دقي على أبوج ألحين وقولي يبة مافيه شي والأمور طيبة بيني وبين زوجي ,,,
زوجج لا هو سكير ولا عربيد ولا قاطج فالشقة بروحج ورايح كازينوهات وطايح عربدة مع الساقطات للفجر ,,
اللهم جاب أمه اللي هو وحيدها شهر العسل ,,ما كفر ريلج فديتج ,,,
والله من ادخل هالقسم قلبي يعورني على البنات اللي يتشكون ,,ترا ثلاث أرباعهم مشاكلهم من صنع يدهم وبالأخير قطت المشكلة كله على زوجها وسوته بعبع ,,,
مشكلة بنات هالزمن ما عندهم طولة بال ,, يبون الحل في ثانية ,,,, فاهمين الزواج سفرات ووناسة ومطاعم والزوج لهم بروحهم بس والود ودهم حطوه بصندوق وقفلوا عليه حتى أمهات أزواجهم حطوهم براسهم !!!
حبيبتي طيعيني وشغلي مخج شوي ,,,بس شوي ,,, والله اني ببداية زواجي عانيت مع أم زوجي وخواته ,,,حتى واحد من أخوانه أتهمني بشي مب فيني ويمس سمعتي ,,,
بس والله ثم والله ولا رفعت التلفون لا لأبوي ولا لأخواني ,,,أنا ما تزوجت عشان أغث أهلي بالمشاكل وأخليهم يشلون همي حتى وأنا في بيت زوجي ,,,
بالعكس تعاملت مع أهل زوجي بكل طيب وكانوا يقطون نغزات علي بالطالعة والنازلة والسبب واحد (( ليش أخونا يحبها !!! ))
كنت من أجتمع بزوجي ألمه لصدري وأقول له أنت غناتي عن الناس كلها ,,فديت ويهك الحلو ,,,أحبك وأبيك وأهلك خل يسبوني ما يهمني وأمك فديتها وفديت سبها لي كفااااااااااية انها جابتك عشان احبك وأشفشفك يالمزيون ,,,كان زوجي يضحك بصوت عالي ويقول أنا مستحي من فعايلهم معاج ,,ماأدري ليش ,,,هلي مب طيبين بس ما ادري شفيهم عليج ,,,
لدرجة انه مرة أم زوجي زفتني بدون سبب ,,والله بدون سبب ,,تقول شعندج كاشخة دايم ومتعدله !! كله مسافرة وطالعة مع ريلج تمشيات وسينمات ,,,ماعندج بيت وعيال تجابلينهم !!! وأفترت على ريلي وتقول وأنت يالز..... ميت على اللي بين ريولها ((سمت حقي بالاسم !!))
تقول شله حاطلها خدامتين !!!
وأنا سااااااااااكتة ,,,تراني بنت عرب وما أرضى على روحي فديتج بس هاي مرة كبيرة أحط راسي براسها ليش !! ليش أناحسها !! ليش ما أكسبها !! جبت راس ولدها بفضل ربي ليش ما أجيب راسها هي بعد !!!
والله من تخلص عمتي بربرتها المعهودة أحضنها وأسفة يايمة وحقج علي وأنا بنتج سنعيني وأنت الخير والبركة وأنا وولدج غلطانين أهم شي رضاج وأقعد أبوس ايدينها وزوجي يبوس ريولها ,,وبدقيقة تلقينها هدت وشقت الحلج ولا كأنها عصبت من شوي !!!
ينقص عليهم بسهوووووووووووولة بس مشكلتنا موقفين مخنا وكرامتنا فوق كل اعتبار !!
وأزيدج من الشعر بيت ,,أنا زوجي مطلق من قبل وعنده بنت وكان ماخذ بنت خالته وطلقها وأم زوجي في جمعاتنا تقول بصوت عالي جدام طليقته وأمها (( هاي مرت عزيز ولدي ,,ماشاء الله خذت الزين كله وتقعد تمدح فيني مدح ماله أول من تالي و بشي مب فيني خخخ عشان تحر أختها وبنتها اللي هي طليقته,, وطليقة زوجي حاولت بكل الطرق انه زوجي يرجعها وقالت لخوات زوجي وأمه مستعدة أرجع على راس زوجته بدون شي بس يرجعني وزوجي قال لأخوانها مااابي أختكم ,,.,من بعد ما ذقت الكيك أرجع للعصيد خخخخ,,,خل تروح بنصيبها والله يستر عليها ,, وحتى بنتي خل جدتها تربيها اذا أختكم خايفة اني أخذ البنت بعد زواجها ,,,
ماعاد يبيها لأن كله تتذمر وما أحمدت ربها على النعمة ,, خوات زوجي يقولون لي بالحرف الواحد (( أنتي اللي عرفتي لأخونا صح ,,عرفتي شلون تكسبينه )),والله ليومج هاي أطالع لزوجي وأسأل شلون طليقته فرطت فيه !! صج ريلي فيه عيوب بس فيه مزايا وايد طليقته ما كانت ملاحظتها ابد,,, وين تلاحظها والأخت ما عندها وقت كله مشاكل وبكي ومدخله أهلها بكل مشكلة حتى لو تافهه!!!
وأهل زوجي ولله الحمد أنا ألحين بالنسبة لهم فوووووووق,,, مايرضون علي بكلمة ,,, حتى أم زوجي ما ترضى وحدة من بناتها تقط كلمة لو بالضحك علي ,,,كسبت جميع الأطراف خخخ,,,ولو انه أم زوجي ساعات تزفنا انا وزوجي بدون سبب ,,خبرج سأن اليأس وحركات الدلع مالت العياييز,,,
كبري عقلج وصلي عالنبي وخلج مرة سنعة ,,,, ادري هذرتي وايد بس عادتج أختي وأبيج تفهمين من تجربتي ,,,
