.. الزوجين اسمهان وعبدالرحمن..عادت إليكم!!

[جيانة]

مرحـــــــــــــــبا​

رانية:وشفيك نزلتي من عند الأخت مرام؟
نجلاء:ضاق صدري يابنات..من اللي شفته!معقول مرام تصاحب ناس بهالأخلاق؟؟؟
اسمهان:عشان تصدقوني لاقلت لكم إن مرام تغيرت عن زمان كثير..
مشاعل:تصدقون ؟حتى عبدالمجيد كذا مرة يلمح وحدة من صاحباتها طالعة من عندها ويقول لي أشكالهم مو زينات..لو نادتك وهم عندها لاتروحين!
رانية:يلا..الطيور على أشكالها تقع!!
نجلاء:لا الحق ينقال..أنا ماسمعتها تتكلم كلام بذيء مثلهم ولاتدخن..
رانية:بس يكفي يالفطينة إنها فاتحة لهم بيتها وتجاريهم وتضحك معاهم..لو فيها خير؟ تعلمهم الصح من الخطأ!ومادام عاجبينها فمصيرها بيوم من الأيام تقلدهم!
نجلاء:بس والله حاز بخاطري إنَّا نفترق..ودي نرجع مثل زمان..
رانية:حبيبتي..من عافنا عفناه وإن كان غالي!!
اسمهان:هي لو ترجع مثل أول؟فأنا أول وحدة بأرحب فيها.
رانية:لاتشيلون همها!!راحت مرام وجات مشاعل تسد الفراغ..مرحبا فيك ياميشو!
مشاعل:مرحبا فيك ياقمر..
واكتملت جلسة الشلة بوجود نجلاء..
وقامت كل وحدة منهم تذكرهم بذكريات الزمان والمقالب اللي كانوا يسوونها في المدرسة والتعهدات اللي يكتبونها
مشاعل:هههههههه الله يقطع أباليسكم آثاريكم ماكنتوا هينات!
رانية:لا وتتذكرون يوم أبلة جوهرة بيوم من الأيام ركبها العنز من كثر ماقهرناها وحلفت أيمان إنها مابتحط بملفاتنا شهادة حسن سيرة وسلوك؟؟
أفنان:ايه أنا أتذكر..وبالذات انتي كانت تحقد عليك حقد وتناظرك بنظرات قوية لأنك أطولنا لساناً!!وبيوم قالت:شدي حيلك يابنت وانجحي!ماهو من حبي فيك!بس عشان لاتقعدين بوجهي السنة الجاية وإلا راح أستقيل والسِبَّة انتي!!!!!
رانية:ايه..بس الحمدلله اسمهان أنقذتنا من تهديدات جوهرة وخذت ولدهم وعمت عيونها عننا!!!
نجلاء: بس لاتنسون بعد..إن السنة الأخيرة لنا بالثانوي كنَّا مسالمات..
وبالأخص بعد مانقلت عبيروه من المدرسة..إلا ماحد سمع أخبار عنها؟؟
أفنان:أنا شفتها بلبنان!!
الجميع(بدهشة):ايييييييييييييش؟؟؟؟
أفنان:مثل ماقلت لكم شفتها بلبنان بمطعم وكانت تاكل وهي كاشفة وجهها وعرفتها..بس مابيَنْت لتركي أبد!
رانية:قدعة يابت!ماأحلاك تبينين له يقوم يحن لها!
اسمهان:لا لا ماأعتقد إنه يفكر فيها أبد بعد اللي سوته معاه...إن شاء الله يكون كل اللي صار لها درس تتعلم منه..
أفنان:إلا يانجول وش صار على خطبتك من ولد خالتك؟؟
نجلاء:ماقالوا لك رانية واسمهان؟جاء بنهاية إجازة الصيف وتقدم رسمي هو وخالتي وأخواته..وصارت النظرة الشرعية..وهالأسبوع سوينا التحاليل وباقي 10 أيام وتطلع النتيجة...
رانية:وشلونه يابنت؟؟وسيم؟ولاأسمر كويحة وبعصاقيل مثل نويصر؟؟
الجميع:هههههههه
نجلاء:يالقافتك يارانية!وش عليك من شكله؟ بس هو من ناحية وسيم؟جداً وسيم!!!
رانية:آآآخ بس من أحلامي أنا يوم كنت بنت أسمع الناس يقولون فلانة تتمنى فارس يخطبها وهو على فرس أبيض!وأنا لاكنت أبيه يجيني على فرس أبيض ولا على حمار أبيض!إلا كنت أحلم يجيني راكب لكزس أبيض!!وزاد جاني نصور بــ وانيت أبيض لا وغمارة وحدةمن زود الفقر!!!
الشلة:ههههههههه
اسمهان:عاد إنتي من صدقك سيارته وانيت أبيض؟
رانية:لا سيارته الأساسية كابريس أسود معلعل ومدقدق من كل جهة تقولين حمار مآكل علقة من بعير!!وعنده وانيت أبيض ومن زود الكشخة موقفه برة قدام البيت يعني إني عندي سيارتين!!!لا ويقول كان ينقل عليه عجايز الحارة أيام زمان!!
نجلاء:أف موب هين !!يركبهم جنبه وتلاقين العجوز كاشخة شايفة نفسها راكبة مع سايق خصوصي !!
رانية:لا ياحبيبتي..مايركبون جنبه ولا شي..إلا يرمي بهم في الصندقة الخلفية للوانيت!!
اسمهان:ههههههههه واعَلَيَا!!ليش خِرفَان؟!!
وماقصروا البنات قاموا يساعدون اسمهان في المطبخ واعداد العشا..وتعشوا
وجاء أخو نجلاء ياخذها وودعت الجميع وقالت:سبحان الله..قدر ايش الفرق بين جمعتكم وجَمعة مرام فوق!!!
في هذي اللحظات كانت أم عبدالرحمن قد رجعت من برة وقاعدة في الحوش وعبدالرحيم معاها يسولفون..
شافت نجلاء نازلة بقمة حشمتها ورايحة للباب...
وشوي نازلين ثنتين من ضيوف مرام متكشفات ويضحكون بصوت عالي ويمزحون مع بعضهم مزح بايخ...
انتبه لهم عبدالرحيم وقال:أكيد هذول ضيوف اسمهان!!!!!!!
أم عبدالرحمن:لا ياحبيبي هذول أكيد ضيوف زوجتك..اسمهان ماتعاشر هالأشكال!!!
عبدالرحيم:وش تقصدين يمه؟؟زوجتي تنزل لهالمستوى؟؟
أم عبدالرحمن:مسكين إنت!!خلني ساكتة أحسن!!
عبدالرحيم:يمه لازم توضحين!
أم عبدالرحمن:انسى الموضوع خلاص..
وبعد نجلاء راحت رانية ثم أفنان وأخيراً مشاعل..ويوم كانت مشاعل طالعة بالدرج كانت آخر ضيفة عند مرام توها تخرج ومرام واقفة تودعها من عند الباب...
انتبهت مرام لمشاعل وكلمتها...
مرام:هلا مشاعل..كنتي عند أهلك اليوم؟؟
مشاعل:لا كنت عند اسمهان...
مرام:بروحكم؟؟
مشاعل:لا معانا أفنان ورانية ونجلاء!!
مرام:نجلاء؟؟؟؟؟؟؟؟؟؟وش اللي جابها عندكم؟؟
مشاعل:أبد تبي تسلم على صاحباتها..ليش؟فيها شي؟؟
مرام(بـ نرفزة):طبعاً..أكيد هذول اسمهان و رانية طابخينها سوى!!حتى نجلاء يبون يقلبونها ضدي!!!
مشاعل:بالعكس..هم ماجابوا طاريك أبداً..كل الجلسة كانت فرفشة ووناسة!
=============
بعــــــــــدين التكملة​

 

[جيانة]

مرحبا بردودكم على هذا الرابط:


http://www.niswh.com/vb/showthread.php?t=225321

 

[جيانة]

أنا جيــــــــــــــــــــــت!​

طلع عبدالرحيم شقته..وقعد مع مرام..​

عبدالرحيم:كنت قاعد مع أمي بالحوش وكان فيه ثنتين نازلين من فوق لابسات عُبي ملونة ومتكشفات ويتضاحكون..هذول صاحباتك؟؟​

مرام(بارتباك):لا...يمكن ضيوف اسمهان!!!!!​

عبدالرحيم:أنا قلت كذا بس أمي مُصرة إنهم ضيوفك انتي!!!​

مرام:وهي أمك كل شي شين..​

تبي تلزقه فيني؟؟؟وبعدين هي ماشافتهم بعينها نازلين من عندي..فعلى أي أساس تحكم؟؟؟​

وحتى إن كانوا نازلين من عندي مين انتوا عشان تحاسبون الناس؟​

عبدالرحيم:بسم الله!وانتي ليش زعلانة؟؟​

مرام:لأني ماأحب أحد يتهمني بشي!!إنت بكرة لو يقولون زوجتك لعَّابة بتصدقهم على طول!!​

عبدالرحيم:بالعكس..أنا إن حبيت؟ حبيت من قلب وتغاضيت عن كل عيب.....​

وراحت مرام ترفع البيت..​

مرام:أقول رحوم؟إتصل على أمك خلها ترسل شغالتها تنظف البيت!​

واتصل عبدالرحيم على أمه وقال لها انه يبي الشغالة تطلع تنظف بيتهم!​

أم عبدالرحمن:لا ياشيخ؟؟ماتشوف كم الساعة بإيدك؟؟ولا تبيني أروح للشغالة وأصحيها وهي نايمة مع زوجها وأقول نظفي بيت عبدالرحيم؟!!​

عبدالرحيم:أجل مين بينظف بيتنا؟​

أم عبدالرحمن:تنظفه راعية البيت الله يعطيها العافية..!!​

عبدالرحيم:يمه؟مرام حامل!​

أم عبدالرحمن:ومشاعل بعد حامل..وموظفة وقايمة ببيتها وتطبخ يومياً لزوجها.. مو لها شهر تتغدى وتتعشى من برة!!!!مثل بعض ناس!!​

عبدالرحيم:شكراً...​

أم عبدالرحمن:عفواً!!​

وقفلت السماعة وراحت تنام..​

عبدالرحيم:خلاص..خلي الشغل بكرة..وخلينا ننام..أمي مارضت ترسل شغالتها!​

مرام:ليه؟حاسدتنا على شغالة؟أجل بأتصل على أهلي خل يرسلون لي وحدة من شغالاتهم!!​

عبدالرحيم:يابنت الناس..ماله داعي..البيت مابيطير..بكرة يحلها حلاَّل!!​

============​

وببيت مشاعل...كان كل الكلام بلغة الاشارة..​

عبدالمجيد:أرسلت للمجلة صور من رسوماتي..واليوم جاني رد منهم بأنه في معرض للرسوم بيقدمون فيه أعمال الفنانين المبتدئين..وأسعار اللوحات بتكون هبة للجمعيات الخيرية..ويبوني أشارك فيه..​

مشاعل:وش تنتظر؟لازم تشارك..ومن بكرة إبدأ في الرسم!​

===========​

في بيت عبدالرحمن...​

عبدالرحمن:سمهونتي؟شلون جمعتكم اليوم؟ان شاء الله استانستوا؟؟؟​

اسمهان:ايه..انبسطنا كثير الحمدلله....​

عبدالرحمن:قابلت اليوم صديقي سلمان وعزمنا على العشاء بكرة في مزرعة أرحامه.. ويقول تعالوا من العصرحاولت أتعذر..لكنه أصر!!​

اسمهان:يوه منك ياعبدالرحمن!وليش تتعذر؟مشتاقة لزوجته ليلى حيل..فرصة نتقابل ونغير جو..​

عبدالرحمن:خِفت يكون عندك تخطيط ثاني أو بتروحين لأهلك وقلت بلاش لاأخرب عليك..​

اسمهان:لا أهلي بأروح لهم يوم الجمعة ان شاء الله..​

============​

وثاني يوم كانت اسمهان فرحانة بالروحة للمزرعة..عرضت على أم عبدالرحمن تجي معاهم لكنها رفضت..​

وقالت:جوهرة بالمستشفى مدري شفيها تأخرت ولادتها​

..والأفضل أكون جنبها..​

وراحوا عبدالرحمن واسمهان..وكانت ليلى وأهلها من العصر بالمزرعة..​

وقامت ليلى تعرِّف اسمهان بأخواتها...​

ليلى:هذي أختي نورا..وهذي بدور وهذي مريم..وهذي زوجة أخوي سلمى...وأمي وأبوي مسافرين يزورون جدي.. مريض شوي..​

وتعرفت بهم اسمهان وكانوا حبوبات..​

وكانت بدور أخت ليلى مخطوبة..​

ليلى:تتذكرين يااسمهان يوم قلت لك تعبنا وحِنا نسوي تجهيزات ملكة أختي؟؟​

اسمهان:ايه..​

وأشرت ليلى على بنت حلوة لكن دبدوبة شوي وشعرها خفيف جداً​

ليلى:هذي هي أختي بدور اللي قصدتها..وزواجها بعد شهرين ان شاء الله..عاد انتي معزومة من الحين...مو تطنشين وماتحضرين مثل يوم الملكة!​

بدور:بالله لاتذكريني بالزواج!​

اسمهان:ليش؟فيه عروس ماتفرح بزواجها؟؟​

بدور:بالعكس أنا فرحانة..لكن ماخرب علي إلا سالفة اكتشفتها الحين!​

نورا:يوووه منك يابدور زهقتينا بسالفتك لاتقولينها!!​

اسمهان:شوفوا..أنا مو ملقوفة بس تشوقت أعرِف!​

بدور:الله يسلمك..كنت أعاني لما تجيني العادة الشهرية من آلام شديدة وانتفاخ بالبطن من زمان وكنت ساكتة على نفسي..وبعدين تطورت المسألة وصار وزني يزيد بالسنتين الأخيرة والكل مستغرب وبالذات إني من النوع اللي ماياكل بكثرة..ومو بس كذا إلا صار شعري يتساقط لين ماصرت شبه قرعة من مقدة راسي..وأخس من هذا كله إنه يطلع لي شعر بجسمي بأماكن مو مرغوبة؟الصراحة بعد ماملكت قلت لازم أشوف لنفسي حل ورحت المستشفى وتحاليل وفحوصات لين اكتشفت بالنهاية إن كل سبب هالبلاوي..هو(تكيس المبايض)!!وارتفاع هرمون الحليب!​

اسمهان:وبعدين؟​

بدور:الدكتورة خرعتني وقالت لي لازم تستمرين على علاج طويل المدى وإلا راح يصير لك عقم! أو اجهاضات مستمرة!!وممكن يستدعي الوضع تدخل جراحي!أو استئصال جزئي للمبايض ونسبة نجاحه ضئيلة!!واللي خايفة منه اني شلون بأصارح خطيبي؟؟أخاف لو عرف بعدين بيعتبر إننا غشيناه!​

وبنفس الوقت مو قادرة أصارحه لأن علاقتي فيه رسمية ومابيننا أخذ وعطا كثير!​

مريم:يابنت لايأنبك ضميرك..إحنا مو من البداية عارفين بــ عِلتك وخبيناها حتى يقول غشيناه!حِنا مادرينا إلا بعد الملكة بـ شهور..​

سلمى:أنا من رأيي تستمرين على العلاج..يمكن تتعافين وتحملين بعد الزواج بسرعة حالك حال أي وحدة..​

اسمهان:صراحة مسألتك محيرة لو تستفتين شيخ أحسن!!أتوقع كل رجال بالدنيا يتمنى الذرية..​

وبدأوا يسولفون بسوالف ثانية ويمشون بين الزرع بالمزرعة الخضراء اللي كانت شاسعة الأرجاء...وهم بقمة انبساطهم..​

وبعد العشا..رجعوا اسمهان وعبدالرحمن بيتهم وهم بالطريق​

عبدالرحمن:انبسطتي بالمزرعة؟​

اسمهان:ايه..الصراحة أهل ليلى ينحطون على الجرح يبرأ..​

وجمعتهم هادية وحلوة مو مثل جمعاتنا خَلَف الله علينا!!!!!!​

عبدالرحمن:أي جمعاتنا؟؟​

اسمهان:كلها!ماتتذكر أخوك عبدالرحيم كل مااجتمعنا على البحر راح واشترى آيس كريم لنفسه ولزوجته من غير مايعبِّر الباقيين!!لو حتى أمه على الأقل..ولازم يسحبها من بيننا وياخذها ويفتر فيها حول البحر ؟أو المخطط!تقول ماحد متزوج إلا هو!خلاص يبون يختلون ببعض يختارون يوم ثاني..مو يستعرضون قدامنا!!!​

ونجي الطلعة كلنا ومعانا أكلاتنا وترامسنا إلا مرام يد ورا ويد قِدام!​

ماشاء الله عليهم دايماً هم ضيوف​

غير الكلام اللي ماله داعي والمزح بالرزح!!و....و​

عبدالرحمن:الحين اش لزومه هالكلام؟؟جمعات وبطلناها وصرنا نادراً مانجتمع برة!لازم يعني من هالانتقادات؟!!​

اسمهان:لا بس قصدي..إنه الطلعات العائلية عشان تكون حلوة ومرغوبة لابد يكون فيها تعاون..وأُلفة..​

عبدالرحمن:كل ناس ولهم طبعهم وتفكيرهم..وحِنا المفروض مانقعد نراقبهم كأننا حاسدينهم!بالعكس مانقول غير الله يهنيهم..​

اسمهان:بس صدقني ماهي حلوة قدام أمك أو خالتك جوهرة وأختك أحلام..ولا حلوة قدام أزواجهم ..انه يقوم ويروح ينادي زوجته ويمسك أياديها ويستعرض بها قدام الناس...هالشي يخلونه بطلعاتهم سوى..​

عبدالرحمن:من راقب الناس ماتت أمه!!!​

اسمهان(بخوف طفولي):يمه! لايصير في أمي شي!!!​

عبدالرحمن:هههههه أقصد مات هماً!​

ولما وصلوا اسمهان وعبدالرحمن للبيت بشرتهم أم عبدالرحمن بولادة الخالة جوهرة بـ ولد وسموه:عمَّار!!!​

==========​

مرت الأيام وكانت كل سوالف رانية بالكلية مع اسمهان ونجلاء عن جارتها الجديدة روابي وسهراتهم وقعداتهم وزياراتهم...​

اسمهان:الصراحة ..شوقتيني أشوف هالروابي..أحس إنها حليله..​

رانية:إذا ماعندك شي هالخميس تعاليني بأناديها ونسهر ونتعشى سوى..​

وبيوم الأربعاء كانت رانية متضايقة في الكلية ووجهها متغير​

اسمهان:رنون؟؟شكلك مو مريح أبد!فيك شي؟؟​

رانية:الحقيني أختك في الله متورطة!!!​

اسمهان:خير؟؟​

رانية:أنا شاكة إني حامل!!​

اسمهان(بفزع): مِن مين؟؟؟​

رانية:قطيعة تقطعك ياهالبنت!!من مين يعني؟أكيد من زوجي..في غيره؟؟؟​

اسمهان:انتي خرعتيني تقولين متورطة!!وشفيها لاطلعتي حامل؟؟؟؟​

رانية:لأن نصور قد قالها لي من البداية لو حملتي هالسنة فاعرفي إني بأفصلك من الكلية وتقعدين بالبيت..أهم شي حملك وصحتك!!!وأنا ودي أكمل دراستي وماأتأخر!!​

اسمهان:طيب انتي تقولين شاكة..يعني مو متأكدة..يمكن يخيب احساسك وتكونين مو حامل..​

رانية:ياليت!!​

========​

اليوم التالي وكانت اسمهان تستعد لزيارة رانية تفاجئت برسالة على جوالها من رانية..​

تقول فيها(سوسو لو ماعليك كلافة وإنتي جاية بالطريق مُري الصيدلية وجيبي لي اختبار حمل..ماودي أقول لناصر ويقعدني بالبيت!!!)​

وهم بالطريق..​

اسمهان:عبدالرحمن؟محتاجة الصيدلية ياليت تمر على أقرب وحدة بطريقنا!!​

عبدالرحمن:خير؟توي قبل يومين جايب لك حبوب الحديد!​

اسمهان:لا ماأبي حبوب..بغيت شي خاص!!​

عبدالرحمن:زين قولي وأنا أجيبه لك على السريع!​

اسمهان:لا أنا أبي أنزل بنفسي..​

عبدالرحمن:خلاص..خليها بعد مانرجع من زيارتنا..​

اسمهان:لا ضروري الحين..وياليت ماتنزل معاي!!!​

عبدالرحمن:آمري!​

وخلاها تنزل الصيدلية لحالها والفضول ذابحه..وقاعد يراقبها وهو بالسيارة ولما جات عند المحاسب وحط غرضها بالكيس نزل عبدالرحمن وقال:ارجعي السيارة أنا بأحاسب!​

راحت اسمهان للسيارة...​

وعبدالرحمن سأل الصيدلي:المدام اش اشترت بالضبط؟​

الصيدلي:اختبار حمل ياأُستاز!​

وحاسب عبدالرحمن وراح يركض للسيارة...ومشى بها وقال بفرح شديد:صحيح يااسمهان صحيح؟؟؟؟​

اسمهان(بدهشة):وشهو اللي صحيح؟؟​

عبدالرحمن:إنك يمكن تكونين حامل؟؟؟​

اسمهان(وهي متأثرة):لا يمكن ولا أكيد!!تطمن هالاختبار مو لي لزوجة ناصر!​

حس عبدالرحمن بخيبة أمل...وظل ساكت طول الطريق!​

مرحبا بردودكم على هذا الرابط:


http://www.niswh.com/vb/showthread.php?t=225321



​

 

[جيانة]

مرحبا بالغاليات​

ظلت اسمهان طول الطريق تفكر بسبب تأخر حملها وانتابتها الهواجس!!
ياترى هل عندي مشكلة التكيس مثل بدور أخت ليلى؟
أو مشكلة ثانية مالها حل؟
أو ماعندي شي حسب ماالدكتورة طمنتني السنة الماضية؟
أو يمكن تكون المشكلة عند عبدالرحمن ومخبي عني؟
ووصلت اسمهان بيت رانية..وفتحت لها رانية الباب ورحبت فيها..
رانية:جبتي اللي وصيتك عليه؟
اسمهان:اختبار الحمل؟ايه جبته..خذيه..
طالعت فيه رانية وراحت ركض على دورة المياه..
اسمهان:ياشين العَجلة!خذي عباتي بالأول!
رانية:يووه نسيتك!البيت بيتك علقي عباتك على الشماعة اللي بالمدخل!
ودخلت رانية دورة المياه وخرجت تغطرف:لللللللللللوش باركي لي يااسمهان باركي لي!
اسمهان(وهي تدمع):مبروك حببتي مبروك..
رانية:طلعت مو حامل يافرحتي!!
اسمهان:وفرحانة؟؟
رانية:طبعاً ياحبيبتي على الأقل أضمن إني أكمل دراستي بدل الربطة في البيت..بس ورى عينك تدمع؟؟؟؟
اسمهان(وهي تداري دموعها):ولاشي ولاشي..
رانية:حلفت عليك تعلميني وإلا بأشحطك بالخيزرانة!!!
اسمهان:اختبار الحمل اللي جبته لك...فرح عبدالرحمن فيه على باله إنه لي!!وانصدم يوم درى إنه لك.
رانية:الله يرزقك ياسوسو..إنتي طيبة وتستاهلين..بس عاد لاتخلين هالموضوع يزعجك ليل بنهار...
ودق الباب وكانت الحاضرة(روابي)جارة رانية...دقت الباب الداخلي اللي بينها وبين رانية و يوصل للدرج.. اللي تطلع منه لشقتها.
فتحت رانية الباب ورحبت فيها...
وسلمت روابي على اسمهان..وبعدين جلسوا...
روابي:هذي هي صاحبتك اسمهان اللي كلمتيني عنها؟
رانية:ايه...هي..
روابي:لي فترة وأنا أتمنى أشوفك يااسمهان من كثر ماحكت لي رانية عنك..ماشاء الله صداقتكم حلوة ومن النادر ماتستمر الصداقات الحقيقية بهالزمن...
رانية:صدقتي ياختي...اسألي مجرِب ولاتسألين طبيب..هذي صديقتنا مرام اللي كانت صداقتنا معاها مضرب المثل..باعتنا بنص ريال ورمتنا ورا ظهرها!!
روابي:انتي زعلانة على صداقة لها كم سنة بس!أجل وش تقولين علي اللي من يوم ..وأنا طفلة كنت متصاحبة مع وحدة من بنات أعمامي وأنا وإياها روحين بجسد وجمعت بيننا أحلى الذكريات...وبعد كل هالسنين تنكرت لي وصارت لاشافتني بمكان أو مناسبة وكأنها ماتعرفني! لازم أنا أروح أسلم عليها...
اسمهان:طيب ليش هالتغيير؟؟انتي زعلتيها بشي؟
روابي:أبد واللي خلقني..بس من يوم تِزَوَجَت..وخَذَت واحد غني كأنها حست إنه فيه فرق بيني وبينها.وصارت تطالعني من فوق..
وتوسع الحوار وامتد إلى الأزواج وكل وحدة تشكي همها..
اسمهان:بصراحة زوجي صار محيرني فعلاً..أحس إنه يتمنى الأطفال..وبنفس الوقت ماراح لدكتور يفحصه!مدري هل هو خايف يطلع فيه عيب؟!مرات صرت أفكر أكلم خالتي تكلمه!!
روابي:لا لا..مسائل حساسة مثل هذي لاتدخلين أم زوجك فيها..صدقيني زوجك بعدها بياخذ منك موقف..فيصل زوجي ياما سوى فيني وكل مااشتكيت لأهله يقلبونها علي..حرَّمت بعدها أشكي لهم وأحاول أحل مشاكلي بنفسي..
رانية:عاد أنا لاعندي أم زوج ولاأبو زوج حتى أشكي لهم من فعايل ولدهم!!لكن هو مايقصر.. دايماً يقول والله يارانية لو ماتقضبين لسانك هالطويل عني لأشكيك عند أبوك!!!
اسمهان:بيني وبينك..انتي يارانية تزودينها معاه..دايماً لاحكيتي لي عن كلامك معاه أستعجب من أسلوبك!الرجال مايحب الحرمة الملسونة!!
رانية:يستاهل!!هو اللي يجيبه لنفسه!طالعي بيتنا وش كبره ؟وكل مكان فيه مستباح!ماعنده شي اسمه هذي غرفة ضيوف ولازم تقعد نظيفة دايماً..كل غرفة لازم يدخلها ويحط بصماته فيها واقعدي يارانية طول اليوم نظفي وامسحي!!والا المكان اللي يقعد فيه لو تشوفونه ماتصدقون!تقولون مكب نفايات؟!!!!!يبُرك قِدام التليفزيون وياكل فصفص ويرمي على الأرض!!أحط له صحن يحط فيه قشر الفصفص لكن أبد ألقى الصحن فاضي والفصفص طايح حواليه!!ولاعنده اهتمام بالحياة إلا متابعة التليفزيون والطلعة مع الشباب!!
روابي:ياشيخة!شي عن شي يهون..تحمدي ربك زوجك موب خاين..ويحقر فيك 24 ساعة..تخيلوا؟ طول يومه وهو يستهزأ فيني وبجسمي وبشكلي ويقارني بأخواته..ومهما سويت وغيرت بشكلي مايعجبه..مع إنه هو عادي وتزوجته وعنده عيب خُلُقي في أقدامه..وحدة مقاسها41 والثانية 45...لكن مايشوف نفسه أبد!!
رانية:لو أنا منك آخذ جزمتين من جزمه وأبروزهم وأحطهم بالصالة وكل ماقال لي شكلك فيه ويخطيه!!أقول له ناظر البرواز!!
روابي واسمهان:هههههههه
رانية:تصدقين يااسمهان؟ أمس كنت نايمة وتحلمت إن ناصر يجي عند عبدالرحمن ياخذ دروس خصوصية في اتيكيت التعامل مع الزوجة وتنمية الطموح؟!!!
اسمهان:لا هذا موب حلم يابكاشة !هذي أمنية تتمنين تطبيقها على أرض الواقع صح؟؟
رانية:صح ونص!ومستعدة أدفع تكاليف الدروس من جيبي الخاص أهم شي يفلح هالنويصر!!
روابي:إلا خل زوجك يتزوج وحدة ثانية وخليها تسنعه لك!
رانية:اسكتي..والله لأسنعهم الإثنين سوى!أساساً نويصر شايل فكرة الزواج الثاني من راسه!لاقلت له: إذا إني موب عاجبتك انقلع تزوج!يقول: من شافك عاف النسوان كلهم يابنت خالد!!!
واستمرت الزيارة في كلام وسوالف وضحك...
=========
أما مرام..كانت في المشغل تدور وتتطمن على سير العمل..وتضحك مع ثنتين من الزباين يدخنون ويسولفون والكوافيرات يسوون لهم تساريح..ومرام واقفة تسولف معاهم...
انتبهت لها ماجدة ونادتها...
مرام:نعم؟
ماجدة:انتي شلون واقفة مع هذول الزبونتين اللي يدخنون وحضرتك حامل؟ماتخافين تنضرين من استنشاق الدخان؟؟
مرام(بـ تريقة):عاااااادي أصلي متعودة دايماً!!!
ماجدة:شلون متعودة؟عبدالرحيم يدخن؟؟؟
مرام:لا مايدخن..بس صاحباتي مدخنات!
ماجدة:شلة الثانوي؟؟
مرام:أي شلة؟الله يرحم والديك..كلهم رميتهم ورا ظهري..أنا أقصد ميساء وسارة ونهلة..وغيرهم..
ماجدة:زبايننا في المشغل؟؟هم يزورونك بالبيت؟؟
مرام:ايه عندك مانع؟
ماجدة:طبعاً عندي مانع..هالحين تبيعين صديقات عمرك وتتصاحبين مع هالطقة؟؟من زينهم؟ترى ماأستقبلهم في مشغلي إلا لأني أتحاشى ألسنتهم!والا اللي مثلهم ماحد يتشرف به! اسمعي كلامهم البذيء بس وإنتي تكرهينهم!
قامت مرام أعطت مقفاها لأختها ماجدة وراحت للريسيبشن وقعدت فيه...
وبعد ساعة حضرت ندى المنحرفة للصالون وسلمت على مرام بطريقة مبتذلة وحضنتها وماجدة تناظرهم من بعيد..
مرام:وش جابك؟؟وحشتِك؟؟
ندى:طبعاً..وهو أنا لي غنات عنك ياحلو إنتَ!!!
مرام:يعني ماودك تسوين شي؟؟
ندى:إلا جيت أصبغ شعري..خصل صفرا وخصل حمرا على فوشي!!
تدخلت ماجدة وقالت:حبيبتي أي زبونة تطلع من مشغلنا نحب إنها تكون بأحسن صورة..فما يتهيأ لي وانتي حالقة شعرك مرة بالطريقة هذي..بيكون صبغ شعرك بألوان صارخة حل مثالي!!!
ندى(بلهجة رجولية):وش المشكلة.وبعدين مرام مقدمتلي خدمات مجانية لمدة شهر! وماطلع براسي إلا الصبغة تبيني أخلي العرض المغري يروح علي؟؟؟؟
ماجدة:بعد إذنك..
وسحبت ماجدة مرام من يدها وقالت:انتي الحين مين سمح لك تقدمين خدمات مجانية للزباين من غير ماترجعين لي؟؟؟وبصفتها ايش هالهانم تقدمين لها هالخدمات؟هذي مكانها صالون حلاقة رِجالي!!
مرام:بصفتها صاحبتي أقدم لها خدمات..وبعدين رجاءً لاتتكلمين عنها بهالشكل!
ماجدة:ولالقيتي إلا هذي الشاذة تتصاحبين معاها؟انتي دارية انه ثنتين من كوافيرات المشغل اشتكولي منها قبل ؟يقولون تتحرش فيهم؟؟
مرام:لا مو معقول..ندى مو راعية هالسوالف..هي مسكينة الناس يظلمونها عشان شكلها بس!!
ماجدة:ونظراتها لك؟ولمساتها؟تشوفينها طبيعية؟
مرام أنا مصدومة فيك!لازم تعرفين يانبيهة إنه مو كل انسانة تتعرفين عليها تدخلينها بيتك!!بكرة وحدة من هالنسوان الفاسدات تخرب بيتك وسمعتك والسبب إنتي! لأنك فتحتي لهم مجال!!
مرام:إنتي مين مسلطك علي؟طايحة من اليوم تراقبيني!
تركتها ماجدة وراحت لندى اللي كانت قاعدة على كرسي تسولف مع الكوافيرات..
ماجدة:لو سمحتي ياأخت!
ندى:نعم ياقمر!
ماجدة:ممكن تطلعين من هالمشغل بهدوء؟ وتوعديني إني ماأشوفك هنا مرة ثانية؟
ندى:وليش عاد؟؟أنا اش سويت؟ماألقى عندك واسطة يامرومتي؟؟
مرام(وهي مفتشلة):ماجدة عيب كذا!!
ماجدة(بعصبية):والله العيب إني أشوف هالأشكال بصالوني وأظل ساكتة!!تفضلي اطلعي برة ياندى هانم!!
قامت ندى وبلهجة ذكورية واضحة قالت:حتندم ياجميل!!
ولبست عباتها وطلعت من الصالون!
مرام:انتي وش هذا اللي سويتيه؟كذا كسرتي خاطر البنية؟؟
ماجدة:مالت عليها هذي لها خاطر ينكسر؟؟ماشفتي شلون تناظرني بوقاحة وتهددني؟؟صحيح إنها تربية شوارع!هذي مستحيل تكون أنثى!!
زعلت مرام من ماجدة وكلمت عبدالرحيم يجي ياخذها!
​

 

[طير مهاجر]

اسفة جدا جدا على كتابة الرد

 

[جيانة]

هلا ياأحلى متابعات​

مرت أيام ومرام زعلانة من تصرف ماجدة وماتروح للمشغل وبيوم سألها
عبدالرحيم:مرام؟
مرام:نعم...
عبدالرحيم:انتي ليش ماصرتي تروحين المشغل لك كم يوم؟؟
مرام:نفسي ضايقة من الوضع!ماجدة بما إنها هي صاحبة المشغل فهي تتدخل بكل كبيرة وصغيرة بالأسعار وبطريقة تعاملي مع الزباين..وبكل شي!!الوضع صاير ماينطاق!
عبدالرحيم:يحق لها..وإنتي على بالك يوم مسكتي المشغل من شهرين خلاص؟صار بجيبك؟هي اللي أسسته وصنعت لنفسها اسم...
مرام:أنا عارفة ...عشان كذا قام يلمع براسي فكرة وهقوتي إنك بتأيدني فيها!
عبدالرحيم:وش هي فكرتك؟
مرام:أشارك ماجدة بالمشغل ويصير كل شي النص بالنص ونوسع المشغل ونزيد من عدد الموظفات.....الخ
عبدالرحيم:لحظة..لحظة..على هونك..انتي على بالك التنفيذ سهل؟هالكلام يحتاج له ميزانية كبيرة توفير عاملات ومستحضرات ودفع رواتب واجارات...لا لايمكن تتحقق رغبتك هذي!!
مرام:ياسلام عليك!وأنا اللي قلت بتدعمني خلاص!
عبدالرحيم:أنا ممكن أساعدك بفكرة ثانية...
مرام:تفضل...
عبدالرحيم:نستأجر ملحق الضيافة اللي بالحوش من أهلي وتصيرين بدل ماتداومين بالمشغل..زباينك يجون لي حدك..ونجيب لك عاملة أو عاملتين ومافي مانع زوجات أخواني يساعدونك!!!
مرام(بانفعال):لاياشيخ!!مين وين لمعت بذهنك هالفكرة الجهنمية؟من كوابيس المنام؟ولا من أحلام اليقظة؟والله ذا اللي ناقص!!أهلك كل يوم والثاني وهم معترضين على ضيوفي أجل شلون لو شافوا الزباين؟؟يمين لايطلعون فيهم كل العذاريب!!
عبدالرحيم:أجل خلك مثل ماانتي أصرف..
==============
وفي الكلية تفاجئوا اسمهان ورانية بنجلاء اللي داومت يوم بالكلية ومن الصباح وهي تبكي ومادخلت أي محاضرة!!!
وظلوا يلحون عليها تجاوبهم وشفيها..وهي رافضة وبس تبكي!وبعد إلحاح شديد تكلمت!
نجلاء:ماجد ولد خالتي!
رانية:وشفيه؟مات؟الله يرحمنا برحمته ماحد دايم إلا وجهه سبحانه!!!
نجلاء:لا مامات..مو كنا ننتظر نتيجة التحاليل تطلع عشان نسوي ملكتنا؟
اسمهان ورانية(بشوق):ايه؟؟
نجلاء:وطلعت النتيجة!
رانية:لاااا احلفي!!كنت أحسبها مابتطلع أبد!!أقول هاتي من الآخر وخلصينا لايجيك شي مايسرك!!
اسمهان:رانية؟اشفيك بالهداوة على البنت!ماتشوفينها شلون ذابحها نفسها بكا؟؟
نجلاء:ماجد طلع مصاب بالإيدز!!
شهقوا رانية واسمهان بصوت واحد!!!!!!!
رانية:الله ياخذه!!زين افتكيتي منه!وليش تبكين عليه؟مايستاهل دموعك هالخايس!
اسمهان:وانتي على طول يارانية راح فكرك بعيد؟موب يمكن انتقل له الإيدز عن طريق نقل دم؟؟
نجلاء:لا..انتقل له المرض عن طريق علاقاته المتعددة النذل الخاين يشتغل بالطيران ومافي ديرة يروح لها إلا ويلعب فيها..آه يالقهر بس من أحلامي!!كنت أتمنى تجي اللحظة اللي تضمنا ببيت واحد لكنه خرب علي وعلى نفسه!!
اسمهان:وانتي اش عرفك بهالكلام؟
نجلاء:أخته قالت لي..وتقول من يوم درى عن النتيجة طس ولاأحد يعرف له طريق!!
رانية:حسبي الله على كل شاب مايخاف ربه!!معقول الزنا صاير سهل هالأيام؟؟ومعقول شبابنا فيهم تخلف لهالدرجة؟؟على كثر البرامج التوعوية عن هذا المرض..مازلنا نشوف ناس يلجأون للحرام وتكون نهايتهم إيدز..الله يعافيهم ولايبتلينا بس!
============
انتظروني بكرة..​

 

[جيانة]

عدت لكم يالغوالي​

مرت الأيام وكانت اسمهان تحاول تعوض النقص من ناحية حبها للأطفال..بزيارة أختها أسماء وملاعبة لينة وأنس..أو زيارة أخوها محمد واللعب مع سعيد ووليد واسمهان الصغيرة..
وكانت مشاعل حاسة فيها وبيوم من الأيام..
مشاعل:اسمهان؟
اسمهان:هلا...
مشاعل:بما إنه الدكتورة قالت لي إن اللي في بطني ولد..فإش رايك تساعديني بإختيار الملابس وتجهيزات المولود..مالي نفس كل شي يكون لونه أزرق..وعندي ثقة كبيرة بذوقك..
اسمهان(بفرحة):ابشري من عيوني بس شلون أقدر أساعدك؟
مشاعل:تنزلين معي السوق ونشتري الأغراض..سوى..
اسمهان:فكرة حلوة!وياحبي في الأطفال وأغراضهم..
وراحوا اسمهان ومشاعل بيوم من الأيام مع السواق وزوجته شغالة أم عبدالرحمن إلى السوق واشتروا أغراض للمولود القادم..
قابلتهم مرام وهي نازلة من الدرج وهم طالعين لشقة مشاعل...
مرام:مساء الخير..وين كنتوا؟؟
اسمهان:كنَّا بالسوق نشتري أغراض مولود مشاعل..
مرام:كل هذا عشان بيسمونه عبدالرحمن؟؟وش دراك..بكرة يجيهم الولد ويسمونه اسم ثاني!!
اسمهان:عادي براحتهم..ولدهم وهم أحرار بإسمه..
مشاعل:الإسم ماله علاقة بشي.بس عندي ثقة كبيرة بذوق اسمهان!
ودخلوا الثنتين شقة مشاعل وصكوا الباب..
مرام(في نفسها):حقودة هالمشاعل!المفروض تاخذني أنا معاها عشان نقضي لأطفالنا!مو تاخذ اسمهان!اسمهان اش علاقتها؟
===========
وحصل إنه بعد كم يوم اتصلت ندى بمرام وبعد السواليف...
ندى:مرام؟انت ليش مافكرتي تزوريني ببيتي لين الحين؟وكل ماقلت لك زوريني تتهربين؟
مرام:أقول لك وماتزعلين؟؟
ندى:قولي..
مرام:قلت لزوجي عن موقع بيتك ورفض تماماً يخليني أزورك!يقول إن الحي اللي إنتي تسكنين فيه من الأحياء المشبوهة!
ندى:الصراحة ماأنكر إنه حولنا يسكن عمالات أجنبية ومتفشي بين البعض الإدمان وبيع الخمور بالسر..والشرطة مايمر أسبوع إلا وهي محاصرة بيت وقابضة على هذول الأجانب..بس أنا وش علاقتي بالموضوع؟ أبيك تزوريني ببيتي...ومالي علاقة بالحي!
مرام:لا..روعتيني بكلامك هذا..الله يقطعهم بعض هالآسيويين والحبوش مانسمع عنهم إلا جرايم تهريب خمور أو دعارة..لا وقاعدين ببلدنا من غير إقامات..بس عموماً بما إني ماأقدر أزورك..فترى بيتي مفتوح لك بأي وقت..
ندى:بشرط؟!!!
مرام:إشرطي..
ندى:نكون بروحنا!!أنا لاحظت كل ماأجيك ألاقي عندك ناس..وماآخذ راحتي..أبي أقعد معاك هالمرة..إنتي وبس!!
مرام:من عيوني!اش رايك؟ بكرة أكنسل الروحة للمشغل وتعاليني إنتي بعد صلاة العشا..
ندى:تم..
========
أقبل اليوم الثاني...وبعد المغرب..
عبدالرحمن:اسمهان..ترى أنا وأخواني طالعين بعد شوي ورايحين لمعارض السيارات..نشتري سيارة زينة للسواق..السيارة اللي معاه ماهي قد كذا...ولو بغيتوا عشا من برة كلميني..
اسمهان:بالتوفيق..أجل بأكلم خالتي تطلع معانا السطوح..
عبدالرحمن:لا..أمي كنت عندها قبل شوي..وقالت لي إنها بتروح مع السايق لصديقتها..لكن اتصلي على زوجات أخواني يطلعون معاك فوق..
وبالفعل اتصلت اسمهان على مشاعل تطلع معاها السطوح يمشون فيه شوي ووافقت..
واتصلت على مرام...لكن مرام قالت:سوري..أنا بيجيني ضيوف!!
راحوا الرِجال لمعارض السيارات..
وطلعوا اسمهان ومشاعل للسطوح وقعدوا يمشون ويسولفون...
اسمهان:وشلونك مع عبدالمجيد؟
مشاعل:الحمدلله..هو حاط كل جهده بالمعرض اللي بيفتتح الشهر الجاي وتشوفينه متوتر لأنه هذا أول معرض شخصي لأعماله..المعرض اللي شارك فيه قبل كان معاه مجموعة رسامين..وكل يوم وهو يرسم لوحاته..تبين تشوفينها؟؟
اسمهان:ياليت..أموت أنا على الرسومات..واللوحات.
وأخذتها مشاعل لطرف السطح وكان فيه غرفة عبارة عن مستودع..كان عبدالمجيد لما يرسم يطلع للسطح في الهواء الطلق..عشان مايضايق مشاعل الحامل بريحة الألوان والبوية اللي يستخدمها بلوحاته...وبعد ماينتهي من رسم اللوحة يحطها بهالمستودع...
مشاعل:شوفي هذي اللوحة يااسمهان عبدالمجيد مسميها (الحلم المنتظر)..وكانت عبارة عن أم شايلة مولودها بحنان..
اسمهان:بس اللي أعرفه إن رسم ذوات الأرواح مايجوز والله أعلم..
مشاعل:وش أسوي فيه؟تناقشنا بهالموضوع كثير..وقلت له خلك على ابداعك في رسم الطبيعة والجمادات..لكنه يقول هذي اللوحة مو للبيع مجرد عرض لموهبتي وقدراتي على رسم كل شي...
وظلت اسمهان تعطي رأيها بكل لوحة...
وبعدها طلعوا من الغرفة وجلسوا بالسطح..
===
أما مرام كانت ندى عندها..
ندى:مرام؟على كثر ماجيتك ماشفت غرفة نومك!
مرام:وش تبين فيها ياملقوفة؟؟
ندى:أبي أتفرج عليها وعلى ملابسك..
مرام:زين تعالي..بأوريك فساتين السهرة اللي فصلتها قبل زواجي
وماتهنيت فيها..بسبب الحمل..
ودخلت مرام على نياتها مع ندى لغرفة النوم..وفتحت الدولاب..وكانت ندى واقفة وراها..
التفتت مرام لندى وقالت:هذا أحلى وأغلى فستان فيهم..اش رايك في لونه؟؟
ولما التقت عيونها بعيون ندى حست إنه نظراتها مريبة!!!تضايقت مرام..وقالت:اش رايك نقعد بالصالة نشرب القهوة؟
ندى(بنظرات ذابلة ولهجة ذكورية):أنا ماأبي شي..أبيك انتي وبس!!!
ولمست مرام اللي اتضح لها خبث نية ندى..وصفعتها على وجهها كف!
ندى:تضربيني يامرام؟مايخالف ياعمري..ضرب الحبيب مثل أكل الزبيب!
مرام:ماكنت أدري إنك قذرة ومنحطة لهالدرجة ولا ماكان خليتك تدخلين بيتي!
ندى:لاياشيخة!وش هالبراءة؟
تظنين كل مكالماتي لك وحبي فيك عشان سواد عيونك؟ظنيتك فاهمة وتستغبين!!
مرام:ابعدي عني ياحقيرة ابعدي.
واقتربت ندى من مرام ومسكتها بطريقة وحشية وحاولت تتهجم عليها..!!!
في السطح كانت اسمهان قاعدة مع مشاعل..
مشاعل:أنا عطشانة مرة..اش رايك ننزل نقعد بشقتي أشرب موية ونسوي شاي؟
اسمهان:لا ارتاحي انتي..أنا بأجيب من بيتي موية وعصير وعندي كيك بالشوكولا لذيذ جربيه وقولي لي رأيك..
ونزلت اسمهان وتركت مشاعل تنتظرها بالسطوح...
وهي نازلة سمعت صوت صياح بشقة مرام!!وقلقت اسمهان وخافت!لأنها عارفة البيت مافيه رجال..وقامت تدق جرس مرام بقوة وتدق الباب!
لما انتبهت ندى لصوت الباب ظنت إن عبدالرحيم رجع وخافت ولبست عباتها وفتحت الباب وشردت!!
أما مرام جلست على الأرض وهي تبكي بانهيار وبصوت عالي..
مسكتها اسمهان ورفعتها وقعدتها على الكنبة وقالت:مرام؟مرام؟اهدي!
وراحت اسمهان ركض تجيب كاسة موية من المطبخ وأعطتها مرام وقالت:مرام..اشربي هالموية وابلعي ريقك وفهميني اش السالفة؟؟
مرام(وهي في قمة انهيارها):
أبغى أذبحها الواطية المنحطة..جيبوها لي بأرتكب فيها جريمة!!
اسمهان:اذكري الله واهدي شوي وعلميني وش السالفة؟
مرام(وهي تبكي):القذرة ندى..تهجمت علي!آه ياقلبي مدري شلون خليتها تروح!
وحكت لاسمهان اللي صار..
اسمهان:انتي الغلطانة يامرام نصحتك من الأول وحقرتيني..
تخيلي لو إنها استفردت فيك وماكان أحد بالبيت؟وش كنتي بتسوين؟هاه؟علميني!
مرام:كنت بأموت أكيد..الحمدلله إنك جيتي بالوقت المناسب..
شوي إلا سمعوا الثنتين صوت جوال غريب يرن!!
مرام:فيه جوال يرن..بس مو نغمة جوالي!
اسمهان:كأن الصوت جاي من غرفة الحريم!
وراحت اسمهان للغرفة وتفاجئت بوجود شنطة ندى!!
أخذت اسمهان الشنطة وقالت لمرام: الحقي!!نست شنطتها!مو بعيدة ترجع تاخذها!!
مرام:لو رجعت مستحيل أفتح لها الباب..
وفتحت مرام الشنطة وقامت تفتشها..لقيت فيها(بعض الأدوات الصناعية لممارسة الشذوذ!!!!!)
وجوال وفتحته مرام ولغت رقمها من جوال ندى وفتشت في صور الجوال ولقيت إن ندى متصورة مع بنات كثير بجوالها في أوضاع تخدش الحياء!!!!!!
اسمهان:شفتي شلون هالبنت هذي مو هينة؟هذي منحرفة محترفة!!
مرام(وهي تصيح وتخبط نفسها):ياويلي يااسمهان ياويلي من اللي كانت بتسويه فيني!!هذي مو صاحية أبد هذي شيطانة الله يصيبها!!!
اسمهان:مدري إش أقول لك..بس أنا مستغربة إنك ماشكيتي فيها قبل ومالاحظتيها..
مرام:صدقيني يااسمهان كنت أحسب إعجابها فيني مجرد محبة واهتمام..مو أكثر!وكنت أتعاطف مع حالتها لأنها كانت توحي لي إنه الكل ظالمها عشان شكلها..بس ماتوقعت أبد إن اللي صار بيصير!
اسمهان:صحيح إن الحياة تجارب!
مرام:تكفين يااسمهان هالكلام اللي صار لا يطلع لأحد ولا لأي مخلوق!
اسمهان:ولايهمك سرك بـ بير..بس أهم شي إنك لو رحتي الصالون بكرة تاخذين شنطتها معك..أكيد بتجي وتسأل عنها..
مرام:زين إنك نبهتيني..ودي تجي المشغل تاخذها ولاتجيني بيتي وتفضحني!!
قلقت مشاعل من تأخر اسمهان عليها ونزلت..تشوف الوضع..
وكانت اسمهان طالعة من شقة مرام..وقابلتها مشاعل..
مشاعل:اسمهان؟كل هذا الوقت عشان تجيبين كيك وعصير؟أجل لو نزلتي تسوين قهوة متى كنتي بترجعين؟؟
اسمهان:أنا كنت عند مرام..راحوا ضيوفها وبغتني أساعدها شوي..بس مادامك نزلتي تعالي شقتي ناكل الكيك ونشرب الموية والعصير..
===========
التكملة خلال الساعات المقبلة بإذن الله...ياترى اش اللي راح يصير؟؟



​

 

[جيانة]

مساءكم ورد​

طبعاً ندى لما طلعت من بيت مرام راحت الشارع تدور ليموزين وركبت معاه وكان بيتها بعيد..لما وصلت بيتها جات تبي تحاسبه ومالقيت شنطتها عشان تعطيه فلوس...
السايق:الحساب؟
ندى:لحظة بأطلع البيت أجيب لك الفلوس وأرجع!
وطلعت العمارة للي فيها شقتها وكانت عمارة مأهولة بالسكان من جميع الجنسيات وفيها 14 شقة!!
ودخلت بيتها وحطت عباتها وقالت:اقعد ياسايق الهم بالشارع لين بكرة!ماتحلم تاخذ مني ريال..وإذا فيك خير دق على باب 14 شقة لين تلقاني!هههههههه
وقررت إنها تروح اليوم الثاني للمشغل وتاخذ شنطتها من مرام..
============
أما رانية كل يوم وهي وناصر بحال!
بيوم من الأيام راحوا لـ مول وقعدوا يتمشون ويتفرجون على المحلات..
مروا من جنب محل مجوهرات بنفس المول..وكانت المجوهرات فخمة..
ناصر:ناظري بهالمجوهرات يارانية فخمة حيل وباين عليها غالية مرة..انتي بس شوفي الزبونات اللي بداخل المحل باين عليهم راهيات و هاي كلاس!
رانية(وتبي تغيظه):وإنت بس ناظِر للبياع اللي بالمحل والبدلة الكشخة اللي لابسها شكله يفتح النفس!!!!!
ناصر:يفتح النفس على إيش ياقليلة الحيا؟؟
رانية:والزبونات الهاي كلاس وراهيات وش دراك إنهم كذا لو ماكنت مقزقزهم بعيونك؟؟
ناصر:مشكلتك مو واثقة من نفسك ولاواثقة فيني!
رانية:لاياحبيبي عندي ثقة بكل شي!إلا إبليس ماأثق فيه!!!
ناصر:بغض النظر عن كل شي قلته..هالمجوهرات اللي صممها فعلاً فنان..لكنه غبي!مين هالأثول اللي بيشريها من عنده؟؟؟
رانية:واحد واصل وإيده فارطة مو مثلك ياولد شَمَه!!!شمه اسم أم ناصر
ناصر:وليش يابنت موضي؟شايفتني بخيل؟؟
رانية:لو منت مكنِّز على ذهب أمك اللي من عام الفيل كان قلت عنك كريم!!!
ناصر:ذهب أمي يالحسناء مخليه لوقت الشدايد!!ولابغيت أشري لك شي بأشريه من جيبي الخاص!
رانية:زين ورني شطارتك!
وسحب ناصر رانية من يدها ودخلوا محل المجوهرات...
ناصر(بهمس):بأشري لك خاتم!
رانية:يارب!أكيد أمي دعت لي اليوم!
ناصر (يكلم البايع):بكم هالخاتم؟؟
البايع(بلهجة لبنانية):هايدا ب25 ألف ريال يامسيو!!
قام ناصر يبلع ريقه!!
ناصر:زين..وهذا؟
البايع:هايدا بـ 19 ألف ريال..
ناصر(باستهزاء):ماعندكم أغلى من كذا؟
البايع:أكيد في أغلى والأغلى دايماً أحلى..بس شو طلبات السنيورة؟بدك ياه بفصوص ألماس أو زريكون؟؟
رانية:أبيه بألماس ويكون كبير شوي وثقيل..
البياع:تكرم عينك..شو رأيك بهايدا؟؟
ناصر:جميل جداً..بكم آخره؟؟
البياع:هايدا بعد التخفيض ب33 ألف ريال بس!!
ناصر:بس؟؟؟لا إحنا مانشتري إلا أغلى من كذا!بنروح ندور محل أغلى!!
وسحب رانية وخرجوا من المحل...
رانية:وشفيك ياأبوكرم انسحبت؟؟
ناصر:وانتي ماصدقتي تقعدين بالمحل وتتشرطين على البايع؟؟أنا مهبول أشري لك خاتم قيمته 33 ألف ريال؟ليش الليدي ديانا؟؟
رانية:تخسى!والله إني أحلى منها..
وراحوا الاثنين مطعم وكان فيه طاولة قريبة عليها ثنتين جالسات يتعشون ويضحكون بصوت عالي وهم في قمة البهرجة(ماكياج صارخ+عطورات فايحة+عبي متبرجة+الطرحة طايحة لنص الراس والشعر باين والحالة كَرْب!!)
لاحظت رانية إنها وهي تتكلم مع ناصر إنه سارح بعيونه ويطالع فيهم!!
فتحينت الفرصة والبنات قايمات من فوق العشا ورايحين للحمام يغسلون أياديهم ومدت رجلها بطريقهم!!
طاحت الأولى وتكعبلت وراها الثانية وصاروا بموقف لايحسدون عليه!!
رانية(بصوت عالي):الله أكبر يالثوالة!رجلي ماشفتوها؟يحق لكم من الأخضر والأصفر اللي تارسين به عيونكم تقولون اشارة مرور!!!
ناصر:سلامات سلامات!!
رانية:سلامات؟؟؟لا قوم ودهم المستشفى أحسن!!
وحدة من البنات:سوري مرة..ماانتبهنا!
رانية(بسخرية):مرة ثانية انتبهي يختي!ماهي حلوة تكونين كشخة وخبلة بنفس الوقت!!لازم تناظرين مكان رجولك وينه!!!!
وخرجوا البنتين من المطعم وهم بقمة الإحراج!!
ناصر(بعصبية):وش هالحركات البايخة؟إنتي أول مرة تدخلين مطاعم؟
رانية:يستاهلون!أنا إن مادخل مزاجي أحد جبته للقاع!
ناصر:على بالك ماشفتك يوم مديتي رجلك بطريقهم؟
رانية:شوف واشبع..أنا ياكرهي في البنات المايعات الصايعات..الوحدة منهم لاحيا ولاحشيمة..كأنها تقول للقاعدين اسمعوني وشوفوني!!
ناصر:قومي قومي..هذا مو مكانك أبد!
وخرجوا من المطعم...
==========
اليوم الثاني من المشكلة بين ندى ومرام..
راحت مرام المشغل من العصر وشنطة ندى معاها..
وكانت مرام قاعدة بغرفة تجهيز العرايس مع زبونة تعرفها..ويسولفون مع بعض...
والصالون زحمة..إلا ندى داخلة تتلفت في الناس تدور على مرام..
راحت وحدة من الكوافيرات تركض لماجدة وقالت(بلهجة سورية):مدام ماجدة؟البِنِت اللي طردتيا قبل هيك من الصالون رِجعِت هلأ!!!!
وراحت ماجدة بسرعة وقالت:نعم ياندى هانم؟وش جابك؟
ندى:وخري عن طريقي..وينها أختك الشاذة؟ ناديها لي!!!
ماجدة:احترمي نفسك!واطلعي برة!
إلا مرام طالعة من الغرفة وشافت الكوافيرات متجمعات!!دخلت بينهم وشافت ندى!
مرام:إنتي يالسافلة لك عين تجين لين هنا؟؟
ندى(وهي تغمز بعينها):أبي أغراضي اللي نسيتهم بشقتك أمس ياحلوة!!
ماجدة:وشهو؟انتي استقبلتي هالنجسة ببيتك أمس؟؟
مرام(بعصبية):مو هذا موضوعنا!اطلعي يامنحطة من هنا قبل لاأفضحك!!!
ندى:انتي تفضحيني يالخايبة؟أنا اللي بأفضحك انتي وأختك!!
وقامت ندى تصيح في الزباين:يازبونات ياغافلات ترى هذول الثنتين اللي يمثلون عليكم الشرف والأخلاق!حاطين كاميرات بالصالون ويصورون الزباين!!ويبيعونها لشباب يتاجرون فيها على النت!!غير الشذوذ والانحطاط اللي هم فيه!!
ماجدة(بانهيار):صكي فمك..طلعوها برة هالنجسة!!وإلا بأطلب لها الشرطة!
مرام:سوي اللي تسوينه ياندى ماتهزين فينا شعرة!جوالك وصورك عندي!وأنا اللي بأسلمها للشرطة بنفسي!
وحدة من الزبونات كانت أول مرة تدخل هذا المشغل هي وبناتها المراهقات فقالت لبناتها:الله يستر علينا بستره..قوموا قوموا يابنات واتصلوا بأخوكم يجي ياخذنا راعيات هالمشغل شكلهم فاسدات!!
بعض الزبونات خافوا وانسحبوا..
والبعض اللي يعرفون مرام وماجدة عِز المعرفة ظلوا جالسات بأماكنهم..
وحدة من الزباين:رجعوا لي فلوسي خليني أروح صالون تاني!
زبونة أخرى:خلصوا شعري بسرعة والله يعدي الليلة ذي على خير!
وحدة من الزباين أخوها يشتغل بهيئة الأمر بالمعروف والنهي عن المنكر اتصلت فيه..
الحرمة:ياعدنان ياخوي الحقني أنا بمشغل وصارت هوشة كبيرة واتهامات إن المشغل مشبوه..تعال بسرعة أنا كلمت زوجي يجي ياخذني..بس تكفى تعالوا شوفوا وش السالفة!!
قام أخوها أخذ عنوان المشغل منها
وبعد مدة قصيرة حاصروا رجال الهيئة المشغل ونزلوا حريم متعاونات مع رجال الهيئة دخلوا الصالون وأمروا باخلائه عشان يتمكنون رجال الهيئة الأفاضل من التفتيش!
أما مرام وماجدة وندى والموظفات كانوا لابسات العبي وواقفات ينتظرون..
وبعد التفتيش الدقيق مالقيوا رجال الهيئة أي شي مشبوه..
لكن مرام أعطتهم جوال ندى وحكت للحريم اللي مع الهيئة السالفة..
واضطروا رجال الهيئة ياخذون أقوال مرام وندى وتدخلوا الموظفات كشهود..وبالتعاون مع الشرطة أحيلت ندى للنظر في موضوعها وتحويلها لمؤسسة رعاية اصلاحية اجتماعية وكل هذا دار خارج المشغل عند الشرطة وبحضور الهيئة!!
وطلبوا ولي أمر مرام وماجدة..
اتصلت ماجدة بزوجها لكن مرام قالت لها:مستحيل أكلِم عبدالرحيم بموضوع مثل هذا!تبينه يذبحني؟؟
ماجدة:الله لايربحك يامرام!كل هالبلاوي طلعت لي من تحت راسك!لي 10 سنوات فاتحة المشغل وماقد صار لي شي!!شوفي آخر صداقاتك وش جابت لنا؟!!!
مرام:لاتزيدين همي هم!!بأكلم أخوي صلاح يجي ينقذني من هالورطة اللي إحنا فيها!
وبالفعل جاء صلاح وعن طريق الواسطات من هنا وهنا وبعد أن ثبت انه مشغل ماجدة مافيه أي شي يثير الشبهات تم تبرئة الجميع إلا ندى...مع التحفظ على المشغل لمدة 3 أيام ويتم مغلق لحين الانتهاء من الاجراءات..
وطبعاً مرام اتصلت على عبدالرحيم من الأول وقالت له:لاتجي تاخذني..حاسة نفسي تعبانة شوي وأبي أنام عند أهلي..
عبدالرحيم:زين تبيني أجيب لك شي من أغراضك؟؟
مرام:لامايحتاج..
ورجعت مرام لبيت أهلها..وسوت لها ماجدة مشكلة كبيرة وقالت لأمها عن كل شي!
أم مرام:ليش كذا يابنتي؟يرضيك هالفضيحة اللي صارت لأختك؟؟لا وبعد ماقرروا الشرطة إن المشغل يقفل 3 أيام بيثبت في ذهن الناس إنه المشغل مشبوه أكيد!!!
مرام:وش أسوي يعني؟تحسبوني أدري إن كل اللي صار بيصير؟؟
ماجدة:صحيح إنك غبية!يعني انتي كل ماتعرفتي على وحدة..فتحتي لها قلبك وبيتك؟ياما قابلت زباين بصالوني..تحسبيني بأقعد أناديهم ببيتي؟؟
مرام:خلاااااص ماأبي أسمع شي!!
ودخلت تنام والدموع تارسة خدها!!!
=====
اليوم الثاني...جاء عبدالرحيم من الظهر يبي ياخذ مرام..
كان أبوها مسافر وأخوها صلاح موجود وحكى له القصة..
صلاح:ربي فكك من اللي صار أمس!
عبدالرحيم:ليش؟اش اللي صار أمس؟
وحكى له صلاح كل شي..
وشوي دخلت عليهم مرام..وأقبلت تسلم على زوجها..لكنه صدَّها وقال(بعصبية):مرام البسي عباتك وتعالي معاي!
صلاح:وليش مستعجل؟اقعدوا تغدوا معانا..
عبدالرحيم:بنتغدى برة!
وراح للسيارة ووراه مرام..وقعد ساكت طول الطريق!
لما دخلوا البيت..حاولت مرام تتكلم معاه..لكنه صاح فيها:مرام؟ماأبي أسمع صوتك نهائياً وجوالك هذا تقفلينه وماتردين على أي مكالمة ولاأعطيني اياه أكسره!!
مرام(وهي تبكي):لا لا أوعدك أقفله!
وخرج وقعد مع أمه واخوانه طول اليوم ومرام بروحها في بيتها تبكي وتنتحب!
قعدت على هذا الحال 3 أيام وعبدالرحيم مايكلمها...
ورن تليفون البيت و رد عليه عبدالرحيم:هلا؟
رنا:مرحبا..مرام موجودة؟؟
عبدالرحيم:ايه...
رنا:بليز..قُلَها رنا!!!
وناداها عبدالرحيم تكلم وخرج لصلاة العصر..
رنا:مرام؟اش حكايتك يابنت؟لياتلاته أيام أتصل عليكي ومابتردي جوالك مقفول والمشغل رحت له اليوم ولقيته كمان مقفول..
حكت لها مرام القصة بشكل مختصر
رنا:واه ياقلبي!يمديكي مرة زعلانة!اش رايك أمُر عليكي بعد شوية أسليكي وأتطمن عليكي؟؟؟
مرام:ياليت!ودي أتكلم مع أي أحد..
وفعلاً بعد ساعة كانت رنا عندها..
وبعد السواليف...
مرام:تشربين كابوتشينو؟؟
رنا:أكيد..
وراحت مرام للمطبخ..
نادتها رنا:مرااااام..عندك مسجات حلوة؟
------------
نكمل بعد ساعة ونص..ياترى اش اللي صار؟؟

​

 

[جيانة]

تابع لمن يتابع​

رنا:مرااااام...عندك مسجات حلوة؟
مرام:أوهوووه..جوالي مليان!
فتحت رنا الجوال وقعدت تقرأ الرسايل بينها وبين نفسها وكان أغلبها من عبدالرحيم..رسايل كلها حب وغرام ومشاعر فياضة!
رنا(بينها وبين نفسها):يابختك يامرام..زوجك شكله مرة رومانسي!!
ولقطت رقم عبدالرحيم وخزنته بجوالها ومرام ياغافلين لكم الله!!في المطبخ تسوي كابوتشينو!
مرام:هاتي جوالي أقفله..
عبدالرحيم من يوم سالفة المشغل وهو مو مخليني أكلِم أحد!
رنا:إش قصدو؟يبغى يحبسك يعني؟ماله حق!لاتطاوعيه!
مرام:بيني وبينك معاه حق!أنا اللي جبت هالبلاوي لنفسي!
===========
رجعت رنا بيتها..
وأما عبدالرحمن واسمهان عادت الرومانسية والهدوء لحياتهم بعد مااستقال من الجريدة وتفرغ لعمله وبيته فقط!
والخالة جوهرة كانت مبسوطة بمولودها اللي مالي عليها حياتها.
====
ومرت الأيام ومرام ملاحظة إن جوال عبدالرحيم دايماً يدق آخر الليل ويرد عليه بسرعة ويقفل!
وبيوم من الأيام..
مرام:إنت اش سالفة هالاتصالات معاك؟على بالك ماأحس فيك وأنا نايمة؟
عبدالرحيم:وشفتيني أخذت وأعطيت؟أنا أرفع السماعة وأقفلها!
مرام:ليش؟
عبدالرحيم:هذي وحدة مأذيتني لابارك الله فيها..لها أسبوع وهي تتصل وتتغنج..بس ماقد أعطيتها وجه..دايم أقفل بوجهها ..ومصرة بنت الحرام إنها تتصل!!
شبَّت الغيرة بقلب مرام وانتظرت عبدالرحيم لين مانام وأخذت جواله وطلعت الصالة وأخذت رقم البنت وكتبته بجوالها وضغطت زر الاتصال وتفاجئت انه الاسم اللي طلع على الشاشة هو(رنا)!!!!
قالت مرام(وهي تكلم نفسها):آه يالنذلة!!تكلمين زوجي وأنا عادِتِك صديقتي؟؟
واتصلت فوراً على رنا..
رنا:أهلين مرام..غريبة صاحية لين دحين؟؟
مرام:صاحية أدلِّع زوجي وأكفيه
من بنات الحرام!!
رنا:يالطيف يارب!ليه هو بصباص؟
مرام:بالعكس هو يعتبرهم حشرات وممكن يدعسهم بأي لحظة!لكن اش تقولين؟ والدناءة صارت طبع في بعض الناس!!
رنا:صدقيني مافي رجَّال والبنات يعاكسوه..إلا ويكون هو اللي أعطاهم مجال!!
مرام:قصدك إن زوجته ممكن تكون هبلة وهي اللي أعطتهم وجه ودخلتهم بيتها!
رنا:مرام؟انتي ليه تتكلمي كده؟تلمحي لحاجة؟
مرام:لا ماألمَّح!لكن المثل يقول اللي على راسه بطحة يحسس عليها!!
رنا:لااااااا انتي شكلك مافقتي من صدمة المشغل!
مرام:اسمعي اللف والدوران ماأحبه..انتي انسانة أحقر بعيني من ندى السافلة!!
رنا:حافظي على كلامك لو سمحتي!
مرام:لما تحافظين انتي على أخلاقك يامنحطة!وهالرقم تلغينه من حياتك أبد ومن اليوم ماأبي أسمع لك نفس ولو أعرف إنك زرتي المشغل صدقيني لأسوي لك فضيحة أكبر من فضيحة ندى!!!
وقفلت السماعة بوجه رنا وقعدت تبكي وتقول بنفسها:اش اللي قاعد يجرى لي؟كل يوم وأنا طايحة ببلوة!!
ثاني يوم صحي عبدالرحيم ومرام باين عليها آثار الهم والحزن...وحاول يسألها:
مرام؟انتي تعبانة؟
مرام:لا..
عبدالرحيم:زعلانة؟
مرام:لا..
عبدالرحيم:لسه متضايقة من سالفة المشغل؟؟
مرام:لا..بس متضايقة من كل شي وماأبي أحد يكلمني!
وقامت تبكي...
حاول عبدالرحيم يرضيها بأي كلمة بس نفسيتها كانت سيئة..فنزل عند أمه وقال لها عن نفسية مرام..
أم عبدالرحمن:ترى طبيعي هالشي ياولدي..الحامل أحياناً يجيها اكتئاب حمل..
عبدالرحيم:والعمل؟
أم عبدالرحمن:لاتخليها تقعد بروحها..خليها تجي تقعد معانا يمكن توسع صدرها شوي..
وبهذي اللحظات جاء لمرام اتصال من ميساء..اللي من نفس شلة رنا!
وبعد السلام..والكلام..
ميساء:اش الأخبار البايخة دي اللي وصلتني عنك؟
مرام:أي أخبار؟
ميساء:إنك تضاربتي مع رنا أمس!
مرام:وحدة منحطة وتبي تسرق زوجي مني..شلون أكلمها؟بالترحاب والتهليل؟
ميساء:بس حرام زعلتيها البنت!
مرام:بالطقاق عليها!أموت وأعرف وين شافته حتى تتعلق فيه؟
ميساء:في صور زواجك وشهر العسل..انتي نسيتي إنك فرجتينا عليها؟
مرام:ويعني فرجتكم عليها؟ تروح تكلم زوجي؟؟
ميساء:بيني وبينك ماألومها!!جوزك شاب وحلو ووسيم..وأي وحدة ممكن تعجب فيه!!!
مرام:انتي ماتستحين على وجهك؟اش هالكلام اللي قاعدة تقولينه؟؟
ميساء:أنا قاعدة أشرح لك الموضوع بس..وصدقيني دي نزوة و تعَدِّي..انتي بس لاتكبري المسائل!!!
مرام:أنا منصدمة فيكم بقوة!انتم كل شي عندكم عادي؟تخيلي لو إنها سوت نفس الشي مع زوجك ترضين؟
ميساء:خليه يلعب زي مايلعب!نزوة وتعدي!ولايروح يتجوز عليا!ساعتها أدبحو!!!!
مرام:ترضون بالحرام؟والحلال ماتبونه؟
الله لايسامحكم ولا يبارك فيكم!
وقفلت السماعة وهلت دموعها!!​

 

[جيانة]

مساء عامر بالخيرات​

اتصلت أم عبدالرحمن على اسمهان ومشاعل ونادتهم عندها واتصلت على مرام..
أم عبدالرحمن:شلونك يابنتي مع الحمل؟
مرام:ماشي الحال..
أم عبدالرحمن:زين وش رايك تنزلين تقعدين معانا بالحوش؟الجو حلو وأنا زينت القهوة واسمهان بتجيب الحلى ومشاعل سوت بيتزا
مرام:بالعافية عليكم خالتي..أنا حاسة بتعب شوي وودي أرتاح..
أم عبدالرحمن:على هواك يابنتي.
واجتمعت أم عبدالرحمن باسمهان ومرام..وجلسوا على بساط على النجيلة الخضراء بالحوش وكان حوشهم فيه ديكورات حلوة..ومكان مثالي لتغيير جو البيت..

مشاعل:مرام جاية ياخالتي؟
أم عبدالرحمن:كلمتها بس تقول إنها تعبانة شوي ومابتجي..أقول اسمهان؟؟
اسمهان:نعم خالتي؟
أم عبدالرحمن:عبدالرحيم قال لي إن مرام نفسيتها تعبانة.. والله أعلم إن فيه شي مضايقها ولا صايبها اكتئاب..فياليت تقعدين معاها وتكلمينها..لاتنسين يابنتي إنكم كنتوا صديقات وقريبات من بعض!
اسمهان:تبين أطلع لها الحين؟
أم عبدالرحمن:ياليت..عبدالرحيم مو موجود الحين...وخذي لها من الحلى اللي سويتيه وبيتزا مشاعل..
وطبعاً اسمهان خمنَّت إنه صار شي لمرام بعد زيارة ندى لها بالبيت..
طلعت اسمهان لمرام ودقت الجرس كذا مرة..وبالأخير فتحت لها مرام الباب..
مرام(بحزن):هلا اسمهان..
اسمهان:هلا فيك..تسمحي لي أدخل؟؟
مرام:أكيد..تفضلي..
اسمهان:شفتك مانزلتي معانا الحوش..وعرفت من خالتي إنك تعبانة وجيت أتطمن عليك..وجبت لك حلى وبيتزا..
مرام:يعطيك العافية..
اسمهان:مرام؟إنتي متضايقة من شي؟؟
مرام(والدموع تترقرق بعيونها):لاتسأليني عن شي تكفين!!
اسمهان:مادام قلتي كذا إذن أكيد فيه شي!!إش صار مع ندى؟رجعت أخذت شنطتها؟؟؟
مرام(بصوت عالي باكي):لاتذكريني فيها الله ياخذها محل ماهي قاعدة!!
اسمهان:مرام..لاتزعلين مني,,بس صدقيني..الإنسان لما يفضفض..يرتاح شوي..ولاتنسين بعد إنك حامل والزعل والهم موب زين لك..افتحي لي قلبك وعلميني..إلا إن كنتي ماتثقين فيني؟!!!!!
وماصدقت مرام إنه فيه أحد مستعد يسمعها وحكت لاسمهان عن كل شي صار لها بالتفصيل مع زميلاتها كلهم...
مرام:صعب يااسمهان صعب إنك تزرعين ثقتك بناس وتخلصين لهم وتكتشفين إنهم خَوَنة وسَفَلة!ومايستحقون إنك تلتفتين لهم حتى؟؟
اسمهان:أنا مقدرة إحساسك..لأني مريت بنفس التجربة!!
مرام(باستغراب):ليش؟إنتي تصاحبتي مع ناس وخانوك؟؟؟
اسمهان:وإنتي نسيتي اللي سويتيه فيني كم مرة؟؟؟
انلجم لسان مرام وماعرفت ترد..
اسمهان:عموماً..ماراح أنكِر إني انصدمت فيك مرة وتأثرت من أسلوبك الغريب معاي..لكن بنفس الوقت..أنا مو حقودة أحس قلبي صافي من جهتك!!
انفجرت مرام بالبكاء وصارت تقول:اسمهان..صدقيني أنا ماكنت مخططة أنقلب عليك ولاعلى غيرك بس حسيت إني عقب الزواج نفسي أتحرر من وجودي بشلة وحدة وتمنيت أصنع لنفسي عالمي الخاص من العلاقات والصديقات..بس ماتخيلت إن كل هذا بيصير لي..
اسمهان:بس إنتي أسأتي الاختيار يامرام..والمشكلة انه الناس اللي اخترتيهم كان واضح عليهم الخطأ من البداية ومع ذلك أصريتي تضحين بأعز صديقاتك وتصمين آذانيك حتى عن أقرب الناس لك وهي أختك.. عشانهم!!وبعدين اش استفدتي؟؟هذا هم ..حاولوا يخربون بيتك..لولا الستر من الله..
مرام:أنا ماأنكر إني تسرعت في الحكم..بس اش تبيني أسوي؟
خلاص.. تعبت من كثر ماألوم نفسي ويلوموني اللي حولي..علاقتي بماجدة تغيرت وبأمي..وحتى عبدالرحيم..حسيت إنه فقد الثقة فيني تماماً..حتى البيت ماصار يقعد فيه..
اسمهان:أحياناً الإنسان لما يكون في غفلة..يحتاج لهزة تصحيه من نومه !!ومادام يامرام صارحتيني باللي صار لك..فأنا من زمان ودي أصارحك باللي في خاطري!
مرام:عارفة..بتقولين إنك مازلتي شايلة علي..صح؟؟
اسمهان(وعينها تدمع):أنا مو شايلة عليك..أنا حسيت إني انطعنت بقلبي منك!وخابت كل آمالي فيك..قبل زواجك كنت أعِد الأيام اللي تجي ونصير فيها مع بعض يجمعنا مكان واحد ونتشارك آمالنا وأحلامنا..لكن للأسف كل شي صار عكس ماتوقعت!!
مرام:أنا عارفة إني غلطت عليك كثير..بس إنتي قلبك كبير وبتسامحيني صح؟
اسمهان:صدقيني مافي شي أثَر على نفسيتي..كثر تخريبك لصورتي قدام زوجي وزوجك!!وأم عبدالرحمن بعد..بس خالتي انسانة حكيمة وحسيت إنها ماصدقت فيني..لكن زوجك بالعكس أخذ فكرة سيئة عني إني انسانة حسودة وأطالع بنعمة غيري وأثير المشاكل!!ليش كذا يامرام؟؟اش تستفيدين؟؟
انحرجت مرام من الكلام واستعاضت عن الرد بالبكاء!!!!!
اسمهان:أنا ماأبي منك أي تبريرات بس أبي شي واحد!أبيك تصحين..وتنسين كل اللي صار!وترجعين مرام القديمة اللي حبيناها وضميناها لشلتنا..وكانت ملهمتنا في ذوقها الرفيع..انتي حتى عقب ماتزوجتي تلاشت عنك خفة الدم اللي عرفناها فيك!ليش بس ليش؟؟؟عبدالرحيم ماقصر معاك بشي..وملحوظ عليه إنه يحبك ومستعد يكسر كلام الجميع إلا إنتي!!!!وحياتك مستقرة الحمدلله..يعني مافي أي شي يجبرك إنك تكرهينا وتحسين إننا أفضل منك!!
واستمرت مرام بالبكاء...
اسمهان:أنا عارفة إني زعلتك بكلامي يامرام..بس مثل ماإنتي متضايقة أنا بعد كنت مثلك وكاتمة بصدري وساكتة!!وماكنت أبي عبدالرحمن بيوم يسمع عني شي يضايقه وبالذات من أقرب الناس له اللي هو أخوه!!ليش مايكون عتبنا بيننا وبين بعض؟؟ليش كلامك كان عند زوجك كثييييييير عني في مواقف كبيرة حاولت أتناساها؟؟؟؟
مرام:خلاص يااسمهان خلاص!لاتزيدين علي أوجاعي..أنا عارفة إني كنت أبي أغير بنفسي أشياء لكني كنت فاشلة فاشلة!!
اسمهان:لا تقولين كنت فاشلة!قولي كنت مو ناجحة!لأن استسلامك للفشل يخليك تنحدرين للأسوأ..وأنا أقولها لك من قلبي يامرام..لو حبيتي ترجعين لنا ولصداقتنا وشلتنا فصدورنا مازالت مفتوحة لك!
مرام:لا تضحكين علي يااسمهان!حتى لو رجعت لكم ماراح تتقبلوني مثل أول..وأولكم رانية!!!
اسمهان:هذا لأنك ماتعرفينها مثلي!رانية قلبها أبيض واللي بقلبها على لسانها..تقول الكلام من وقته وتنساه بعدين!جربي من جديد وشوفي..إن صدق ظني أو لا!
مرام:إنتي متفائلة مرة...حتى نجلاء اللي كانت أقرب وحدة منكم لي..ماصارت ترفع علي سماعة!
اسمهان:بعذرها..انتي تدرين إن خطبتها على ولد خالتها تفركشت؟؟
مرام:مو معقول؟؟ليش؟؟
اسمهان:طلع عنده إيدز الله لايبتلي مسلم..
مرام:ياعمري عليها!!يمديها ذابحة عمرها من البكا عليه..
اسمهان:في البداية بس..لكن الأيام علمتها إنه واحد مثله مايستاهل دموعها...
مرام:طيب رانية وأفنان؟ماحملوا؟
اسمهان:لا..الله يرزقني ويرزقهم ان شاء الله..
مرام:تصدقين؟وحشتني أخبارهم!
اسمهان:طيب اش رايك نتفق هالأسبوع ونروح لرانية.وأفاجئها بحضورك؟؟
مرام:ياليت..مشتاقة لجلساتنا وذكرياتنا زمان..بس افرضي ماتقبلتني؟أعرف رانية زعلها جامد
اسمهان:ماعليك..زعلها جامد بس قلبها رهيف..وبأخليها تنادي أفنان ونجلاء..وأكيد بنخلي مشاعل تجي معانا..اش قلتي؟؟
مرام:اش بأقول؟غير تم!أهم شي أنسى كل همومي..
==============
أما رانية بيوم من الأيام قالت لناصر:نصور؟تصدق؟كل ماطلعت الحوش أمشي أو أنشر الغسيل..أحس كأن أحد يراقبني!وأتلفت حولي وماألقى أحد!
ناصر:مافهمت!تبين تقولين إن السالفة فيها جِن؟؟
رانية:والله يمكن!ليش لا!
ناصر:وش هالجن الكشخة اللي هواهم شرقي ويقعدون برة؟؟مستحيين يعني يدخلون البيت من غير استئذان؟؟
رانية:أقول يامِلحك!!أصلاً هالبيت بكبره يخوف!!بيت قديم وغرفه كثيرة ونصها مانستعملها!غير إن حضرتك مخلي غرفة نوم أمك مثل ماهي ماحاولت تشيل الأثاث فيها..مو بعيدة ألقاها بيوم مسكونة بقبيلة جِن!!
ناصر:آآآآها غيرانة من وحدة ميتة؟لو هي حية وش بتقولين؟؟
رانية:لاتخلط عبَّاس على دبَّاس!أنا أقول لو نغير الغرفة أحسن!
========
واتفقت اسمهان مع رانية في الكلية انهم يجتمعون عندها وقالت رانية:الله يحييكم..
بس اسمهان حبت إن حضور مرام يكون مفاجأة للشلة كلها وماخبرت أحد!!!
=========
بالنسبة لعبير في الرياض بدأت تتعلق بأهل أبوها اللي ظلت سنين وهي ماخذة عنهم أفكار غلط من أمها..وصارت شهرياً تسافر لهم مرة وحدة بعطلة نهاية الأسبوع وماكانت تلقى بينهم إلا كل ترحيب هي وأخوانها..وسط غضب أمها اللي بس تدعي عليهم في الروحة والرجعة!!!​

 

[جيانة]

الرجاء عدم وضع ردود هنا حتى لايتم غلق الموضوع..
والاكتفاء بالرد على هذا الرابط
http://www.niswh.com/vb/showthread.php?t=225321



​

 

[جيانة]

مرحباً من جديد​

جاء اليوم المنشود وركبوا مرام ومشاعل مع اسمهان بسيارتها ووصلوا بيت رانية..
دخلوا الثلاثة... وكشفوا اسمهان ومشاعل وجوههم أما مرام ظلت متغطية وساكتة عشان تكتشفها رانية!
سلمت رانية على اسمهان ومشاعل ووصلت لمرام...
رانية:اسمهان؟مين هذي شغالتكم؟
كشفت مرام وجهها وقالت:شغالتهم؟ليش ياقلبي؟شايلة مكنسة؟ولاقاعدة أكب الزبالة؟؟
رانية:مراموه؟ويه قطيعة؟وش جابك بعد ماارتحنا في غيابك؟؟جاية تباركين لي؟صح النوم ياماما!!!
التفتت مرام لاسمهان وقالت:اسمهان؟ماقلت لك إن رانية لايمكن تتقبلني؟؟
اسمهان:إلا متقبلتك ونص!بس هذا شعار الجودة حق رانية!لسانها لازم يجمرك على كل شي!!!
الجميع:ههههه
رانية:لا أنا من جد مستغربة حضورك؟شوفي يمين الله إن كانت نيتك شينة لأرمي بك في غرفة أم ناصر وأخلي العفاريت يتعشون عليك!!!
مشاعل:هههه الصراحة يارانية خوش استقبال!
مرام:لاتستغربين يارانية..المثل يقول(الدنيا سلف و دين)..تتذكرين لما اعتذرتي لي بملكتي عن فعايلك وحضنتيني؟؟هذا أنا بأردها لك واعتذرلك وأحضنك!
حضنوا الثنتين بعضهم بحرارة..
رانية:كل شي فيك اختلف يامرام حتى حضنك !الكرشة صارت حاجز!أهم شي قلبك مايكون فيه حواجز وإلا عقابك عندي عسير!!!!
اسمهان:أحد جاك غيرنا؟
رانية:ايه أفنان ونجلاء وصلوا قبلكم..وروابي بتنزل بعد شوي..
وبعد ماتهندموا راحوا يسلمون على الباقيين...
أفنان ونجلاء(بصوت واحد):مرااااااااام؟؟
مرام:ايه مرام...ايش؟ماوحشتكم؟؟
قاموا أفنان ونجلاء يسلمون عليها..
اسمهان:ياجماعة الخير..إحنا جينا نفتح صفحة جديدة..ولا حد يسأل عن شي فات!!
وجات روابي ووزعت رانية العصير على ضيوفها وشربوا البنات كاساتهم وخذتهم السوالف وماقام أحد يساعد رانية!!
رانية:حيا الله هالرفلات الخايبات..قاعدة أخدم عليكم وماواحدة فزَّت تساعدني؟ليش؟خدامة أبوكم أنا؟؟
نجلاء:هيا استلموا..بتتمنن علينا هالرانية باللقمة اللي بناكلها عندها!!
وقاموا يساعدونها وكانت رانية متفننة في ضيافتها بسفرة موالح ومعجنات وحلى وصواني مشكَلة...
أفنان:ماشاء الله..ماشاء الله..وش هالعِز كله؟مأدبة السلطان؟؟
رانية:أي سلطان؟السلطان حقي ظل راقد على الكنبة وحوله كل شي منثور تقولون الغرفة ضاربها إعصار؟!وصِحت فيه ذيك الصيحة اللي خلته يمشي وهويكلم نفسه!ودخل المطبخ وساعدني!
مرام:وععععع..زوجك حط إيده بهالأكل؟
رانية:تكفين ياربيبة العِز!ماكأنك مسنترة في المطاعم تاكلين من يد هالأجانب..والواحد فيهم الله عالم إيده وين كانت قبل مايحطها بالأكل!!
الجميع:ههههههههه
اسمهان:والله يطْلع منه هالناصر!
رانية:وش يطلع؟أقول لك عل قلبي لين ماساعدني وهزأته وقلت له لو إنك بنت؟كان عنست في بيت أهلك وماحد خذاك!!مايعرف شي بالمطبخ!
مشاعل:ماينلام.. رجال وماهي شغلته
نجلاء:أنا من يوم كنت صغيرة وأنا أشوف أبوي أحياناً بالاجازات يدخل يساعد أمي ويطبخ..وطبخه يهبل ولايعلى عليه!
رانية:حتى أنا أبوي كان يدخل مع أمي..بس عشان يهاوش ويطلع عيوب بالأكل!!
=========
بكرة بإذن الرحمن التكملة​

 

[جيانة]

مرحباً..تكملة مع اضافة جديدة​

جاء اليوم المنشود وركبوا مرام ومشاعل مع اسمهان بسيارتها ووصلوا بيت رانية..
دخلوا الثلاثة... وكشفوا اسمهان ومشاعل وجوههم أما مرام ظلت متغطية وساكتة عشان تكتشفها رانية!
سلمت رانية على اسمهان ومشاعل ووصلت لمرام...
رانية:اسمهان؟مين هذي شغالتكم؟
كشفت مرام وجهها وقالت:شغالتهم؟ليش ياقلبي؟شايلة مكنسة؟ولاقاعدة أكب الزبالة؟؟
رانية:مراموه؟ويه قطيعة؟وش جابك بعد ماارتحنا في غيابك؟؟جاية تباركين لي؟صح النوم ياماما!!!
التفتت مرام لاسمهان وقالت:اسمهان؟ماقلت لك إن رانية لايمكن تتقبلني؟؟
اسمهان:إلا متقبلتك ونص!بس هذا شعار الجودة حق رانية!لسانها لازم يجمرك على كل شي!!!
الجميع:ههههه
رانية:لا أنا من جد مستغربة حضورك؟شوفي يمين الله إن كانت نيتك شينة لأرمي بك في غرفة أم ناصر وأخلي العفاريت يتعشون عليك!!!
مشاعل:هههه الصراحة يارانية خوش استقبال!
مرام:لاتستغربين يارانية..المثل يقول(الدنيا سلف و دين)..تتذكرين لما اعتذرتي لي بملكتي عن فعايلك وحضنتيني؟؟هذا أنا بأردها لك واعتذرلك وأحضنك!
حضنوا الثنتين بعضهم بحرارة..
رانية:كل شي فيك اختلف يامرام حتى حضنك !الكرشة صارت حاجز!أهم شي قلبك مايكون فيه حواجز وإلا عقابك عندي عسير!!!!
اسمهان:أحد جاك غيرنا؟
رانية:ايه أفنان ونجلاء وصلوا قبلكم..وروابي بتنزل بعد شوي..
وبعد ماتهندموا راحوا يسلمون على الباقيين...
أفنان ونجلاء(بصوت واحد):مرااااااااام؟؟
مرام:ايه مرام...ايش؟ماوحشتكم؟؟
قاموا أفنان ونجلاء يسلمون عليها..
اسمهان:ياجماعة الخير..إحنا جينا نفتح صفحة جديدة..ولا حد يسأل عن شي فات!!
وجات روابي ووزعت رانية العصير على ضيوفها وشربوا البنات كاساتهم وخذتهم السوالف وماقام أحد يساعد رانية!!
رانية:حيا الله هالرفلات الخايبات..قاعدة أخدم عليكم وماواحدة فزَّت تساعدني؟ليش؟خدامة أبوكم أنا؟؟
نجلاء:هيا استلموا..بتتمنن علينا هالرانية باللقمة اللي بناكلها عندها!!
وقاموا يساعدونها وكانت رانية متفننة في ضيافتها بسفرة موالح ومعجنات وحلى وصواني مشكَلة...
أفنان:ماشاء الله..ماشاء الله..وش هالعِز كله؟مأدبة السلطان؟؟
رانية:أي سلطان؟السلطان حقي ظل راقد على الكنبة وحوله كل شي منثور تقولون الغرفة ضاربها إعصار؟!وصِحت فيه ذيك الصيحة اللي خلته يمشي وهويكلم نفسه!ودخل المطبخ وساعدني!
مرام:وععععع..زوجك حط إيده بهالأكل؟
رانية:تكفين ياربيبة العِز!ماكأنك مسنترة في المطاعم تاكلين من يد هالأجانب..والواحد فيهم الله عالم إيده وين كانت قبل مايحطها بالأكل!!
الجميع:ههههههههه
اسمهان:والله يطْلع منه هالناصر!
رانية:وش يطلع؟أقول لك عل قلبي لين ماساعدني وهزأته وقلت له لو إنك بنت؟كان عنست في بيت أهلك وماحد خذاك!!مايعرف شي بالمطبخ!
مشاعل:ماينلام.. رجال وماهي شغلته
نجلاء:أنا من يوم كنت صغيرة وأنا أشوف أبوي أحياناً بالاجازات يدخل يساعد أمي ويطبخ..وطبخه يهبل ولايعلى عليه!
رانية:حتى أنا أبوي كان يدخل مع أمي..بس عشان يهاوش ويطلع عيوب بالأكل!!
=========
وبعد الأخذ والعطا...ثم العشاء
راحت اسمهان دورة المياه...
وجلسوا أفنان ومشاعل وروابي مع بعضهم وقاعدين يسولفون..ونجلاء ومرام ورانية مع بعضهم..
التفتت رانية لمشاعل وروابي وأفنان وقالت:خير؟ليش مسويين حِزب؟ليش إنكم موظفات؟؟
روابي:خلك ساكتة!من زين الرواتب اللي ناخذها عاد!
رانية:اسمه يجيكم راتب!!!بكرة أسوي لنفسي بزنس وأشوف نفسي عليكم!
نجلاء:ويوم بيصير بإيدك قريشات بتشوفين نفسك علينا؟؟هذا بدل ماتعطينا ياوجه الفقر؟؟
رانية:يعني أنا اللي بأتعب وبأعرق وتجون إنتوا تاكلونها باردة مبردة؟؟
مرام:وش هو البزنس اللي بتسوينه ياحظي؟بتأسسين فرقة الطقاقات المتحدة؟؟؟
رانية:وش المانع؟؟تنضمين لي؟؟
مرام:يوه الشر برة وبعيد!تبين الناس يحذفونا بالحذيان؟
رانية:لايالثولات..عندي بزنس سبيشل!قاعدة أعصر دماغي وان شاء الله يجيني فكرة حلوة...
أفنان:بعيد عن البزنس وهالكلام...تذكرت..يوم السبت ان شاء الله عندنا بالروضة وحدة الأصحاب وودي لو وحدة منكم تتبرع تزورني بالروضة عشان أشرح للأطفال آداب الزيارات بين الأصدقاء..ومفهوم الأصحاب..فمين منكم تتبرع وتجي الروضة كزائرة؟؟
رانية:والله ذا اللي ناقصني!!أغيب عن الكليةو أقعد أناقز مع البزران!!!
مشاعل:وأنا عندي عملي بالمعهد..
روابي:وأنا عندي دوام بالمدرسة..
نجلاء:وأنا أهلي لايمكن يوافقون إني أضحي بروحتي للكلية وأروح للروضة!!
مرام:وأنا مثل منتي شايفة كرشتي كبرت ويالله أجِر نفسي جر!!
أفنان:لا انتي يامرام نستضيفك ان شاء الله في وحدة العائلة..زيارة أم حامل!!
إلا اسمهان خرجت من دورة المياه ودخلت عليهم..
رانية:أتوقع اسمهان مابتقول لك لا!!ياحبها في صياح البزران!!
اسمهان:اش السالفة؟؟
شرحت لها أفنان الموضوع..
اسمهان:ياالله!!!فكرة روعة!!
أفنان:يعني نقول تم؟؟
اسمهان:أكيد..أكيد
رانية:طالعوا الهبلة!!بتضيع يوم كامل من الكلية عشان تروح تتهبل مع البزران!!
اسمهان:عادي..الكلية موب طايرة..أهم شي استمتع مع الأطفال...
رانية:أجل قوموا يابنات نسترجع ذكريات الطفولة ونلعب فتحي ياوردة..غمضي ياوردة!!
نجلاء:لا لا نلعب بريلا بريلا بريليله..ليلة العيد تعشينا..ولا شَرْعَت بيتك كبير ومليان مخابيء!!!
مشاعل:لا عاد أنا إعفوني من هالمهرجان!!بأجلس مكاني!
رانية:يحق لك يالعجوز!!خلك مكانك!!
وقاموا بقية البنات يلعبون ألعاب الطفولة وهم يضحكون على أنفسهم ضحك هستيري..
وتوقع ناصر إن الضيوف راحوا ففتح الباب بالمفتاح ووقف بالمدخل..وسمع أصوات الضيوف وهم يلعبون فتحي ياوردة في الصالة!!!
وقام إتصل برانية وقال:تعالي أنا واقف بالمدخل!
أقبلت رانية..
ناصر:وش هالأصوات؟ وفتحي ياوردة وغمضي!افتتحتي حضانة ليلية؟؟
رانية:لا ياعزيزي..قاعدة ألعب مع الشلة!!!!
ناصر:يامثبت العقل والدين!!هذا كبركم وتلعبون؟؟!!
رانية:حبيبي!مع رانية كل شي جايز!
=============
رجعوا الضيوف كل وحدة على بيتها بعد سهرة ممتعة
وبسيارة اسمهان ركبوا مشاعل ومرام...
ووصلوا وراحت كل وحدة على بيتها...
وببيت اسمهان..كانت اسمهان تسولف مع عبدالرحمن وهي تضحك..
عبدالرحمن:ماشاء الله شكلك استانستي بالطلعة؟أشوف معنوياتك مرتفعة؟
اسمهان:ايه..الصراحة الجلسة مع رانية لها طعم ثاني!
عبدالرحمن:هذا نفس رأيي بناصر..سبحان من يجمع ويوفق...
وحكت له اسمهان عن رغبتها في زيارة الروضة ومساعدة أفنان في توضيح معاني درسها للأطفال..
عبدالرحمن:طيب والكلية؟؟
اسمهان:شوف؟..عشان الأطفال كل شي يهون!!
عبدالرحمن:على راحتك..بس ماتشوفين إنها مو حلوة تدخلين على الأطفال بإيد فاضية؟؟
اسمهان:شلون يعني؟؟
عبدالرحمن:يعني الأطفال يحبون الهدايا والحلويات..لو مثلاً نروح بكرة السوبرماركت ونشتري لهم حلويات وشيبسات يحبونها وتوزعينها عليهم بعد ماتدخلين!
اسمهان:يارب يسعدك ياعبدالرحمن..تصدق كان غايب عن بالي هالموضوع؟؟زين بآخذ لكل طفل مجموعة أشياء وأغلفها بكيس وأحطهم بالسلة وأوزعها!!
===============و
واليوم التالي وكان الجمعة راحت اسمهان واشترت حلويات وألعاب صغيرة خاصة بالحفلات..وكانت معزومة للغداء عند أهلها راحت لهم بعد مااشترت الأغراض..وشاركوها سماح وأسماء بالتغليف...
وأم اسمهان تقول:يالله سألتك في هاليوم الفضيل ماتردني..إنك ترزق حبيبتي اسمهان بالذرية الصالحة..
اسمهان:يارب يايمه يارب..الله يستجيب دُعاك..
سماح:ويرزق أفنان ورانية ان شاء الله...
أسماء:آمين..ويرزق كل متأخرة..جارتي هذي سابع سنة لها من تزوجت ولكن ماانكتب لها حمل..ودايماً توصيني أدعي لها بيوم الجمعة بالذات..لعل دعوة توافق ساعة إجابة...
أم اسمهان:يكفي إن الرسول خبرنا يابنتي إن دعوة المسلم للمسلم بظهر الغيب مستجابة..لاتبخلون على كل محتاج بدعاويكم..
=================
وأقبل السبت وأفنان مجتهدة تشرح للأطفال الآداب اللي يتعاملون بها مع ضيوفهم وأصدقائهم..
وبعد دقايق اتصلت اسمهان بأفنان وقالت لها:أنا وصلت ياعسل..
راحت أفنان وسلمت عليها...وقالت لها:شوفي يااسمهان انتي راح توقفين قدام الباب وأنا بأكلم الأطفال شوي وأول ماأأشر لك من وراء الباب الزجاج دقي الباب وأنا أفتح لك...
وبالفعل..قالت أفنان للأطفال بالصف:هالحين ياأطفالي راح نستقبل ضيفة وصديقة جديدة لنا..ومانبي نزعلها أبيكم كلكم تكونون مؤدبين جداً وتورون ضيفتنا حسن الاستقبال..موافقين؟؟
الأطفال(بصوت واحد):موافقين ياأبلة..
وأشرت أفنان لاسمهان اللي واقفة برة الصف..وطقت اسمهان الباب..وقامت أفنان تستقبلها..
أفنان:أهلاً أهلاً بصديقتنا أبلة اسمهان...اش اسم صديقتنا ياأطفالي؟؟
الأطفال:أبلة اسمهان...
وراحت أفنان تعرِّف اسمهان على طلاب وطالبات الفصل
وأجرت مع اسمهان مقابلة شخصية...ومثلوا الثنتين مشاهد خاطئة في استقبال الضيف والأطفال يصححون الأخطاء بمشاهد صحيحة في كيفية استقبال الأصدقاء والضيوف..
وكان يوم ممتع وزعت فيه اسمهان الهدايا..وسوت أفنان حفلة مُصغرة استمتعوا فيها الأطفال بالأكل والألعاب والأناشيد...
ولما انتهت زيارة اسمهان شكرت الأطفال على حسن الضيافة,,
وقالت أفنان:أطفالي؟يالله نرفع يدنا للسماء وندعي مع بعض..
رفعوا الأطفال أياديهم للدعاء..
أفنان:يلا ندعي بصوت واحد:
..يارب ياكريم زي مافَرَحَتنا أبلة اسمهان بالزيارة..فَرِّحهَا بالذرية الصالحة..
الأطفال(بصوت واحد):يارب ياكريم زي مافرحتنا أبلة اسمهان بالزيارة..فرحها بالذرية الصالحة..
حضنت اسمهان أفنان بشوق وقالت:جزاك الله خير يالغالية...
وودعت الأطفال ودموع الفرح غامرتها..
========
وبالسيارة...
عبدالرحمن:هاه؟بشريني؟كيف زيارتك للأطفال؟
اسمهان:روعة روعة مرة ياعبدالرحمن ياليتك شفت منظرهم وهم رافعين أياديهم ويدعون لي بالذرية الصالحة..
تبللت عيون عبدالرحمن بالدموع وقال:الله يرزقنا يااسمهان قولي آمين..
اسمهان:آمين..آمين...​

 

[جيانة]

رجعنا...وياهلا​

مرت الأيام وافتتح عبدالمجيد أول معرض شخصي له..في وسط توتر شديد وكانت مشاعل تدعمه بقوة..وحب عبدالرحمن يفرح قلب أخوه فعزم أصحابه بالجريدة اللي كان يكتب فيها عشان يغطون هالخبر صحفياً..
وأجروا مقابلة شخصية مع عبدالمجيداللي كان يتخاطب بالاشارة وعبدالرحمن يترجم لهم...
وأما عبدالرحيم من باب رفع معنويات عبدالمجيد عرض عليه إنه يشتري لوحة من لوحاته...
ونال المعرض استحسان كثير من الزوار وكان يحتوي على 25 لوحة انباع منها 6 لوحات بأسعار مُرضية...
وقابل عبدالمجيد عُروض مختلفة من عدة جهات حابين يتبنون موهبته..
ومنهم مكتب للديكور طرحوا عليه فكرة تصميم نماذج للرسم على جدران الفلل والقصور...
===========
أما رانية مرت عليها فترة تتلقى فيها اتصالات مُريبة من أرقام غريبة!!وبس تسمع إن المتصل رجال تدعي عليه عشرين دعوة تجيب أجله!!
وكذا مرة كانت لما تطلع الحوش في العصرية تمشي... من باب تخفيف وزنها اللي زاد بعد الزواج...تلاقي جارهم زوج روابي واقف يدخن بالبلكونة!!ويناظر فيها!!!!!!!!!!!
وبيوم نزلت روابي عند رانية وبعد الأخذ والعطا...
رانية:الحين يابنت..مو السطح مقابل شقتك على طول؟؟
روابي:صحيح..
رانية:أجل وشهو له زوجك مسنتر في البلكونة؟ليش مايروح للسطح ويقعد براحته؟؟؟
روابي:ليش؟عسى ماضايقك بشي؟
رانية:إلا مضايقني ونص!كل مابغيت أستمتع بالحوش ألاقيه واقف بالبلكونة!
روابي:أنا آسفة..ماكنت أدري..ان شاء الله أكلمه...
=========
وكانت روابي بما إنها معلمة حاسب بمدرسة أهلية وبنفس الوقت طالبة منتسبة بالجامعة تنشغل كثير من الأحيان وتطلب من رانية تطبخ لها أو تفزع لها بأصناف!!
وبيوم كانت روابي راجعة من دوامها وهي بقمة التعب وطبخت غداها وتغدوا وناموا ولما صحت قبل المغرب بساعة..لقيت رسالة من خالات زوجها يقولون فيها:بنجي نزورك عقب المغرب!
تسربعت روابي وقامت تكنس البيت وتنظف وماصار قدامها وقت تسوي فيه أكلات بالمطبخ وتغسل المواعين فاستنجدت برانية..
روابي:رانية طلبتك..بيجوني ضيوف بعد المغرب ومايمديني أسوي شي..يادوب أحمِم ولدي وأتحمم وأجهز قهوتي..
رانية:تبين أصناف مالحة وحالية؟؟
روابي:ياليت!لو مافيها كلفة!
رانية:والله مابأكذب عليك..من ناحية كلفة ففيها كلفة مادية ووقتية وجُهدية!
روابي:ماعليك..كل شي بحسابه..شوفي انتي كم تبين على الصينية؟؟
رانية:هههههههه يالعبيطة أمزح معاك..إحنا جيران!
روابي:إذا انتي تمزحين؟فأنا أتكلم جد!أحس إني متفشلة منك..دايماً طلباتي ماتخلص!
رانية:مادمتي جادة فالصينية الوحدة أسويها ب30 ريال!!!!!!
روابي:مو مشكلة..بس عجلي علي الله يخليك..
وشمرت رانية الأكمام وقالت لنفسها:مادام السالفة فيها فلوس؟أجل بأجتهد وأسوي أربع صواني!ثنتين حالية وثنتين مالحة!!
وقامت تضبط وتسوي وتجهز..بأسرع ماعندها...وخلال مدة قصيرة شوي انتهت من اعداد الأصناف وطلعتها لجارتها وحطتها عند الباب وأخذتها روابي.....
فرشت روابي سفرة للحالي والمالح..وأعجبوا ضيوفها بالأصناف وسألوها عن الطريقة لكنها صارحتهم بإنها مو من إعدادها..بل من اعداد جارتها رانية...
وكانت وحدة من خالات زوج روابي إدارية بمدرسة حكومي....وقالت:بعد كم يوم عندنا اجتماع خاص بالموجهات وكنا مخططين نسوي لهم بوفيه إفطار وتغالينا أسعار المحلات..لو تكلمين جارتك تسوي لنا تهقين ترضى؟؟؟
روابي:ماأدري!!بس بأكلمها لك..
الضيفة:ايه كلميها الحين تكفين..باين عليها شُغلها نظيف وطعمه لذيذ...
اتصلت روابي والضيوف عندها وقالت لرانية السالفة...
رانية:أقول عطيني ضيفتك أتفاهم معاها!
أعطت روابي السماعة لضيفتها...
رانية:ألو..هلا محسوبتك رانية متخصصة في اعداد الحلويات والموالح بأسعار منافسة للسوق!!
الضيفة:والنعم..باين من أكلك ماشاء الله إنه عندك نَفَسْ..بالأكل..
رانية:مشكورة...زين..اش طلباتك؟ وتبينها بأي يوم؟
الضيفة:أبيها هذا الثلاثاء...وتكون عبارة عن بوفيه مشكل..حلويات وموالح وساندويتشات وسلطات...
رانية:ابشري..وكم ميزانيتكم؟
الضيفة:بصراحة ماأبي المبلغ المطلوب يكون أكثر من 800 ريال!!!!!
رانية:ابشري..بس ترى هالمرة بأخفض لكم لأنها أول مرة تطلبون فيها!!! بس الله الله بالدعاية لاتنسيني!!!
الضيفة:ابشري..
=========
ويوم الاثنين كانت رانية بالمطبخ بعد ماقضى لها ناصر كل الطلبات...تعجن وتفرِد وتخبز..لين ماطفشت!!ودخلت على ناصر بغرفة الجلوس وهو مسدوح على الكنبة يتابع مسرحية ومتشقق من الضحك!!
رانية:ناصر..ناصر..ناااااااااااصـــــــــــــــر!!
ناصر:بسم الله!وش تبين؟؟
رانية:هالحين تاركني أكرُف بالمطبخ وإنت معلِق عيونك بالشاشة؟تضحك وتكركِر؟؟
ناصر:وش تبيني أسوي لك يعني؟
رانية:قوم..ساعدني!
ناصر:ماأبي..وتستاهلين..ماحد قال لك اشتغلي طبَّاخة والله مغنيك!!!
رانية:بدل ماتشجعني إني سويت لنفسي بزنس خاص؟؟؟
ناصر:تكفين ياأم بزنس!!انتي تطبخين في ساعات والنسوان يلهفونه ببطونهم في دقايق!!عالم فاضية!!لو مخليتني أفتح مطبخ حاشي وقُعود أبرك!!!
رانية:خلنا من الفلسفة وتعال اغسل لي الصحون على الأقل!
ناصر:آسف!!
رانية:إذن لاتحلم تذوق عشا اليوم!!!
ناصر:تعالي تعالي أمزح معك!!قطع الأعناق ولا قطع الأرزاق!!!
==========
واجتهدت رانية في تغليف الصحون والسبتات ومواعين التقديم اللي شرتهم مخصوص...وجات الحرمة تستلم طلباتها صباح الثلاثاء قبل ماتروح رانية الكلية..
وبعد السلام والكلام..
رانية:لو سمحتي..هاتي 200 ريال بعد!
الحرمة:ليش؟اتفاقنا على 800 بس!
رانية:قيمة تأمين الصحون!!
الحرمة:غالية والطلب رخيص..ومالي وجه أقول لا وهذي أول مرة أشوفك فيها..الصراحة الأصناف شكلها متعوب عليها...
وبالفعل أخذت الحرمة أصناف البوفيه واجتهدوا المعلمات بتزيين الطلبات على المفارش والطاولات...
ونال البوفيه استحسان الموجهات والمعلمات والاداريات وتوزع رقم رانية على الناس وبدأت في رحلتها مع المطبخ وتجميع الدراهم!!!!
=======
وفي الكلية...
رانية:ماودك يااسمهان تشاركيني بالبزنس؟؟
اسمهان:ياليت..بس أي بزنس؟
رانية:الطبخ والبيع!
اسمهان:لا لا ماأفكر أبد!
رانية:ليش؟مِستَعِرَة؟؟
اسمهان:لا بالعكس..بس مالي في المطبخ مثلك...لاتنسين إن موهبتي بسيطة على القد يادوب كم أكلة تعلمتها من هنا وهنا...
رانية:أما أنا ماتوقعت إنه بيدخل لي ذهب من ورا هالشغلة..بالذات لما تكون الطلبية سبتات لسابع أو مناسبات...بس إنتي وش الموهبة اللي تحسينها عندك؟؟؟
اسمهان:أنا مالي بالطبخ بس أحس إني أحب أكتب محاولات شعرية بسيطة أو قصص شاعرية!!!
رانية:لاياشيخة!و ذي في أي شي بتنفعك؟لايكون بتألفين قصص وأشعار وتبيعينها على البسطات بالشارع؟؟؟
اسمهان:هههههه لاطبعاً بس تصدقين إن نجلاء قالت لي ليش ماتألفين أبيات بسيطة بأسماء العريس والعروس وتبيعينها على الاستيديوهات؟
وجات نجلاء وانضمت لهم...
نجلاء:وش تسولفون فيه؟؟؟
اسمهان:عن بزنس رانية..قاعدة تشجعني أسوي لنفسي شغل خاص
نجلاء:تصدقون؟نفس اللي أنا قاعدة أفكر فيه!قبل كم يوم رحت المشغل لمرام ومعاي توزيعات ولادة سويتها لبنت خالتي..ومريت أقص شعري ووريتهم لها وعجبتها حيل..قامت أختها ماجدة عرضت علي لو أتوظف عندها بالمشغل بتغليف الهدايا وعمل توزيعات للمناسبات...الصراحة انبسطت بس أمي رفضت وقالت:دراستك أهم بس إذا معزمة؟ لاتداومين بالمشغل اتركي رقمك وإذا جاهم زباين يعطونهم رقمك ويتفقون معاك!!
رانية:والله فكرة حلوة وأنا أدعمك..خلينا بس من اسمهان الكسلانة...
اسمهان:لاتسبقين الأحداث يارانية يمكن لو طولت وماحملت أفكر أشغل نفسي بفكرة تدِر علي رِبح!
نجلاء:بيني وبينكم أنا لي فترة فعلاً أزين دفاتر التحضير حقت بنات التطبيق العملي وآخذ فلوس..بس نفسي أطور الفكرة وأتخصص بالتوزيعات وتغليف الهدايا..على حلاوة هالشغلة لكنها متعبة وتاخذ وقت...
وبعد كم يوم اجتمعوا البنات كلهم ببيت مرام...وفتحوا نفس الموضوع...
نجلاء:أما أنا ورانية لقينا لنفسنا شغل وماشيين فيه..لكن مرام جبت لها فكرة حلوة ومارضت..
مرام:وشهي؟
نجلاء:تألف أشعار بأسماء العروسين..أو زفات بما إنه خيالها واسع شوي!!
مرام:والله فكرة يااسمهان..لو ناوية تطبقينها بأقول لماجدة تتبنى الموضوع..لأنها ناوية تسوي تطوير بخدمات المشغل...
أما مشاعل وأفنان...قالوا:كافي علينا وظايفنا...
مرت الأيام وأقبلت اختبارات مابين الترمين...وكانت رانية فاردة ملازمها بالأرض وتذاكر وصدعت من المذاكرة وفكرت تسوي لنفسها برَّاد شاي يضبط المزاج.. وناصر كان مشغول برة البيت...وبعد ماسوت الشاي افتقدت النعناع..وأخذت سكينة وخرجت الحوش تقطع نعناع..
وفجأة حست بصوت وراها والتفتت بسرعة وكان فيه رجال غريب واقف يراقبها!!!!
عرفته رانية على طول جارهم فيصل زوج روااااااااااااااابي!!!
==========
أستكمل بعد سويعات..تعبت!!!​

 

[جيانة]

مرحبا بالجميع......
وكانت رانية واقفة تطالع بدهشة في فيصل زوج روابي اللي كان واقف قدامها بمنتهى الوقاحة!!
حاولت تستر نفسها بأي شيء لكن مافي حولها شي بالحوش...
رانية(بخوف):إنقلع من قدامي ياخسيس..لأصيح بصوتي وألِم عليك الناس!!
فيصل:بالهداوة بالهداوة يابنت الناس..واسمعيني للأخير!
رانية:ماأبي أسمع منك شي..انقلــــــــــــــــــــــع!!
فيصل:ترى أنا أراقبك من زمان وعاجبني كل شي فيك وكان نفسي تردين على مكالماتي وماكنتي تعطيني فرصة!
رانية:إنت ماتستحي تخون زوجتك وإنت متزوج؟
فيصل:وروابي هذي تسمينها زوجة؟!!!!أنا مظلوم معاها!نفسي ألقى اللي تفهمني وأرتاح لها!!!
قامت رانية حست بخباثة نيته وصاحت بأعلى صوتها..فاقترب منها خوفاً من الفضيحة ومسكها وحط يده على فمها لكنها أخذت السكينة وشقت يده!!!
وهرب بسرعة ورانية تقول:هالحين بأعلم ناصر بكل شي ياحقير يادنيء...
ودخلت رانية بيتها وقفلت الباب على نفسها وهي بقمة الانهيار...اتصلت على ناصر لكنه كان معزوم في منطقة بعيدة مافيها إرسال ...وفكرت تتصل بروابي...
رانية:روابي؟إنتي بالبيت؟؟
روابي:لا عند أهلي..رحت أزورهم... وزوجي مدري شلون وافاه الكرم الحاتمي وقال لي خليك عندهم يومين!!!
قالت رانية(بينها وبين نفسها):بلاَك..ماتدرين وش اللي مخطط له بغيابك!!!!!!
روابي:بغيتي مني شي؟؟
رانية:أبد عندي اختبار بكرة ومليت من المذاكرة وحبيت أتصل فيك تونسيني..عموماً مابأطول عليك وسلمي على أهلك...
أما زوج روابي كان الشيطان يلعب بعقله..وخايف لو درى ناصر يسوي فيه شي...فصار يخطط بنفسه:مادام ماضبطت معاك الأمور يافيصل؟؟إذن تغدى بها قبل ماتتعشابك!!!
وقعد يتصل بناصر لين مافتح معاه الخط...وكان ناصر راجع في الطريق وخرج من المنطقة اللي مافيها إرسال وبدأ يقترب من طريق البيت..
ناصر:هلا..
فيصل:هلا أخ ناصر..إنت قريب؟؟؟
ناصر:إيه...ليش؟فيه شي؟؟
فيصل:ايه..فيه موضوع ضروري تعرف عنه!
ناصر:خير؟؟
فيصل:بأنتظرك عند باب الشارع وأول ماأشوفك بأحكي لك!!
حس ناصر بالقلق وخاصة إنه ماله علاقة بفيصل من قبل!
ويوم وصل لقي فيصل بانتظاره وبعد السلام...
فيصل:شوف ياأخ ناصر إنت إنسان محترم وماأرضى لك تعيش مخدوع والماي يجري من ورا ظهرك!!!
ناصر:زين علمني اش السالفة؟أنا بديت أقلق!
فيصل:الصراحة كنت خارج قبل شوي أجيب زوجتي من عند أهلها ولقيت زوجتك واقفة عند باب المطبخ تستقبل رجَّال!!!!
ناصر:ووين المشكلة؟أكيد إنه أخوها!
فيصل:لا مو أخوها!!لو كان أخوها ماكان قعدت تتلفت بخوف وهي تدخله للبيت!!فقمت أنا تصرفت وخذيت جزمته من عند عتبة الباب وخشيتهم!!وبعد نص ساعة خرج من عندها وفتش عن جزمته ومالقاها..وصارت زوجتك تصيح فيه وتقول له اطلع بسرعة لايجي زوجي ويشوفك!!!!وهرب..
ناصر(بعصبية):إنت اش قاعد تخربِط؟؟هذي زوجتي وبنت ناس ومن عائلة محافظة..لايمكن تفرط بشرفها بهالسهولة!!!
فيصل:إذا منت مصدقني؟شوف إيدي زوجتك يوم واجهتها جابت سكين وبغت تذبحني فيها لولا إني شردت..وهذي هي جزمة الرجال خير إثبات!!!
وأعطى فيصل النذل جزمة لناصر..وأخذها ناصر وراح يركض على بيته!!!
ودخل على رانية مثل الثور الهايج!!
وقفت رانية بكل ضعف وهي ماتدري عن كلامه مع فيصل وقالت:ناصر؟إنت رجعت؟
ناصر(بنظرات مريبة):إيه رجعت..ليش؟متفاجئة؟
رانية:لا بس أنا دقيت عليك وكان جوالك مغلق..ليش قفلته؟
ناصر:أنا ماقفلت شي..كلميني هنا!!مين اللي كان عندك؟
رانية:ماحد..أنا كنت أذاكر!
ناصر:كذابة!!
رانية:لا مو كذابة.إنت اش تقصد؟؟
ناصر:إش كنتي تبين يوم اتصلتي فيني؟؟هاه؟تكلمي؟
رانية:مادامك معصب وتنافخ فيني ماراح أقول لك..إلا لاهديت!!
سحبها ناصر من إيدها بقوة وقال(بعنف):هذي جزمة مين؟ اعترفي؟
رانية:وش دراني؟وين لقيتها؟؟
ناصر:قدام الباب الخارجي للمطبخ!!
رانية:لاتكون جزمة جارنا!!
وتأملت رانية في الجزمة...
ناصر:لااااا؟وش يجيب جزمته عندنا؟؟
رانية:مدري عنه...لكن ماحد يلبس مقاسين إلا هو!عنده عيب خُلقي بأقدامه قدم صغيرة وقدم مرة كبيرة!!!!
ناصر:ماشاء الله..مقاسات أقدام جارنا حافظتها؟؟؟؟
رانية:انت اشفيك تكلمني كذا؟ اش عندك بالضبط؟؟
ناصر:إنتي انسانة حقيرة ومنحطة!!!ياخسارة ثقتي فيك!!
رانية(وهي متفاجئة):ليش؟؟أنا اش سويت؟؟
ناصر:منهو هاللي قابلتيه؟؟
رانية:جارنا فيصل!!
ناصر:اش تبين فيه ياحقيرة؟؟إنتي كذابة وأدنى مماتوقعت!
رانية:اسمعني.. أنا بأعلمك بالسالفة كلها..
ناصر:ماأبي أسمع أي مبررات كلها كذب بكذب!!روحي البسي عباتك ويلا على بيت أهلك!!ماأتحمل جلستك ببيتي!
رانية:حرام عليك..أنا اش سويت لك؟؟
ناصر:لما تروحين لبيت أبوك اشرحي لهم كل الحقارة اللي سويتيها!!
وضربها كف على وجهها!!!!!!!
راحت رانية ولبست عباتها...ومن البكا خلت كل شي ببيت ناصر اللي ماسمح لها تاخذ حتى جوالها!
ووصلت لبيت أهلها...
نزل معاها ناصر ودق الباب وفتح مشعل الباب..
ناصر(بزعل):وين أبوك؟؟
مشعل:قاعد على السفرة يتعشى!
ناصر:عندكم أحد غريب؟
مشعل:لا..
قام ناصر سحب رانية من يدها ودخل بها على عائلتها أبوها وأمها ومشاري وأختها روان وهم قاعدين على السفرة يتعشون...
ناصر:خذوا بنتكم...ماأبيها ولالي علاقة فيها بعد اليوم!!والله يستر على بنات الناس..
وخرج يركض على سيارته ومشاري يلحقه لكن من دون فايدة!!ناصر مايرد!

 

[جيانة]

ياهلا وغلا​

كانوا أهل رانية قاعدين على السفرة يتعشون ومتفاجئين من دخول ناصر عليهم وكلامه معاهم بهالطريقة وانصرافه من غير توضيح أي شيء عن المشكلة!
أما رانية كانت واقفة مكانها تبكي بصمت...
طالع فيها أبوها بنظرة حادة وقال:اش اللي صار يابنت؟؟؟
تدخل أخوها مشاري وقال:بعد هذي مايبي لها سؤال يايبه!بنتك معاها ماجستير في طول اللسان!تلاقيها مجننة الرجال ومخرجته عن طوره!!!!
أبورانية(بعصبية):إسكت إنت!لاتتدخل!!رانية قولي اش اللي صار؟؟
لكن رانية ظلت ساكتة وراحت تركض لغرفتها...
أبورانية(يكلم أمها):قومي ياموضي..شوفي بنتك اش فيها وبالهداوة عليها..لين ماتفهمين اش اللي صار..
دخلت أمها عليها الغرفة وسألتها عن السبب...
رانية:يمه..أنا نفسي مو عارفة اش القصة!!
أم رانية:لاااا؟؟تتغابين علي؟واحد جايبك بآخر الليل وبكرة وراك إمتحان نهاية الترم الأول..ودموعك على خدك..ويقول ماأبي بنتكم..وتقولين مدري اش القصة؟؟؟؟
رانية:صدقيني ماأدري!لاوفوق هذا كله أعطاني كف على وجهي الله لايسامحه ولد (شمه)!!
أم رانية:أكيد طولتي لسانك عليه؟
رانية:يمه..أصلاً ماكان عندي بالبيت!رجع من برة ودخل علي والشر في عيونه وقام يرميني بتهم مثل الحقارة والدناءة والخداع!
أم رانية:يابنتي..تذكري زين!إنتي ماغلطتي أو سويتي شي من وراه؟؟
قامت رانية حكت لأمها عن موقفها مع فيصل زوج روابي بالحوش!
أم رانية:بس!تلاقينه كان موجود ويراقبكم من بعيد وموب فاهم شي!وظن فيكم سوء!
رانية:لا لا مستحيل..لأني أول مادخلت البيت اتصلت فيه وكان جواله مغلق وتقريباً بعد ساعة إلا ربع وصل البيت ودخل علي وصار اللي صار...
أم رانية:يمكن أحد شافكم وقال له؟
رانية:يمه؟مين بيشوفنا؟وحتى لو أحد شافنا أنا ماسويت شي غلط!الأعمى لو شافني كان عرف إني كنت أدافع عن نفسي وشقيت إيد الكلب فيصل بالسكين!!
ودخل أبو رانية..وحكت له رانية عن كل شي..
أبورانية:أنا لو خذيت القصة بحسب كلامك فمابأشوف إنك غلطتي..لكن أكيد لو سمعتها من ولد الناس بألقى لها تفسير ثاني!
رانية:أنا موب حاقدة على فيصل القذر هذا كثر ماحقدت على ناصر!!
على الأقل فيصل تاريخه أسود ودايماً كانت تحكي لي زوجته عن مشاكلهم زمان وإنه كان يسرق أرقام صاحباتها من جوالها ويآذيهم!لكن ناصر النذل شلون يتهمني في شرفي ويفرط فيني بهالسهولة.لا ويمد إيده علي؟؟؟لكن بسيطة يانويصر!يمين لأخليك تندم على حركتك هذي!!
أبورانية:الله وش هالتفاؤل؟هذا إن كان ماصحيتي بكرة ولقيتي ورقة طلاقك عند الباب!!
رانية:لااااااااااااااااااااا!!!!
----------
انتظروني غداً
​

 

[جيانة]

مساءكم ورد وياسمين​

نام الجميع في بيت أهل رانية..إلا رانية اللي كان التفكير شاغلها وببالها ألف سؤال وسؤال ينتظرون جواب!!
أما ناصر لما تركها ببيت أهلها ورجع بيته راح للصالة يتأمل المكان اللي كانت رانية جالسة فيه..وناثرة ملازمها وأوراقها..وحاطة صحن فيه براد شاي صغير وفنجال واحد...وجوالها جنب الأغراض!
أخذ ناصر جوالها وصار يفتش فيه..كان كل همه يلقى شي يثبت له شكوكه بدل ماهو متعذب ومتشتت البال..
فتش الرسايل ومالقي شي مهم كل الرسايل عبارة عن نكت ودردشة بينها وبين زميلاتها أو استفسارات من زباينها عن أسعار الأطباق....
وفتش قائمة الاتصالات وبدأ بالاتصالات الصادرة ومالقي غير اتصالين من رانية.. واحد على روابي وواحد عليه..
وفتش بقائمة الاتصالات الواردة ولقي فيه رقم غريب من غير اسم متكررة منه الاتصالات..وبحث في سجل المكالمات المخزنة بالجوال من شهر ولقي إن هالرقم متكررة منه الاتصالات أكثر من 22 مرة!! ومافي ولامرة رانية متصلة عليه!!
بغى يتصل على هالرقم..بس خاف إنه يكون رقم وحدة من زبونات رانية!!ولكن بنفس الوقت صار ناصر في صراع داخلي وده يصيد أي شيء ينافي شكوكه ويكذِّب ظنونه!!
وتذكر إنه واحد من زملاؤه اسمه هاشم يشتغل في الاتصالات..واتصل ناصر عليه...
بعد السلام...
ناصر:معليش ياهاشم..المعذرة على اتصالي عليك بهالساعة..
هاشم:لا ماعليك يالحبيب خِذ راحتك.
ناصر:بغيت أطلب منك خدمة..
هاشم:تفضل..
ناصر:فيه رقم دايماً يتصل علي وماأرد..وودي أعرف مين صاحبه أخاف إنه واحد من زملائي القدامى وأنا ناسيه..وإذا ماعليك أمر..تبحث لي عندك بإسم مين مسجل هالرقم
؟؟؟؟؟050437
هاشم:غالي والطلب رخيص..بكرة ان شاء الله لارحت عملي بأبحث لك عنه وأتصل فيك...
ناصر:على خير..أنتظر اتصالك..
وراح ناصر ينام..ولكن هيهات يجيه النوم في بعاد رانية! اللي كانت مالية البيت بصوتها ومشاكساتها..
ابتسم ناصر وقال بنفسه:مميزة يارانية حتى في هواشاتك!!بس الله يقطع إبليس اللي فرَّق بيننا!!
============
أقبل اليوم الثاني..وجات أم رانية تصحي بنتها عشان دوام الكلية...
أم رانية:رانية..رانية..قومي يابنتي..مشاري ينتظرك بالصالة..
رانية(بتثاقل):وش يبي مني؟؟
أم رانية:يبي يوديك على طريقه للكلية..نسيتي إن وراك اختبار؟؟؟؟
رانية:ماني رايحة!
أم رانية:يووه!ليش؟؟
رانية:شلون أروح وأنا ماذاكرت أصلاً؟وولد شمه ماخلاني آخذ معاي أي شي من البيت...حتى ملازمي خليتها..
أم رانية:ليش يابنتي ماذاكرتي أمس؟وش كنتي تسوين طول اليوم؟؟
رانية:وحدة من الجيران اتصلت فيني على تليفون البيت عشر مرات تبي أسوي لها أكلات وشغلات..وضاع يومي في الطبخ والعجن وتنظيف المطبخ..ماقعدت أذاكر إلا بالليل ومامداني ذاكرت كم صفحة إلا صدعت وجيت أسوي الشاي وصار اللي صار مع جارنا النجس وبعدها ماقدرت أفتح كتاب !!
أم رانية:زين مايخالف..روحي اختبري يمكن ربي يفتحها عليك وتجاوبين..
رانية:قلتلك ماني رايحة..هالمادة صعبة وماقد فتحتها من أول الترم..يعني إن رحت أو مارحت؟ راسبة في جميع الأحوال..ماغير بلغي مشاري يتوكل على الله و يروح جامعته...
أم رانية:حسبي الله ونعم الوكيل..براحتك خربي مستقبلك بإيدك!
وخرجت الأم من الغرفة..
وحاولت رانية تكمل نومها لكنه طار!أما الأم رجعت تنام وأبو رانية راح لعمله..
===========
وبالكلية..استغربوا نجلاء واسمهان من عدم حضور رانية...
اسمهان:مو معقولة أبداً!!رانية تغيب بيوم مهم مثل هذا؟؟؟نسيت إن وراها امتحان نصفي؟؟؟
نجلاء:حتى أنا مستغربة..أخاف صاير عليها شي؟؟
اسمهان:لاتكون البنت حامل وتعبانة؟؟
نجلاء:لا..رانية لو تحمل بتبشرنا على طول..وأمس ماكان فيها إلا العافية..
اسمهان:بأتصل فيها وأعرف السالفة..
صاروا نجلاء واسمهان يتصلون برانية ولكن مامن مجيب...وقلقوا!!
===========
أما ناصر جاله اتصال من زميله هاشم اللي يشتغل بالاتصالات...
ناصر:هلا هاشم..
هاشم:ايه لقيت لك الرقم اللي تبيه مسجل بإسم..فيصل بن فلان الفلاني!!
ناصر:ايش؟معقول؟
هاشم:هذا الاسم اللي طلع عندي..
ناصر:طيب جزاك الله خير ياهاشم..
وقفل ناصر الخط وهو يفكر ويفكر ومو عارف يلقى تفسير للي قاعد يصير..
===========
أما رانية حاولت تنام وماقدرت وفتحت كتبها القديمة اللي تركتها ببيت أهلها لكنها ملت ومالها نفس تقرأ ونزلت من غرفتها وراحت للمطبخ وكانت شغالة أهلها صاحية تنظف...
الشغالة:مدام رانية؟تبقي فُتُور؟تبغي فطور؟؟؟
رانية:لا شكراً..مالي نفس!
وراحت رانية للصالة..ولقيت أختها روان الصغيرة قاعدة قدام التليفزيون تتفرج وتآكل كورن فليكس بالحليب!مو دعاية للمنتج ترى!!ههههه
رانية:روان؟ليه مارحتي المدرسة؟؟
روان:اشفيك؟إحنا خلصنا المدرسة من أول!
رانية:ايه صح تذكرت إنتوا عندكم تقويم!
روان:رانية؟إنتي نمتي ببيتنا؟؟
رانية:إيه..
روان:ليش؟إنتي ماعندك بيت؟؟
رانية:كااااان عندي..بس حسبي الله على من خلاني لاجئة عندكم!!!
روان:عندك قصة حلوة تحكينها لي؟؟
رانية:ايه عندي قصة بس ماهي حلوة!
روان:قوليها...قوليها..
رانية:كان فيه عصفورين حلوين عايشين بقفص..
روان وهي تقاطع:ليش..ليش يعيشون بقفص؟؟ليش مايطيرون بعيد؟؟
رانية:بس..يبون يكونون مع بعض!بعدين بيوم من الأيام جاء ُغراب..
روان..تقاطِع:أعرفه..أعرفه..لونه أسود!
رانية:بالضبط..وحاول يخرِب حياة العصفورين وسحب العصفورة..و
روان تقاطِع من جديد:ليش يخرب عليهم أكيد هم آذوه صح؟؟
رانية:لا ماحد آذاه الله يبلاه بمصيبة مِن عنده!!وبعدين العصفورة حاولت تدافع عن نفسها وجرحت الغراب بالسكينة!
روان:أف!اش هذي العصفورة المتوحشة؟ ماأحبها!
رانية:أقول؟؟انتي بتخليني أكمِل القصة؟وإلا أصكك بـ طراق؟؟
روان:وبعدين؟مات الغراب؟
رانية:ياليته يموت عسى عيونه البط!
روان:يعني كيف البط يجلس على عيونه؟؟
رانية:البط يابنت يعني الفقع!أوهوووو الله يعينك ياأفنان مدري شلون تشتغلين في الروضة مع البزران؟!!!
روان:أنا في المدرسة ماني صغيرة بالروضة!!هيا كملي كملي..
رانية:أبد ياطويلة العمر..يوم رجعت العصفورة قفصها قام العصفور طردها ووداها بيت أهلها!!حتى ملازمها ماخلاها تاخذها مالت عليه!!!
روان:طيب..يمكن العصفورة مسويت له زحمة في القفص وهو يبي مكان واسع يعيش فيه؟؟
رانية:بالله قومي قومي..غثيتيني بكلامك وأسئلتك!!قال ايش؟العصفورة مسويت له زحمة!
روان:قصتك مرة مو حلوة!!
رانية:قلتلك من البداية بس ماصدقتي!
وحاولت رانية تبحث عن شي تشغّل نفسها فيه..فراحت المطبخ وحطت حرَّتها بإعداد الأكلات وطبخ الغداء.
صحيت أمها قبل الظهر..ودخلت المطبخ وشمت الروايح..
أم رانية:الله الله وش هالحركات الحلوة؟
رانية:أبد..لقيت نفسي فاضية..قلت أدور شي أشغل نفسي فيه..
أم رانية:مااتصل ناصر؟؟
رانية:ماهو ناوي يتصل من يوم إنه رماني هالرمية!!
أم رانية:وجلستك ببيت أبوك..تسمينها رمية؟؟
رانية:طبعاً..أحس نفسي مقطوعة عن العالم..لاجوال ولاشي..
أم رانية:ومين منعِك.. عندك التيليفون خذيه واتصلي باللي تبين!
رانية:وشلون بأتصل بالناس..وأنا موحافظة رقم أحد؟كل الأرقام مخزنتهم بجوالي بس!!!
أم رانية:وانتي ليش تبين تتصلين بأحد؟كلميني أنا!
رانية:يمه ودي أكلم روابي..أبيها تعرف عن اللي كان بيسويه زوجها فيني خليها تعرفه على حقيقته عدِل!!بس المشكلة إنها عند أهلها وأنا ماعندي رقم بيت أهلها ولاحافظة رقم جوالها..ومابترجع بيتها إلا بكرة..
أم رانية:واش تستفيدين لاكلمتيها؟تبين تخربين بيت المخلوقة؟
رانية:لا... أحسن ينخرب بيتي أنا!!واحد حقير مثل فيصل حرام الوحدة تضيع عمرها معاه المفروض تتركه من أول مرة خانها فيها!!
أم رانية:وهي ليش ماتركته من أول خيانة؟؟
رانية:لأن أهلها مافتحوا صدورهم لها!أبوها متوفي وأمها عايشة مع أخوانها وأخوان روابي شديدين وكل مرة تتهاوش مع زوجها يرجعونها له غصب!ويقولون البنت مالها إلا بيت زوجها..يمه هالروابي تقطع القلب..تخيلي تزوجت وهي بنفس عمري وهالحين صار لها 3 سنوات مع زوج مايسوى هللة!!!
أم رانية:ولاتنسين يابنتي إنه عندها طفل منه وين توديه؟تقعد مع ولدها تربيه أحسن..
رانية:لا ياحبيبتي!مافي وحدة بالدنيا مجبورة تقعد مع واحد نجس ربي رازقه زوجة بالحلال ويُصِّر على اللعب بالحرام!ان شاء الله لو أهلها مجرمين!
ولا هم على بالهم يوم زوجوها باعوها خلاص؟؟؟
أم رانية:الله يعدِّي الأمور على خير..
بعدساعات رجع أبو رانية من العمل..
أبورانية:مااتصل عليكم ناصر؟؟
رانية:لا..
تغدوا الجميع...وانبسط مشاري وقال:وش هالسفرة الحلوة؟تدرين رانية؟ اقعدي عندنا على طول!!
رانية:ايه..لاشبعت العَدُوَة..قَلَت المُرُوَة!
بدل ماتتمنالي أرد بيتي؟!
اتصل أبو رانية على ناصر وكلمه بلهجة حادة وقال:تعال بسرعة..أبيك ضروري!
وجاء ناصر..واستقبله أبو رانية..
أبو رانية:إنت جبت بنتنا أمس..ورميتها من غير ماتوضح لنا السبب أو تعطينا تفسير..وأظن هذا الشي مو من حقك رانية خرجت من بيتنا بكرامتها فالمفروض ماترجع لنا إلا بكرامتها..اش اللي صار بالضبط؟؟
حكى ناصر لأبو رانية بالضبط الحوار اللي دار بينه وبين جارهم!!
أبو رانية:وإنت صدقته على طول؟
ناصر:الصراحة جاب لي أدلة مقنعة بالإضافة إلى إنه مابيني وبينه علاقة من قبل فإش اللي بيجبره يتبلى على زوجتي؟؟
أبو رانية:بس إنت تعرف إن بنتي عاقلة
ناصر:بس الشيطان شاطر ياعمي!!!
قام أبو رانية وناداها..
دخلت رانية من غير سلام ولاكلام ونظراتها لناصر تفلق الصخر!!!
أبو رانية:قولي يابنتي لزوجك السالفة اللي حكيتيها لنا أمس..
حكت رانية السالفة بالتفصيل وناصر متفاجيء من اللي سمعه!!
ناصر:يعني...اشرحي لي أكثر!
رانية:كل هذا ومااستوعبت؟يبي يداري فضيحته قام قلب القصة كلها علي!وإنت ماصدقت على الله تخرجني من بيتك!!!
ناصروهو يهز راسه:لاحول ولاقوة إلا بالله..الله يخزي الشيطان..أنا لقيت له أكثر من 22 اتصال بجوالك بعد ماطلعت اسمه بطريقتي الخاصة..ليش ماعلمتيني من أول بالاتصالات؟؟
رانية:وأنا اش دراني انه هو اللي يتصل؟ثم إن الاتصالات زادت الفترة الأخيرة فخمنت انه ممكن تكون من بعض الزباين اللي وزعوا رقمي على الناس!
ناصر:حصل خير..وأنا آسف..قومي البسي عباتك وخل نرجع بيتنا!!
رانية:لاااااا؟؟؟ تنكِت حضرتك؟؟؟
ناصر:لا.. أكلمك جد..ايش؟مو مصدقة إنك بترجعين بيتك من جديد؟؟ماعليك أنا قلبي أبيض وأسامح بسرعة!!
رانية:ايه..بس أنا قلبي أسود بلون شعر راسي!ورجعة معاك مو راجعة!!
أبورانية:وش هالكلام يابنت؟ماني رايحة الكلية..ماني راجعة معاك؟؟كل شي عندك عناد؟؟؟
ناصر:صحيح مارحتي الكلية؟؟
رانية:ايه..
ناصر:ليـــــــــــش؟؟
رانية:مرة يهمك مستقبلي يعني؟إذا كنت مااهتميت بشرفي وقذفتني
..بتهتم بدراستي؟؟؟
ناصر:يابنت الحلال..أكرر أسفي لك ويلا نرجع لبيتنا وغضب الله على الشيطان
رانية:وأسفك هذا وين أصرفه بالله؟؟تتهمني في سمعتي وتصدق قولة الغريب فيني وتمد إيدك علي وتخرجني من بيتي بهدومي اللي علي في الليل وتاليتها تختصر هالسالفة بكلمتين؟؟مانصفتني والله!
ناصر:زين تدللي علي باللي تبينه وأنا أسويه لك!
رانية:كرامتي ترجع!
ناصر:ابشري..بس شلون؟؟
رانية:أعطيك كف مثل اللي ذوقتني إياه!عاد بروحنا أو قدام أهلي بكيفك!!
ناصر(بعصبية):لاااا؟ذا اللي ناقص والله!
أبو رانية:وش هالكلام يابنت؟ماتحشمين الرَجَّال وهو ببيتنا؟
رانية:وليش هو ماحشمني يوم كنت ببيته؟؟
أبو رانية:روحي روحي البسي عباتك وخلك من هالكلام...
رانية:مافي..ياخذ الكف بالأول!!
ناصر:عيب عليك يارانية كبري مخك..شلون رجال وتطقيني؟؟؟
رانية:لا ياشيخ؟؟واش يعني رجال؟على راسك ريشة؟ولا لك كرامة وانسانية وأنا حيوانة يجوز فيني الطق؟؟؟
أبو رانية(بـ غيظ):أفففف..يابنت الحلال طيعي زوجك وفكينا من كلامك..
رانية:ايه..وش عليكم؟رِجال وتوقفون مع بعضكم!أما أنا حرمة ضعيفة..تستحلون فيني الإهانة وواجب علي أتحمل!!
ناصر:اطلبي طلب غير هذا.. فلوس؟ومستعد أرضيك باللي تبين!
رانية:كم بتدفع يعني؟؟
ناصر:لك مني 5آلاف ريال!!
رانية:نعم ياولد شمه؟؟ليش ياعيوني؟؟الشغالة وهي شغالة لابغيت تستقدمها تدفع لها ضِعف هالمبلغ!!وأنا مستخسر تدفع لي مبلغ زين وأنا زوجتك؟؟
ناصر:اللهم لاحول ولاقوة إلا بك...زين بأخليها عشرة!
وكان مشاري واقف عند الباب يسمع هاللحظة وقال:وشهو اللي خمسة وعشرة؟؟فاتحين حراج سيارات ومزاد علني؟؟
أبو رانية:بالله اطلع اطلع برة و ضِف وجهك!!
ناصر:قولي وش تبين وريحيني!
رانية:خمسين ألف ريال!ريال ينطح ريال!
ناصر(بـ خرعة):ايـــــــــــش؟؟50 ألف ريال أروح أتزوج بها حرمة ثانية أحسن لي!!!
رانية:من طيب عودك ياولد شمه!!!
أبو رانية:خلاص عاد!فكوني من هالمهزلة..اطلعي يابنت مع زوجك!!
رانية:ماني طالعة إلا إن كنت بتسوي مثله وتطلعني غصب؟؟!!!
أبو رانية:شوف ياولدي..الامتحانات بتنتهي عقب أسبوعين..تعال بعد الامتحانات وخِذ زوجتك..
رانية:ولا بعد أسبوعين موب رايحة معاك!
ناصر(بـ عتب):كذا يارانية؟؟على هواك!بس خليك متذكرة إني جيت أعتذر لك ورفضتي تقبلين اعتذاري!!
رانية:ماجيت من كيفك ياقلبي ولاكنت بتجي ولو بعد مية سنة!!أبوي هو اللي اتصل عليك!!
ناصر(بزعل):مع السلامة ياعمي!
وطلع من الباب وراح...
التفت أبو رانية لبنته وقال:هالحين اش بتستفيدين من ورى هالراس اليابس؟هاه؟علميني؟؟
رانية:إن كرامتي ترجع لي,,وكرامتك إنت بعد!!إنت نسيت انه اتهمني في شرفي؟؟؟وشرفي هو شرفك وشرفك شرفي!!!
أبو رانية:خلاص ياأم شرف..لاوصلتك ورقة طلاقك على البيت بروزيها ذيك الساع وغني موال لـ شرفك!!!
دخلت أم رانية:خير؟وشفيه الرجال راح؟
أبورانية:اسألي بنتك الضايعة!!!
أم رانية:يابنتي قال لي مشاري انه اعتذر لك خلاص..وش تبين بعد؟كان رجعتي معاه!!!
رانية:وإنتوا ماتحتسون بالفكة مني؟ماكأني بنتكم!!!
أم رانية:هيا تحمل عناد بنتك..اللي كانت مشفوحة على الزواج ورحت تزوجها وشوفها اليوم شلون تبي الفكة..على بالها الزواج لعبة بتتسلى بها!!
رانية:لا يمه...مو لعبة..استراحة محارِب!
=============




​

 

[جيانة]

الرجاء عدم وضع ردود هنا حتى لايتم غلق الموضوع..
والاكتفاء بالرد على هذا الرابط
http://www.niswh.com/vb/showthread.php?t=225321



​

 

[جيانة]

رجعت ياقماري​

أرسلت رانية أخوها مشاري لبيتها وأخذ جوالها وملازمها من ناصر..وشوية ملابس..للكلية والبيت..
ناصر(يكلم مشاري وهو خارج من عنده):تكفى..مشاري كلِم أختك ترد لبيتها..وتنسى الماضي!
مشاري:تحلم ياحبيبي!!تو بطني رجع لحالته الطبيعية وعصافير بطني ماعاد تصوصو لأني شبعان طول الوقت!!!
ناصر(بـ مكر):شوف..لو أقنعتها ترجع لي؟لك مبلغ يرضيك ياوسيط!
مشاري:ايه قول كذا من الأول!من عيوني..ابشر!!
وقعدت رانية تذاكر..وراحت اليوم الثاني للكلية...
قابلوها اسمهان ونجلاء وطرحوا عليها 20 سؤال عن سر غيابها وتطنيشها لاتصالاتهم!
رانية:خلااااااااااص صدعتوا بي ياغجر!!السالفة ومافيها..متهاوشة مع زوجي وقاعدة ببيت هلي!ارتحتوا؟؟
اسمهان:أعوذ بالله!!ليش؟؟
نجلاء:المفروض اللي يعرف رانية زين مايسألها هالسؤال يااسمهان!
رانية:وش قصدك يانجول؟ترى رحت لأهلي وأنا مظلومة!!!
نجلاء:ياشيخة!إلعبي غيرها!تظلمين قبيلة إنتي!هِب ماأعرفك؟؟
اسمهان:ماعليك منها احكي لي يارانية ..وش اللي صار؟؟
نجلاء:شوفي يارانية..إن طلعت السالفة من سوالفكم السخيفة؟فتحملي مايجيك مني!!
رانية:أجل اسمعوا واحكموا!
وحكت لهم سالفتها بالتفصيل الممل...
اسمهان:ياعمري!!كل هذا صار لك وإحنا ماندري؟؟
نجلاء:بلا في وجهه جاركم الخسيس هذا! ليتك طاعنته بالسكين في بطنه!!
رانية:هو لو بقى واقف قدامي كان سويتها فيه!!لكن شرد الله لايسامحه!!!!!!
اسمهان:بس مالك حق يارانية..يجيك زوجك يراضيك وترفضين؟؟؟
رانية:أحسن يستاهل!
نجلاء:إلا كفو هالرانية!خليه يحس على دمه شوي!
اسمهان:بس أنا أحس لازم يكون بين الزوجين تنازلات..وهو مااعتذر لك إلا وحاس بأنه غلطان..فليش تعقدين الأمور؟؟
رانية:حبيبتي؟أنا متعمدة أعقد الأمور بوجهه..عشان لابغى يعيدها في المستقبل ويزعلني؟يتراجع!!ويتذكر زعل رانية شلون صعب!!!
اسمهان:بس يالذكية..افرضي طلع أعند منك...وما ردك بعد الاختبارات..وش بتسوين؟؟
رانية:لا لا ياحبيبتي..ناصر زوجي وأعرفه..وماهو من النوع اللي يتحمل البُعد..بالذات إني من يوم دخلت بيته..غيرت له أشياء كثيرة بحياته..وصار لي فضل عليه..لدرجة إنه مايقدر يتصرف تصرف من غير مايرجع لي!!
نجلاء:ياهووووه عالثقة!!
رانية:يابنتي أنا راتبه وهو راتبه يسلمني إياه بإيدي وأقسمه له وأرتب له ميزانيته...
==============
لما رجعت رانية البيت اتصل عليها ناصر وحاول فيها بالكلام الحلو ترجع له..لكن لافائدة...
رانية:وش سويت في جيراننا؟
ناصر:ولاشي!
رانية:نعم؟ولاشي؟وش قاعد تنتظر ياروح أمك؟؟
ناصر:الرجال من يوم هالمشكلة مابان!!ويظهر إن بيتهم فاضي!واتصلت عليه مايرد..وش تبيني أسوي فيه؟؟؟
رانية:تبلغ عنه..يجيبونه من تحت الأرض!!ثم نرفع عليه قضية قذف! وجريمة محاولة الشروع في اغتصاب!!!!!
ناصر:الله..كل هذا؟ياحبك للفضايح ياذي البنت!
رانية:خله..يستاهل..أنا اللي يدوس على طرف ثوبي أسففه التراب!!فمابالك باللي سواه هالنذل؟؟ولا إنت كرامة زوجتك وسمعتك مالها قيمة عندك؟؟
ناصر:أجل ماتعرفيني!أنا مخطط بس أشوفه..أجمع عيال الحارة عليه يكفخونه لين يقول بس!!
رانية:لا مرة شاطر إنت!!بياخذ العلقة اليوم وينساها بكرة!أنا أبيه مثل مايعرف يكيد للناس ويسوي لهم فضايح..ينفضح هو وينخرب بيته!!
ناصر:يابنت الحلال تحسبين هالاجراءات سهلة؟؟هذي المسائل يبي لها شهود وجلسات بالمحكمة..ودلائل واثباتات!!ولين تاخذين حقك..مات ناس وانولد ناس!!!
رانية:مالي شغل..أنا مصممة!
ناصر:أقول اتركيك من هالعناد..خلاص المشكلة صارت وانتهت وماحد عَرَف بها إلا أنا وانتي..لازم يعني ربك يستر علينا؟؟ونفضح أنفسنا؟؟
رانية:بس الحقير ذا ينطرد من بيتنا طردة الكلاب!!
ناصر:ومين قال لك إني بأخليه دقيقة في بيتي؟؟أنا بأعلمه شلون يمشي على الصراط!!!
رانية:ومع هذا ياناصر ماني راجعة لك ولو ياطى راسك الثرى!!!
وقفلت السماعة...
ناصر(بينه وبين نفسه):ماتوقعت عنادك بيكون لهالدرجة يارانية..لكن مابأيأس!!
++++وأما مشاري قاعد ينكد على رانية يبيها ترجع لبيتها عشان ياخذ الفلوس اللي ناصر مطمعه فيها!!!
ومرت الأيام....
رانية:شوف يامشاري..لو تسوي فيني اللي تسويه..طلعة من بيتكم موب طالعة..وقاعدة على قلوبكم لين تموتون فلا تتعب نفسك بتطفيشي!!!
مشاري:وأنا يئست منك وسلَّمت القلعة!!والفلوس اللي بآخذهم من زوجك ماعَدت أبيها!!
رانية:آهاااا..يعني هو مطمعك بفلوس.عشان يردني؟؟؟
مشاري:ايه نعم!
رانية:كذا ياناصر!!أجل بتطول قعدتي هنا أكثر!!!
=========
توسط ناصر بتركي يرسل زوجته أو أحد من أخواته يراضون رانية لكن من غير فائدة!!خابت محاولاتهم
وكانت رانية تقول:جيتكم عزيزة وغالية..لكن مشاكلي مع زوجي نحلها بيننا وبين بعض!!
اضطر ناصر إنه يستعين بعبدالرحمن بعد مافشلت كل المحاولات.. لعلمه بمحبة رانية لاسمهان...
وتكلم عبدالرحمن مع اسمهان وقال لها:شكل صديقتك هذي عنيدة..وحاولوا الكثير يتوسطون وماعطتهم وجه..لذلك أطمح وأتوسم فيك الخير إنك تردينها لصوابها ولامانع إنها تقول شروطها بس تكون عقلانية..مو معقول تاركة زوجها يبهذل نفسه ويتوسط بالناس عشانها... ولااستنتجت لين الحين إن كل هذا من زود غلاتها عنده!!!
اسمهان:يارب يهديها..ياما كلمتها بس إذن من طين وإذن من عجين!
عبدالرحمن:تذكري يااسمهان..إن الكذب حرام..بس جائز في الصلح بين طرفين!!واستخدمي ذكائك!
اسمهان:إبشر!
ووداها لرانية.....
وبعد السواليف بين الثنتين...
اسمهان:اسمعي يارانية..أنا بأقول لك كلام عرفته عن طريق زوجي..وإنتي حرة في اختيارك!!
رانية:خير؟؟بيطلقني ناصر؟؟
العبي غيرها!!
اسمهان:لا..بس يقول زوجي إن كثير من الناس حوله لما دروا إنكم متهاوشين قاموا يعرضون عليه الزواج ببناتهم وبأقل المهور!!
رانية:ليش؟خلصوا الرِجال من الديرة؟؟
اسمهان:بيني وبينك..زوجك مافيه شي يتعيب..بس انتي ظالمته!
رانية:وعساه وافق؟؟
اسمهان:لا يقول عبدالرحمن إنه كان يصد عن الناس اللي يفتحون له هالموضوع..بس مع الوقت لما فشلت محاولاته في رجعتك كأن راسه بدأ يلين وصار يقول ماأقدر أتحمل الحياة من غير زوجة!
رانية:أحسن..خل يعرف قيمتي!
اسمهان:ايه بس يارانية هو محتار..يقول إنه حاط مبلغ يبي يراضيك فيه ومتورط..يقول بأحاول في زوجتي محاولة أخيرة..إن مارضت تاخذه وترجع فأنا ماعندي مانع أحطه كمهر لبنت أول واحد عرض علي بنته!!!
رانية:لا لا تقولين!!
اسمهان(بثقة):هذا اللي صار!وإنتي براحتك ماحد يقدر يجبرك ترجعين..بس مثل ماتعرفين ناصر مايقدر يفتح بيتين يقول لو خطبت وحدة ثانية فالله يعين بأضحي برانية وأخليها ببيت أهلها..لأني ماأقدر أجبرها تحبني وهي ماتبيني!!
رانية:لا والله أحبه وأعشقه بعد!قصير النظر هذا!!شلون يقول ماأحبه شلون؟؟
اسمهان:وبالله فيه وحدة بالدنيا تحب زوجها وتفشله قدام الناس؟تبي ترجع له وماتبي.شلون تجتمع هذي؟؟
رانية:ياالله يااسمهان!!كلامك غربلني!وخبص كل حساباتي!
اسمهان:بكيفك..بس تخيلي زوجك يعيش مع وحدة غيرك؟
تخيلي تصيرين مطلقة وماحد يتزوجك بعده ولايسأل فيك؟؟
البنات الأبكار تارسات البيوت وماحد طالع فيهم..بيجون يطالعون فيك إنتي؟؟
تخيلي الكلام اللي بيطلع عليك بعدين؟أكيد لو طلقك ناصر الناس بيقولون عشان سُمعتها موب زينة وبيصدقون اللي صار!!
رانية:الله يقطع ابليسك يااسمهان..لاتطرين قدامي طاري الطلاق...وهو حضرته ماصدق؟كلها 16 يوم اللي قعدتها عند أهلي وبدأ راسه يلين لزوجة ثانية؟؟أجل لو قعدت عندهم وأنا نفاس شهر؟؟وش بيسوي؟؟
اسمهان:ماشاء الله إنتي حامل؟
رانية:أقول انطمي..أنا أقول مثلاً يعني..
اسمهان:ايييييه حسبت!!المهم ماينلام مسكين صبر عليك واجد وعطاك بدل الفرصة ألف وانتي راسك متحجر!متى بيلين أبي أفهم؟
رانية:زين..إش أسوي؟شوري علي؟؟
اسمهان:إنتي مو قلتي لي قبل كذا إنه أرسل لك شنطة إيدك حقت الخرجة مع مشاري؟؟
رانية:ايه..وش دخل هذا بالموضوع؟؟
اسمهان:اسمعي بس..والشنطة هذي كان بداخلها نسخة من مفاتيح البيت؟؟
رانية:ايه..صح!
اسمهان:أنا أقول تلمين الموضوع من غير وجع راس وتخلينها بينكم وبين بعض..وترجعين من غير مايدري للبيت وتستقبلينه أحسن استقبال!!وهقوتي إنه مابيقصر معاك!!
رانية:خِبلة إنتي يابنت؟؟ولا شكلك كذا؟؟هالحين بعد كل الجهاد والعناد اللي سويته؟أرخِص نفسي بلحظة؟؟لاماجبتيها صح يابنت سعيد!!!
اسمهان:أجل انطمي وسِفي تراب ببيت أهلك!!الرجال شاريك لآخر لحظة وبيعطيك فرصة وحدة وبعدها بيبيعك ويروح لغيرك!!وساعتها اقعدي غني(خسارة خسارة)!!!!
رانية:ياربييييي..طيب مافي حل ثاني؟؟؟
اسمهان:ارسلي له مسج حلو..لو من نكتك الماصخة!أكيد بيفرح لاعبرتيه..واتركي الباقي عليه!بس بشرط مو يجيك لين البيت وتحجرين راسك وتتشرطين!ترى الرجال معزِم إنها آخر فرصة وبيقطك ورا ظهره لو مارضيتي!!!وانتي الخسرانة!هو بيشوف حياته مع وحدة ثانية تبسطه وانتي بتقعدين بين أربع جدران تكتبين همومك ومشاكلك بالمنتديات ويغثونك بردودهم!!!غير إن أهلك بيحسونك عالة عليهم ويعلُّون قلبك على كل صغيرة وكبيرة!!
رانية:مدري اش أقول لك..بأحاول أمسك لساني!
اسمهان:و خيطي فمك لو تقدرين يكون أحسن!!
المهم بعد طول نقاش خرجت اسمهان من عند رانية وهي توعدها خير..
==========
طبعاً بالأيام الماضية حقت الامتحانات اتصلت رانية بروابي بعد مارجع لها جوالها وحكت لها عن السالفة..
روابي:زين إنك قلت لي وأنا ببيت أهلي..عشان ماأرجع له هالكلب!
وبالفعل قعدت روابي عند أهلها..وفيصل خاف يرجع للبيت ويشوفه ناصر..فانتظر يوم ..داوم فيه ناصر الصباح وراح فيصل للبيت..بس ناصر كان ذكي وموصي حراس العماير اللي جنبهم إنهم لو شافوه يمسكونه!
وبالفعل أول مالمحوه مسكوه..لين جاء ناصر من العمل...وكفخوه تكفيخ على مستوى..لين اعترف بغلطته..
وقال له ناصر:قدامك حل من اثنين..ياأخذك لأقرب قسم شرطة يجلدونك جلد يصلخ جلدك ويحبسونك..وأجيب عليك شهود؟؟؟أو تعوضني هالحين بمبلغ يبرد القلب وتطلع برة بيتي؟؟
فيصل(وهو مخترع):لا لا كل شي ولاالفضايح الله يستر عليك..بأعطيك 150 ألف تاخذهم؟
ناصر:لا..زيده شوي!
فيصل:خذ 170 ألف والله هي كل اللي حيلتي..
ناصر:موافق..
وفعلاً سدد فيصل المبلغ لناصر وخذاه ناصر ولاقال لرانية شي!!
بعدين تعرفون ليش!!!​

 

[ام مها]

انتى تنزلين القصه فى منتدى الفراشه