بنات بدخل على طول لان اعصابي ماتتحمل ابدا اكتب على مهلي
بعد مارجعت لبيت زوجي مع اخوي كان زوجي مبسوط نوعا ما لاكن حسيت فيه شي مو طبيعي قاعد يصير من وراي
بعد يمكن ربع ساعه طلع لشغله من عندي واتصل علي كان انسان ثاني ماعرفه كان وحش مو زوجي الي انا سويتها لي مفاجأه
قالي لمي اغراضك واطلعي مع اخوك مابي اشوفك انا انهبلت كيف اجي من بيت اهلي ويفضحني ويرجعني المهم جلسنا نتناقش بالتلفون وهو معصب قلت شوف انا طلعه من بيتي ماراح اطلع لو وش مايصير الا لما اعرف وش صاير
قالي اذا جيت ولقيتك بطلعك غصب عنك سكر بوجهي وكنت انتفض من الصدمه اتصلت على ابو زوجي ولاتقولون ليش سويتي كذا لانه اقرب الناس لي وممكن يحل مشكلتي لاكن صدمني لما قال تستاهلي الي يعمله فيك جلست ابكي الحين من بقالي قلت له ليش وش الغلط الي عملته قال سوالف كثيره وبررت له اني انا جيت لزوجي حابه اسويها مفاجأه قالي اجل شوفي اجلسي فبيتك ومحد راح يجيك
بتقولون ليش ماطلعتي وتركتيه انا اقولكم زوجي مافيه شي بيني وبينه واعرف من السبب باللي صار واعرف من اللي وقع بيننا حسبي الله ونعم الوكيل عشان كذا تركت قلبي وفكرت بعقلي وقلت اذا طلعت من بيتي اول شي بخسر زوجي وبشمت فيني الناس قمت وفرشت سجادتي وجلست ساعه وانا اصلي وادعي ان ربي ينصرني على من ظلمني كنت ابكي بشده يابنات ولاحسيت اني محتاجه احد غير ربي وكنت عارفه ان الامل بالله كبير كنت احس بحركة البيبي فبطني وابكي كل ماحسيت فيها دعيت ودعيت لحد ماتقطع صوتي من البكاء
وبعد ربع ساعه يابنات اتصل اخوي وقالي تطمني ونامي ارتاحي وكلمني ابو زوجي وقالي خليك فبيتك وماعليك من احد لاكن دخل زوجي وكان ندمان كان يعتذر وربي حسيته ندمان على كل الي سواه ولما جيت اسأله عن الي سواه قال خلاص لاتنبشين بالماضي ونفتح صفحه جديده
بنات اولا شرايكم باللي سويته
ثانيا كيف اتعامل مع زوجي بعد اللي صار احس اني عايشه بخوف وباي لحظه ممكن يدخل ويقول روحي للاهلك قولوا لي وش اسوي
