ام زوجي أرحمها .. وأخاف منها ومن الأيام!!!

[عيوف]

السلام عليكم

خواتي مشكلتي باختصار

زوجي واخوانه 3 اثنين ساكنين برا العائلة اللي هي انا وسلفتي وواحد مع خالتي الارملة بالبيت متزوج له سنة

الكبير ساكن بشقة فوق خالتي واحنا ببيت قبالهم يعني نروح لهم مشي

والحين طلع منها اللي كان معها وحززززنت مرررة وزعلت عليه .. وكل ما اجيها ترمي كلام : عيالي تركوني عيالي ما يهتمون الا بحريمهم ....

ويعلم الله اني دايم احض زوجي على البر بأمه لأنه أحيانا يقصر معها..

وانا من قبل اتزوج شارطة بيت على اي شخص يتقدم لي ... وفعلا سكنت بشقة فوقهم وبعد كم سنة بنيت البيت انا وزوجي لاني موظفة ولله الحمد

والحين انا حاسة بتأنيب ضمير لأن عيالها تركوها ما عندها الا بنتها هي وعيالها فيه مشاكل بينها وبين زوجها


وارحمها كثييييير وبنفس الوقت خايفة العلاقة تخرب معها لو سكنت معها

لأن زوجي يلمح نسكن عندها ونأجر بيتنا لأن علينا ديون كثيييرة

الله يسامحه اللي طلع منها المفروض اخر واحد ما يطلع .. و وحيد امه ما يطلع ..


وش اقول له لو كرر الكلام علي وش الحل برأيكن خواتي شوروا علي الله يحفظكم...:35:

 

[مدلعه مزاجيه]

شوفي
على حسب شخصية ام زوجك اذا سليطه او لسانها حار لا تسكنين معهم
اصلا لوانها طيبه السكن مع ام الزوج يجيب المشاكل والحساسيه

بس لا تقصرون زوروها كثير و وخلي زوجك يزورها ويتقهوى عندها يوميا

 

[يالوردي]

خلك بعيد حبك يزيد
لوسكنتي معها بتطلعلك المشاكل
وتتقيدحريتك ولاراح تحسين انك متزوجه
ولك بيت تتحكمين فيه
خلاص ام زوجك عندها بنتها
وزوجك يتفق مع اخوانه كل يوم يروح واحد عندها لوزياره بسيطه

 

[ام صبا الاموره]

خلاص دام فيه واحد ساكن فوقها يكفي يحسسها بالامان
ولما تكوني ساكنه عندها راح تكوني ضيفه مالك اي حكم بالبيت حدك غرفتك
بس انتي لاتقصري معها واعتبريها زي امك مراح تتركي زوجك وتجلسي عندها

 

[نضوج أنثى]

لا تلومين اخوه اللي طلع زوجته بعد من حقها تستقر بحياتها انا اشوف ممكن تسكنوا معاها بنفس العماره لكن الشقه لا انتبهي انا حاسه فيها انها وحيده وتطفش ونفسيتها تتعب لكن الواحد يبعد عن المشاكل احسن زوجك لو فتح معاك الموضوع قولي له امك على عيني ورآسي واحبها بس لازم تكون لنا حياتنا المستقله لو رحت وسكنت عند خالتي كل خطوه بتكون محسوبه عليه لأني في بيتها وهالشي من حقها بس فيه ظلم ليه انا ماامنعك عن امك تقدر تروح لها بأي وقت وانا مو مقصره معاها ان شاءالله وكلنا قريبين منها لو احتاجت شي تلقانا قدامها بس في امور كثيره بنحرم منها لمن اشاركها السكن وابسط حقوقي

 

[صباح الندى]

اصحي تسكني عندها لو هي زي العسل على قولت يالوردي خلك بعيد حبك يزيد ولو السكن عندها مريح ما خرج عنها ولدها وعياله لا تكوني بطلة زمانك وتسوي تضحيه عشان يسدد الديون اصلا لو سكنتو عندها بتزيد المصاريف عيالها اربعه وعشرين ساعه بيسنترون هم وعيالهم وبنتها وعيالها وما راح يكون لك خصوصيه حتى في الوجبات والنوم والمشاوير وعيالك وكل شي
لذلك انصحك ما تسكني عندهم اختي ساكنه عند اهل زوجها وعايشه في جحيم مع ان عمتها عسوله مره بس لابد من المشاكل وكسر الخواطر

 

[عيوف]

والله ان كلامكم صح مية بالمية وجزاكم الله الف خير فعلا خالتي الله يهديها حــــــــاااارة ودقيقة مرررة في كل شي وعلاقتنا الان محترمة جدا

وراح تنحسب علي روحاتي وجياتي

خصوصا ان عندي سواق واطلع ع كيفي متى ما بغيت

كل ما اتخيل اني ساكنة معها تجيني كهربا :33:

 

[رندا كووول]

اهنئك ياخت عيوف ع قلبك الطيب وتفكري ف خالتك وتتمني لها الخير .
خالتك راح تتعود ع وضعها الجديد .وبنتها عندها تسليها .وولدها ساكن فوق .بالعكس كلكم حواليها ماتحس بالوحده .
اذا زوجك لمحلك اعملي حالك مافهمتي عليه ..لكن لو صرحلك قولي هي قريبه مننا ونزورها يوميا .وكمان اخوانك مايقصروا ..وبعدين نزعجها بأطفالنا وما ياخذوا راحتهم ف اللعب ..بس لاتوافقي تسكني معاها ..والديون تتسدد ان شاءالله من غير ماتضحي ببيتك.
ربي يوفقك ويسعدك ويسخر لك زوجك.

 

[عيوف]

اختي رندا مشكووورة حبيبتي ع ردك والله استفدت منك ومن باقي خواتي اللي ردوا علي

فعلا هي تنزعج من الأطفال وتحب الهدوء جزاك الله خير

الله يسخر لنا ولك

 

[والله عسل]

وأنا شوري من شور الأخوات
ظلي في بيتك معززة مكرمة، الله يهنيك حبيبتي
وبعدين ما شاء الله أنتوا حواليها،
بس أهم شي زوجك يمر عليها يوميا بعد ما يصلي الفجر مثلا يصبح عليها ويسألها إذا قاصرها شي، لأن الأم شي طبيعي تحس بالغيرة أن عيالها ربتهم وبالآخر يطلعوا عنها وتاخذهم حريمهم بس انت هديها وقوليلها نحن يمك أي شي ناقصك نحن حاضرين ، يعني امتصي زعلها بالكلام العسل والاحترام والتقدير،

,,,, بس عزيزتي لاحظت عليك تخوف وتردد بشأن ديون زوجك، وأنا أقولك خليك واثقة من نفسك لما تجاوبيه بدون تردد ولا تعطيه أي احتمال بخروجك من البيت، ووضحي له سلبيات السكن مع أمه، وجلسوا جلسة صفاء وسووا استراتيجيات لقضاء الديون والله يفرج همك

 

[عيوف]

الله يجزاك خير يا عسل

والله انك عسل من جد


شورك وهداية الله :3: