الزوج نعمة او نقمة

[فجر الحربي]

السلام عليكم ورحمة الله وبركاته

مشكلتي مضحكة مبكية انا نفسي ماادري ايش ابغى من زوجي
وماادري ويش ابغى من حياتي نفسيتي صارت زفت ماني متحملة احد كل همي
اني ارتاح ضميري معذبني

انا من الشخصيات المرحة المتفاؤلة اجتماعية
احب الناس احب نفسي واحترمها كثير واقدرها واثقة من نفسي كثير طموحة والحمدلله احقق كثير وانجز كثير وفقني الله بدراستي وفي تحقيق كثير من احلامي


تزوجت وفي بداية زواجي وكنت بصراحة وهذه غلطتي مااخلي زوجي يصرف كثير
مع انه عنده ويقدر يمشيني ويوديني السوق وماكنت اطلب كثير انا بيتوتية وحملت بدري وتعب حمل وولادة وصرت اطلب ابغى وابغى لكن صار يقول ماعندي وماعندي ومشغول ومقدر
بعدين بعدين وعلى هذا الحال مهتم بنفسه مرة ويشتري اغراضه باناقة يعني ومايبخل على نفسه بشيء

مرت الايام وانا على وضعي ماتغير اذا ابغى اتمشى وداني بيت اهلي واذا ابي السوق اتبهذل لازم ابكي عشان اروح وبعدها بكم يوم يوديني وهو مبسوط يعني ماينكد علي في طلعتي وقتها ..

صار لي كذا موقف مع اهله وبعدين صرت مااثق في احد نهائي تحطمت منهم ماعدت اصدق احد احس كل الناس تخدعني احسهم كلهم يجاملون ويكذبون فقدت ثقتي بالناس وفقدت ثقتي فيه لاني اكتشفت انه على علاقة مع بنات وانه مرتاح معهم وماهو مرتاح بحياته معي قالها لي مرة وان لو معه فلوس راح يتزوج ولا يفكر باحد ماصرت اثق فيه ويدخل شات يعني فيه طيش مع انه مو واضح عليه لكن الشكوى لله


بعدها صرت حتى مااثق بنفسي دمرني تدمير كل ماجاء البيت البيت ليش كذا الاكل ليش كذا لبسك ليش كذا غيريه شعرك يتساقط ليش وووو آخرتها وصلت معه يقول انتي المسؤلة ان شعر بنتي ماطلع قلت له توها صغيرة حسيت انه مجنون يدك ليش كذا وسيل عارم من الانتقادات مدري ايش يبغى مني هو مرة اقول استخف وانجن ومرة اقول سايريه يابنت وطنشي والله ياناس افقدني حتى لذة الحياة ماصرت اثق بأحد ولا ابغى احد ابغى بس انعزل
بعد المشاكل مع اهله قلت يابنت عزي نفسك عن الناس اذا يبغونك تجين يدقون عليك
وفعلا جربت هالطريقة وارتحت ..

بيتي صرت اهتم فيه اكثر مع انه نظيف ومرتب بس صرت ابالغ كثير على حساب مااسمع كلمة تجيب الهم منه

أنا كاتبة وصار ينتقد كتاباتي بطريقة لاذعة حتى اصبحت اشعر باني لااجيدها ابدا وتركتها ولم اعد اكتب الا يسير ولا اثق فيه بسبببه

انيقة جدا بسبب تهزئيه وتحطيمه لم اعد اعرف كيف البس يكثر النقد اللاذع بطريقة تنرفز وتفقد الواحد كرامته

كنت مااطلب فلوس ولما تغيرت صرت اطلب وصار يتضايق تنقصني امور واشياء واغراض لبيتي
ولي وللبنات من شدة تحطيمه لم اعد ادري ماارغب فيه افقدني حتى حلاوة الشيء ولذته
امشي في السوق ولا ادري ماذا اشتري بسببه اذا اخذت شيء تحدث ماله داعي غالي مو لازم فيه امور اهم منه واذا قلت ماعندي طيب سكت بس بعد مايكرهني فيه واتركه ماابيه

وبعدها ينزل يشتري له _ كبك_ 120 ريال ويجي فرحان فيه :8:


بنتي الكبيرة تبغى العاب وتفرح فيها لما تشوفها مع الناس لكن ماعندها مايقول لا بس مايشتري واذا جاء ينزلني السوق قال ماعندي غيرها ومن هالكلام يسد نفسك عن الشراء
استحي من الناس اذا جو عندي مدري ايش اقدم لهم هواء مثلاً
بعت ذهبي فلوسي شهري ياخذ مني احيان برضاي واحيان يسوي زعلان عشان اعطيه
واذا احتجت بالبكاء يعطيني 200 ريال لا ويرجع ياخذها يقول يعني على مين باصرفها مو عليكم واسكت وانا منغبنة

كل شيء لي اعطيته اياه ماحرمته من شيء لكن الله حسيبه
بسببه صرت امشي في السوق ماادري ويش اخذ وارجع البيت ويدي فاضية
كنت احب الضحك والحياة وصرت مكتئبة وزعلانة وحزينة افكر بالطلاق ومرة اقول البنات
ومرة اقول انا اهم وراحتي ونفسيتي


اللحين ويش اسوي يعني اتطلق وانفذ بجلدي والا انطق واصبر

اتمنى اقرا شيء يسرني ورجاء ماابغى ردود تجرح مااحد ناقص

 

[عاشقة الشروق]

الله يفرج همك ويسخر لك زوجك وعيالك

 

[هياووووووي]

حبيبتي انا عندي لج حل
اولا : الصبرررررررررررررررررررررر
قوي ثقتج برب العالمييين وخلى عندج امل انه الله ما يضيع حق العباد وانه ماراح يخيب ظنج
تتبعي هاذي الشروووط
1_ صلاة قيام الليل لو ركعتين وقولي تقريبا 100 مره (اللهم اني اسالك رضاك والجنه )
2_ اذا تسمعين اغاني لازم تتركينها ما بينفعوونج بشى اكثري الاستغفار
3_ على كل صلاه تصلينها دائما رددي (اللهم اجلب لي زوجي جلبا حيث لا يقر له ليل ولانهار حتى ياتي الي راغبا نادما ولهانا متيما يعتذر )
4_ المداومه على قراءة سووره البقره يوميا ومن تخلصين رددي (اللهم اجعل زوجي تقيا نقيا هينا لينا مخموم القلب مرفووع ذكره ف السموات والارض )

الطلاق ما بينفعج يشي وادعيله الله يسخر قلبه لج وبناتج ربيهم احسن تربيه وابوهم بيرجع لصووابه ولعقله انشالله وبيترك بنات الحرام
انتى احين خليه لاتحتكين فيه بس اشتغلي لنفسج ادعي وانتى ساجده خل ربج يعرف اسرارج وربج رووؤف رحيم

 

[فجر الحربي]

عاشقة الشروق

طيب الله خاطرك واسعدك

 

[ربي رضاك عني]

الله يكشف كربك حبيبتي اصبري (ان الله مع الصابرين)
كوني مع الله يكن معك تحلو لك الحياااااااااااااااااااه
اكثري من الدعاء والاستغفار فلهما سر عجيييييب في كشف الكروب

 

[الاميــره]

الله يفرج همك يااااااااااارب

 

[حنان بلا حدود]

لا حول ولا قوة الا بالله تفرج كل هم , استغفر الله تفتح كل الابواب المغلقة .

اعانك الله وفرج همك وبارك لك في ذريتك ,,,

 

[زمن أول تحول]

حبيبتي الله يخره لك ويهديه لك ويجعله قره عين لك ويجعلك قرة عين له ... اميييييييين

شوفي حبيتي زوجة اخويا من اول ماتزوجت حملت ع طول ماشاء الله والحمل متعبها وهيك وماتطلب منه شي واذا طلبت حاجه قليله واهلها يروحون يقضون لها ولا تمشيات ولا طلعات ولا هم يحزنون ..

طبعا وهي حامل ماكانت حاسه بالنقص وبعد ماولدت بكم شهر بدت تشوووف قد ايش هي غبيه وانه مقصر عليها بكثييير .. ويالله حملات هجوم بس من تحت لتحت ..

يعني اعطيني 1500 واذا قال لا تنزله سوووووق غااالي وتخليه يشووف الاسعاار وترجع وهي ما اشترت شي ..

وبدا يحس على نفسه يعني مثلا تبغاه يشتري ملابس لولدها تقوووله اهلي يقووولون احنى بنشتري له

دام ماعندكم فلوس او كرهنا اللبس هذا على ولدك ووكذا تخليه يشتري وهو طيب لانه مايحب احد يتكلم عليهم كذا ..

شوفي حبيبتي بعطيكي نصايح وانتي شوفي اللي يناسبك وطبقيه ..


* خلي فلوسك لك لاتعطينه شي روحي السوووق واشتري ملابس ع ذوووقك مو تقولي انك كشخه ليه تخليه يدمرك خليك واثقه من نفسك واختيارك واذا قال مو حلوو قوليله غريبه كلهم مدحووه ليا ويقولون مرره ذوووق ..

* واشتري كريمات رطبي جسمك خليه ناعم اهتمي فيه حاولي تصلحين العيوب اللي فيه واذا جا روحي جيبي المناكير وحطي وبردي اظافرك خليه يشوف انك تحبين نفسك وتدلعينها ..

* رددي كل ماتذكرتي انا قويه انا ناجحه انا حلوه

(جيبه يعني اجيبه لو كان تحت الحراسه
لاتقولوا مقدر اجيبه
لا تقولوا هذي صعيبه
اجيبه يعني اجيبه لو كان تحت الحراسه

* خليكي قويه مو من يوم يقولك لا تبكين قوليلي افا حبيبي يخليني احتاج احد وهو موجود ..

* لاتخلينه لا هو ولا اهله يأثرون فيك لانك قويه وناجحه ومتفائله

* مارسي حياتك عاادي خليكي مشغوله عنه باي شي بينيله انك محبوبه كلمي صديقاتك اللي من زمان عنهم وقطعتيهم عشانه هو ماقطع علاقاته عشانك ..


وفيه نقطه مهمه امكن هو يغار منك عشانك يعني ناجحه اكثر منه او عشان عندك مؤهلات اكثر منه ..


وقبل كل شي لا تنسين الاستغفااار والدعاء والصدقه لو كل يوم ريالين وراح تشوووفي رااحه غريبه والامور تتيسر لك


كان عندك هم لاترفع تقول يااله الكون همي كم كبر
قول ياهمي ترى مهما تصول عندنا رب كبير يابشر

يالله ياقويه خلينا نشوووف بعد فتره نجاحك والله يوفقك ويسخره لك ..

وع فكره ترى انا ماني مصلحه اجتماعيه لكن هيه نصيحه من اخت محبه لك

واذا ماعجبك كلامي لاتنفذين شي ..

 

[رازيا]

عزيزتي تأملت رسالتك المطولة وقرأتها أكثر من مرة أتأمل ما بين سطورها وما تحمله من أسى وألم، وكم أقدر لك هذا الجهد الكبير، والصبر الطويل، وحرصك الجميل على استقرار بيتك وإسعاد زوجك ومصلحة أبنتك، فهنيئاً لك بهذه الهمة العالية والروح القوية.
أخيتي الكريمة: كثيرة هي منغصات الحياة، ولكننا إذا توقفنا عند كل منها فإننا سوف نسير للخلف، وندور حول حلقات مفرغة تؤثر سلباً على حياتنا، لذلك فإن كثيراً من مشكلات البيوت يمكن التغلب عليها بطرائق وأساليب تتناسب مع كل حالة منها،اطلب منك طلبين
الأول: عدم الاكتراث أو عدم الاهتمام باتهاماته وسوء تقديره لك، فأنت تعملين ذلك من أجل رضى الله تعالى، فإن كان خالصاً لله فسوف يرضى به الزوج إن آجلاً أو عاجلاً.
الثاني: استمري إلى اهتمامك بنفسك وجمالك وزينتك وترتيب بيتك واهتمامك بأولادك دون التعريض له بذلك وكأنك تفعلين ذلك من طباعك وليس له، ليشعر أنك غير مهتمة باتهاماته ولا برأيه فيك، وأشعريه أنك تثقين في قدراتك وجمالك، فسوف يفكر كثيراً حينها.
1-لا تفكري في الطلاق مطلقاً ولا تجعليه يمر على خاطرك أبداً ، فأنتِ ما تزوجت إلا رغبة في الزواج ، وهذا حقك المشروع ونداء فطرتك الطبيعي ولاشك أن من الإيجابيات التي حصلت عليها أن سكنت نفسكِ إليه بما هو قائم بينكما من علاقة جسدية ، وهذه إيجابية وحسنة استفدتها من الزواج الذي هو بحق نعمة وآية من آيات الله عزوجل العظيمة ، ولا أظنك تختلفين معي في هذا الأمر،وهذا الأمل الأول لكِ اجتهدي بكل ما تملكين من مميزات الأنوثة بكسب قلبه والتودد إليه، والمرأة وهبها الله عزوجل قدرة على معرفة مداخل الرجل والدخول إليه من خلالها للتأثير عليه.
2-قولي لنفسك :أنا أريد أعيش مع هذا الرجل الذي هو زوجك ، ولكن حياتي معه تحتاج إلى إصلاح وعشرة بالمعروف وصبر، زواجك مدته ربما سنة او 3 سنوات وهي مدة قصيرة جداً، كي تتخذي قرار الخروج من المنزل وقد تفكرين في الطلاق ، أختي الفاضلة خسارتك أكبر من خسارته بالطلاق ، - ومعاذ الله أن يقع ذلك - لو طلبتِ الطلاق ستكون خياراتكِ قليلة، ثم أي نوعية من الرجال ستتزوجين بعد الطلاق. لابد أن تكون قناعتك قوية جدا في أن الأفضل والأحسن لكِ في هذه المرحلة من عمر زواجك القصير هو البقاء مع زوجك ، لذلك أنصحك بالعودة إلى بيتك اذا كنتي خرجتي منه ، عودي ومعك خطة منهجية تهدف لإصلاح زوجك ، واحتسبي في ذلك الأجر من الله تعالى .
3- تعلمي فن الحوار الزواجي ، وأقرئي كثيرا عن كيفية حل المشكلات الزوجية، تفعلين ذلك استعداد لمحاورة زوجك والدخول معه في حوار مستمر حتى تحققي لنفسك وزوجك حياة زوجية هادئة ومستقرة.اجلسي معه جلسة صراحة واسئليه هذه الاسئلة
أنا أحبك وأريد أنا أعيش معك وأن يكون بيننا أطفال زيادة ،لماذا تهملني طوال النهار ؟ لماذا أنت زعلان دائما، وما يعجبك أي شيء؟ لماذا تنظر لي باحتقار وازدراء وترى أني قاصرة ولا أحسن أي شيء؟ لماذا الألفاظ النابية والبذيئة والقاسية ؟ لماذا تمنع عني كل شيء فهل أنت تحبني ؟ لماذا تزوجتني ؟
هذه الأسئلة اطرحيها عليه بهدوء وروية ، وكوني فطنة وذكية جدا لسماع أجوبته حتى تكتشفي ما في داخله، وتعرفي ما يؤلمه حتى تكوني سببا لراحته،عزيزتي تنازلي له بعض الشيء ولا تقفي له بالند والمطالبة بحقوقك ، لأنه وبكل صراحة زوجك يحتاج إلى أخصائي نفساني وليس طبيبا نفسيا ، ، وقد يكون هو صاحب علاقات غير مشروعة ولا يعرف من النساء إلا المتبذلات الرخيصات ، فكل إناء بالذي فيه ينطح ، وهذا تفسير لتصرفاته معك ،
5- كيف علاقة زوجك بأمه وأبيه وأخوته وأقاربه ومن حوله، ما هي نظرة عائلته له، هل هو رجل محترم و وقور و فاضل ومجتهد ، ابحثي عن هذه الأمور عن سمعة زوجك في محيطه العائلي ، ستحصلين على إجابات ، قد يكون هو سيء الخلق والطبع وضعيف الدين مع الجميع ، وقد يكون العكس ، ليس سيئاً إلا معك ، في كلا الحالتين ستحصلين على إجابة تجهزي نفسك للتعامل معها.
7- استعيني بالله تعالى واطلب منه أن يبصرك بحقيقة زوجك وأن يلهمك الصواب والسداد في التعامل معه ،أكثري من الاستغفار والصدقة، وأظهري حاجتك الشديدة لله تعالى ، فهو أعلم بما يصلح لك ولزوجك .
أسأل الله تعالى أن يوفقك وأن يحبب زوجك فيك وأن يصلحه لك وأن يرزقك الحياة الزوجية الهانئة المستقرة السعيدة.

 

[دلوعة عمرو]

الله يفرج همك ويبعد زوجك عن الحرام

 

[فجر الحربي]

اتمنى هياوي اني مااندم على شيء ولا بأي شيء
اعترف اني الحمدلله مااستمع للأغاني الله وفقني لهالشيء لكني مقصرة كثير بديني

ونفسيتي الان صايرة الحمدلله بس

 

[فجر الحربي]

ربي رضاك عني

والاميرة


حنان بلا حدود


الله يفرج همي زهمكن ويجعل القرآن وذكره راحة لنا من هموم هذه الدنيا ومشاكلها

جزاكن الله الخير

 

[نوود موود]

انت انسانه رائعه فعلا.. ارجعي حبي نفسك ودلعيها بدون تقصير بحقوق زوجك وحبي الحياة وتفائلي ونمي مواهبك وطوريها اكثر واكثر..
واذا كنت تحسين اللي بزوجك غيره منك فراعي هذا الشي وحسسيه انه هو ذوقه راقي بالللبس وطريقة كلامه منمقمه واسلوبه وسوالفه حلوه ومشوقه وانك تستمدين ذوقك و اسلوبك الحلو منه .. بكذا ان شاء الله بتخف حدة الغيره عنده وبيحس انه انسان ناجح مثلك وبيكون لك عون بإذن الله تعالى .. خذي بيده حبيبتي ودليه على طريق السعاده..
وداومي على الاستغفار.. بالتوفيق

 

[مـ ح ـلك القلب]

اخيتــــــي عليـــكـ بصــلاة الليل بالثلث الاخير من الليل والدعــــــاء والاستغفاررررررررررررررررررررر دائمـــــــــآ رددي لا الــــــــــــــه الا انت سبحـــــانك اني كنت من الظـــالمين....الله يفرج همك وهم كل مهموووووم عاجلا غير اجل.....


من صلى 4 ركعات وقال(ياودودياذا العرش المجيد يافعال لماتريد اسألك بعزك الي لايرام وملكك الذي لايضام وبنورك الذي ملأاركان عرشك ان تكفيني مااهمني من امر الدنيا والاخره)استجاب له الله بأذن الله ومشيئته

استغفر الله الذي لا اله الا هو الحي القيوم واتوب اليه....

 

[الجده الصغيره]

انت اولا بحاااااااجه لاستعادة ثقتك بنفسك.....ليش تسمحين له يحطمك؟...وينتقص منك؟....

المفروض لو انتقد شي من كتاباتك قولي انا وااثقه من نفسي وراضيه عنها...
انت ابدي بنفسك ورجعي لها مكانتها اللي ضيعتيها وبعديييين التفتي لزوجك........