امرأه اخرى فى حياة زوجى

[هونى]

ودى اعرض مشكلتى عليكم وياريت القى عندكم الحل لان نفسيتي وايد تعبانة طبعا صارلى 8سنوات متزوجة وريلى اكبر منى ابعشرين سنة وانا مشهودلى من غير غرور بالجمال الشديد طبعا اول ماخذانى عيشنى ابدلع ولى ابيه القاه بس من سنة انقلبت حياتى مره وحده صار يسهر بره البيت للفجر وقبل كان حمامة بيت حده لساعة 8 صار يتنرفز على كل شى وموعاجبة العجب ابكل شى وصار ينتقدنى على ابسط حركه اسويها تدرون ليش عشان طلع متعرفله على وحده معاه بادوام مطلقة وشينة لاوبعد سيئة السمعة ضاحكة على عقلة مسكين .طبعا واجهته بالخيانة وقام يلف ويدور ويقولى كله اللى قاعد تقولينه اوهام وظنون لما اللة اكشفه لى ورحت حق اهلى زعلانة وكنت حامل لى ثامن ولما ولدت جانى متاسف وندمان ويقولى انها اضحكت على عقله واشحنت راسة على وقالى الحين نبدى ابصفحة جديدة وخلاص انا ندمان وحلفلى بالقرأن ان ماراح يرجع لهطريج مره ثانية وانا صدقتة لانه كان شكلة صج ندمان ويبى يراضينى ابكل صوره طلعت من النفاس ورحتله وعيشتة شهريار زمانه وعيوبى كلها شلتها فينى.ماصارلى اسبوع من جيتى له وافتش ابمبايلة والاقى امطرشلها مسج غرام واجهته اول شى انكر بس ابطلعت الروح ياللة اعترف وقالى اهى تبينى اتزوجها والحين اهى نفسيتها تعبانه فطرشتلها مسج عشان اونسها وصار يبكى ويقولى لاتخلينى انا احبك وابيك طبعا انا ماصدقته وفضحته عند اهلى واهله ولحين اهو طلع من البيت زعلان صارله شهرين وانا متأكدة للحين يكلمها والله ان مومنه بس اهى لاصقه فية موهادته شأسوى فى هالمصيبة

 

[زمان الصمت]

الله يكون بعونك وحسبي الله على من بغى على كل رجل متزوج وله اولاد

الظاهر طلعه الرجال من البيت زعلانين صارت موضه هاليومين انتي شهرين انا 4 شهور

لكن الخير بما اختاره الله وادعي وانا بدعي لك ان الله يفرج همك ويرده كان فيه خير

 

[انوثة بلا حدود]

الله يعينك ياختي على مشكلتك

بس المفروض اذا الوحده مننا تريد زوجها وما صارت تكرهه ولسا مامله فيه خير ما تفضحه عند اهلها واهله

لانه مو حل اما انه يرحل ويتركها زي زوجك او يتمرد وتصير ما تفرق معاه وتخرب حياتها بيدها

اذا تقدرين اختي انك تكلميه وتقولين ارجع لبيتك ونفتح صفحه جديده اذا هو لسا شاري الحياة

وتقولين انك سامحتيه بس بشرط يترك اللي هو فيه :fish:عشان تمشي حياتكم صح


والله يهدي الجميع

 

[منكسره]

خبري اي أحد من اخوانج أو أبوج يتصل فيه وخبريه انج خلاص بتنفصلين عنه (((تخويف)))
لأن اللي يحب عمره ما يسوي سواتك
وأكيد الحين الحقيره فاضلها الجو لا تخلين الوضع مستمر أكثر من كذا كيف يقدر على غيابج أكيد هي ماليه عليه الجو
نصيحتي لا تخليييييييه

 

[umsarona]

المفروض كنتي تحلين هالمشكله بينج وبينه وخطأ انك فضحتيه مثل ما تقولين بين اهله واهلج والله امرنا بالستر وصدقيني هذي نزوه وبتمر باذن الله رجعيه البيت واحتويه وشغلي وقته بالبيبي الجديد والتخطيط لمستقبلكم وبكل شي حلو ولا تجيبين طاريها في البيت كلش خليكي انتي الملكه في البيت

 

[*زين الوصوفي*]

تخيليها شي وصخ في بيتج وتبين تنظفبنه لا تنازلين عن ريلج ولا تفضيلها الجو اهو لج انتي بروحج..

الجمال مب كل شي الجمال جمال الروح حبيبتي

سالفه الزعل امصخت يا حل يكون من وراها يا بلاها الزعل لا تفضيله الجو ايلسي خربي عليها تحملي شو اما اهي حسبي الله عليها اللهم اجعل كيدها في نحرها واجعل تدبيرها في تدميرها..

 

[some1]

إهدي حبيبتي ،
باذن الله تنحل الأمور بالهدوء
أنا لا ألومك لانك فضّحتيه أمام اهلك ،،
لأ ،،
لانه كل انسان مختلف عن الثاني يعني كل انسان ممكن يقبل أو يقدر يمسك اصحابه وفي ناس لأ ،،
استشيري اصحاب المشورة من اللي تثقين فيه ،،
وان شاءالله الأمور تسير للأحسن حبيبتي

 

[الدكتورة نبضة قلب]

الله يكون في عيونج
اتمنى من الاستشاريات مساعدتج

بالنسبه لي ارى انه المواجهه تسرعتي فيها
ما الومج
الوحده تحت الصدمه تسوي اي شي

بس

صدقيني
زوجج باذن الله مرده لج

حاولي تحتوينه وترجعينه مره ثانيه

ما اقول تعتذرين
لا
ممكن تقوليله انه تبتدون من اول ..وتصلحون الامور
هو غلط بشكل كبير
وانتي غلطتي بفضحه
وجا الوقت اللي تصلحون يه الغلط

اعيدي الى البيت

وبعدها

ابدي الحرب البارده معاه​

 

[sosowo]

اختي شهرين وااااااااااايد
لازم ترجعينه باي طريقه كانت لاتخلينه لها
وصدقيني لو ماكان صج يبيج انتي جان ماردج بعد ولادتج واعتذر منج
بس هذي الخايسه وراه
وعلى قولتج وياه بدوامه بعد اخس واخس
حاولي تردينه لاتخلينها تلعب بعقله

 

[salma_ahmed]

ما أعرف بس أحسها قوية سالفة الفضايح ..
الحين شو استفدتي .. يمكن هرب لحضنها من حضن زوجته وضناه ..

على العموم كل شي ينحل بإذن الرحمن .. بس إني إستشيري أهل الثقة .. وربي ييسرلج الخير ..

 

[وردة أمل]

هوني ...

اللة يعينج على ما ابتلاج ويصلحلج امورج أمييييين.


حبيبتي اسمحيلي ..


بس حبيت أخبرج نقطة(.) اذا صارحتي الرجل بالخيانه فلا تتنازلين عن حقوقج ولا تصدقين الحلوووف الكذابة يمكن الحقيقة قاسية عليج وعلى كل وحدة تقرا كلامي ويمكن البعض يتحامل شوي .


البداية واجهتيه وزعلتي وطلعتي من البيت وكنتي حامل تحتاجين العاطفة ... ويوم ما راضاج وحلف بكل طيب رجعتي ووثقتي فية ... المفروض ماكنتي تلينين بسرعة ولا تسامحينة أول ما يحلف.


الحين حس أنج ما تستغنين عنة وطلع من البيت على أساس متى يرجع يلقاج لأنج ما تستغنين عنة ! رغم أنة ما وفى بحلفت القرأن!!


حبيبتي ولا حرمة في العالم بتقدر تاخذ الريال غصب عنة وسالفة أن داز مسج يواسيها يدل على أنة مستخف فيج .. أسفة بس أعتبرج أختي ولهذا السبب أصارحج.


نصيحتي لج حسسيه بأنج تستغنين عنه وفكري في أمورج أنتي فكري في نفسج شوي أنتي ما بتموتين من دونة ....
ولا شو؟؟ قوي نفسج.. المشكلة فينا نحنا ننجرح ونزعل في وقت غيرنا لاهي. اذا حبينا أخلصنا حتى النخاع ونثق ثقة عمياء. حليلنا الحريم:tears:.

فكري في كلامي عدل وارجوج لا تتصلين فية ولا حتى تردين على اتصاله.. وشوفي كلها ايام ويرجع ركض للبيت.



واسمحيلي.

 

[كنت من أهلها]

كان الله في عونك لكن ياعزيزتي لازم تسوين شي لتحفظي بيتك لأنه في النهاية لازم يرجع لبيته وذلك بتوسيط احد من اقاربكماواذا عاد اليك اكسري قلبة بحسن التعامل وكان شيء لم يكن وبذلك تصبحين انت ملكة قلبة نصيحة مجربة قريبة لحالتك

 

[== فجر جديد==]

إن شاء خير يا أختى وعسى الله يهديه ويرجع حق بيته وعياله وصدقينى هذى فترة وبعدين راح يتحسف بس إنت الله يهديج لو ما سك المرأه ومكلمتها وبينتيلها إنك عارفه كل شى ولازم تتركه أحس من ما تفضحينه لأن صديقتى كانت جذى يوم إفضحت زوجها إنقلب ضدها فعسى الله يهديكم حق بعض يا رب.........
(( اللهم عظمنى فى قلبى الزوجى وجعلنى قرةعينه ودم قلبه ودفء حياته وسعدنى ولا تشقنى معه يا أرحم الراحمين يا رب))​

 

[نبرة حزن]

الله يهدي ريلج بس أحس وايد قوية يوم أنج فضحتي جدام الاهل ألحين بيرد السالفة كلها عليج المفروض تتفاهمبن وياه واتحلين مشاكلكم مبينكم

 

[هونى]

كلامكم كله على عينى وراسى بس كلام وردة امل مطابق مع تفكيرى حسافة يوم زعل اتصلت علية مرتين وكلمنى ابجفا عاد يوم شفته يكلمنى جذيه احتريت وقلتله طلقنى طبعا اهو قالى روحى المحكمة وطلبى الطلاق عشان تسقط جميع حقوقك ومنها حضانة العيال

 

[وردة أمل]

هوني

طمنينا عليج حبيتي ومثل ما قلتلج لا تلاحقيمه واشغلي نفسج بنفسج..:bye1: روحي صالون سوي صبغه يديدة غيري اللوك شورايج أمممم طلعي مع ربيعاتج استانسي سوي الشوبنج أو اي شي يعيبج. أي شي شو عندج هوايات .. المهم يا حبيبتي اشغلي نفسج وخلية اخر الاهتمامات صدقيني ماراح تندمين:evil_lol:.

 

[ضياء القمر]

استفيدي من القصص الموجودة بالمنتدى


عسى الله ان يلهمك الصبر والحكمة والدهاء

ويرد لك زوجك لك ان شاء الله

 

[ود اليل]

والله كانك تحكين عن قصتي وفضحت زوجى عند اهله واهلي وفي الهيئه لكن للأسف مانفع بشي وهي متسلطه عليه لا انها واطئيه وقليلة ادب لكن مانفعني غير قيام ا ليل والدعاء اكثرى اختي من الدعاء .

 

[صاحبة الظل]

الله يعينج ياخيتى على ما بتلاج والصبر مفتاح الفرج والدعاء ثم الدعاء