهتمام وضحت علشانه وماصارت انانية لازم يقل اعجابه فيها ويخونها ؟؟

لا تدلليه ولا تخليه كل همج؟؟؟ وبمقالات ثانية نشوف ان الزوجة الصالحة اهي اللي يكون زوجها وبيتها كل همها

ما احب الانانية ولا احب الدهاء والحيل على الزوج والحبيب .. بس صرت احس ان الحياة لازم نتعامل فيها جذي لو مع اي حد ليششششششششششششششششش

انا خلاص مو قادرة استوعب

 

[غاليه]

اختي الحبيبه

الرجال فيهم الصالح والطالح يعني مو كلهم طريقة تعاملهم وحده
كل انسان له طريقه تتعاملين معه بالذات الرجل يعني زوجي غير زوجك ومو قاعده مثلا ان فلانه تعامل زوجها كذا انا لازم اعامله بنفس الاسلوب
اختي كوني متفائله
وقصص الخيانه احيانا فيها فوائد منها ان الوحده تهون عليها مشكلتها خصوصا اذا كانت مشكله بسيطه وتبدأ تقارن بينها وبين غيرها وتقول الحمد لله

 

[أميرة مملكتي]

اي والله يا اختي الغالية دانة انا مثل حالتج والله انا بعد تعقدت من هالسوالف ..زوجي ولله الحمد شايلني فوق راسه وحاطني بعينه وصايني وعازني ورازني جدام الناس وعلاقتنا ما كان فيها اي شي بس من قمت ادخل هالمنتديات واقرى هالقصص اللي تشيب الراس.. ولما اروح جمعات الحريم اسمع هذي تقول فلانة زوجها خانها وفلانة مسكينة زوجها تزوج عليها والله ان هالسوالف قامت اتأثر على حياتي وانقلبت حياتي 180 درجة ...قمت اشك بزوجي قمت ادق عليه وين مايروح وياويله اذا تأخر بدوامه او اذا اتصلت و ما رد علي قمت اتضايق من طلعاته مع ربعه وقمت افتش بموبايله والمشكلة اني والله ما القى شي يدل على الخيانة والله انا اسوي الشي ومو مقتنعة ... لدرجة انه لاحظ علي هالتغيير وسألني بيوم انتي تشكين فيني رديت عليه تبي الصراحة مو مني من اللي اسمعه واقراه من الحريم ...قاللي وليش تخلين هالاشياء تأثر على حياتنا وتخربها دام انتي عارفة انا شنو ليش تتأثرين باللي حواليج ..وقالي انا وايد سمعت سوالف من ربعي عن اللي طاح على زوجته تخونه او اللي تنحاش مع صاحبها ليش ما اتاثر بهالسوالف واشك فيج لاني انا عارفج انتي شنو وعارف انج متربية على الاصول وما عندج هالخرابيط ...والله ان ضاق خلقي لما سمعت كلامه و على السوالف اللي سويتها فيه مسكين حتى هو قام يتضايق اذا بروح جمعة حريم لان عارف سوالف الحريم ...فقمت اطنش واقول الحمدلله الذي عافانا مم ابتلاهم فيه وفضلنا على كثير من خلقه ...

 

[lioness]

ولا تتعقدي ولا على بالك يا حبيبتي بس انتي لما تروحي عالمشفى ما بتشوفي غير مرضى
ولما تروحي على مركز الاعاقات مابتشوفي غير معاقين ولما تدخلي مركز استشارات زوجية واسرية مارح تشوفي طبعا غير مشاكل اسرية وهكذا هي الحياة
كوني متقائلة دائما ولا تسمحي لاي شيء سلبي ان يؤثر عليكي ابدا

 

[spoil]

امممم والله بصراحه حتى انا متعقده من زمان من كثر مااسمع عن مشاكل المتزوجين

وادخل هنا واقرأ القصص اتعقدت زيادة بس في نفس الوقت قلت يالله ومنكم نستفيد

مع اني انا بنت بس ادخل للأستفاده:shiny: ​

 

[حزمة جرجير]

على قولت الاختlioness
مايجي هنا غالبا الا اخوات
يدورون حلول او شاكين بشي..
زي المستشفى مايجيه الا ناس تعبانه.
فأنتي اذا كنتي متعافيه لاتقرين هالاشياء
لانها بتأثر عليك وتغير حياتك..
زي اميرة مملكتي..
وانا جاني وقت عشت عذاب من الشكوك
الغير اكيده بسبب الادمان على قراءة هالمواضيع
لكن وكلت امري لله وارتحت..
الحمد لله والشكر له.

 

[هدأة الغسق]

أخواتي هذا خطأ كبير .. لما تسقطن ماتقرأن على حياتكن ؟

بالله لو الأستاذة ناعمة اسقطت المشاكل التي تأتيها على حياتها الخاصة ماذا كان حدث ؟

لم تصل لهذا النجاح أبداً .

والأخت التي تتأثر بهذه القصص نصيحة لا اتقرأيها .

المنتدى مليئ بالأقسام تجولي فيه واستفيدي مما يفيدك ودعي عنك الوساوس والشيطان .

ولكن لاتكوني مغفلة وتعلمي من القصص كيف تكوني واعية وملاحظة لما يدور حولك في حياتك في عملك مع أقاربك مع زميلاتك .

هذه وجهة نظري وأتمنى أن تفيدكن .​

 

[ام هاشم]

حبيبتي دانه
موكل الرجال والازواج كدا
كل راجل يختلف عن الاخر على حسب تربيته وثقافته وعاداته وتقاليده والمجتمع من حوله
زي مافي ازواج كل حياتهم مشاكل في ازواج عايشين مبسوطين ومرتاحين وجدا سعيدين بحياتهم
بس انا رايي
مهما كان الزوج خائن وحق مشاكل
الى ما يرجع في الاخير يعقل ويرجع لزوجته واولاده
ويقدر تضحياتك وصبرك عليه
ويحطك في عيوني الاثنين

 

[بشرى ساره]

ليش تتعقدين ؟؟؟ الحياه حلوه ومره ومالازم ناخذها بسوداويه وان كان تحطمتي من مجرد القراءه مو مجرد صوره نمطيه لكل حياه
على كذا حتى الرجال لما يسمعون حكايات الحريم وخياناتهم لاهلهم وازواجهم اش بيقولون بالله نفس اللي انتي تقوليه
عشان كذا الواحد يعقلها ويتوكل مايصير اللي الله كاتبه

 

[helwaya]

احب اشكر

lioness

لأن هذه المشكلة لا طالما عقدتني من كل شئ ومن العالم وابكتني وكلامك اقنعني

وافكر به كلما حزنت من قصة احداهن

ان هذا كالمستشفى او ما شابه

انا هنا لتعلّم ومن هذا القبيل

شكرااا