انقلوا لأولادكم.حب الله برفق ..أبي الذي تعلم القرآن لأجلي

[راجيه الرضا]

. #ربوا_أولادكم_صح
(اسمي احمد ..واكتب عن انسان احترمته ...وكان لي قدوة....قصتي قصة عمر....مع بابا ..يسألني الناس عن سر محبتي لله وحفظي لكتاب الله فتكون الاجابة السر في كلمة من 4 حروف بابا ..
بابا كان موظف بوزارة الثقافة....لكن كان يحمل دكتوراه تربوية.مش من كلية لكن بفضل الله عليه ...وابدأ قصتي من بيت ابي حيث كنت الابن الاكبر وبعدي سامية ...
ماما مؤهل متوسط ربة منزل
بابا مؤهل عالي يعمل موظفا
لكن عن رقي تعاملاته معنا حدث ولا حرج
بابا شخص مكانش بيزعق
وكان اقصي غضبه تغير في لون وجهه
كان دوما يحدثني بهدوء منذ طفولتي
يهمس له عمي اضربه لقد اخطأ
يرد قائلا مفيش بذرة تنضرب عشان تنمو...
ابني زرع عاوزه يكبر
كنت طفلا حركيا اتنطط
واقفز وكثيرا ما اوقعت اشياء
وكان يقول لامي ده سنه دورنا ناخد بالنا مش نزعق
ابي لم يكن ثريا
لكنه كان يصطحبني الي مراكز الشباب وينفق ماله لاجري والعب باستمرار
ليس ماله فقط وجهده ايضا
والاجمل انه بلا صراخ
كنت اري زملائي
اهاليهم يصطحبوهم نعم للرياضة لكن مصاحبين بالشخط والزعيق
انا ابي فكان خروجي معه متعة
لانه كان يستمتع بالسير معي....
ويضحك من قلبه علي كلماتي
عندما ذهب بي الي الشيخ لتحفيظ القرآن الكريم
اعتذر الشيخ بعد مرتين وقال اني شقي ومفيش فايدة مني
لكن ابي اصر ان يعلمني
كان يتركني اتحرك او اركب العجلة وهو يردد القرآن وانا اقول خلفه....ورسم صورته وهو يرتدي تاجا وقال لي بعينين يملؤهما الحماس (انا واثق انك هتلبسني التاج ده. .).
قلت وانا غير فاهم(ازاي؟)
قال لي بفخر (انت هتحفظ كتاب ربنا وانا الملايكة هتكرمني بسببك )
ابتسمت.

.وكان عمري6سنوات
كان يحدثني بفخر غريب
عندما كنت ازعل منه كنت اقول له مش هالبسك التاج
فكان يبتسم في رفق
ويقول اسف يا استاذ احمد
تعلم هو القرآن
لانه لم يصبراي شيخ علي حركتي
وحفظني هو
لانه كان يصبر عليّ
كنت ادخل وهو يحدث عمي او جدي
فكان يستأذن محدثه ويستمع اليّ
لم ينهرني او يشخط متتدخلش ف كلام الكبار
وكان يقول ان النبي صلى الله عليه وسلم كان يحترم الاطفال
معاملته لسامية كانت في نفس الرفق
لم اكن متفوقامثلها لحركتي
ولكن تفوقي الرياضي في كرة القدم والكاراتيه
كان يعوضني...
ولم يكن يوما ابي يقارن بيننا
كان يقول احمد احسن ولد وسامية احسن بنت
احضانه كانت ترويني بالفعل
وظل يحتضنني ..دوما
وعمي ساخط
الواد ده هيطلع متدلع
لكن ابي كان دوما يمنحني طبطبته التي كانت تسكن احساسي
....
تمردي في المراهقة
كان يتفهمه ويقول لي اللي يريحك يا احمد
كنت اشعر بالحرج من ذوقه
واطيعه
والله فعلا المربي المتفاهم يكون غاليا عند ابنائه
لم ادخن
ولم افعل الحرام
لانه قال لي جملة عجيبة عجيبة (ينفع حد يبقي ربنا يراه ويعمل الغلط )
كان عمري 8 سنوات نظرت حولي ربنا فين
قال في يقين (ربنا يراك......)
قلت وليه انا مش شايفه
رد باسما (هتشوفه في الجنة ...بعد ما تعمل خير كتير ان شاء الله. .)
كنت دوما اسأل عن الله
(ايش عرفني ان فيه ربنا)
امي كانت تنهرني
هو كان يرد في هدوء (ايش عرفك ان البيت ده بناه حد ايش عرفك ان الكرسي ده صنعه حد)
كنت ارد (اكيد يعني البيت ما اتعملش لوحده ولا الكرسي عمل نفسه)
كان برد (يبقي برضه الارض والسما معملوش نفسهم )
اممممم كنت اقول (طيب ومين اللي خلقه؟ ؟ ؟)
كان يرد (لو ربك احتاج حد يخلقه يبقي ازاي هو خالق؟ ؟ ؟الخالق ميحتاجش الي خالق سؤالك مش مضبوط ...)
ثم تمتم قائلا
(تعالي كده)
...
جعلني انظر الي ماسورة مجاري كانت ضاربة في الشارع
ثم قال (بص للعمل البشري ...الماسورة اد ايه ومع ذلك ضربت...بص بقه الي الوريد بتاعك اللي في دراعك ماشي بسلام ازاي؟ ؟ ؟؟ مين خلقه؟ ؟)
كنت ارد في راحة واعجاب وعمري 8 سنوات (الله)
كان يناديني لاتأمل قلب الدجاجة او الارنب امي تنظفه
ويقول لي انظر ....من يعتني بهذا المخلوق الضعيف ويخلق له قلبا متقنا كهذا.....
جعلني انظر الي خلق الله في كل شيء !
قال في هدوء (هي الناس كلها بتاخد جزاءها في الدنيا ؟ مش فيه ناس كويسة وناس وحشة؟ ساعات الناس الوحشة بتفضل وحشة لاخر عمرها طيب هما لازم يتحاسبوا....ايمانك بالاخرة ايمان بالعدل .وايمان بالخير ..)
احببت الله من قلبي
وحافظت علي الصلاة
ايقنت ان خالقي عظيم حكيم
كان يناقشني دوما ....ويحكي لي....
حياته معه كانت كقطع السكر
كان يعلم اني لا استطيع التعامل الا في ظل الارتياح النفسي
وكان دوما يتمتم ان التربية زراعة
زراعة خير
كنت ان طلبت منه مالا مهما طلبت يرد في حفاوة (انت تؤمر..

هو فيه اغلي منك ؟ ؟ ؟)
كنت افرح ثم كان يناقشني في الطلب ويلبي قدر جهده
عمره ما قال لي (لا...ما انت عندك .......)
كنا نصل الي النتيجة معا
اليوم انا اجادل الملحدين بعد ان درست وفهمت والاساس ردوده عليّ

اليوم انا رياضي مرموق والاساس صبره عليّ
اليوم انا حافظ من حفاظ كتاب الله تعالى والاساس جهده معي
كل هذا من بعد فضل الله علي
ربوا ولادكم لزمن غيرزمانكم
احترموا ولادكم
انقلوا حب الله برفق
انقلوا العقيدة بصبر
الامضاء ابن مخلص
قصه للدكتورة إيناس فوزى​